ẸMO Akpọ Ọsosuọ nọ o du lahwe evaọ ukpe 1914 u ru nọ akpọ-soso ọ rọ riẹ nọ Emọ-Uwuhrẹ Ebaibol a re fi ẹmo ho. (Aiz. 2:2-4; Jọn 18:36; Ẹf. 6:12) Ẹvẹ o jọ kẹ idibo Ọghẹnẹ evaọ obọ Britain?

Evaọ ukpe 1916 egọmeti Britain o fi uzi họ inọ ọzae kpobi nọ ọ rrọ umuọ ikpe ikpegberee rite udhuvẹ nọ ọ re rọo ho, o re kpohọ ẹmo-ofio. Rekọ uzi na o ta nọ ahwo nọ a se inọ a re fi ẹmo ho fiki “egagọ hayo obroziẹ iroro rai,” a rẹ kẹ ae uvẹ. Egọmeti na ọ tẹ jẹ rehọ ogbẹgwae jọ mu nọ o rẹ jiroro oghẹrẹ ohwo nọ a rẹ kẹ uvẹ gbe oghẹrẹ uvẹ nọ a rẹ kẹe.

Dede na, a mu Emọ-Uwuhrẹ Ebaibol nọ i bu te udhuvẹ fihọ uwou-odi jẹ gba eree họ kpohọ ẹmo evaọ obọ France. Fiki okienyẹ nana, inievo nọ e rrọ Britain a te kere ileta gbe obe-ayare nọ inievo idu isoi gbe egba isoi (5,500) a whobọ họ se Herbert Asquith nọ ọ jọ osu orẹwho na.

Usi u te do ze nọ, a gwọlọ sa inievo-emezae eree nọ a wọ kpobọ France na kpe keme a rọwo nọ a re fi ẹmo ho. Rekọ epanọ a ro dhe inievo na họ uhie be te sa kpe na, a te nwene iroro inọ jọ a tube fi ai họ uwou-odi ikpikpe. A te zihe ai kpobọ England re a jọ obe fi ai họ uwou-odi.

Nọ ẹmo na ọ gbẹ r’otọ na, a te mu ezae nọ e rọo no họ ẹgbahọ kpohọ ẹmo. Henry Hudson nọ ọ rrọ edọkita, ọ tẹ jọ rrọ omọvo Emọ-Uwuhrẹ Ebaibol, yọ ọ rrọ ọzae uwou-orọo o fi ẹme na họ okọto obọ Manchester evaọ England. Evaọ August 3, 1916, okọto na u te bruoziẹ kpei, a te hoi, kẹsena a te siobọnoi kẹ isoja. Ẹdhọ ọfa ọ jọ okọto re evaọ Edinburgh, obọ Scotland. A jọ ẹdhọ nana brukẹ James Frederick Scott, ọgbaẹmo-aro oke-kpobi nọ ọ jọ ikpe udhegbisoi. Otu egọmeti a wariẹ tu ẹdhọ na, rekọ a te nwene iroro fiki ẹdhọ otiọye ọfa nọ a gwọlọ gu evaọ obọ London. A jọ ẹdhọ ọfa nana brukpe Herbert Kipps, nọ ọ rrọ omọvo Emọ-Uwuhrẹ Ebaibol re, a te hoi, kẹsena a te siobọnoi kẹ isoja.

Evaọ September 1916, Emọ-Uwuhrẹ Ebaibol egba ivẹ gbe ikpe ezeza gbe ene (264) a te fi odẹ h’otọ re a si ai no iruẹru ẹmo-ofio. A kẹ isoi uvẹ evaọ usu rai, jẹ rọ iruo egọmeti egaga kẹ udhuhrẹ gbe ikpegbene (154), a kẹ udhegbesa iruo nọ a re ro fi obọ họ kẹ elakpa-ẹmo, kẹsena a tẹ rọ udhone gbivẹ kẹ isoja, a tu ejọ kpohọ okọto isoja kẹsena a te fi enana họ uwou-odi isoja. Ahwo buobu a tẹ jẹ ta nọ  oware nana nọ egọmeti o bi ru ahwo na o gahrọ, u te ru nọ egọmeti o ro si ai no uwou-odi isoja fihọ uwou-odi ahwo gheghe.

Edgar Clay avọ Pryce Hughes nọ e jọ usu inievo nọ e jẹ rẹrote iruo uwou ogha obọ Britain uwhremu na, a je ru iruo ame-obrudhe nọ egọmeti ọ kẹ rai oke yena evaọ obọ Wales. Rekọ evaọ oke yena, a fi Herbert Senior nọ ọ rrọ usu inievo eree nọ a zihe no obọ France ze họ uwou-odi ọ Wakefield evaọ obọ Yorkshire. A fi efa họ uwou-odi ọ Dartmoor nọ oja o rẹ jọ re ohwo gaga, uwou-odi nana a fi Emọ-Uwuhrẹ Ebaibol buobu fihọ.

Ọmọ-Uwuhrẹ Ebaibol nọ a re se Frank Platt nọ ọ rọwo nọ o re ru iruo obufihọ kẹ isoja, a kẹ riẹ uye gaga fikinọ ọ se inọ o re kpohọ aro-ẹmo ho. Atkinson Padgett nọ o fi odẹ h’otọ kẹ ẹmo-ofio no taure o te ti wuhrẹ uzẹme na, isoja i gboja kẹe gaga fikinọ ọ se uwhremu na nọ o re kpohọ ẹmo-ofio ho.

Dede nọ inievo mai buobu evaọ oke yena a nwani wo otoriẹ oware nọ u dhesẹ vevẹ re a seomaba-edhehọ ẹmo ho, a jẹ daoma ru eva were Jihova. Ahwo nọ ma fodẹ evaọ ikuigbe nana a fi emamọ oriruo h’otọ, orọ seomaba-edhehọ ẹmo evaọ etoke “ukpokpoma” ogaga. (Evia. 3:10)—Iruẹru Mai erọ Oke nọ U Kpemu evaọ Britain.