ONANA yọ ojọ evaọ usu eme nọ ọsẹ mẹ nọ o wo omaurokpotọ, nọ o re ru iruo gaga na ọ jẹ hae ta okenọ mẹ gbẹ jọ ọmaha. Okienyẹ ọ rẹ dhae eva gaga, fikiere nọ ọ nwani yo usiuwoma Ebaibol na, o te dede ovuẹ na rehọ evaọ ukpe 1953. No umuo oke yena vrẹ, ọ tẹ jẹ dawo ẹgba riẹ kpobi re ọ ruẹ nọ o wuhrẹ omai emọ riẹ eware nọ ọyomariẹ o je wuhrẹ no Ebaibol ze. Evaọ oke ọsosuọ, o jẹ ruọ oni mẹ oma ha re ọ siọ iwuhrẹ egagọ Kathọlik riẹ. Rekọ nọ oke o be nya haro na, o te mu Ebaibol na họ ewuhrẹ.

O jọ bẹbẹ re ọsẹgboni mẹ a wuhrẹ omai, keme oni mẹ ọ riẹ obe tere he yọ ọsẹ mẹ ọ jẹ hai ru iruo oke na kpobi evaọ obọ ẹwọ. Ẹsejọ fikinọ oma o rrọ riẹ no, owezẹ o jẹ hai goi nọ o te bi wuhrẹ omai. Rekọ omodawọ riẹ o wha irere ze. Mẹ họ ọmọ ọkpako, fikiere mẹ jẹ hai wuhrẹ oniọvo-ọmọtẹ gbe inievo-emezae ivẹ mẹ. Uyoyou nọ Noa o wo kẹ uviuwou riẹ, onọ u dhesẹ oma via evaọ ẹmeoyo riẹ kẹ Ọghẹnẹ nọ ọsẹ mẹ ọ jẹ hae ta kpahe ẹsikpobi na, o jọ usu eware nọ mẹ jẹ hai ro wuhrẹ inievo mẹ. Ikuigbe Ebaibol nana e jẹ hae were omẹ gaga. U kri hi, mai kpobi ma te mu iwuhrẹ họ ẹnya evaọ obọ Ọgwa Uvie evaọ Roseto degli Abruzzi, ẹwho jọ nọ ọ rrọ ofẹ unueri Adriatic evaọ obọ Itali.

Nọ mẹ jọ ikpe ikpegbọvo evaọ ukpe 1955, mẹ avọ oni mẹ ma nya ẹkwotọ igbehru vrẹ kpohọ okokohọ ọsosuọ mai evaọ obọ Rom. No umuo oke yena vrẹ, me rri ikokohọ nọ a rẹ nya wọhọ abọjọ uzuazọ Oleleikristi nọ o mai woma kpaobọ.

Ukpe nọ u lele i rie mẹ tẹ họ-ame, kẹsena mẹ tẹ ruọ iruo ọkobaro oke-kpobi na ababọ oke oraha. Nọ mẹ kpako te ikpe ikpegbihrẹ no, me te mu iruo ọkobaro obọdẹ họ evaọ ẹwho Latina nọ ọ rrọ ofẹ obọze ovatha-ọre Rom, onọ o rehọ emaele udhuzii gbikpe (190) thabọ no oria mai. Evaọ ẹwho nana, ohwo ọvo ọ rẹ daezọ oware nọ ọrivẹ riẹ o bi ru hu. Eva e jẹ were omẹ avọ ibe ọkobaro mẹ gaga fiki ebe buobu nọ ma je fihọ ada, rekọ fikinọ ma gbẹ dina maha, obọ uwou o je si omai urru. Ghele na, mẹ gwọlọ nya lele ọkpọvio kpobi nọ a kẹ omẹ.

Uwhremu na, a te dhe omẹ kpohọ ẹwho Milan re me fi obọ họ ru ọruẹrẹfihotọ ọrọ okokohọ akpọ-soso nọ uzoẹme  riẹ o ta nọ “Usiuwoma Ebẹdẹ Bẹdẹ,” onọ a ru evaọ ukpe 1963. Evaọ etoke okokohọ na mẹ fialoma via kuomagbe inievo efa buobu je ru iruo, ọjọ rai họ Paolo Piccioli, oniọvo-ọmọzae nọ o no obọ Florence ze. Evaọ ẹdẹ avivẹ okokohọ na, oniọvo nana o ru ẹme ọjaja jọ kpahe uzuazọ seba ẹrọo. Mẹ jọ eva mẹ ta nọ, ‘oniọvo nana o ti wo aye vievie he.’ Rekọ, u kri hi ma te je he kere ileta se ohwohwo, yọ eware nọ ma je kere i dhesẹ nọ ma wo itee evona, uyoyou kẹ Jihova, gbe isiuru nọ ma gwọlọ ro ru oreva riẹ. Evaọ ukpe 1965, mẹ avọ Paolo Piccioli ma tẹ rọo.

Me ru iruo ọkobaro oke-kpobi ikpikpe evaọ Florence. Ẹvi nọ ọ jọ ukoko na o jẹ kẹ omẹ evawere gaga, maero kọ ẹnyaharo emaha na. Mẹ avọ ọzae mẹ, Paolo ma jẹ hai lele ae ta ẹme kpahe iruẹru ukoko na, jẹ hae zaharo kugbe ai, yọ obọro Paolo ọ rẹ mai lele ae fa. Evaọ uzẹme, mẹ rẹ gwọlọ jọ kugbe ọzae mẹ ẹsikpobi, rekọ me muẹrohọ nọ emọ yena gbe ahwo iviuwou sa-sa evaọ ukoko na a rẹ gwọlọ jọ kugbei gaga re fiki isiuru nọ o wo kẹ ae.

Eva e rẹ were omẹ gaga nọ me te roro te ahwo buobu nọ ma wuhrẹ Ebaibol kugbe no. Omọvo rai jọ họ Adriana, ọnọ ọ ta kẹ ahwo iviuwou ivẹ jọ kpahe eware nọ o je wuhrẹ. A te ru ọruẹrẹfihotọ re a lele olorida-ichọche jọ ta ẹme kpahe uwuhrẹ Esanerọvo gbe ẹwẹ nọ o re whu hu. Ibishọpo esa i kuomagbe ai. Ahwo nana nọ ma je wuhrẹ Ebaibol na a ruẹ vuhumu nọ eme nọ ibishọpo na a jẹ ta e wọso ohwohwo yọ e rrọ whaliẹ whaliẹ, u te no ere no, e rọwokugbe iwuhrẹ ivevẹ nọ e rrọ Ebaibol na ha. Ẹmeọta-kugbe yena o wha erere ologbo ze. U ru nọ ahwo nọ a bu te ikpegbisoi a ro kurẹriẹ evaọ iviuwou ivẹ yena uwhremu na.

Uzẹme, oghẹrẹ nọ ma be rọ ta usiuwoma enẹna u wo ohẹriẹ no epanọ o jọ vẹre. Evaọ oke yena, Paolo o wo onaa gaga nọ o re ro lele ilorida-ichọche ta ẹme nọ o te zere ai, yọ ọ jẹ hai nya ku ai gaga. Mẹ kareghẹhọ ojọ nọ o ro lele ilorida-ichọche ta ẹme evaọ iraro ogbotu jọ. Oghẹrẹ enọ nọ a jẹ nọ o kẹ imuẹro nọ ewegrẹ a ru ọruẹrẹfihotọ re a nọ omai enọ nọ a roro nọ ma te sae za ha. Rekọ ẹkẹre o kurẹriẹ. Ọjọ evaọ usu rai ọ tẹ nọ sọ u fo re ahwo ichọche a duomahọ isuẹsu wọhọ epanọ a bi ru anwọ ikpe buobu ze na. Nọ a be kẹ uyo onọ nana, oma o tẹ jẹ rroro ilorida-ichọche na. Ẹsiẹvo na ikpẹ i te fu, ẹkeria na ọ tẹ rọ ere fa. Evaọ ikpe jọ nọ i lele i rie, ma te yo nọ ilorida-ichọche na a ru ọruẹrẹfihotọ re a furie ikpẹ na otẹrọnọ ẹmeọta na ọ gbẹ nya epanọ a gwọlọ họ.

Nọ mẹ avọ Paolo ma gba ikpikpe no evaọ orọo mai, a te zizie omai kpohọ iruo ọsẹro ọnyawariẹ. Rekọ o dina jọ bẹbẹ re ma jẹ uzizie na rehọ keme  Paolo ọ jọ iruo nọ ma je jo wo ugho ziezi. Dede na, nọ ma lẹ kpahe onana unuẹse buobu no, ma tẹ jẹ uvẹ iruo na rehọ. O jẹ hae jọ oware omawere gaga nọ ma tẹ rrọ kugbe uviuwou nọ ma kpahe iwou rai evaọ etoke iweze mai. Evaọ owọwọ, ma re ru uwuhrẹ kugbe ahwo uviuwou na, kẹsena Paolo o ve fi obọ họ kẹ emaha na ru iruo isukulu rai nọ a wha ziọ obọ uwou, maero nọ e tẹ rrọ esọmo. U te no ere no, Paolo ọ jẹ hai se obe gaga, yọ ọ jẹ hai gbiku eware ọbọga nọ o se ku. Evaọ ẹdẹ-ọvo oka, ma rẹ nyae ta usiuwoma evaọ ewho nọ Isẹri Jihova e rrọ họ, ma ve je zizie ahwo kẹ ovuẹ nọ a te kẹ owọwọ yena.

Nọ ma ru iruo ọsẹro ọnyawariẹ te ikpe ivẹ no, a te zizie omai kpohọ uwou ogha nọ o rrọ obọ Rom. Paolo ọ jọ kugbe ẹko iruo uzi, mẹ kọ ofẹ iruo nọ a rẹ jọ rẹrote emagazini nọ a bi vi kpohọ otafe. O jọ lọlọhọ k’omai hi re ma ru inwene nọ o gwọlọ, rekọ ma gba riẹ mu nọ ma re ru onọ ukoko o vuẹ omai kpobi. O jọ oware omawere k’omai gaga nọ ma ruẹ ẹnyaharo nọ ọ jẹ romavia evaọ uwou ogha na, gbe ahwo nọ i je kurẹriẹ ziọ ukoko na evaọ ẹkwotọ Itali. Oke yena Isẹri Jihova evaọ Itali a ro wo ebe-uzi jọ nọ i wuzou gaga mi egọmeti. Iruo Ebẹtẹle nọ ma jọ na e were omai gaga.

Nọ ma jọ Ebẹtẹle, ẹme kpahe azẹ nọ Isẹri Jihova a re se fihọ oma ha na o duoma lahwe evaọ Itali. Evaọ emuhọ ikpe 1980, ẹdhọ jọ ọ jọ okọto kpahe ẹme nana. A wọ eku họ ọzae-avọ-aye jọ nọ a rrọ Isẹri Jihova uzou inọ a kpe ọmọtẹ rai, dede nọ oghẹrẹ ekpehre ẹyao-azẹ jọ nọ emọ buobu a wo evaọ obọ Mediterenia o kpe rie. Inievo buobu nọ e jọ Ebẹtẹle a je fi obọ họ kẹ elọya nọ i dikihẹ kẹ ọsẹgboni na evaọ ẹdhọ na. Ukoko na o rọ omobe ovẹvẹ gbe uvitha obọdẹ Awake! ro fi obọ họ kẹ ahwo riẹ kpahe uzẹme ẹme na gbe oware nọ Ebaibol ọ ta kpahe azẹ. Paolo o je ru iruo euwa ikpegbezeza kẹdẹ kẹdẹ evaọ etoke nọ ẹme na ọ jọ otọ na. Yọ mẹ jẹ dao ẹgba mẹ kpobi ruẹ nọ me fi obọ họ kẹe.

Nọ ma te ikpe udhe no evaọ orọo, oware nọ ma rẹro riẹ hẹ o tẹ via. Mẹ jọ ikpe udhuvẹ gbe ọvo, yọ ọzae mẹ ọ rrọ ikpe udhuvẹ gbe izii nọ mẹ rọ vuẹe nọ o wọhọ nọ me dihọ. Mẹ tẹ jọ omobe nọ ọzae mẹ o re kere eware fihọ ruẹ ẹme nana nọ o kere ẹdẹ yena inọ: “Olẹ: O tẹ ginẹ rrọ uzẹme inọ aye mẹ o dihọ, ivie Ọghẹnẹ fi obọ họ k’omai daji iruo odibọgba oke-kpobi, ruabọhọ egagọ ra, re ma jẹ jọ eyewọ nọ i re fi emamọ oriruo h’otọ kẹ ọmọ. Onọ o mae rro, fi obọ họ k’omẹ re o tẹ kawo me fi abọjọ eware nọ mẹ be ta evaọ eplatfọmo anwọ ikpe ọgba nọ e vrẹ na h’iruo.” Mẹ rẹ sae ta nọ Jihova ọ kuyo olẹ ọzae mẹ na gbe olẹ mẹ nọ ma te roro kpahe eware nọ ma bi ru enẹna.

 Enwene ologbo ọ romavia nọ ma yẹ ọmọtẹ mai Ilaria no. Evaọ uzẹme, udu u re whrehe omai ẹsejọ, wọhọ epanọ obe Itẹ 24:10 o ta inọ: “Otẹrọnọ udu u no owhẹ awọ oke uye, yọ ogaga ra utuloho.” Rekọ ma jẹ hae rọ uketha kẹ ohwohwo, keme ma riẹ epanọ onana u wuzou te.

Ilaria ọ ta nọ eva e were riẹ gaga inọ ọzae-avọ-aye nọ a roma kẹ iruo odibọgba oke-kpobi a yẹ riẹ. Ma gbabọ kẹe oke ovo ho; ma rẹrote ei ziezi. Mẹ jẹ hae jọ kugbei ẹsikpobi evaọ okpẹdoke. Evaọ owọwọ nọ ọzae mẹ o te no iruo ze no, ọ rẹ jọ kugbe Ilaria, lele iei zaharo, je fi obọ họ kẹe ru iruo nọ a kẹ riẹ no obọ isukulu ze, dede nọ eware e vọ ọzae mẹ obọ nọ o ti ru. O re ru onana kpobi kugbe Ilaria, dede nọ u re te ighọjọ ivẹ hayo esa evaọ aso taure o te ti ru iruo obọriẹ re. Ilaria ọ rẹ ta ẹsikpobi nọ, “Ọsẹ mẹ họ ogbẹnyusu ọkpekpe mẹ.”

Whọ sae ruẹ nọ re ma fi obọ họ kẹe dikihẹ ga evaọ edhere uzẹme na, o gwọlọ nọ ma re fi ẹro họ iẹe n’oke t’oke, ẹsejọ dede o jẹ hae gwọlọ nọ ma si ei ozọ. Mẹ kareghẹhọ ẹdẹjọ nọ o ru ogbẹnyusu riẹ ekpehre oware jọ nọ a jẹ zaharo. Ma dhesẹ kẹe no Ebaibol ze nọ oware nọ o ru na o thọ. Ma tẹ jẹ ta kẹe nọ o wou unu kẹ ogbẹnyusu riẹ evaọ iraro mai.

Ilaria ọ rẹ ta ẹsikpobi nọ uyoyou nọ ọsẹgboni riẹ a wo kẹ iruo usiuwoma na o were riẹ gaga. Enẹna nọ o wo ọzae no na ọ be mae ruẹ epanọ u wuzou te re a yoẹme kẹ Jihova je lele ọkpọvio riẹ.

Evaọ ukpe 2008, Paolo ọ tẹ riẹ nọ o wo ẹyao-ọta. Oke ọsosuọ, ma roro nọ ẹyao na o ti kpo, yọ Paolo ọ jẹ ta udu họ omẹ awọ gaga. U te no oghẹrẹ usiwo-imu nọ o mai woma nọ ma jẹ gwọlọ no, mẹ avọ ọmọtẹ mai Ilaria, ma jẹ hae lẹ se Jihova re o fi obọ họ kẹ omai thihakọ oware nọ u ti noi ze kpobi evaọ obaro. Ghele na, evaọ iraro obọmẹ na, ẹyao ọ be rọ ẹmẹrera mi ọzae ọgaga mẹ na ẹgba kpobi no. Evaọ ukpe 2010, ọzae mẹ o te whu. Rekọ o be kẹ omẹ uduotahawọ gaga nọ me te roro te eware nọ mẹ avọ ọzae mẹ ma ru kugbe evaọ ikpe udhuvẹ gbe isoi nọ ma jọ kugbe na. Ma rọ eva kpobi gọ Jihova. Mẹ riẹ nọ iruo mai e te thọrọ Jihova ẹro ho. Yọ me bi rẹro okenọ Paolo ọ te rọ kparoma no uwhu ze, wọhọ epanọ Jesu ọ ta evaọ obe Jọn 5:28, 29.

Evaọ iroro, mẹ gbẹ rrọ ọmọtẹ ọsese ẹdẹ nọ iku Noa e jẹ hae were gaga na. Ọtamuo mẹ o ri nwene he. Mẹ gwọlọ yoẹme kẹ Jihova, ghelọ oware nọ o rẹ rehọ mi omẹ kpobi kẹhẹ. U muẹro nọ, ebẹbẹ nọ i re te ohwo kpobi, eware nọ ohwo ọ nya seba, hayo nọ i vru mi ohwo i te oware ovo ho nọ a tẹ rehọ ae wawo eghale Ọghẹnẹ. Onana o via k’omẹ no, mẹ rẹ sae vuẹ owhẹ avọ imuẹro kpobi inọ oware ovuovo o rrọ họ nọ a sae rọ wawo eghale Ọghẹnẹ.