Udu o be dina bru Angela, * oniọvo-ọmọtẹ nọ o rri wo ọzae he nọ ọ rrọ ikpe ọgba-gbọ. Ọ be hẹrẹ ekpako na. Eme a te ta kẹe? Evaọ uzẹme anwọ okejọ ze na ọ re ziọ ewuhrẹ hẹ, yọ ẹdẹ ọnana oma o rrọ riẹ no fiki iruo riẹ, orọ ẹruorote ekpako soso nọ o ru evaọ okpẹdoke yena. U te no awa-ọruọ kpahe iruo okpẹdẹ riẹ no, o bi roro kpahe oni riẹ nọ oma o ga ha yọ onana o be kẹe idhọvẹ gaga.

Otẹrọnọ whẹ họ ọkpako nọ o ti lele Angela ta ẹme, ẹvẹ whọ te sae rọ kẹ “owhrori” nana nọ udu u bi whrehe na uduotahawọ? (Jeri. 31:25) Orọ ọsosuọ, ẹvẹ whọ sae rọ ruẹrẹ oma kpahe re iweze na e sae kẹe omosasọ?

Ẹsejọ, oma o rẹ sae rrọ omai fiki iruo obọmai hayo iruo sa-sa nọ ma bi ru evaọ ukoko na. Wọhọ oriruo, nọ a dhesẹ eruẹaruẹ jọ kẹ Daniẹl yọ o wo otoriẹ rai hi, eware ‘i dhe rie ọvẹ.’ (Dan. 8:27) Nọ ukọ-odhiwu na, Gebriẹl ọ romavia kẹe, o wo omosasọ. Ukọ-odhiwu na ọ fa otọ eruẹaruẹ na kẹ Daniẹl, ọ kẹ riẹ imuẹro nọ Ọghẹnẹ ọ kuyo olẹ riẹ no, jẹ ta kẹe nọ Ọghẹnẹ o ‘you rie gaga.’ (Dan. 9:21-23) Evaọ oke ofa, eme uduotahawọ nọ ukọ-odhiwu ọfa ọ ta kẹ Daniẹl e bọ riẹ ga.—Dan. 10:19.

Epọvo na, re ma te ti weze bru oniọvo nọ udu u bi whrehe, u fo nọ ma rehọ  omoke jọ roro kpahe epanọ eware e rrọ kẹe. Ebẹbẹ vẹ o wo? Ẹvẹ ebẹbẹ na i bi ro mi ei ẹgba nọ ọ hai ti ro wabọ evaọ iruẹru ukoko? Emamọ uruemu vẹ o wo? Richard nọ ọ rrọ ọkpako ukoko vrẹ ikpe udhe no ọ ta nọ: “Ofẹ nọ inievo na a be jọ daoma mẹ rẹ tẹrovi.” Ọ ta re nọ: “Fikinọ mẹ rẹ kake romatotọ roro kpahe oghẹrẹ nọ eware e rrọ kẹ oniọvo nọ mẹ gwọlọ weze bru, u re ru ei lọhọ kẹ omẹ nọ mẹ sae rọ kẹe uduotahawọ nọ u fo.” Otẹrọnọ whẹ avọ ọkpako ọfa wha ti gbe kpohọ iweze na, kọ u gbe fo re wha kaki roro kpahe oghẹrẹ nọ eware e rrọ kẹ oniọvo na?

Ẹsejọhọ whọ riẹ nọ o lọhọ họ re ohwo ọ ta kẹ omọfa kpahe epanọ eware e rrọ kẹ ọyomariẹ. Wọhọ oriruo: O sae jọ bẹbẹ kẹ oniọvo re ọ ta eva riẹ kẹ ekpako nọ i weze bru rie. Ẹvẹ ekpako na a sai ro fi obọ họ kẹ ohwo otiọye na ta oware nọ o riẹe eva? Ovao nọ wha re ru ohwohwẹ gbe ẹme ọsasa nọ o re no unu rai ze, e rẹ sai fi obọ họ. Michael nọ ọ rrọ ọkpako ukoko vrẹ ikpe udhuvẹ no, ọ fodẹ eme nọ ọ rẹ kake ta nọ a te kpohọ iweze ekpako inọ: “Whọ ruẹ, uvẹ-ọghọ jọ nọ ekpako na a wo họ, re a weze bru inievo rai evaọ obọ uwou rai, jẹ daoma riẹ ae ziezi. Fikiere u bi si omẹ urru anwẹdẹ re ma nyaze.”

Wha sae rọ olẹ muhọ evaọ etoke iweze na. Pọl ukọ na ọ jẹ hae fodẹ ẹrọwọ, uyoyou, gbe akothiho inievo na evaọ olẹ riẹ. (1 Tẹs. 1:2, 3) Whọ tẹ ta kpahe iruemu iwoma oniọvo na, yọ whọ be rọ ere ruẹrẹ udu ra gbe oriẹ họ kẹ emamọ ẹmeọta-kugbe. Ẹme ra ọ rẹ sae jẹ lẹliẹ udu kie oniọvo na vi. Ọkpako ukoko jọ nọ a re se Ray nọ o wo onaa ziezi ọ ta nọ: “Ẹsejọ ma re muẹrohọ eware iwoma nọ ma be hai ru hu. Fikiere nọ ohwo jọ ọ tẹ kareghẹhọ omai eware nana, u re ru eva were omai.”

Wọhọ Pọl ukọ na, whọ sae kẹ ohwo “okẹ Ẹzi” na ẹkwoma oria Ebaibol nọ who re se kugbei rọ bọe ga. (Rom 1:11) Wọhọ  oriruo, oniọvo-ọmọzae jọ ọ sai roro nọ o gbe fioka ha, wọhọ ọso-ilezi na nọ ọ rehọ omariẹ dhesẹ “oviẹ-udi nọ o rọ eva iwiri.” (Ol. 119:83, 176) Whọ tẹ fa otọ ẹme ọso-ilezi yena kẹe kpẹkpẹe no, whọ sae vuẹ oniọvo na evaifihọ nọ who wo inọ ijaje Ọghẹnẹ e re “thọrọ iẹe” ẹro ho.

Epọvo na, ọtadhesẹ Jesu kpahe aye nọ o wo idọlọ-efuafo nọ ọvo jọ o vru na o sai fi obọ họ kẹ oniọvo-ọmọtẹ nọ ọ siọ iwuhrẹ enya ba no hayo nọ udu u whrehe no. (Luk 15:8-10) Ẹsejọhọ, ovo jọ evaọ usu idọlọ-efuafo nọ a hwe kugbe ro ru ufiare oghaghae jọ u vru ku aye na. Who te lele iei ta ẹme kpahe ọtadhesẹ nana, ẹsejọhọ u ti fi obọ họ kẹe ruẹ nọ ọ rrọ ghaghae evaọ ukoko na. Whọ sai dhesẹ kẹe nọ Jihova ọ be daezọ riẹ gaga nọ ọ rrọ omọvo igodẹ riẹ na.

O rẹ were ibe Ileleikristi mai re a ta ẹme kpahe Ebaibol na. Fikiere kẹ oniọvo na uvẹ re ọ kpahe ẹme re. Nọ who te se oria Ebaibol jọ nọ u kiekpahe uyero oniọvo na no, whọ sae rehọ ẹme jọ noi ze jẹ vuẹe re ọ kpahe fihọ iẹe. Wọhọ oriruo, ọkpako ọ sai se obe 2  Ahwo Kọrint 4:16, kẹsena ọ vẹ nọ oniọvo na nọ, “Kọ who bi muẹrohọ idhere sa-sa nọ Jihova o bi ro ru owhẹ kpokpọ?” Whọ tẹ rọ oghẹrẹ utiona lele oniọvo na ta ẹme, wha sai “wo oma osasọ kugbe.”—Rom 1:12.

O rẹ sae jẹ kẹ ibe Oleleikristi ra omosasọ nọ wha tẹ ta kpahe ohwo jọ evaọ Ebaibol na nọ o wo ọkpọ ẹbẹbẹ riẹ na. Ohwo nọ ọkora ọ rrọ oma ọ sae kareghẹhọ Hana hayo Epafrodaitọs, enọ i wo ọkora ẹsejọ rekọ a gbẹ jọ ghaghae evaọ aro Ọghẹnẹ. (1 Sam. 1:9-11, 20; Fil. 2:25-30) Kọ wha gbe lele oniọvo na ta kpahe iriruo Ebaibol jọ nọ i kiekpahe ẹbẹbẹ nọ ọ rrọ otọ na?

Nọ iweze na e tẹ make vrẹ no, wha rẹ sai dhesẹ nọ wha wo ọdawẹ kẹ ibe Ileleikristi rai nọ wha tẹ be hae nọ ae epanọ eware e rrọ ẹsikpobi. (Iruẹru 15:36) Taure ẹme na o te ti kuhọ evaọ etoke iweze, whọ sai ru ọruẹrẹfihotọ nọ who re ro lele iei kpohọ usiuwoma ota. Nọ ọkpako ukoko jọ nọ o wo onaa ziezi nọ a re se Bernard ọ tẹ wariẹ nyaku oniọvo nọ o weze bru no ẹdẹjọ, ọ rẹ rọ areghẹ nọe kpahe oware jọ nọ ọ ta kẹe nọ o ru inọ, “Kọ oware nọ mẹ ta ẹdẹ na u fi obọ họ kẹ owhẹ?” Whọ tẹ be hai ru enẹ, u ti fi obọ họ kẹ owhẹ riẹ sọ ohwo na ọ gbẹ gwọlọ obufihọ.

O gwọlọ nọ ma rẹ rẹrote, you, je wo otoriẹ inievo mai enẹna vi epaọ anwẹdẹ kpobi. (1 Tẹs. 5:11) Fikiere, taure ekpako a te ti kpohọ iweze ẹruọsa, jọ a romatotọ roro kpahe epanọ eware e rrọ kẹ oniọvo na. Lẹ se Jihova kpahe iẹe. Salọ oria ikere nọ u fo. Whọ te ruẹ ẹme nọ whọ sae rọ kẹ otu nọ udu u bi whrehe omosasọ.