Imuẹro i dhesẹ nọ ikọ-odhiwu a jọ etenẹ ta kpahe na. Imuẹro vẹ?

Owọ avivẹ na o ta nọ: “Nọ emọ Ọghẹnẹ a te ruẹ nọ emetẹ ahwo na a woma gaga; a te mu ọvuọ aye nọ ọ were riẹ họ ẹrehọ.”—Emu. 6:2.

Evaọ Ikereakere Hibru, ẹme na “emọ Ọghẹnẹ” ọ romavia evaọ Emuhọ 6:2, 4; Job 1:6; 2:1; 38:7 gbe Olezi 89:6. Eme eria Ebaibol nana i dhesẹ kpahe “emọ Ọghẹnẹ” nana?

O rrọ vevẹ inọ ikọ-odhiwu nọ i kokohọ aro Jihova họ “emọ Ọghẹnẹ” nọ ma se kpahe evaọ obe Job 1:6 na. Setan nọ ọ jẹ “nya kpemu kparo” evaọ akpọ na ọ jọ usu rai. (Job 1:7; 2:1, 2) Epọvo na, ma jọ obe Job 38:4-7 se kpahe “emọ Ọghẹnẹ” nọ i “do edo oghọghọ” okenọ Ọghẹnẹ o “fi otọhotọ akpọ na họ.” Ma sae ta nọ enana yọ ikọ-odhiwu keme oke nana yọ a re ma ahwo-akpọ họ. U muẹro nọ “enọ e rọ odhiwu kpobi” nọ a fodẹ evaọ Olezi 89:6 na yọ emama Ọghẹnẹ nọ e rrọ obọ odhiwu, orọnikọ ahwo-akpọ họ.

Nọ o rrọ ere na, amono họ “emọ Ọghẹnẹ” nọ a fodẹ evaọ obe Emuhọ 6:2, 4 na? Rọwokugbe eria Ebaibol nọ ma kiẹ riwi evaọ obehru na, ma sae ta nọ oria ikere nana o be ta kpahe ikọ-odhiwu nọ e ziọ otọakpọ.

O rrọ bẹbẹ kẹ ahwo jọ re a rọwo nọ ikọ-odhiwu a rẹ sai wo isiuru owezẹ ọzae-avọ-aye. Ẹme nọ Jesu ọ ta evaọ obe Matiu 22:30 u dhesẹ nọ orọo gbe owezẹ ọzae-avọ-aye o rrọ obọ odhiwu hu. Rekọ evaọ okenọ u kpemu, ikọ-odhiwu a nwene oma zihe ruọ orọ ahwo-akpọ, a je tube lele ahwo re emu jẹ da idi kugbe dede. (Emu. 18:1-8; 19:1-3) Otẹrọnọ ikọ-odhiwu a rẹ sai nwene oma ruọ ahwo-akpọ, lele ahwo-akpọ re emu jẹ da udi, kiyọ a rẹ sai lele eyae wezẹ re.

Ebaibol na ọ kẹ imuẹro nọ ikọ-odhiwu jọ a ru ere. Evaọ obe Jud owọ avọ 6, 7 a rehọ uzioraha ahwo Sọdọm nọ i je bru igbere wawo orọ “ikọ-odhiwu nọ e yọre ọkwa rai hi, rekọ a tẹ nya siọ oria ẹria rai ba.” Ẹko ahwo ivẹ na, ikọ-odhiwu gbe ahwo Sọdọm a je “bru igberedha je fi oma rai họ urusio nọ u fori hi.” Obe 1 Pita 3:19, 20 nọ o ta ọkpọ ẹme ọvona, o fodẹ ikọ-odhiwu nọ e ghẹmeeyo re okenọ o jẹ ta kpahe ahwo “edẹ Noa.” (2 Pita 2:4, 5) Fikiere, ma sae ta nọ eware iyoma evona nọ ikọ-odhiwu nọ e ghẹmeeyo evaọ edẹ Noa a ru na, eye ahwo Sọdọm avọ Gomora a ru re.

Ma rẹ ruẹ nọ onana uzẹme, nọ ma tẹ kareghẹhọ nọ “emọ Ọghẹnẹ” nọ a fodẹ evaọ obe Emuhọ 6:2, 4 na yọ ikọ-odhiwu nọ a nwene oma ruọ ahwo-akpọ je lele eyae wezẹ.

Pita ukọ na ọ ta nọ izi hayo ikọ-odhiwu nana họ, “enọ e kezọ oke ọsosuọ họ, nọ Ọghẹnẹ o thihakọ hẹrẹ eva edẹ Noa.” (1 Pita 3:20) O rrọ vevẹ, Pita ọ jẹ ta kpahe ikọ-odhiwu nọ i kuomagbe Setan wọso Ọghẹnẹ. Jud ọ ta kpahe ikọ-odhiwu nọ “e yọre ọkwa rai hi,” inọ Ọghẹnẹ “ọ rehọ egbregba ebẹdẹ bẹdẹ kare [ae] fihọ eva edidi obiebi bọ ẹdẹ ologbo oziẹobro na.”—Jud 6.

Oghẹrẹ vẹ ikọ-odhiwu a rọ ghẹmeeyo evaọ edẹ Noa? Taure Owhe Ologbo na o te ti ku, ikọ-odhiwu nana a nwene oma ruọ ahwo-akpọ, oware nọ Ọghẹnẹ ọ jiroro riẹ kẹ ae he. (Emu. 6:2, 4) U te no ere no, a je lele eyae wezẹ, onọ o rrọ oware aghọ. Ọghẹnẹ ọ ma ikọ-odhiwu re a lele eyae wezẹ hẹ. (Emu. 5:2) Ọghẹnẹ ọ te raha ikọ-odhiwu nana nọ e ghẹmeeyo na evaọ oke nọ o fihọ. Rekọ wọhọ epanọ Jud ọ ta, obọnana a rrọ “eva edidi obiebi,” koyehọ oghẹrẹ nọ a gbẹ sai ro wo usu ovuovo kugbe Ọghẹnẹ hẹ.

Oke vẹ gbe oghẹrẹ vẹ Jesu ọ rọ vuẹ “izi nọ e rọ uwou-odi” na ovuẹ? Pita o kere nọ onana o via okenọ a kpare Jesu no uwhu ze “eva ẹzi.” (1 Pita 3:18, 19) Muẹrohọ onana re, Pita ọ ta nọ Jesu ọ ‘vuẹ ovuẹ,’ onana u dhesẹ nọ Jesu ọ vuẹ ovuẹ na no taure Pita o te ti kere obe Pita ọsosuọ. Fikiere, o wọhọ nọ okenọ a kpare Jesu no uwhu ze no o ro whowho ovuẹ ọraha nọ o ti te ikọ-odhiwu aghẹmeeyo na. O jọ ovuẹ ẹruore he, rekọ orọ ẹdhoguo ọraha kufiẹ. (Jona 1:1, 2) Jesu o kru ẹrọwọ riẹ jẹ dadamu usu riẹ kugbe Ọghẹnẹ bọo oke uwhu, Ọghẹnẹ ọ tẹ jẹ kpare iẹe no uwhu ze no, onọ u dhesẹ nọ Setan o wo ogaga vi ei hi, fikiere o wo udu nọ ọ sai ro whowho ovuẹ obrukpe otiọye na.—Jọn 14:30; 16:8-11.

Evaọ obaro, Jesu ọ te gba Setan avọ ikọ-odhiwu aghẹmeeyo yena o ve ti gbolo ae fihọ ọgọdọ nọ o wo oba ha na. (Luk 8:30, 31; Evia. 20:1-3) Taure oke yena u te ti te, ikọ-odhiwu nọ e ghẹmeeyo na a rrọ evaọ ebi ọlala, koyehọ oghẹrẹ nọ a gbẹ sae ro wo usu ovuovo kugbe Ọghẹnẹ hẹ. Avro ọ riẹ hẹ, a te raha ae kufiẹ riẹriẹriẹ.—Evia. 20:7-10.