Kọ Whọ Kareghẹhọ?
Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:
Uruemu ogbẹrọwọ vẹ ahwo a wo kpahe Ebaibol na, kọ ẹvẹ u fo nọ Ileleikristi a re rri uruemu yena?
Ahwo a wo uruemu ogbẹrọwọ jọ, inọ a te rovie Ebaibol na idudhe, oria ikere kpobi nọ a ruẹ o rẹ kẹ ai uthubro nọ a gwọlọ oke yena. Ileleikristi a re wo uruemu utiona ha, onọ a re ro rri Ebaibol na wọhọ ẹsenọ o rrọ obe emajiki. Ukpoye a re wuhrẹ Ebaibol na, onọ u re fi obọ họ kẹ ai wo eriariẹ egbagba gbe ọkpọvio Ọghẹnẹ.—12/15, ẹwẹ-obe avọ 3.
Eme “akpọ” nọ ọ te vrẹ na o dikihẹ kẹ?
“Akpọ” nọ ọ te vrẹ na yọ ahwo nọ i bi ru oreva Ọghẹnẹ hẹ nọ e rrọ akpọ na, orọnikọ otọakpọ na dẹe he. (1 Jọn 2:17) Ahwo owoma gbe otọakpọ mai na a te zọ.—1/1, ẹwẹ-obe avọ 5-7.
Dede nọ Ebẹle o whu kri no, ẹvẹ ọ be rọ ta ẹme kẹ omai nẹnẹ? (Hib. 11:4)
Ọ be rọ ẹkwoma ẹrọwọ riẹ ta ẹme kẹ omai. Ma rẹ sae raro kele ẹrọwọ riẹ. Ahwo a gbẹ be ta ẹme kpahe emamọ oriruo nọ o fihotọ nẹnẹ.—1/1, ẹwẹ-obe avọ 12.
Abọ vẹ evaọ uzuazọ u fo nọ ma rẹ jọ yọroma re oware ovo o siọ usu mai ba ẹhẹriẹ no Ọghẹnẹ?
Abọ jọ họ: ofẹ iruo hayo utee nọ ma bi le, arozaha gbe ẹkeriotọ omawere nọ ma salọ, usu kugbe ohwo uviuwou mai nọ a si no ukoko, isiuru kẹ eware ekpokpọ nọ a bi ku ze, awa-ọruọ kpahe omokpokpọ, ugho, oma nọ ohwo o re dhesẹ fiki ẹnyaharo nọ o bi wo evaọ ukoko Ọghẹnẹ.—1/15, ẹwẹ-obe avọ 12-21.
Eme ma rẹ sai wuhrẹ no omaurokpotọ Mosis ze?
Mosis ọ wọ oma kpehru fiki ọkwa riẹ hẹ, ukpoye, ọ rẹroso Ọghẹnẹ, orọnikọ omobọriẹ hẹ. Ma rẹ kuvẹ hẹ re ọkwa hayo eriariẹ nọ ma wo e lẹliẹ omai fu uke hayo wọ oma kpehru; ukpoye ma rẹ rẹroso Jihova. (Itẹ 3:5, 6)—3/1, ẹwẹ-obe avọ 5.
Nọ a ta nọ emọ Izrẹl “a yawo evaọ obọ eva ha,” eme u dhesẹ? (Jeri. 9:26)
A jẹ ghẹmeeyo, yọ o gwọlọ nọ a re si oware nọ u ru eva hayo udu rai rrọ gaga na no, koyehọ iroro hayo isiuru rai nọ e wọso oreva Ọghẹnẹ. (Jeri. 5:23, 24)—3/15, ẹwẹ-obe avọ 9-10.
Eware jọ vẹ e lẹliẹ Jesu wo evawere evaọ uzuazọ?
Jesu ọ rọ oreva Ọghẹnẹ uruo karo evaọ uzuazọ. O you Ọsẹ riẹ gaga, je you ahwo. Ofariẹ, ọ riẹ nọ Ọsẹ riẹ o you rie jẹ be were eva kugbei. Enana họ ugogo eware nọ e rẹ lẹliẹ ohwo wo evawere evaọ uzuazọ.—5/1, ẹwẹ-obe avọ 4-5.
Eme abọ otọakpọ ukoko Jihova o kẹre te?
O kẹre te Ugboma Esuo na, egbẹgwae uwou-ogha, esẹro okogho gbe erọ ubrotọ, ugboma ekpako, ikoko, gbe omomọvo iwhowho-uvie na.—4/15, ẹwẹ-obe avọ 29.
Kọ emọ Izrẹl a jẹ hae kare igbulegbu fihọ ure nọ a tẹ gwọlọ kpe ai?
Ijo. Ahwo erẹwho efa a jẹ hae kare igbulegbu fihọ ure nọ a tẹ gwọlọ kpe ai orọnikọ emọ Izrẹl he. Evaọ oke nọ eware nọ a gbiku rai fihọ ikereakere Hibru na e rọ via, ahwo Izrẹl a jẹ hae kake rọ itho fi orumuomu kpe. (Izerẹ 20:2, 27) Kẹsena a vẹ kare ori riẹ fihọ ehru ure re o jọ ozọ-usio kẹ emọ Izrẹl efa.—5/15, ẹwẹ-obe avọ 13.
