Brẹse whọ ta ẹme yena kẹ omara hayo omọfa no, nọ who je rri emagazini ọkpokpọ nọ o kpozi? U wo ẹjiroro nọ a bi ro fi iwoho nọ a ru onaa fihọ ziezi họ emagazini mai na. I re fi obọ họ kẹ omai roro didi je wuhrẹ omai oware jọ. Iwoho na e rẹ sai wuhrẹ omai eware buobu nọ ma tẹ ruẹrẹ oma kpahe kẹ uwuhrẹ Uwou-Eroro jẹ kuyo evaọ obọ ewuhrẹ.

Wọhọ oriruo, daoma rọ omoke jọ roro kpahe oware nọ o soriẹ nọ a ro fi uwoho nọ o rrọ oria ọsosuọ uzoẹme uwuhrẹ na fihọ etẹe. Eme a be rọ uwoho na dhesẹ? Ẹvẹ u ro wobọ kugbe uzoẹme uwuhrẹ na hayo oria Ebaibol nọ a rehọ uzoẹme uwuhrẹ na no ze? Daoma roro kpahe epanọ iwoho efa nọ e rrọ uzoẹme na i ro wobọ kugbe oware nọ a bi wuhrẹ na gbe epanọ u ro kpomahọ uzuazọ ra.

Oniọvo nọ o bi ru uwuhrẹ Uwou-Eroro Na ọ te gwọlọ nọ inievo na a kpahe ẹme fihọ iwoho na unọjọ utọjọ, re a ta kpahe oghẹrẹ nọ i ro wobọ kugbe oware nọ a bi wuhrẹ na hayo oware nọ a wuhrẹ no ae ze. Ẹsejọ a re kere eme jọ kẹle uwoho na nọ u re si iroro ohwo kpohọ oware nọ a be jọ edhe-ẹme jọ ta. Rekọ ẹsejọ, ọnọ o bi ru uwuhrẹ na ọ rẹ jiroro edhe-ẹme nọ u fo nọ a rẹ jọ ta kpahe iwoho na unọjọ utọjọ. Enẹ ogbotu na a te rọ rehọ ẹkwoma iwoho na wo erere ziezi no oware nọ a bi wuhrẹ no Ebaibol ze.

Oniọvo-ọmọzae jọ ọ ta nọ, “Nọ me te se uzoẹme re no, iwoho na e rẹ wọhọ isugẹ nọ a fihọ ehru ikeki.”