Evaọ ohiohiẹ Edesa-Oka, September 5, 2012, a whowho kẹ ahwo uviuwou Ebẹtẹle United States gbe Canada nọ a rehọ oniọvo ọkpokpọ jọ mu omọvo Ugboma Esuo Isẹri Jihova no. Odẹ oniọvo na họ Mark Sanderson, yọ September 1, 2012 o mu iruo họ wọhọ omọvo Ugboma Esuo na.

Ọsẹgboni Brọda Mark Sanderson yọ Isẹri Jihova, a yẹ riẹ jẹ yọrọ iẹe evaọ San Diego, California, U.S.A., yọ ọ họ-ame evaọ February 9, 1975. O mu iruo ọkobaro họ evaọ September 1, 1983, evaọ ẹwho Saskatchewan obọ Canada. Evaọ December 1990, o nwrotọ no eklase avọ ihrẹ orọ Isukulu Ewuhrẹ Odibọgba (onọ a bi se Isukulu Ebaibol Rọkẹ Inievo-Emezae nọ E re Rọo Ho enẹna) evaọ United States. O mu iruo ọkobaro obọdẹ họ evaọ April 1991 evaọ ẹwho Canada nọ a re se Newfoundland. Nọ o ru iruo ethabọ ọsẹro okogho te oria jọ no, a te ziziei kpohọ Ebẹtẹle obọ Canada evaọ February 1997. Evaọ November 2000, a te dhei kpohọ uwou ogha obọ United States, nọ o te obei ọ kaki ru iruo kugbe Ẹko-Iruo Evuẹ Kpahe Usiwo Obọ Ẹsipito kẹsena o te kuomagbe Ẹko-Iruo Ẹruorote Iruẹru Ikoko.

Evaọ September 2008, Brọda Sanderson o te kpohọ Isukulu Rọkẹ Inievo Ogbẹgwae Uwou Ogha, kẹsena a tẹ rehọ iẹe mu omọvo Ogbẹgwae Uwou-Ogha obọ Philippines. Evaọ September 2010, a tẹ wariẹ ziziei kpobọ United States re ọ jọ ofiobọhọ evaọ ofẹ Ugboma Esuo na nọ o be rẹrote iruẹru usiuwoma ota gbe ikoko.