EBAIBOL na ọ ta nọ: “Riri, emọ gbe ibi uvueyẹ na [yọ] ukuoriọ gbe okẹ nọ u no obọ ỌNOWO ze.” (Ol. 127:3) Agbẹta nọ ọzae-avọ-aye a rẹ rọ ghọghọ gaga nọ aye na o te yẹ na.

Emamọ usi kpobi avọ owha-iruo, yọ ere ọvona o rrọ re nọ a te yẹ ọmọ. Re ọmọ ọ sae rro ze avọ omakpokpọ, o gwọlọ nọ ọ rẹ re emamọ emu ẹsikpobi. Re ọmọ na ọ sai dikihẹ ga evaọ egagọ uzẹme, o gwọlọ nọ esẹgbini a rẹ rọ ẹme Ọghẹnẹ wuhrẹ ọmọ na jẹ kpọe họ nya lele izi Ọghẹnẹ. (Itẹ 1:8) Oke vẹ a re ro mu ewuhrẹ otiọye na họ, kọ eme o kẹre te?

Roro kpahe ohwo orua Dan jọ nọ a re se Manoa nọ ọ jẹ rria Zora evaọ orẹwho Izrẹl oke anwae. Ukọ-odhiwu ọ vuẹ aye Manoa nọ ọ rrọ ọga inọ o ti yẹ ọmọzae. (Ibr. 13:2, 3) Avro ọ riẹ hẹ, eyaa yena i ru eva were Manoa avọ aye riẹ nọ a wo ẹrọwọ na gaga. Dede na, a jẹ ruawa kpahe oware jọ. Fikiere Manoa ọ tẹ lẹ nọ: “O, ỌNOWO, ivie mẹ lẹ owhẹ, jọ ohwo ra nọ who vi bru omai ze na, ọ wariẹ zihe ze re o wuhrẹ omai epanọ ma re ti ru ọmọ nọ a bi ti yẹ na.” (Ibr. 13:8) Manoa avọ aye riẹ a jẹ ruawa kpahe oghẹrẹ nọ a te yọrọ ọmọ na. Avro ọ riẹ hẹ, a rọ izi Ọghẹnẹ wuhrẹ Samsin ọmọzae rai, yọ imuẹro i dhesẹ nọ a ginẹ yọrọ ọmọ na fihọ edhere Ọghẹnẹ. Ebaibol ọ ta nọ: “Ẹzi ỌNOWO o te je mu” Samsin. Onana u ru nọ Samsin o ro ru eware igbunu buobu evaọ okenọ ọ jọ oguẹdhọ evaọ Izrẹl.—Ibr. 13:25; 14:5, 6; 15:14, 15.

Oke vẹ u fo nọ a re ro mu ọmọ họ ewuhrẹ? No “oke emaha ze” oni Timoti nọ a re se Yunisi gbe oni-ologbo riẹ Lọis a rọ rehọ “ikere ẹri na” wuhrẹ Timoti. (2 Tim. 1:5; 3:15) No emọfofa ze a ro mu Timoti Ẹme Ọghẹnẹ họ ewuhrẹ.

U fo nọ esẹgbini nọ e rrọ Ileleikristi a rẹ lẹ Jihova kẹ ọkpọvio jẹ ma omaa ziezi re nọ a te yẹ ọmọ a vẹ sai wuhrẹ iẹe no “oke emaha ze.” Obe Itẹ 21:5 o ta nọ: “[Omaa] omamọ ohwo o rẹ rehọ ọruẹriọ tha.” Taure ọsẹgboni a te ti yẹ ọmọ, o gwọlọ nọ a rẹ ruẹrẹ oma kpahe ziezi. A rẹ sai tube kere eware ọmọ nọ a te dẹ fihotọ. Epọvo na u wuzou nọ a rẹ ma omaa oghẹrẹ nọ a ti ro wuhrẹ ọmọ na ẹme Ọghẹnẹ kpahotọ. Utee esẹgbini o rẹ jọ epanọ a re ro wuhrẹ ọmọ na no emaha ze.

Obe jọ nọ a kere kpahe epanọ a rẹ rọ yọrọ ọmọ no emaha ze o ta nọ: “Nọ a tẹ nwani yẹ ọmọ no, emerae nọ i lele i rie na yọ etoke nọ ẹvori ọmọ na o re ro koko oma họ. Evaọ oke nana, ekwakwa ẹvori na nọ i re fi obọ họ kẹ ohwo wuhrẹ oware i re vi vẹrẹ gaga.” Fikiere u re woma gaga re esẹgbini a rọ oke nana wuhrẹ ọmọ na eware kpahe egagọ Jihova gbe eware efa nọ e rẹ sai fi obọ họ kẹe evaọ uzuazọ.

Oni jọ nọ ọ rrọ ọkobaro oke-kpobi ọ ta kpahe ọmọtẹ riẹ nọ: “Anwọ okenọ ọ rọ jọ amara ọvo mẹ be rọ wha ae lele oma kpohọ usiuwoma ota. Dede nọ ọ jẹ riẹ oware nọ o be via ha, mẹ riẹ nọ usiuwoma nọ mẹ jẹ hae wha ae nya ẹsikpobi na u fi obọ họ kẹe. Nọ ọ kpako te ikpe ivẹ no, ọyọvo ọ jẹ hae rọ omobe-ovẹvẹ kẹ ahwo nọ ma tẹ rrọ usiuwoma.

Ọmọ nọ a re wuhrẹ no emaha ze o rẹ wha emamọ iyẹrẹ ze. Dede na, esẹgbini a riẹ nọ re a rọ ẹme Ọghẹnẹ wuhrẹ ọmọ no emaha ze u wo ise-abọ buobu.

Ọmọfofa o re dhoma mu oria ovo ho, yọ ọ rẹ gwọlọ tẹrovi oware krẹkri hi, onana o rẹ sae jọ use-abọ kẹ esẹgbini. O rrọ ere keme emaha na a gwọlọ riẹ enwenọ oware kpobi nọ o be via wariẹ ae họ. Eme esẹgbini a rẹ sai ru nọ ọmọ rai ọ jẹ riẹ oware nọ a gwọlọ wuhrẹ iẹe?

Muẹrohọ ẹme nọ Ọghẹnẹ ọ rọ ẹkwoma Mosis ta nọ o rrọ Iziewariẹ 6:6, 7, inọ: “Eme nana nọ [me] je kẹ owhai nẹnẹ na e rẹ jọ eva rai; wha rẹ rehọ ae wuhrẹ emọ rai owowa, wha rẹ rehọ ae gbe-iku no wha keria eva iwou rai, no wha be nya eva edhere, gbe okenọ wha kiẹzẹ, gbe okenọ wha rọo ze.” Ẹme na “owowa” u dhesẹ epanọ a re dhe oware ẹwẹwariẹ. Ọmaha ọ wọhọ okakọ oboba nọ o gwọlọ nọ a re ku ame ku ẹsikpobi. Nọ o rọnọ oware nọ a re dhe ẹwẹwariẹ u re fi obọ họ kẹ ọkpako kareghẹhọ oware nọ u wuzou na, u re fi obọ họ kẹ ọmaha re.

Re esẹgbini a sae rọ ẹme Ọghẹnẹ wuhrẹ emọ rai, o gwọlọ nọ a rẹ raha oke kugbe ai. Re a wo uvẹ utioye evaọ akpọ nana nọ obọ ahwo o jọ rrọ eware buobu na, o rẹ sae jọ bẹbẹ. Rekọ Pọl ukọ na ọ ta nọ o gwọlọ nọ ohwo ọ “raha oke he,” onọ u dhesẹ nọ ọ rẹ rọ oke no eware efa ze kẹ iruẹru ukoko. (Ẹf. 5:15, 16) Ẹvẹ a sai ro ru onana? Oniọvo jọ nọ ọ rrọ ọkpako ukoko, nọ aye riẹ ọ rrọ ọkobaro oke-kpobi yọ obọ aye na o rẹ jọ eware buobu ọ be sae raha oke nọ u fo kẹ ewuhrẹ ọmọ rai, jẹ rẹrote iruo ukoko, gbe iruo okọ riẹ. Ẹvẹ ọzae-avọ-aye nana a sai ro wo  oke nọ a bi ro wuhrẹ ọmọtẹ rai? Ọsẹ na ọ ta nọ: “Taure me te ti kpohọ iruo kohiohiẹ kohiohiẹ, mẹ avọ aye mẹ ma re se oria jọ kẹe evaọ Obe Ikuigbe Ebaibol Mẹ hayo evaọ obe okpẹdẹ na. Evaọ owọwọ, ma re se obe ukoko na jọ kẹe taure o te ti kiẹzẹ, yọ ma rẹ wha ai lele oma nọ ma te bi kpohọ usiuwoma. Ma gwọlọ nọ uvẹ nọ ma re ro wuhrẹ iẹe o vrẹ omai hi evaọ oke nana nọ ọ be whẹro ze na.”

Evaọ uzẹme, ma gwọlọ nọ emọ mai a rẹ jọ emamọ ahwo. Rekọ ugogo oware nọ o rẹ lẹliẹ omai wuhrẹ emọ mai họ, re a rọ eva rai kpobi gọ Jihova.—Mak 12:28-30.

Olezi 127:4 o ta nọ: “Wọhọ ese eva obọ ogbaẹmo ere emọ otu uzoge na e rọ.” Ẹhẹ, a rọ emọ dhesẹ ose nọ u fo nọ a rẹ ma ziezi re o sai kie oware nọ ohwo ọ gwọlọ. Nọ ozuẹ o te siobọno ose no, ose na o gbẹ sai zihe ze he. Emọ e wọhọ ose, a te jọ kugbe ọsẹgboni rai bẹdẹ bẹdẹ hẹ. Fikiere o gwọlọ nọ esẹgbini a rẹ rehọ omoke nọ emọ na a rọ rrọ kugbe ae na kọ ẹme Ọghẹnẹ họ udu emọ rai.

Jọn ukọ na ọ ta kpahe emọ nọ o fi obọ họ kẹ dikihẹ ga evaọ egagọ Ọghẹnẹ nọ: “Evawere nọ me wo vi onana o rọ họ, re me yo nọ emọ mẹ e rọ kpahe uzẹme na.” (3 Jọn 4) Ere ọvona esẹgbini Ileleikristi a rẹ sae ta nọ a tẹ ruẹ nọ emọ rai a “rọ kpahe uzẹme na.”