A yẹ omẹ avọ ẹyao onwa-uke evaọ ukpe 1956. Oria jọ evaọ onwa-uke mẹ u rovie. Ẹyao nana o si eyao efa buobu lele oma, onọ u ru rie rrọ bẹbẹ kẹ omẹ re mẹ nya no oria ruọ oria.

Taure a te ti yẹ omẹ, Isẹri Jihova jọ nọ e rrọ imisiọnare a je wuhrẹ Ebaibol kugbe ọsẹgboni mẹ. Evaọ okenọ mẹ jọ ọmaha, umutho Isẹri Jihova jọ ọvo e jẹ rria iwhre mai nọ a re se Usakos, evaọ Namibia. Fikinọ ukoko ovuovo o rrọ iwhre na ha, uviuwou mai o jẹ hai se ebe nọ a ti ro ru ewuhrẹ kugbe. Okenọ mẹ jọ ikpe ihrẹ, a te ru obẹrọ kẹ omẹ, onọ a ro rovie oria nọ mẹ sae rọ vẹ. Nọ mẹ jọ ikpe 14, me te mu ẹyao ewawa họ ẹmọ. Fikinọ isukulu nọ ọ mae kẹle oria nọ ma jọ u thabọ no uwou mai gaga yọ o gwọlọ nọ ọsẹgboni mẹ a rẹ rẹrote omẹ fiki omamẹ na, mẹ sae nya isukulu na nwrotọ họ.

Ghele na, mẹ gba riẹ mu nọ me re wo emamọ usu kugbe Ọghẹnẹ. Evaọ oke yena, umutho ebe ukoko na jọ ọvo a fa fihọ Afrikaans no, ẹvẹrẹ mai. Fikiere me te wuhrẹ epanọ a re se Oyibo re mẹ sai se ebe ukoko na efa buobu. Me zihe ruọ owhowho-uvie jẹ họ-ame nọ mẹ jọ ikpe 19. Ikpe ene nọ i lele i rie, ẹyao ọ lahiẹ omẹ gaga yọ onana o jẹ hae kẹ omẹ ọkora. U te no ere no, mẹ jẹ sae ta usiuwoma ziezi hi evaọ ẹwho mai fiki ozodhẹ ohwo-akpọ.

Nọ mẹ vrẹ ikpe 20 no, ma tẹ kwa no Namibia kpobọ South Africa, mẹ tẹ jẹ hae jọ obei kpohọ iwuhrẹ, yọ oyena o jọ orọ ọsosuọ nọ me kuomagbe ukoko. Eva e were omẹ gaga. No oke o be nyaharo na, a tẹ wariẹ ru obẹrọ ofa kẹ omẹ, onọ a ro rovie oria nọ mẹ sai ro kuame.

Ẹdẹjọ mẹ gaviezọ kẹ ẹme ọsẹro ọnyawariẹ jọ kpahe iruo ọkobaro oke-kpobi. Ẹme na ọ nya ruomẹ oma. Mẹ riẹ nọ ẹyao ọ be ginẹ kẹ omẹ uye, rekọ mẹ ruẹ nọ Jihova ọ be sẹro mẹ anwọ oke nana kpobi na. Fikiere me te fi obe họ kẹ iruo ọkobaro oke-kpobi. Rekọ fiki ẹyao mẹ na, o jẹ ruọ ekpako na re a whobọ họ efọmo na ha.

Ghele na, mẹ jẹ dawo ẹgba mẹ kpobi evaọ iruo usiuwoma ota na. Oni mẹ gbe inievo efa evaọ ukoko na nọ i je fi obọ họ kẹ omẹ u ru nọ me ro wo euwa nọ i bu te erọ ọkobaro kamara kamara evaọ emerae ezeza. Onana u ru ekpako na riẹ nọ mẹ sae nyate utee euwa na, dede nọ mẹ be mọ. Mẹ tẹ wariẹ fi obe họ, kẹsena ekpako na a tẹ whobọ họ iẹe. Evaọ September 1, 1988, me te zihe ruọ ọkobaro oke-kpobi.

Mẹ ruẹ nọ Jihova ọ be ginẹ wọ ewha mẹ nọ mẹ rrọ iruo ọkobaro na. Iruo ọkobaro na u ru usu mẹ kugbe Jihova ga vi epaọ ọsosuọ no, je ru nọ mẹ be rọ tẹrovi epanọ me re ro fi obọ họ kẹ amọfa riẹ uzẹme na viukpọ ẹyao mẹ. Eva e be were omẹ gaga keme me fi obọ họ kẹ ahwo jọ roma mudhe kẹ Jihova jẹ họ-ame no.

Ẹyao ọ gbẹ be lahiẹ omẹ. Rekọ Jihova ‘ọ be sẹro mẹ kẹdẹ kẹdẹ.’ (Ol. 68:19) Orọnikọ Jihova ọ be wọ owha na kẹ omẹ ọvo ho, rekọ o bi ru oma were omẹ.