A ru ifimu jọ nọ ọ were ahwo gaga nọ uzoẹme riẹ o ta nọ, A Trip Down Market Street. A ru edo fihọ iẹe he, a jariẹ dhesẹ oghẹrẹ uzuazọ nọ ahwo a je yeri evaọ ẹwho San Francisco obọ America evaọ etoke ikpe 1900. Ahwo nọ a ru ifimu na a jọ ehru rehọ ekamẹra rri edhere ẹwho na nọ o re zurie gaga. Whọ rẹ jọ ifimu na ruẹ ekẹkẹ, imoto oke anwae, ahwo nọ a be dẹ jẹ zẹ eware evaọ iwou-eki, onọ o rrọ iruẹru ikẹdẹ kẹdẹ rai.

Oware nọ o mae da ahwo kpahe ifimu na họ, o wọhọ nọ a ru rie evaọ April 1906. Yọ ẹsejọhọ a nwani ru ifimu na no otọ u ro nuhu avọ erae nọ i du lahwe evaọ April 18, onọ u kpe ahwo buobu jẹ wha ọraha ologbo ziọ ẹwho na. Ahwo nọ oware na u kpomahọ nọ a jọ ifimu na a riẹ hẹ inọ emedẹ jọ i kiọkọ re a te whu. Ọzae jọ nọ a re se Scott Miles, nọ ọ rrọ oruọmọ ọjọ evaọ usu ahwo nọ a ru ifimu na ọ ta nọ: “Ohrọ ahwo nọ a rrọ ifimu na o re omẹ, a bi ru iruo ikẹdẹ kẹdẹ rai rekọ a riẹ nọ oware jọ o be te via kẹ ae kẹle he.”

Ere ọvona o rrọ nẹnẹ re. Ohrọ ahwo o be re omai. A bi yeri uzuazọ ikẹdẹ kẹdẹ rai vrẹ, a riẹ nọ ọraha eyero omuomu nana ọ rrọ obaro tha ha. Wo ohẹriẹ no otọ nọ o rẹ sai nuhu idudhe nọ o rẹ vuẹ uwou se ohwo ho, omoke u gbe kiọkọ nọ ma rẹ rọ vẹvẹ erivẹ mai unu kpahe ẹdẹ ẹdhoguo Jihova. Ẹsejọhọ who wo omaa nọ whọ be hai ro kpohọ usiuwoma ota koka koka. Kọ whọ gbẹ sai ru vi ere?

Jesu o fi obọdẹ oriruo hotọ keme o siobọno iruo usiuwoma ota na oke ovo ho. Ọ jẹ ta usiuwoma kẹ ahwo kpobi nọ ọ nyaku, ọ ta kẹ omiazọhọ jọ evaọ edhere gbe aye jọ nọ ọ ruẹ evaọ akotọ ozae. (Luk 19:1-5; Jọn 4:5-10, 21-24) Ọ jẹ rọ oke nọ ọ hai ro serihọ dede ta usiuwoma kẹ ahwo. Ohrọ nọ o wo kẹ erivẹ o jẹ wọe ru onana. (Mak 6:30-34) Ẹvẹ Ileleikristi nẹnẹ a be rọ rehọ aro kele Jesu ta usiuwoma na avọ ọwhọ?

Melika ọ be rria oria nọ otu iroiro e vọ nọ a rẹ jọ kẹ ahwo uvẹ ruọ iwou amọfa ha. Ibuobu ahwo nọ a gbẹ rrọ oria yọ emọ isukulu nọ i no erẹwho efa ze, yọ inọmba ifonu rai e rrọ obe nọ a  kere inọmba ifonu ahwo nọ a rrọ okegbe na fihọ họ. Melika ọ rẹ ta usiuwoma kẹ ahwo nana nọ ọ tẹ nyaku ae evaọ ogebara gbe oria nọ a rẹ jọ ruọ oware nọ o rẹ wọ ohwo kpohọ edhe ọfa evaọ uwou-ehru. Ọ ta nọ: “Mẹ sae ta nọ etenẹ na yọ ẹkwotọ usiuwoma ota mẹ.” Ọ rẹ wha ebe evẹrẹ sa-sa lele oma, yọ ahwo na a rẹ ginẹ rehọ emagazini gbe emebe evẹvẹ mi ei. Ọ rẹ jẹ ta kẹ ahwo na nọ a kpohọ oria evuẹ Itanẹte jw.org mai. O mu obe uwuhrẹ Ebaibol họ kugbe ahwo buobu no.

Oniọvo ọfa jọ nọ a re se Sonia ọ rẹ rọ uvẹ kpobi ta usiuwoma kẹ ohwo kpobi nọ ọ ruẹ re. O bi ru iruo evaọ ẹsipito ọsese jọ, yọ o fi utee họ nọ ọ rẹ ta usiuwoma kẹ ibe-iruiruo riẹ ziezi. Ọ kake romatotọ roro kpahe oware nọ o rrọ ẹgwọlọ omomọvo ibe-iruiruo riẹ. Kẹsena ọ vẹ rọ oke ibreki riẹ zizie ae omomọvo re a ta ẹme kugbe kpahe Ọghẹnẹ. Sonia ọ rọ enẹ mu iwuhrẹ Ebaibol ivẹ họ. Ọ tẹ be jẹ ma omaa nọ ọ rẹ rọ abọjọ oke ibreki riẹ ta ẹme kugbe ahwo nọ a be hẹrẹ edọkita.

Okenọ otọ nọ u nuhu nọ ma fodẹ evaọ emuhọ uzoẹme na o via vrẹ no, ohwo ẹwho na jọ nọ ọ zọ ọ ta nọ: “Ọraha nana họ okpẹtu nọ ọ mai yoma kpaobọ nọ o rẹ sae via kẹ ẹwho.” Rekọ onana u te oware ovo ho nọ ma te roro kpahe okpẹtu nọ o ti te “enọ e riẹ Ọghẹnẹ hẹ” evaọ ẹdẹ ofu riẹ nọ ọ be tha na. (2 Tẹs. 1:8) Jihova ọ gwọlọ nọ ahwo a kezọ kẹ unuovẹvẹ nọ idibo riẹ a bi whowho nẹnẹ re a kurẹriẹ.—2 Pita 3:9; Evia. 14:6, 7.

Who wo uvẹ-ọghọ nọ whọ rẹ rọ vuẹ ahwo nọ edẹ urere na ma rrọ na je fi obọ họ kẹ ai siobọno iruemu iyoma rai re a tẹrovi epanọ a re ro ru oreva Jihova. (Zef. 2:2, 3) Kọ whọ sae rọ uvẹ kpobi ta usiuwoma kẹ ibe iruiruo ra, erivẹ ra, gbe ahwo nọ whọ be hae nyaku kẹdẹ kẹdẹ? Kọ whọ te daoma vẹvẹ ahwo unu vi epaọ anwẹdẹ?