Okenọ a zizie ekobaro ivẹ jọ nọ e jọ usiuwoma ota rueva uwou jọ evaọ obọ Kenya, u gbe rai unu nọ a ruẹ ọzae ọkakao jọ evaọ ehwa. Ete-oma riẹ o tulo ho, yọ abọ riẹ ọ rrọ kpẹkpẹe gaga. Nọ inievo na a dhesẹ eyaa Ọghẹnẹ nọ e rrọ Ebaibol kẹe inọ “ọmo o [ti] duola wọhọ uyo,” ọzae na o te kpohwẹ ku unu.—Aiz. 35:6.

Uwhremu na ekobaro na a tẹ te riẹ nọ a yẹ ọzae nana nọ odẹ riẹ o rrọ Onesmus na avọ ẹyao nọ a re se osteogenesis imperfecta, koyehọ ẹyao nọ o re ru igbenwa ohwo jọ hẹhẹhẹ. Ugbonwa riẹ o hẹhẹ te epanọ o sai ro wiri nọ oware jọ o tẹ nyẹe. Onesmus ọ riẹ nọ akaba-ọmo nọ a re ghelie ọvo ọ te jọ evaọ etoke uzuazọ riẹ kpobi avọ edada keme ẹyao nana o wo umu hu.

Onesmus ọ rọwo nọ a wuhrẹ Ebaibol kugbei. Dede na, oni riẹ ọ rọwo nọ o kpohọ iwuhrẹ hẹ keme o je roro nọ onana o sae wha enwoma gbe edada efa sei. Fikiere inievo na a rẹ rekọdo eme nọ a jọ iwuhrẹ ru, Onesmus ọ vẹ gaviezọ kẹ ae evaọ obọ uwou. Nọ a wuhrẹ Ebaibol kugbei te emerae isoi no, ọ tẹ jiroro nọ o re kpohọ iwuhrẹ o tẹ make rọnọ onana o sae wha edada jọ sei fiki oma riẹ na.

Kọ iwuhrẹ enya o wha edada efa sei? Vievie, ukpoye ewoma o no rie ze. Onesmus ọ ta nọ: “O wọhọ nọ edada mẹ i re kpotọ nọ mẹ tẹ rrọ obọ iwuhrẹ.” Ọ ruẹ nọ eware nọ o bi wuhrẹ no Ebaibol ze na i bi ru ei jọ sasasa vi epaọ anwẹdẹ. Nọ oni riẹ o muẹrohọ onana, eva e tẹ were iẹe te epanọ ọ rọ rọwo nọ a wuhrẹ Ebaibol kugbe ọyomariẹ re. Ọ ta nọ: “Egagọ Ọghẹnẹ họ umu ọmọ mẹ.”

U kri hi, Onesmus o te zihe ruọ owhowho-uvie. Uwhremu na ọ tẹ họ-ame, yọ enẹna ọ rrọ odibo oriruo no. Dede nọ ọ rẹ sae nya ha yọ obọ ovuovo ọ be sai ro kru oware, ọ gwọlọ nọ o re ru utho ẹgba riẹ kpobi evaọ egagọ Jihova. Ọ gwọlọ ru iruo ọkobaro obufihọ rekọ o jẹ ruẹe oma re o fiobehọ họ. Fikieme? Keme o te gwọlọ nọ ohwo jọ ọ hai gheliei evaọ akaba-ọmo riẹ noke toke. Nọ ọ ta ẹme na kẹ inievo na, a tẹ vuẹe nọ a ti fi obọ họ kẹe. Ere a gine ru, onọ u ru nọ Onesmus ọ sai ro ru iruo ọkobaro obufihọ na.

Onesmus ọ gwọlọ nọ ọ rẹ jọ ọkobaro oke-kpobi rekọ o je roro kpahe ẹbẹbẹ ọvona. Rekọ isase okpẹdẹ nọ o se ẹdẹjọ o kẹ riẹ uduotahawọ. A rehọ isase yena no Olezi 34:8 ze, onọ o ta nọ: “Jawo, re whọ ruẹ nọ ỌNOWO o woma!” Nọ o roro didi kpahe oria ikere yena no, ọ tẹ jiroro nọ ọ rẹ jọ ọkobaro oke-kpobi. Enẹna ọ rẹ ta usiuwoma edẹ ene evaọ ẹkpoka, yọ o wo emọ-uwuhrẹ Ebaibol buobu nọ i bi wo ẹnyaharo ziezi. O kpohọ Isukulu Ekobaro Oke-Kpobi evaọ ukpe 2010. Eva e were Onesmus gaga okenọ ọ ruẹ nọ ọjọ evaọ usu ekobaro ivẹ nọ e nya bru ei ze ẹdẹ na ọ jọ owuhrẹ rai evaọ isukulu na.

Onesmus ọ joma kpako te ikpe 40 no, enẹna ọsẹgboni riẹ a whu no rekọ inievo nọ e rrọ ukoko na a be rẹrote ei. Eva e be were iẹe gaga fiki eghale nọ ọ be reawere rai enẹna, yọ o bi rẹro oke nọ eyaa nana nọ e rrọ Ebaibol na i ti ro rugba, inọ: “Ohwo ọvo nọ ọ be ria . . . nọ ọ rẹte ta [nọ], ‘mẹ be mọ,’ ọ rọ họ.”—Aiz. 33:24.