EVAỌ usi-uwhowho jọ nọ Emọ-Uwuhrẹ Ebaibol a rehọ edẹ izii ru evaọ amara August ruọ September 1929, inievo nọ i bu vi idu ikpe (10,000) a rọ ovuẹ na te eria buobu evaọ America. A fi ebe gbe emebe-evẹvẹ nọ i bu te idu egba ivẹ gbe ikpe isoi (250,000) họ ada. Egbaẹmo-aro hayo ekobaro oke-kpobi nọ i bu te odu ọvo e jọ usu inievo nọ i wobọ evaọ usi-uwhowho na. Onana o jọ ẹvi ologbo ọrọ unu inievo nọ e ruọ utu ekobaro oke-kpobi na. Omobe-ovẹvẹ na Bulletin * o ta nọ a “rẹro riẹ vievie he” inọ unu ekobaro na a te rọ akuasa bu vi epanọ a jọ vẹre no ukpe 1927 rite 1929.

Evaọ ubrobọ ekuhọ ukpe 1929, ekọ i kie ku ahwo evaọ akpọ-soso. Eki nọ o kie evaọ ofẹ okọ America nọ a re se New York Stock Exchange evaọ Edivẹ-Oka, edẹ 29 ọrọ amara October evaọ ukpe 1929 o wha ẹbẹbẹ ologbo nana ze. Ebanke gbe ekọmpene ilogbo buobu i kie. Okọ o raha ku ima ahwo buobu, makọ iruo ẹwọ dede. Evaọ ukpe 1933, a tẹ jẹ jọ America mi ahwo buobu iwou rai kẹdẹ kẹdẹ fikinọ a sae wha igho nọ a momo ho.

Ẹvẹ ekobaro oke-kpobi a jẹ sai ro yeri uzuazọ rai evaọ oke ẹgaga nana? Oware jọ nọ u fi obọ họ gaga họ, iwou rai nọ a ru epanọ a re ro ghelie ai no oria ruọ oria. Fikinọ a rẹ hwa osa uwou hayo osa-uzou fihọ iwou nana ha, u ru nọ araha ugho ọrọ ekobaro buobu u ro kpotọ nọ o kẹ rai uvẹ ruabọhọ iruo usiuwoma ota na. * Evaọ etoke ikokohọ ubrotọ, a re wohọ iwou itienana ọvọvẹ wọhọ ehọtẹle. Evaọ ukpe 1934, omobe-ovẹvẹ Bulletin na o tẹ kẹ ithubro kpahe oghẹrẹ nọ Emọ-Uwuhrẹ Ebaibol a sai ro ku iwou nọ a rẹ wha no oria ruọ oria nọ i re wo eware wọhọ ame, oria ẹbẹ-othere, ehwa nọ a re kpiri, gbe oghẹrẹ eware nọ e rẹ sai le ekpahe.

Ekobaro oke-kpobi nọ i wo onaa ziezi a tẹ jẹ hai ku iwou nọ a re ghelie. Ọkobaro jọ nọ a re se Victor Blackwell ọ ta nọ, “Noa nọ o ku okọ evaọ Ebaibol na ọ riẹ epanọ a re ku okọ vẹre he, ere ọvona o jọ kẹ omẹ, mẹ riẹ epanọ a re ku iwou nọ a re ghelie vẹre he.” Rekọ oniọvo nana o ku uwou nọ a re ghelie uwhremu na.

Ọzae-avọ-aye jọ nọ a re se Avery gbe Lovenia Bristow a wo omoto nọ a ru wọhọ uwou. Avery ọ ta nọ, “Mẹ jẹ hai si uwou mẹ lele oma ẹsikpobi wọhọ ogbe nọ o re no ekpe riẹ hẹ.” Aimava avọ ọzae-avọ-aye ọfa nọ a re se Harvey gbe Anne Conrow a gbẹ jọ iruo ọkobaro oke-kpobi na, inievo nana a gwa ebe kugbe oware nọ a ro ru ugbẹhẹ uwou omoto rai. Ehẹhẹ ebe na i re kie fihotọ ẹsikpobi nọ a tẹ be dhẹ no oria ruọ oria. Avery ọ ta nọ: “Uvumọ ohwo ọ re te ruẹ omoto-uwou otiọye ẹdẹvo ho.” Amọ Conrow a wo emezae ivẹ, yọ Avery ọ ta kpahe uviuwou nana nọ: “A rẹ ruẹ uviuwou nọ u wo evawere te orọ inievo nana ha.” Harvey Conrow o kere nọ, “Oja oware ovo o ruọ omai hi, Jihova ọ jẹ rẹrote omai yọ ma je wo evawere ziezi evaọ egagọ riẹ.” Uwhremu na, Harvey Conrow avọ aye riẹ gbe emezae ivẹ rai a kpohọ Isukulu Giliad, kẹsena a te dhe ae kpohọ Peru kẹ iruo imisiọnare.

 Ọzae-avọ-aye na, Giusto avọ Vincenza Battaino a ru iruo ọkobaro re. Nọ aye na o dihọ no, a te zihe omoto anwae rai ruọ uwou nọ a re si lele oma, onọ o “wọhọ ehọtẹle owowoma” nọ a tẹ rehọ iẹe wawo oria nọ a jẹ rria vẹre. Nọ a yẹ ọmọtẹ rai no, te ae te ọmọ na a tẹ ruabọhọ iruo nọ e were rai gaga na be ta usiuwoma kẹ ahwo Itali nọ e be rria America.

Ahwo buobu a jẹ gaviezọ kẹ usiuwoma na, rekọ ibuobu a jọ iyogbere yọ a wo iruo ho, fikiere ẹsibuobu a jẹ ruẹ ugho ru unevaze kẹ ebe nọ a jẹ rehọ họ. Ukpoye, a jẹ hae kẹ inievo na eware efa sa-sa nọ a tẹ rehọ ebe mi ai. Ekobaro ivẹ jọ a fodẹ eware 64 sa-sa nọ ahwo na a rọ rehọ ebe mi ai. Nọ a kele eware na fihotọ, e jọ “wọhọ eware nọ a dẹ evaọ uwou-eki.”

Fred Anderson ọ nyaku ọwhẹrẹ jọ nọ ọ rehọ ẹno nọ oni riẹ ọ kẹ riẹ rọ rehọ ebe mi ei. Nọ amọ Anderson a nya te udhu ofa, ọzae jọ ọ jẹ gwọlọ rehọ ebe mai rekọ ọ ta nọ, “Me wo ẹno nọ me ti ro se ebe na ha.” Ọ tẹ dawo ẹno nọ a kẹ Anderson na, nọ ọ ruẹ nọ ọ sae rehọ iẹe se obe, ọ tẹ rehọ ebe na gbe ẹno na je ru unevaze fihọ ae.

Herbert Abbott o wo ekete nọ a rẹ rọ wha erifẹ evaọ omoto riẹ. Ẹdẹjọ ahwo a rehọ erifẹ nọ i te esa hayo ene rehọ ebe mi ei, kẹsena ọ tẹ zẹ ae evaọ obọ eki jẹ rọ ugho na dẹ epẹtiro fihọ omoto riẹ. Herbert o kere nọ: “Ugho o jẹ hae kare omai ẹsejọ, rekọ ma kuvẹ re oyena o whaha omai hi. Epẹtiro e tẹ thakpe rrọ omoto na yọ ẹme o re no, ma rẹ wọ kpohọ usiuwoma ota avọ eva kpobi nọ ma fihọ Jihova.”

Ajọwha inievo nana gbe eva nọ a fihọ Jihova u fi obọ họ kẹ ae evaọ etoke ẹgaga nana soso. Ẹdẹjọ nọ oso ọ jẹ rrọ avọ okpofou, ure jọ u kie tehe uwou-omoto amọ Maxwell avọ Emmy Lewis, aimava a nwani no uwou na no oware na o rọ via. Maxwell o kere nọ: “Eware nana e jọ ọzadhe kẹ omai hi, yọ eware nọ e rẹ sae via evaọ okenọ a rẹro rai hi, o ziọ omai iroro ẹdẹvo ho inọ ma re siobọno iruo na. Iruo usiuwoma ota na e gbẹ vọ yọ ma gwọlọ ru ai.” Avọ ọtamuo gbe obufihọ inievo na, Maxwell avọ Emmy a tẹ wariẹ ku uwou-omoto rai.

Inievo buobu a wo ẹzi omarọkẹ iruo otiọna evaọ oke obẹbẹ nana nọ ma rrọ na. Wọhọ ekobaro oke anwae nọ ma gbiku rai na, ma gba riẹ mu nọ ma rẹ ruabọhọ iruo na bẹsenọ Jihova ọ te ta nọ iruo na i te no.