‘Onana O rẹ te jọ Oware nọ Wha rẹ Kareghẹhọ’
“Ẹdẹ ọnana ọ rẹ te jọ ẹdẹ ẹkareghẹhọ rọ kẹ owhai, wha ve koko iei re ọ jọ ẹdẹ-eha ỌNOWO na.”—ỌNY. 12:14.
1, 2. Ehaa vẹ i wuzou kẹ Ileleikristi kpobi nẹnẹ, kọ fikieme?
WHO te yo ẹme na “ekareghẹhọ,” ẹdẹ vẹ ọ rẹ nwane ziọ owhẹ iroro? Ohwo nọ ọ rọo no ọ rẹ sae ta nọ ẹdẹ ehaa orọo riẹ. Amọfa a rẹ sai fodẹ ẹdẹ nọ omamọ oware jọ o via kẹ orẹwho rai, wọhọ ẹdẹ nọ orẹwho rai u ro no otọ esuo orẹwho ofa. Kọ whọ riẹ ehaa ekareghẹhọ jọ nọ ahwo orẹwho jọ a jẹ hai ru evaọ etoke ikpe nọ i bu vrẹ idu esa gbe egba isoi (3,500) nọ i kpemu?
2 A re se ekareghẹhọ nana Ehaa Ọnyavrẹ. Emọ Izrẹl a jẹ hai ru ehaa nana rọ kareghẹhọ ẹdẹ nọ a ro no igbo Ijipti. Ehaa yena i wuzou kẹ owhẹ. Evaọ oghẹrẹ vẹ? Keme i wobọ kpahe uzuazọ ra. Rekọ whọ sae ta nọ, ‘Ehaa yena yọ ehaa ahwo Ju, mẹ yọ ohwo Ju hu. Kọ ovẹ o jariẹ t’omẹ?’ Ẹhẹ, whọ rẹ sae jọ obe 1 Ahwo Kọrint 5:7 ruẹ oware nọ o jariẹ t’owhẹ, o ta nọ: ‘Kristi, nọ ọ rọ omogodẹ iwẹ-ọnya-vrẹ mai, ọ gọ iwẹ kẹ omai no.’ Re ma sai wo otoriẹ oware nọ ma be ta na, o gwọlọ nọ ma rẹ riẹ kpahe Ehaa Ọnyavrẹ ahwo Ju na ziezi, ma vẹ rehọ iẹe wawo ujaje nọ a kẹ Ileleikristi kpobi nẹnẹ.
FIKIEME A JE RO RU EHAA ỌNYAVRẸ NA?
3, 4. Eme ọ wha Ọnyavrẹ ze?
3 Ahwo buobu wariẹ akpọ na họ nẹnẹ nọ a rrọ ahwo Ju hu a riẹ kpahe Ehaa Ọnyavrẹ na. O sae jọnọ a se kpahe iẹe evaọ obe Ọnyano, a rri rie evaọ ifimu hayo a gbiku na kẹ ai.
4 Nọ emọ Izrẹl a jọ igbo Ijipti te ikpe buobu no, Jihova o te vi Mosis avọ Erọn oniọvo riẹ nyae ta kẹ Fẹro nọ o si obọ no ahwo Riẹ. Fẹro ovie Ijipti nọ o wo omorro na ọ rọwo si obọ no emọ Izrẹl he, fikiere Jihova ọ tẹ kẹ ai iye sa-sa. Ukuhọ riẹ, Ọghẹnẹ o te kpe enwara Ijipti kpobi, onọ o jọ uye avọ ikpe nọ o Ọny. 1:11; 3:9, 10; 5:1, 2; 11:1, 5.
ro te ai, onana u te ru nọ Fẹro o ro si obọ no emọ Izrẹl.—5. Eme a ta kẹ ahwo Izrẹl nọ a ru rọ ruẹrẹ oma kpahe kẹ ukpo rai? (Rri uwoho nọ o rrọ emuhọ uzoẹme na.)
5 Ọghẹnẹ ọ gwọlọ nọ emọ Izrẹl a re ru oware jọ taure a te ti no igbo. Ọ vuẹ rae oware na evaọ ukpe 1513 taure oke kristi u te ti te, evaọ amara Ebib onọ a je se Nisan uwhremu na. * Ọ ta kẹ emọ Izrẹl nọ a mu oma họ ẹruẹrẹkpahe evaọ ẹdẹ avọ 10 amara Nisan rọkẹ oware jọ nọ a ti ru evaọ owọwọ nọ ọre o te kiediwi no evaọ ẹdẹ avọ 14 amara na. Kọ fikieme o te rọ jọ owọwọ? Oware nọ o soriẹ họ, no owọwọ ẹdẹjọ rite owọwọ okiokiọ riẹ ahwo Hibru a re kele wọhọ okpẹdoke. Evaọ ẹdẹ avọ 14 Nisan, Ọghẹnẹ ọ ta nọ iviuwou ahwo Izrẹl kpobi a re kpe omogodẹ ọzae hayo ẹwe ọzae, a vẹ rọ azẹ riẹ wholo ehru gbe tabọ tabọ inuẹthẹ rai. (Ọny. 12:3-7, 22, 23) Ahwo uviuwou na a vẹ rọ omogodẹ na soso tọ, jẹ rọ ebrẹdi nọ e kare ẹvi gbe ẹbe ọyayare rọ re iẹe. Ẹnjẹle Ọghẹnẹ ọ tẹ nya orẹwho Ijipti vrẹ evaọ aso, je kpe enwara Ijipti kpobi, rekọ ọ rọ obọ te enwara Izrẹl vievie he, ukuhọ riẹ a te si obọ no ae.—Ọny. 12:8-13, 29-32.
6. Fikieme o rọ gba emọ Izrẹl họ nọ a re ru Ehaa Ọnyavrẹ?
6 Ere emọ Izrẹl a ro no igbo Ijipti, yọ o gwọlọ nọ a rẹ hae kareghẹhọ ẹdẹ nọ a ro no igbo na kukpe kukpe. Ọghẹnẹ ọ vuẹ rae nọ: “Ẹdẹ ọnana ọ rẹ te jọ ẹdẹ ẹkareghẹhọ rọ kẹ owhai, wha ve koko iei re ọ jọ ẹdẹ-eha ỌNOWO na; wha re ti koko iei no ige te ige wọhọ uzi bẹdẹ.” Nọ a te ru Ehaa Ọnyavrẹ na no evaọ ẹdẹ avọ 14, a ve ru ehaa ọfa jọ lele iei nọ o rẹ rehọ edẹ ihrẹ. Ẹdẹ avọ 14 amara Nisan họ uzedhe ẹdẹ Ehaa Ọnyavrẹ na, rekọ a rẹ sai se ehaa nọ a ru edẹ eree na kpobi Ehaa Ọnyavrẹ na. (Ọny. 12:14-17; Luk 22:1; Jọn 18:28; 19:14) Ehaa Ọnyavrẹ na o jọ usu ehaa nọ o gba emọ Izrẹl họ nọ a re ru kukpe kukpe.—2 Irv. 8:13.
7. Eme Jesu ọ tohọ nọ o ru Ehaa Ọnyavrẹ urere kugbe ilele riẹ no?
7 Fikinọ Jesu avọ ikọ riẹ a je koko Uzi nọ Ọghẹnẹ ọ rọ ẹkwoma Mosis kẹ orẹwho Izrẹl, a jẹ hai ru Ehaa Ọnyavrẹ na re. (Mat. 26:17-19) Nọ o ru Ehaa Ọnyavrẹ urere kugbe ilele riẹ no, Jesu ọ tẹ to Emu Owọwọ Olori na họ, onọ o gwọlọ nọ ilele riẹ a re ru kukpe kukpe. Rekọ ẹdẹ vẹ u fo nọ a re ro ru ei?
EMU OWỌWỌ OLORI NA —ẸDẸ VẸ A RE RO RU EI?
8. Onọ vẹ o romavia kpahe Ehaa Ọnyavrẹ gbe Emu Owọwọ Olori na?
8 Nọ o rọnọ a nwani ru Ehaa Ọnyavrẹ no Jesu ọ rọ to Emu Owọwọ Olori na họ na, u dhesẹ nọ ẹdẹ yena ọvona a re ro ru Emu Owọwọ Olori na. Rekọ ẹsejọhọ who ti muẹrohọ nọ ideti nọ a fodẹ nọ a re ro ru Ehaa Ọnyavrẹ na evaọ ikeledẹ buobu nẹnẹ, o rehọ ẹdẹ ọvo hayo edẹ jọ wo ohẹriẹ no ideti nọ ma be hai ro ru Ekareghẹhọ uwhu Jesu na. Fikieme o rọ rrọ ere? Uzi nọ Ọghẹnẹ ọ kẹ emọ Izrẹl o rẹ sai fi obọ họ kẹ omai riẹ uyo na. Nọ Mosis ọ ta nọ “ukoko ogbotu Izrẹl kpobi a re ti kpe imigodẹ” no, ọ tẹ fodẹ uzedhe oke nọ a re ro kpei evaọ ẹdẹ avọ 14 ọrọ amara Nisan.—Se Ọnyano 12:5, 6.
9. Wọhọ epanọ o rrọ obe Ọnyano 12:6, oke vẹ a re ro kpe omogodẹ Ehaa Ọnyavrẹ na? (Rri ẹkpẹti na re, “Oke vẹ Evaọ Ẹdẹ Na?”)
9 Obe ahwo Ju nọ a re se Pentateuch gbe Haftorah e fodẹ ẹme nọ obe Ọnyano 12:6 o ta, inọ: “Eva oke owọwọ.” Uzedhe ẹme nana efafa Ebaibol jọ a rọ fa oria Ebaibol nana. Rekọ Ebaibol Tanakh gbe efa jọ a fa riẹ nọ, “nọ oke u te bi siarohọ no.” Ejọ e tẹ jẹ fae nọ, “evaọ aso,” hayo “nọ ọre o te kiediwi no.” Fikiere nọ ọre o te kiediwi no a re ro kpe omogodẹ na, koyehọ emuhọ ẹdẹ avọ 14 Nisan.
10. Wọhọ epanọ otujọ ọ ta, oke vẹ a jẹ hai ro kpe omogodẹ na, rekọ onọ vẹ onana o wha ze?
10 Uwhremu na, ahwo Ju jọ a tẹ jẹ hai roro nọ ẹsejọhọ euwa buobu e te ruemu re a te ti kpe imigodẹ nọ a rehọ ziọ etẹmpol na kpobi re. Fikiere o sae jọ nọ obe Ọnyano 12:6 o be ta kpahe ekuhọ ẹdẹ avọ 14 Nisan, koyehọ no okenọ ọre o te muhọ ekie diwi no rite okenọ oke u te muebi no. Rekọ otẹrọnọ oke yena a ro kpe arao na, kọ oke vẹ a rọ re emu na? Ọgbaeriariẹ egagọ ahwo Ju jọ nọ a re se Profẹsọ Jonathan Klawans ọ ta nọ: “Nọ ọre o te kiediwi no, koyehọ ẹdẹ ọkpokpọ o muhọ no. Fikiere a re kpe arao na evaọ ẹdẹ avọ 14, rekọ a ve ru ehaa na jẹ re emu na evaọ ẹdẹ avọ 15. Dede na a fodẹ onana dẹe evaọ obe Ọnyano ho.” O te je kere nọ: “Makọ ebe nọ isu-egagọ ahwo Ju a kere dede e fodẹ oghẹrẹ nọ a jẹ hai ru Ehaa Ọnyavrẹ na ha taure a tẹ te raha etẹmpol na” evaọ ukpe 70 C.E.—Mai ma kere ibiẹme na mu gbalọ.
11. (a) Eme ọ via kẹ Jesu evaọ ẹdẹ Ehaa Ọnyavrẹ ọrọ ukpe 33 C.E.? (b) Fikieme a ro se ẹdẹ avọ 15 ọrọ amara Nisan evaọ ukpe 33 C.E. Ẹdijala “ologbo”? (Rri oruvẹ-obotọ na.)
11 Fikiere ma rẹ sai nọ inọ, oke vẹ a ro ru Ehaa Ọnyavrẹ ọrọ ukpe 33 C.E. na? Nọ ẹdẹ nọ a te rọ rehọ “omogodẹ gọ iwẹ ọnyavrẹ” o si kẹle no, Jesu ọ tẹ ta kẹ Pita avọ Jọn evaọ ẹdẹ avọ 13 ọrọ amara Nisan nọ: “Wha nya e ruẹrẹ iwẹ-ọnyavrẹ kpahe kẹ omai, re ma re iẹ.” (Luk 22:7, 8) Kẹsena “oke u [te] te” nọ a rẹ rọ re emu Ọnyavrẹ na nọ ọre o kiediwi no evaọ ẹdẹ avọ 14 Nisan, onọ o jọ owọwọ Edene-Oka. Nọ Jesu ọ re emu yena kugbe ilele riẹ no, ọ tẹ to Emu Owọwọ Olori na họ. (Luk 22:14, 15) Aso yena a mu Jesu jẹ rehọ iẹe gu ẹdhọ. A tẹ kare iẹe veghe nọ oke u bi ti te ọre t’uzou evaọ ẹdẹ avọ 14 ọrọ amara Nisan, uvo ẹdẹ yena o te whu. (Jọn 19:14) Ere ‘Kristi, nọ ọ rọ omogodẹ iwẹ-ọnya-vrẹ mai’ o ro whu evaọ ẹdẹ ọvona nọ a ro kpe omogodẹ Ọnyavrẹ na. (1 Kọr. 5:7; 11:23; Mat. 26:2) A ki Jesu evaọ ubrobọ ekuhọ ẹdẹ avọ 14 ọrọ amara Nisan taure ẹdẹ avọ 15 o te ti muhọ. *—Izerẹ 23:5-7; Luk 23:54.
EKAREGHẸHỌ NỌ I WUZOU KẸ OWHẸ
12, 13. Ẹvẹ emọ ahwo Izrẹl a jẹ hai ro wobọ evaọ Ehaa Ọnyavrẹ na?
12 Joma wariẹ ta kpahe oware nọ o via evaọ obọ Ijipti na. Evaọ oke yena Mosis ọ ta nọ ahwo Ọghẹnẹ a ti koko Ọnyavrẹ na wọhọ uzi ‘bẹdẹ bẹdẹ.’ Enọ nọ emọ e rẹ nọ esẹgbini rai kpahe otofa Ọnyavrẹ na, gbe iyo nọ esẹgbini na e rẹ kẹ ae yọ abọjọ iruẹru Ọnyavrẹ na re. (Se Ọnyano 12:24-27; Izie. 6:20-23) Fikiere ehaa Ọnyavrẹ na e rẹ te jọ “ekareghẹhọ” nọ i wuzou kẹ emaha na re.—Ọny. 12:14.
13 No ige te ige, ahwo Izrẹl a re wuhrẹ emọ rai eware buobu nọ i wuzou kpahe ehaa Ọnyavrẹ na. Oware jọ nọ a re wuhrẹ emọ na họ, Jihova yọ Ọghẹnẹ nọ ọ rrọ uzuazọ, orọnikọ ẹdhọ jọ gheghe he. O wo ọdawẹ kẹ idibo riẹ, yọ ọ rẹ thọ ae evaọ oke ebẹbẹ. Yọ o dhesẹ onana via evaọ okenọ o “kpe ahwo Ijipti,” jẹ thọ enwara emọ Izrẹl.
14. Eme esẹgbini Ileleikristi a rẹ sae rehọ iku Ọnyavrẹ na wuhrẹ emọ rai?
14 Orọnikọ o gbahọ nọ kukpe kukpe esẹgbini Ileleikristi nẹnẹ a re wuhrẹ emọ rai kpahe Ehaa Ọnyavrẹ na ha. O make rrọ ere na, kọ whai esẹgbini wha be hai wuhrẹ emọ rai inọ Jihova ọ rẹ thọ idibo riẹ? Kọ wha be hai dhesẹ kẹ ae epanọ u mu owhai ẹro te inọ Jihova ọ gbẹ be ginẹ thọ idibo riẹ nẹnẹ? (Ol. 27:11; Aiz. 12:2) Wha te bi wuhrẹ ae, kọ wha rẹ ta yọ a be gaviezọ ọvo, manikọ wha re wuhrẹ ae evaọ edhere ẹmeọta-kugbe, onọ u re ru uwuhrẹ na te ae udu? Daoma ru uwuhrẹ na evaọ edhere nọ o sai ro fi obọ họ ru usu ahwo uviuwou ra kugbe Jihova jọ gaga.
15, 16. Eme ikuigbe Ọnyavrẹ na gbe iku efa nọ e rrọ obe Ọnyano e rẹ sai wuhrẹ omai kpahe Jihova?
15 Orọnikọ epanọ Jihova ọ rẹ rọ thọ idibo riẹ ọvo iku Ọnyavrẹ emọ Izrẹl na i re wuhrẹ omai hi. Ọ sẹro rai nọ ọ ‘rehọ ae no Ijipti ze no.’ Roro kpahe idhere jọ nọ o ro ru onana. Ọ jẹ rọ ẹkwoma ẹgho gbe elo erae ro su ai. A nya otọ oyaya vrẹ evaọ udevie abade ọwawae na yọ ame na o dikihẹ tabọ tabọ wọhọ ugbẹhẹ. Nọ a te okpa no, a tẹ ruẹ ame na nọ o whẹ ruru egbaẹmo Ijipti. Kẹsena emọ Izrẹl nọ a siwi na a tẹ kpare ole inọ: “Mẹ rẹ suole kẹ ỌNOWO . . . te esi na gbe ọnọ ọ be dhẹ ẹe o gele irai fihọ evaọ abade. ỌNOWO na họ ogaga gbe ole mẹ, O te zihe ruọ usiwo mẹ.”—Ọny. 13:14, 21, 22; 15:1, 2; Ol. 136:11-15.
16 Who te wo emọ, kọ who bi fi obọ họ kẹ ae fievahọ Jihova wọhọ Ọnọ o re siwi idibo riẹ? Kọ a be hae ruẹ epanọ onana u mu owhẹ ẹro te evaọ ẹmeọta gbe iroro-ejẹ ra? Evaọ etoke Egagọ Uviuwou rai, wha sae ta kpahe iku nọ e rrọ obe Ọnyano uzou avọ 12 rite 15, je fiẹgba họ oghẹrẹ nọ Jihova ọ rọ thọ idibo riẹ. Evaọ oke ofa, wha rẹ sae ta ẹme kpahe oware ovona nọ wha te se obe Iruẹru 7:30-36 hayo Daniẹl 3:16-18, 26-28. Ẹhẹ, o gwọlọ nọ te emaha te ekpako a re wo imuẹro inọ Jihova ọ gbẹ be thọ idibo riẹ nẹnẹ. Wọhọ epanọ o siwi idibo riẹ evaọ oke Mosis na, ere o ti siwi omai evaọ obaro re.—Se 1 Ahwo Tẹsalonika 1:9, 10.
OWARE NỌ MA RẸ KAREGHẸHỌ
17, 18. Eme o rẹ kareghẹhọ omai nọ ma te roro kpahe oghẹrẹ nọ a rọ azẹ ruiruo evaọ Ọnyavrẹ ọsosuọ na?
17 Ileleikristi uzẹme a re ru ekareghẹhọ Ọnyavrẹ na ha. Izi nọ Ọghẹnẹ ọ rọ ẹkwoma Mosis kẹ orẹwho Izrẹl a jọ ta nọ a hai ru ehaa Ọnyavrẹ na, yọ ma rrọ otọ uzi yena ha. (Rom 10:4; Kọl. 2:13-16) Oware nọ o mai wuzou kẹ omai nẹnẹ họ, ekareghẹhọ uwhu Ọmọ Ọghẹnẹ. Ghele na, eware jọ e riẹ nọ a jẹ hai ru evaọ ekareghẹhọ Ọnyavrẹ na nọ i wuzou kẹ omai.
18 Azẹ omogodẹ nọ emọ Izrẹl a ro wholo ehru gbe tabọ tabọ inuẹthẹ rai na o jọ edhere nọ a ro siwi uzuazọ rai. Nẹnẹ, ma gbẹ be rọ erao dhe idhe he. Rekọ u wo oghẹrẹ idhe jọ nọ e rẹ sai siwi uzuazọ mai bẹdẹ bẹdẹ. Pọl ukọ na o kere kpahe “emọ etuyẹ nọ a kere họ obe obọ odhiwu.” Ẹkwoma “azẹ ọfẹkuo,” koyehọ azẹ Jesu a ro siwi uzuazọ Ileleikristi yena nọ a rọ ẹzi wholo na. (Hib. 12:23, 24) Yọ ẹkwoma azẹ yena ọvona a ti ro siwi uzuazọ Ileleikristi nọ e te rria otọakpọ na bẹdẹ bẹdẹ. N’oke t’oke, o gwọlọ nọ Ileleikristi a re roro kpahe ẹme nana: “Ma rehọ fiki azẹ riẹ wo ẹta mai, gbe ẹrọvrẹ eware iyoma mai, wọhọ epanọ ubu aruoriwo riẹ o rọ.”—Ẹf. 1:7.
19. Ẹvẹ oware nọ o via evaọ ẹdẹ nọ a kpe Jesu u re ro ru evaifihọ mai ga kpahe eruẹaruẹ Ebaibol?
19 Okenọ a vuẹ emọ Izrẹl nọ a kpe omogodẹ kẹ Ọnyavrẹ na, a vuẹ rae nọ a du wiri uvumọ ugbonwa riẹ hẹ. (Ọny. 12:46; Ik. 9:11, 12) Kọ ẹvẹ kpahe “Omogodẹ Ọghẹnẹ” nọ ọ rọ uzuazọ riẹ ta ahwo-akpọ no igbo na? (Jọn 1:29) A kare riẹ veghe kugbe igbulegbu ivẹ nọ e jọ tabọ tabọ riẹ. Ahwo Ju a mi Pailet udu re a wiri igbenwa imasa nọ a kare veghe na re a ruẹse kaki whu, keme a sae nyasiọ ae ba ehru ure na rite ẹdẹ avọ 15 ọrọ amara Nisan he, onọ o te jọ Ẹdijala ologbo. Isoja i wiri igbenwa igbulegbu ivẹ na, “rekọ nọ a [nyate] Jesu, nọ a ruẹ nọ o whu vẹre ino, a gbe wiri awọ riẹ hẹ.” (Jọn 19:31-34) Oyena o rọwokugbe oghẹrẹ nọ a je ru omogodẹ Ọnyavrẹ na, fikiere omogodẹ nana ọ jọ “uwoho” oware nọ o te via evaọ ẹdẹ avọ 14 ọrọ amara Nisan evaọ ukpe 33 C.E. (Hib. 10:1) U te no ere no, oware nọ o via ẹdẹ yena o jọ orugba ẹme nọ ọ rrọ Olezi 34:20, yọ onana u re ru omai fievahọ eruẹaruẹ Ebaibol.
20. Ohẹriẹ vẹ o rrọ Ehaa Ọnyavrẹ na gbe Emu Owọwọ Olori na?
20 Dede na, ohẹriẹ o rrọ Ehaa Ọnyavrẹ na avọ Emu Owọwọ Olori na. Orọnọ oghẹrẹ nọ ahwo Ju a je ru ekareghẹhọ Ọnyavrẹ na u dhesẹ nọ ere ilele Jesu a ti ru ekareghẹhọ uwhu riẹ hẹ. Evaọ obọ Ijipti ahwo Izrẹl a re ugboma omogodẹ na, rekọ a da azẹ riẹ hẹ. Onana u wo ohẹriẹ no oware nọ Jesu ọ vuẹ ilele riẹ. Ọ ta nọ ilele riẹ nọ i ti lele iei su “eva uvie Ọghẹnẹ,” a rẹ re ebrẹdi na jẹ da udi na nọ i dikihẹ kẹ ugboma gbe azẹ riẹ. Ma te ta kpahe onana ziezi evaọ uzoẹme nọ o rrọ aro na.—Mak 14:22-25.
21. Fikieme u ro fo re ma riẹ kpahe Ọnyavrẹ na?
21 Avro ọ riẹ hẹ, Ọnyavrẹ na yọ oware ulogbo jọ evaọ ikuigbe idibo Ọghẹnẹ, yọ ma sai wuhrẹ eware buobu noi ze. Fikiere, dede nọ ahwo Ju a jẹ hai ru Ọnyavrẹ na orọnikọ Ileleikristi hi, u fo nọ ma rẹ riẹ kpahe iẹe je wuhrẹ eware jọ noi ze keme o rrọ abọjọ ‘Ikereakere nọ Ọghẹnẹ o gie ẹwolo ku na.’—2 Tim. 3:16.
^ edhe-ẹme 5 Taure a te ti mu emọ Izrẹl kpohọ igbo Babilọn, a jẹ hai se amara ọsosuọ ahwo Hibru Ebib, rekọ uwhremu na a te je sei Nisan. Fikiere Nisan ma ti se amara yena evaọ uzoẹme nana.
^ edhe-ẹme 11 Nọ ọre o kiediwi no, ẹdẹ avọ 15 ọrọ amara Nisan o te muhọ, onọ u dhesẹ nọ Ẹdijala jọ evaọ ukpe yena (nọ o jọ Ẹdẹ-Ọmaha) o kie fihọ ẹdẹ ọsosuọ nọ a re ro ru Ehaa Ebrẹdi nọ E Kare Ẹvi, onọ a jẹ hai ru evaọ ẹdijala re. Fikinọ Ẹdijala ivẹ na i kie fihọ ẹdẹ ọvona, a te sei Ẹdijala “ologbo.”—Se Jọn 19:31, 42.