Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Oke vẹ Jesu ọ rọ “vuẹ izi nọ e rọ uwou-odi ovuẹ”? (1 Pita 3:19)

O wọhọ nọ oke jọ nọ Jesu ọ kparoma no uwhu ze no ọ rọ ta kẹ izi imuomu na nọ ẹdhoguo o bi bru ae tha.​—6/15, ẹwẹ-obe avọ 23.

Kọ Ọghẹnẹ o wo “ọriẹwẹ”? (Iruẹru 10:34)

Otofa ẹme Griki nọ a jọ etenẹ fa nọ “ọriẹwẹ” na u dhesẹ epanọ ohwo “o re rri ovao omọfa.” Ọghẹnẹ o re rri ovao ahwo jọ siọ edekọ ba fiki ovioma rai hi, yọ o re rri uyẹ hayo epanọ ohwo o wo ugho te gbe he.​—7/1, ẹwẹ-obe avọ 

Oke vẹ họ oke ẹdhoguo Jesu nọ a rẹ rọ riẹ igodẹ gbe ewe na? (Mat. 25:32)

O te jọ oke uye ulogbo na nọ Jesu ọ te rọ ze ti guẹdhọ ahwo, nọ a tẹ raha egagọ erue no.​—7/15, ẹwẹ-obe avọ 6.

Oke vẹ otu nọ o re ru umuomu nọ a fodẹ evaọ ọtadhesẹ Jesu orọ eka gbe ikpoko na a te rọ viẹ jẹ riakọ? (Mat. 13:36, 41, 42)

A ti ru ere evaọ etoke uye ulogbo na nọ a tẹ riẹ nọ a te sae vabọ no ọraha na ha.​—7/15, ẹwẹ-obe avọ 13.

Oke vẹ họ oke orugba ẹme Jesu kpahe odibo nọ o wo ẹrọwọ avọ areghẹ na? (Mat. 24:45-47)

Orọnikọ oke Pẹntikọst 33 C.E. ẹme na o ro muhọ erugba ha, rekọ no umuo ukpe 1914 vrẹ. Jesu ọ rehọ ọrigbo na mu evaọ ukpe 1919 re ọ rẹrote uwou riẹ, onọ o kẹre te Oleleikristi kpobi nọ o bi wo erere no iwuhrẹ Ọghẹnẹ ze.​—7/15, ẹwẹ-obe avọ 21-23.

Oke vẹ Jesu ọ te rọ rehọ ọrigbo nọ o wo ẹrọwọ na mu uzou eware riẹ kpobi?

Jesu ọ te rehọ iẹe mu uzou eware riẹ kpobi evaọ etoke uye ulogbo na nọ utu ọrigbo na a te zihe ruọ ibe isu kugbei no evaọ obọ odhiwu.​—7/15, ẹwẹ-obe avọ 25.

Kọ fikieme ma rọ ta nọ Jihova o mukpahe ifoto-ẹbẹba iriwo?

Ọ riẹ nọ ifoto-ẹbẹba iriwo o rẹ wha enwoma se ohwo. O you omai, jẹ gwọlọ thọ omai no enwoma, yọ ọ gwọlọ nọ orọo gbe uviuwou mai e raha kuotọ họ.—9/1, ẹwẹ-obe avọ 6.

U te no obufihọ Ọghẹnẹ no, eme ọfa o fi obọ họ kẹ Isẹri Jihova nọ i bu te egba ivẹ gbe ikpe esa (230) nọ e zọ evaọ etoke onya uthethei nọ a nya no uwou-odi Sachsenhausen?

Dede nọ ohọo gbe ẹyao u ru oma lọhọ ae, a jẹ tuduhọ ohwohwo awọ evaọ onya na.​—8/15, ẹwẹ-obe avọ 18.

Fikieme ikuigbe onya nọ emọ Izrẹl a jọ fa Ethẹ Jọdan vrẹ ruọ Ẹkwotọ Eyaa na o rọ rrọ oware uduotahawọ kẹ omai?

Dede nọ ethẹ na o su vọ okenọ oware na o rọ via, Jihova ọ da ame na ji re idibo riẹ a ruẹse fa ruọ abọdekọ. Avro ọ riẹ hẹ, oware nọ o via na u ru ẹrọwọ gbe evaifihọ nọ a wo kpahe Jihova ga. Yọ ikuigbe na e rẹ sae kẹ omai uduotahawọ re.​—9/15, ẹwẹ-obe avọ 16.

Kọ fikieme ma jẹ re ohrọ amọfa? (Kọl. 3:13)

Ugogo ẹjiroro nọ o rọ gwọlọ nọ ma rọ vrẹ amọfa họ, Jihova ọ be rọ vrẹ omai no eva ze. Oware ofa họ, ma te siọ amọfa ba eruthọ ẹdẹjọ họ, nọ o te gwọlọ nọ a rọ vrẹ omai.—11/1, ẹwẹ-obe avọ 13.

Ẹvẹ eruẹaruẹ nọ e rrọ obe Maeka 5:5 kpahe emọ-ivie gbe ithuru-igodẹ na i bi ro rugba nẹnẹ?

Ma ruẹ nọ ekpako ukoko na nọ i bi fi obọ họ kẹ idibo Ọghẹnẹ ruẹrẹ oma kpahe kẹ ohọre nọ o rrọ obaro tha na họ ‘ithuru-igodẹ ihrẹ gbe emọ ivie eree’ nọ a fodẹ evaọ obe Maeka 5:5 na.​—11/15, ẹwẹ-obe avọ 20.