1, 2. Fikieme eviehọ e rọ dotọ fia nẹnẹ, kọ oghẹrẹ vẹ a bi ro whowho ae? (Rri uwoho nọ o rrọ emuhọ uzoẹme na.)

IWHAYO gbe eviẹhọ e da akpọ fia nẹnẹ. Onana u re gbe omai unu hu, keme Ebaibol na o dhesẹ nọ Ẹdhọ yọ ọviẹahwohọ, yọ ọye o bi su akpọ nana. (1 Tim. 2:14; 1 Jọn 5:19) Nọ akpọ omuomu nana o bi te ekuhọ no na, ofu Setan o bi dhe ẹgẹga “keme ọ riẹ nọ oke riẹ o re kpẹkpẹre.” (Evia. 12:12) Fikiere ma rẹ sai rẹro nọ ahwo nọ Setan ọ be kpọ a rẹ vọ avọ eviẹhọ, yọ a te daoma gaga re a ruẹse viẹ idibo Jihova họ.

² Ẹsejọ ma rẹ jọ ekwakwa awhusi yo eme nọ a be rọ viẹ ahwo họ kpahe oware nọ Isẹri Jihova a rọwo gbe erue nọ a bi gu ruru ai. A be rọ ebe-usi, etẹlẹvisiọne, gbe Itanẹte whowho erue. Onana u ru nọ otujọ a be rọ rọwo erue itieye na.

3. Eme ọ rẹ sai fi obọ họ kẹ omai whaha eviẹhọ?

³ Eva e be were omai nọ ma wo Ebaibol na nọ o rrọ “erere rọ kẹ . . . ọkpọvio,” onọ u re fi obọ họ kẹ omai whaha eviẹhọ ọwegrẹ mai na, Setan. (2 Tim. 3:16) U wuzou re ma wuhrẹ no oware nọ Pọl ukọ na o kere kpahe Ileleikristi ikpe udhusoi-ọsosuọ obọ Tẹsalonika ze, enọ a viẹ otu rai jọ họ rọwo eware nọ e rrọ uzẹme he. Ọ vuẹ rai nọ a “kuvẹ hẹ re iroro rai i reghe.” (2 Tẹs. 2:1, 2, NW) Eme ma rẹ sai wuhrẹ no ohrẹ Pọl na ze, kọ ẹvẹ ma sai ro fi ei họ iruo nẹnẹ?

4. Ẹvẹ a rọ kareghẹhọ Ileleikristi obọ Tẹsalonika kpahe “ẹtha Ọnowo na,” kọ ẹvẹ a be rọ kareghẹhọ omai nẹnẹ re?

⁴ Pọl ọ jọ ileta ọsosuọ nọ o kere se ukoko obọ Tẹsalonika ta kpahe “ẹtha Ọnowo na.” Ọ gwọlọ nọ ẹtha ẹdẹ Ọnowo na ọ ruọ inievo na ọza ha. Ukpoye, nọ a rrọ “emọ elo” na, ọ ta udu họ ae awọ nọ a “siọ owezẹ ba [jẹ] jọ aruro.” (Se 1 Ahwo Tẹsalonika  5:1-6.) Nẹnẹ, ma be hẹrẹ okenọ a te rọ raha egagọ erue akpọ-soso nọ a se Babilọn Ologbo na. Onana o te jọ emuhọ ẹdẹ ologbo Jihova. U woma gaga nọ ma be rọ ẹmẹrera wo otoriẹ oghẹrẹ nọ Jihova o bi ro ru ẹjiroro riẹ gba. Eva e be jẹ were omai nọ ukoko na o be hae rọ ẹruoke kareghẹhọ omai eware nọ i re fi obọ họ kẹ omai jaja aro vi. Ma te bi muẹrohọ eware nana nọ a be kareghẹhọ omai n’oke t’oke na, u re ru ọtamuo mai jọ gaga, onọ ma gwọlọ ro ‘dhe idhe efuafo jẹ rehọ ẹgba iroro mai gọ’ Ọghẹnẹ.—Rom 12:1, NW.

5, 6. (a) Eme Pọl ọ ta ẹme kpahe evaọ ileta avivẹ nọ o kere se Ileleikristi obọ Tẹsalonika? (b) Eme Ọghẹnẹ ọ te rọ ẹkwoma Jesu Kristi ru kẹle na, kọ enọ vẹ u fo nọ ma nọ omamai?

⁵ Nọ Pọl ukọ na o kere ileta ọsosuọ na se Ileleikristi obọ Tẹsalonika no, u kri hi o te kere ileta avivẹ se ae. Ọ jọ ileta nana ta kpahe uye nọ o be tha, okenọ Jesu o ti guẹdhọ “enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi.” (2 Tẹs. 1:6-8) Evaọ uzou avivẹ orọ ileta nana, Pọl ọ ta nọ otujọ evaọ ukoko na a jẹ ruawa kpahe ẹdẹ Jihova te epanọ a je ro roro nọ u totọ no oke yena. (Se 2 Ahwo Tẹsalonika 2:1, 2.) Umutho eware jọ ọvo Ileleikristi yena a riẹ kpahe oghẹrẹ nọ Jihova o bi ro ru ẹjiroro riẹ gba, nwane wọhọ epanọ Pọl ọ ta kpahe aruọruẹ oke yena nọ: “Eriariẹ avọ aruọruẹ mai egba unu hu; rekọ oke nọ onọ o gba-unu na o ze ino, kẹsena onọ o gba-unu hu o vẹ te vrẹ.” (1 Kọr. 13:9, 10) Dede na, ẹme nọ ẹzi Ọghẹnẹ ọ wọ Pọl, Pita gbe Ileleikristi itieye na efa kere se inievo na oke yena u ru rai kru ẹrọwọ rai.

⁶ Re ọ sae kpọ eware vi, ẹzi Ọghẹnẹ ọ wọ Pọl ta nọ “ohwo uzioraha” na gbe ikọ erue e te roma via taure ẹdẹ Jihova ọ tẹ te ze. * Kẹsena evaọ ẹruoke, Olori na Jesu Kristi ọ vẹ te “raha” ahwo kpobi nọ a viẹhọ. Pọl ọ fodẹ oware nọ o soriẹ nọ a te rọ raha ae, inọ, “fiki epanọ a you uzẹme nọ u re siwi ai hi.”  (2 Tẹs. 2:3, 8-10) U fo nọ ma nọ omamai nọ: ‘Ẹvẹ me you uzẹme na te? Kọ mẹ be daoma wo otoriẹ okpokpọ nọ o be hae roma via evaọ emagazini mai nana gbe ebe efa nọ ọrigbo nọ o wo ẹrọwọ na o bi kere kẹ idibo Ọghẹnẹ evaọ akpọ-soso?’

7, 8. (a) Enwoma vẹ Ileleikristi ikpe-udhusoi ọsosuọ a rẹriẹ ovao dhe? (b) Kọ ovẹ Ileleikristi uzẹme a rẹriẹ ovao dhe nẹnẹ?

⁷ Evaọ uzẹme, u te no ikọ erue gbe iwuhrẹ erue rai no, eware efa e riẹ nọ e rẹ sae wha enwoma se Ileleikristi. Pọl o kere se Timoti nọ, “uyoyou kpahe igho oye họ owọ imuomu kpobi.” Ukọ na o dhesẹ nọ, ‘eguọlaguọlọ ugho o lẹliẹ otu jọ vru siọ orọwọ na ba jẹ rehọ inwe buobu duwu oma rai no.’ (1 Tim. 6:10) Ofariẹ, “iruo uwo” e te jọ oware enwoma n’oke t’oke.—Gal. 5:19-21.

⁸ Pọl ọ kẹ Ileleikristi obọ Tẹsalonika unuovẹvẹ ogaga kpahe enwoma nọ otu nọ ọjọ oria ofa se “ikọ erue” a rẹ sae wha ze. Enọ e rẹ ta “eware nọ e rẹ liẹliẹ ahwo yoma, [re a ruẹsi] si ilele lele oma rai” a jọ usu ahwo nana. (2 Kọr. 11:4, 13; Iruẹru 20:30) Jesu o jiri ukoko obọ Ẹfẹsọs uwhremu na fikinọ a “wo odiri kẹ ahwo omuomu hu.” Inievo obọ Ẹfẹsọs na a jẹ “jawọ” ahwo otiọye na nọ a se omarai Ileleikristi rekinọ a rrọ ikọ erue gbe eterue. (Evia. 2:2) Pọl ọ jọ ileta avivẹ riẹ nọ o kere se inievo obọ Tẹsalonika ta nọ: “Imoni, enẹna ma rehọ odẹ Ọnowo mai Jesu Kristi ta kẹ owhai, re wha si oma no imoni edekọ nọ e be mọ oyẹlẹ.” Kẹsena ọ tẹ ta nọ inievo itienana a rẹ gwọlọ “ru iruo ho.” (2 Tẹs. 3:6, 10) Otẹrọnọ o gwọlọ nọ a siomano oghẹrẹ inievo itiena, a gbe du ta ha sọ ma re siomano otu nọ o bi zihe ruọ ikọ erue no. Ẹhẹ, o rẹ jọ oware enwoma gaga nọ ohwo o te kuomagbe inievo itieye na oke yena, yọ ere o rrọ nẹnẹ re.—Itẹ 13:20.

9. Eme ma jẹ yọroma nọ ohwo jọ ọ tẹ gwọlọ ta ẹme k’omai kpahe otoriẹ jọ nọ o wo kpahe eware nọ Ebaibol na o ruvẹ hẹ, hayo ta ẹme wọso ukoko na?

⁹ Ma be joma kẹle etoke uye ulogbo na gbe ekuhọ akpọ omuomu nana no, fikiere enẹna o mae gwọlọ nọ ma rẹ gaviezọ kẹ unuovẹvẹ nọ a kẹ Ileleikristi ikpe-udhusoi ọsosuọ na. Evaọ uzẹme, ma gwọlọ ‘rri aruoriwo Ọghẹnẹ vo ho,’ onọ o rẹ sai ru omai ku uvẹ nọ ma re ro wo uzuazọ ebẹdẹ bẹdẹ fiẹ. (2 Kọr. 6:1) Otẹrọnọ ohwo jọ nọ ma gbẹ be hai kpohọ iwuhrẹ ọ be gwọlọ nọ ma ta ẹme kugbei kpahe otoriẹ jọ nọ o wo kpahe eware nọ Ebaibol o ruvẹ hẹ, hayo eware nọ o roro nọ a bi ruthọ evaọ ukoko Ọghẹnẹ, o gwọlọ nọ ma rẹ yọrọ oma gaga kẹ ohwo otiọye na.—2 Tẹs. 3:13-15.

10. Iruemu anwae vẹ a ta udu họ Ileleikristi obọ Tẹsalonika awọ nọ a ru lele?

¹⁰ Pọl ọ ta udu họ ibe Ileleikristi riẹ nọ e rrọ obọ Tẹsalonika awọ nọ a ‘dikihẹ ga’ je ru lele eware nọ a wuhrẹ na. (Se 2 Ahwo Tẹsalonika 2:15.) Eware vẹ a se ‘iruemu anwae’ nọ a wuhrẹ na? Orọnikọ enọ otu egagọ erue a je wuhrẹ wọhọ ẹsenọ Ikereakere i no ze na ha. Ukpoye, Pọl ọ jẹ ta kpahe iwuhrẹ nọ ọyomariẹ gbe ikọ edekọ a wo no obọ Jesu ze, enọ Ọghẹnẹ ọ rehọ ẹkwoma ikọ na je wuhrẹ ahwo, yọ ibuobu iwuhrẹ yena e rrọ Ebaibol na nẹnẹ na. Pọl o jiri ibe Ileleikristi riẹ nọ e jọ obọ Kọrint, o kere se ai nọ: “Wha be kareghẹhọ omẹ ẹsikpobi, gbe epanọ  wha bi kru uruemu nọ me dhesẹ kẹ owhai.” (1 Kọr. 11:2) A rẹ sai fievahọ iwuhrẹ itieye na keme obọ Ọghẹnẹ i no ze.

11. Oghẹrẹ vẹ eviẹhọ e rẹ sai kpomahọ otujọ evaọ ukoko na?

¹¹ Okenọ Pọl o je kere se inievo obọ Hibru, o si iroro rai kpohọ idhere ivẹ nọ Oleleikristi ọ sai ro kie no ẹrọwọ na. (Se Hibru 2:1; 3:12.) Ọ ta kpahe ‘ereghe no’ gbe ‘ekie no.’ Okọ nọ o rrọ unueri o rẹ sai “reghe” hayo su no oria nọ o rrọ. Onana o rẹ via ẹmẹrera. Rekọ evaọ abọdekọ riẹ, ohwo ọ sai gele okọ riẹ no unueri. Iriruo ivẹ nana i dhesẹ oware nọ o rẹ sae via nọ ohwo ọ tẹ kuvẹ re a viẹe họ kie no orọwọ na.

12. Eware vẹ e rẹ sae raha usu mai kugbe Ọghẹnẹ nẹnẹ?

¹² O sae jọnọ ere o via kẹ inievo jọ evaọ obọ Tẹsalonika. Kọ ẹvẹ o rrọ nẹnẹ? Eware buobu e vọ riẹ nọ e rẹ sae raha oke mai kufiẹ. Dai roro kpahe unu euwa nọ ohwo ọ rẹ raha evaọ oria evuẹ Itanẹte, se jẹ kpahe fihọ evuẹ nọ a rọ ekọmputa vi ze, dhogbo arozaha eriosehọ hayo rri ighe arozaha evaọ etẹlivisiọne n’oke t’oke. Eware nana kpobi e rẹ sae rehọ iroro Oleleikristi je ru nọ o gbe ro wo ajọwha kẹ egagọ Ọghẹnẹ te epaọ ọsosuọ họ. Eme o re noi ze? O sai ru nọ olẹ ohwo na o rẹ rọ jọ thakpinọ ọ lẹ, o vẹ jẹ rehọ oke iwuhrẹ gbe usiuwoma ota riẹ. Ẹvẹ ma sae rọ whaha eware itiena nọ i gbe ro reghe iroro mai hi?

13. Wọhọ epanọ a ruẹaro riẹ, oghẹrẹ uruemu vẹ ahwo buobu a wo nẹnẹ, kọ eme o ti fi obọ họ kẹ omai kru ẹrọwọ mai?

¹³ Oware jọ nọ ma re ru họ, u fo nọ ma rẹ kareghẹhọ ẹsikpobi nọ ‘edẹ urere’ na ma rrọ na, jẹ riẹ nọ oware enwoma o rrọ nọ ma te bi kuomagbe otu nọ ọ be vro nọ edẹ urere na ma rrọ na. Pita ukọ na o kere kpahe oke mai na nọ: “Iseẹkoko e rẹ te tha avọ ẹkoko-ose, bi lele urusio iwo obọ rai. A nọ, ‘Bovẹ eya ẹtha riẹ na e rọ? Keme anhwọ okenọ esẹ na i kieruọ owezẹ na, eware kpobi e gbẹ rọ wọhọ epanọ e rọ nọ emuhọ ẹma akpọ na ze.’” (2 Pita 3:3, 4) Ma tẹ be hai se Ebaibol na je roro didi kpahe eware nọ ma se ẹsikpobi u ti fi obọ họ kẹ omai kareghẹhọ nọ ‘edẹ urere’ na ma ginẹ rrọ na. Ikọ erue nọ a ruẹaro rai na e roma via ikpe buobu nọ i kpemu no, yọ a gbẹ rrọ rite inẹnẹ. “Ohwo uzioraha” na ọ riẹ rite enẹna yọ ọ gbẹ be wọso idibo Ọghẹnẹ. Fikiere, o gwọlọ nọ ma rẹ jaja aro vi jẹ hae kareghẹhọ nọ ẹdẹ Jihova ọ kẹle no.—Zef. 1:7.

14. Ẹvẹ usiuwoma nọ ma rẹ ta ẹsikpobi o be rọ thọ omai?

¹⁴ Oware nọ o via kẹ inievo buobu no o kẹ imuẹro nọ ugogo oware nọ u re fi obọ họ kẹ omai jaja aro vi nọ iroro mai i gbe ro reghe he họ, usiuwoma ota nọ ma re kpohọ ẹsikpobi. Fikiere, nọ Jesu Kristi nọ o wo uzou ukoko na ọ ta kẹ ilele riẹ nọ a ta usiuwoma kẹ ahwo erẹwho kpobi je wuhrẹ ae re a koko ijaje riẹ, ọ jẹ kẹ ae ohrẹ nọ u ti fi obọ họ kẹ ae. (Mat. 28:19, 20) Ma tẹ be rọ ọwhọ ru iruo usiuwoma ota na u re dhesẹ nọ ma bi ru lele ohrẹ Jesu na. Kọ who roro nọ usiuwoma ota inievo obọ Tẹsalonika na o jọ orọ thakpinọ a nya hayo a wuhrẹ ahwo, wọhọ ẹsenọ a je ru iruo na avọ oma eho hayo elọhoma? Kareghẹhọ nọ Pọl o kere se ai nọ: “Wha za Ẹzi na dhe he. Wha jẹ [aruọruẹ] fiẹ hẹ.” (1 Tẹs. 5:19, 20) Eruẹaruẹ Ebaibol nọ ma be hai wuhrẹ kpahe je whowho  kẹ ahwo evaọ usiuwoma ota na i gine siuru gaga.

15. Eme ma rẹ sai wuhrẹ evaọ etoke egagọ uviuwou nọ i re fi obọ họ kẹ omai?

¹⁵ U gine fo nọ ma fi obọ họ kẹ ahwo uviuwou mai wo onaa usiuwoma ota. Inievo buobu a ruẹ nọ edhere jọ nọ a sai ro ru onana họ, a re wo abọjọ nọ a rẹ jọ wuhrẹ kpahe onaa usiuwoma ota evaọ etoke egagọ uviuwou rai. Wha te ruẹ nọ u re fi obọ họ re wha ta kpahe epanọ ahwo uviuwou na a sai ro zihe bru je fi obọ họ kẹ ohwo jọ nọ a duku nọ o wo isiuru. A sae jọ etoke egagọ uviuwou na jiroro oware nọ a rẹ ta kpahe nọ a tẹ wariẹ zihe bru ahwo na, uzoẹme nọ a roro nọ o te were ae, gbe okenọ u fo nọ a re ro zihe. Inievo jọ a rẹ rọ abọjọ oke egagọ uviuwou rai ta kpahe eware nọ a te jọ obọ ukoko wuhrẹ evaọ oka yena jẹ rọ ere ruẹrẹ oma kpahe. Kọ u wo eware efa jọ nọ whọ rẹ sai ru rọ ruẹrẹ oma kpahe kẹ iyo nọ whọ te kẹ evaọ obọ ewuhrẹ? O rẹ bọ ẹrọwọ ra ga nọ whọ tẹ be hai wobọ evaọ iwuhrẹ, onana u ti je ru nọ iroro ra i gbe ti ro reghe he. (Ol. 35:18) Wha tẹ be hai ru egagọ uviuwou o te thọ owhai no eme hayo iwuhrẹ erue gbe iroro avro.

16. Uvẹ-ọghọ vẹ u fo nọ Ileleikristi nọ a rọ ẹzi wholo na a rẹ rọ fiki riẹ sẹro ẹgba iroro rai?

¹⁶ Ma te roro kpahe oghẹrẹ nọ Jihova o bi ro fi obọ họ kẹ idibo riẹ wo otoriẹ eruẹaruẹ Ebaibol anwọ ikpe buobu ze na, ma rẹ ruẹ nọ eghale ilogbo e rrọ obaro hẹrẹ omai. Ileleikristi nọ a rọ ẹzi wholo nọ i gbe kiọkọ otọakpọ a te nyai kuomagbe Jesu evaọ obọ odhiwu. Onana yọ obọdẹ uvẹ-ọghọ nọ a rẹ rọ fiki riẹ dikihẹ ga jẹ sẹro ẹgba iroro rai. Ma rẹ sae ta ẹme nana nọ Pọl o kere se inievo obọ Tẹsalonika kẹ ae inọ: “Ma rẹ siọ Ọghẹnẹ ba eyero kẹse kẹse fiki rai hi, imoni, iyoyou Ọnowo na, keme . . . Ọghẹnẹ ọ ha owhai fihọ esiwo eva ẹfuọ gbe Ẹzi gbe uzẹme [evaọ] orọwọ” na.—2 Tẹs. 2:13.

17. Ẹme uduotahawọ vẹ o rrọ obe 2 Ahwo Tẹsalonika 3:1-5?

¹⁷ Epọvo na u fo nọ otu nọ o bi rẹro uzuazọ ebẹdẹ bẹdẹ evaọ aparadase otọakpọ a rẹ daoma re iroro rai e seba ereghe. Otẹrọnọ ẹruore otọakpọ who wo, hai roro kpahe ẹme nọ Pọl o kere se ibe Ileleikristi riẹ nọ a rọ ẹzi wholo evaọ obọ Tẹsalonika. (Se 2 Ahwo Tẹsalonika 3:1-5.) U fo nọ mai omomọvo ma rẹ hae kareghẹhọ uthubro yena ẹsikpobi. Pọl ọ ginẹ jọ ileta riẹ nọ o kere se inievo obọ Tẹsalonika kẹ omai unuovẹvẹ kpahe oghẹrẹ iroro nọ u fo nọ Ileleikristi a rẹ whaha. Onana yọ uthubro nọ u fo nọ Oleleikristi kpobi o re se gboja gaga nọ ma rrọ edẹ urere na.