Ọsẹ uviuwou jọ evaọ obọ Brazil ọ ta nọ: “Egagọ Uviuwou mai e rẹ daruọ omai oma te epanọ ma re ro ru ei ruọ aso nọ mẹ gbẹ ta nọ ma kuhọ họ.” Ọsẹ ọfa jọ evaọ obọ Japan ọ ta nọ ọmọzae riẹ nọ ọ rrọ ikpe 10 ọ rẹ kareghẹhọ oke he nọ a te bi ru egagọ uviuwou, ọ rẹ gwọlọ nọ a wuhrẹ vrẹ ọvo. Fikieme? Ọsẹ na ọ ta nọ: “Ọmọ na o wo ọwhọ kẹ ewuhrẹ na, keme o rẹ kẹe evawere gaga.”

Uzẹme riẹ họ, orọnikọ emọ kpobi a wo ọwhọ kẹ egagọ uviuwou ho, o rẹ tubẹ were ejọ họ. Fikieme? Ọsẹ jọ evaọ obọ Togo ọ ta nọ: “U fo nọ egagọ Jihova i re fou ohwo ehoo ho.” Otẹrọnọ o be hae fou otujọ ehoo, kọ o sae jọnọ oghẹrẹ nọ a bi ru egagọ uviuwou rai o be whae ze? Rọkẹ iviuwou buobu, egagọ uviuwou o be hae jọ ‘etoke oghọghọ’ wọhọ epanọ Aizaya ọ ta kpahe Ẹdijala.—Aiz. 58:13, 14.

Esẹ buobu a ruẹ vuhumu nọ re iviuwou rai e sae reawere egagọ uviuwou, o gwọlọ nọ etoke uwuhrẹ na ọ rẹ jọ sasasa. Oniọvo jọ nọ a re se Ralf nọ o wo emetẹ esa gbe ọmọzae ọvo ọ ta nọ egagọ uviuwou rai o rẹ wọhọ ẹsenọ a bi gbiku kugbe, ohwo kpobi o re wobọ evaọ ẹmeọta-kugbe na. Rekọ uzẹme riẹ họ, ẹsejọ o rẹ jọ bẹbẹ re a ru ewuhrẹ na evaọ oghẹrẹ nọ ohwo kpobi ọ rẹ rọ jariẹ wobọ. Oni jọ ọ ta nọ: “Ẹsejọ, me re wo ẹgba te epanọ me re ro ru egagọ uviuwou were te epanọ mẹ gwọlọ họ.” Kọ whọ sai fi ẹbẹbẹ otiọye na kparobọ?

Ọsẹ jọ evaọ obọ Germany nọ o wo emọ ivẹ ọ ta nọ, “o gwọlọ nọ ma rẹ hai ru inwene.” Oni jọ nọ a re se Natalia nọ o wo emọ ivẹ ọ ta re nọ: “Oware nọ o be mai fi obọ họ kẹ omai evaọ egagọ uviuwou mai họ idhere sa-sa nọ ma be hai ro ru ei.” Iviuwou buobu a rẹ ghale iruẹru egagọ uviuwou rai fihọ abọ sa-sa. Cleiton, ọsẹ jọ evaọ obọ Brazil nọ o wo emọ ivẹ nọ e rrọ izoge  ọ rọwokugbe ẹme yena, ọ ta nọ: “Oyena u re ru ewuhrẹ na jọ sasasa nọ ohwo kpobi o je wuhrẹ oware jọ noi ze, u re je ru nọ ahwo uviuwou na kpobi a rẹ rọ jariẹ wobọ.” Nọ esẹgbini a tẹ ghale oke ewuhrẹ na fihọ abọ sa-sa, u re fi obọ họ kẹ ae tẹrovi ẹgwọlọ emọ na ọvuọvo, maero nọ a tẹ kpako vi ohwohwo gaga. Esẹgbini a rẹ sae ta ẹme kpahe ẹgwọlọ omomọvo uviuwou na, yọ a rẹ sai ru inwene nọ a tẹ be salọ oware nọ a ti ro ru egagọ uviuwou na gbe oghẹrẹ nọ a ti ro ru ei.

Idhere sa-sa vẹ iviuwou jọ a bi ro ru egagọ uviuwou rai? Otujọ ọ rẹ so ile ro mu egagọ uviuwou rai họ. Oniọvo-ọmọzae obọ Mexico jọ nọ a re se Juan ọ ta nọ: “Oyena u re ru omamai jọ sasasa jẹ ruẹrẹ iroro mai kpahe kẹ oware nọ ma bi ti wuhrẹ na.” Ahwo uviuwou riẹ a rẹ salọ ile nọ i kiekpahe oware nọ a ti wuhrẹ evaọ owọwọ yena.

Iviuwou jọ a re se eria Ebaibol jọ kugbe. A rẹ ghale ẹme ahwo sa-sa nọ e rrọ oria Ebaibol nọ a bi se na kẹ omomọvo uviuwou na se. Ọsẹ jọ evaọ obọ Japan ọ ta nọ oghẹrẹ isase utiona o jariẹ oma oghẹrẹ jọ evaọ oke ọsosuọ. Rekọ eva e jẹ were emọ ivẹ riẹ inọ ọsẹgboni rai a bi lele ai ru oware kugbe avọ evawere. Iviuwou jọ a rẹ tubẹ rọ ikuigbe Ebaibol ru edrama. Ọsẹ jọ nọ a re se Roger evaọ obọ South Africa nọ o wo emezae ivẹ ọ ta nọ emọ a re “muẹrohọ eware jọ evaọ ikuigbe Ebaibol nọ mai esẹgbini ma ruẹ hẹ.”

Oghẹrẹ ofa nọ a sai ro ru egagọ uviuwou họ, eruo oware jọ nọ a rẹ rọ ẹro ruẹ nọ u wobọ kpahe ikuigbe Ebaibol. A rẹ sai ku okọ Noa hayo bọ etẹmpol Solomọn evaọ etoke egagọ uviuwou na. O gwọlọ nọ a re ru ekiakiẹ re a tẹ te sai ku oware utioye. Wọhọ oriruo, ọmọtẹ obọ Asia jọ nọ ọ rrọ ikpe isoi avọ ọsẹgboni riẹ gbe oni-ologbo riẹ a jẹ jọ otuwou rai ru ẹwẹ-akpala arozaha nọ u re dhesẹ eria sa-sa nọ Pọl ukọ na ọ nya evaọ etoke erẹ imishọnare riẹ. Iviuwou efa jọ a ru ẹwẹ-akpala arozaha nọ u wo iwoho ikuigbe iruẹru nọ e rrọ obe Ọnyano. Ọmọzae obọ Togo jọ nọ a re se Donald nọ ọ rrọ ikpe 19 ọ ta nọ: “Idhere sa-sa nọ ma bi ro ru egagọ uviuwou mai u bi ru ewuhrẹ na gbe uviuwou mai jọ sasasa vi epaọ anwẹdẹ.” Kọ whọ sai roro kpahe oware jọ nọ o rrọ ikuigbe Ebaibol nọ wha re ru via evaọ etoke egagọ uviuwou rai nọ u re ru ei were vi epaọ anwẹdẹ?

Dede nọ idhere sa-sa nọ a re ro ru egagọ uviuwou i re ru ei were, o gwọlọ nọ ohwo kpobi evaọ uviuwou na ọ rẹ ruẹrẹ oma kpahe re a sai wo erere noi ze. Ẹsejọ ewuhrẹ na ọ rẹ bẹ emọ na, fikiere o gwọlọ nọ ọsẹ na ọ rẹ kareghẹhọ onana nọ ọ tẹ be salọ oware nọ a ti wuhrẹ, ọ vẹ jẹ ruẹrẹ oma kpahe ziezi. Ọsẹ jọ ọ ta nọ: “Nọ mẹ tẹ ruẹrẹ oma kpahe, ẹsiẹe uviuwou na kpobi o rẹ mai wo erere no ewuhrẹ na ze.” Ọsẹ jọ evaọ obọ Germany ọ ta nọ eka jọ taure ẹdẹ egagọ uviuwou na o te ti te, ọ rẹ vuẹ ahwo uviuwou riẹ oware nọ a ti ro ru egagọ uviuwou na kpahotọ. Ọsẹ obọ Benin Republic jọ nọ o wo emọ ezeza nọ e rrọ umuo ikpe 12 kpotọ, ọ ta nọ otẹrọnọ ividio ukoko na jọ a ti ro ru egagọ uviuwou na, ọ rẹ ruẹrẹ enọ kpahotọ. Evaọ uzẹme, oma oruẹrẹkpahe u wuzou kẹ egagọ uviuwou mai.

Nọ ahwo uviuwou a tẹ riẹ oware nọ a ti wuhrẹ taure oke egagọ uviuwou u te ti te, a sae hae ta ẹme kpahe iẹe, onọ u re ru ai wo ọwhọ kẹ egagọ uviuwou na. Nọ omomọvo o te wo abọ nọ o ti ru evaọ egagọ uviuwou na, o rẹ jariẹ oma wọhọ nọ ọye o bi ti ru egagọ uviuwou na.

O rrọ use-abọ kẹ iviuwou buobu re a ru egagọ uviuwou rai ẹsikpobi.

Esẹ buobu a re ru iruo no ohiohiẹ rite owọwọ re a sae rẹrote uviuwou rai. Wọhọ oriruo, ọsẹ jọ evaọ obọ Mexico ọ ta nọ ighọjọ ezeza ohiohiẹ yọ o no uwou kpohọ iruo no, o je zihe ze kọ ighọjọ eree owọwọ. Ẹsejọ o rẹ gwọlọ nọ a nwene oke Egagọ Uviuwou na fiki iruẹru ukoko na jọ.

Ghele na, o gwọlọ nọ o rẹ jọ ọtamuo mai inọ ma re ru egagọ uviuwou ẹsikpobi. Ọmọ ikpe ikpegbọvo jọ nọ a re se Loïs evaọ obọ Togo ọ ta kpahe ọtamuo nọ a ru inọ: “O tẹ make rọnọ ẹsejọ oware jọ o rẹ whae ze nọ ma gbẹ sai mu egagọ uviuwou mai họ evaọ oke nọ ma fihọ họ, egagọ uviuwou na i re vo omai hi.” U woma gaga nọ ahwo buobu a re ru egagọ uviuwou rai evaọ emuhọ ẹkpoka na. Otẹrọnọ oware jọ o whaha e rai nọ a gbẹ sai ru ei evaọ ẹdẹ nọ a fihọ họ, a ve fi ẹdẹ ọfa họ nọ a re ro ru ei evaọ ẹkpoka ọvona.

Wọhọ epanọ odẹ na “Egagọ Uviuwou” u dhesẹ, o rrọ abọjọ iruẹru nọ ma be rọ gọ Jihova. Jọ ahwo uviuwou ra kpobi a hae rehọ ‘igbenu rai’ jiri Jihova k’oka k’oka. (Hos. 14:2) Ajọ oke yena o jọ etoke oghọghọ kẹ ahwo uviuwou na kpobi, “keme evawere ỌNOWO na họ ogaga rai.”—Neh. 8:9, 10.