Evaọ ole nọ Devidi ovie Izrẹl oke anwae ọ so je ro jiri Ọnọma na, ọ ta nọ: “Mẹ gwọlọ ru orọeva ra, O Ọghẹnẹ mẹ; uzi ra o rọ udu mẹ.” (Ol. 40:8) Ghelọ ebẹbẹ kpobi nọ Devidi ọ rẹriẹ ovao dhe evaọ uzuazọ, o jẹ were iẹe re o ru oreva Ọghẹnẹ. Evaọ uzẹme, idibo Jihova efa e jariẹ nọ a wo evawere kpahe oreva riẹ uruo, orọnikọ Devidi ọvo ho.

Pọl ukọ na o dhesẹ nọ ẹme Olezi 40:8 na o kiekpahe Mesaya hayo Kristi na. O kere nọ: “Nọ Kristi ọ teze eva akpọ na, ọ tẹ ta nọ, ‘Iwẹegọ gbe idhe whọ guọlọ erae he, rekọ oma whọ ruẹrẹ kpahe kẹ omẹ; idhe-emahọ gbe iwẹegọ uzioraha who wo awere eva rai hi. Kẹsena mẹ jẹ ta nọ, “[Rri], mẹ ze ti ru o rọ eva ra, O Ọghẹnẹ,” wọhọ epanọ a kere kpahe omẹ eva obe na.’”—Hib. 10:5-7.

Okenọ Jesu ọ jọ otọakpọ, o jẹ hae were iẹe nọ ọ tẹ ruẹ emama Ọghẹnẹ, nọ ọ tẹ rrọ kugbe egbẹnyusu, je bi lele ai re emu. (Mat. 6:26-29; Jọn 2:1, 2; 12:1, 2) Rekọ oware nọ o mae jariẹe oja họ oreva Ọsẹ obọ odhiwu riẹ nọ o re ru, yọ oye o jẹ mai ru eva were iẹe re. Ọ tubẹ ta nọ: “Emu mẹ họ [re me ru] oreva Ọnọ O vi omẹ ze, jegbe re me ru iruo riẹ.” (Jọn 4:34; 6:38) O wuhrẹ ilele riẹ oware nọ o rẹ kẹ ohwo uvi evawere. Yọ ilele na a rọ evawere, unevaze gbe ọwhọ ta usiuwoma Uvie na kẹ amọfa.—Luk 10:1, 8, 9, 17.

Jesu ọ ta kẹ ilele riẹ nọ: “Wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai: ri, mẹ avọ owhai a gbẹ jọ kẹse kẹse, makọ te urere akpọ na.” (Mat. 28:19, 20) Onana u dhesẹ nọ ma rẹ ta usiuwoma kẹ ahwo evaọ oria kpobi nọ ma sae jọ ruẹ e rai, zihe bru enọ i wo isiuru, je wuhrẹ Ebaibol kugbe ai. Iruo nana e rẹ kẹ evawere gaga.

 Ahwo a make gaviezọ kẹ omai hayo a gaviezọ họ, oghẹrẹ ẹzi nọ ma wo kpahe iruo na o rẹ whae ze nọ ma sai ro wo evawere. Eme ọ rẹ wọ omai ruabọhọ usiuwoma ota na nọ ahwo a gbẹ maki wo isiuru kpahe ovuẹ mai hi? Keme ma riẹ nọ usiuwoma nọ ma rẹ ta gbe ahwo nọ ma re wuhrẹ re a zihe ruọ ilele Jesu, u re dhesẹ nọ ma you Jihova gbe erivẹ mai. Evaọ uzẹme, usiuwoma ota na o te wha esiwo se omai gbe enọ ma be ta kẹ. (Izik. 3:17-21; 1 Tim. 4:16) Joma ta kpahe eware jọ nọ i fiobọhọ kẹ inievo mai jọ nọ a rọ ruabọhọ iruo na avọ ajọwha evaọ ekwotọ nọ usiuwoma ota na o jọ rrọ bẹbẹ.

Emamọ iyẹrẹ i re noi ze nọ ma tẹ be nọ ahwo enọ nọ i fo evaọ usiuwoma ota. Evaọ ohiohiẹ ẹdẹjọ, oniọvo-ọmọtẹ mai jọ nọ a re se Amalia ọ ruẹ ọzae jọ nọ o bi se obe-usi evaọ ogege-eriosehọ jọ. Ọ tẹ nya bru rie jẹ nọe sọ o se ku emamọ usi jọ no evaọ obe-usi na. Nọ ọzae na ọ vuẹe nọ o ri ti se ku hu, Amalia ọ tẹ ta kẹe nọ, “Mẹ wha emamọ usi bru owhẹ ze kpahe Uvie Ọghẹnẹ.” Ẹme nana o ru ọzae na gaviezọ kẹ usiuwoma na, yọ ọ rọwo nọ a wuhrẹ Ebaibol kugbei. Amalia o mu uwuhrẹ Ebaibol họ kugbe imasa evaọ oria yena.

Oniọvo-ọmọtẹ ọfa jọ nọ a re se Janice o zihe oria iruo riẹ ruọ ẹkwotọ usiuwoma ota riẹ no. Okenọ oroiro oria na avọ ibe-oruiruo riẹ jọ a ta nọ uzoẹme jọ nọ a ruẹ evaọ Uwou-Eroro Na o were rai gaga, Janice ọ tẹ vuẹ ae nọ ọ te hae rehọ uvitha emagazini na se ai n’oke t’oke. Ere ọvona ọ jẹ rehọ emagazini se ibe-oruiruo riẹ ọfa jọ nọ o wo isiuru kpahe izoẹme sa-sa nọ e be hae romavia evaọ Uwou-Eroro gbe Awake! na. Onana u te ru nọ ibe-oruiruo riẹ ọfa jọ ọ rọ ta kẹe nọ ọ hae rehọ emagazini sei re. Janice ọ ta nọ, “Onana yọ oghale ulogbo nọ u no obọ Jihova ze.” Uwhremu na, ahwo 11 soso ọ jẹ hae rehọ emagazini se evaọ oria iruo riẹ n’oke t’oke.

Ọsẹro-ọnyawariẹ jọ ọ kẹ iwhowho-uvie jọ ohrẹ nọ, a tẹ ta usiuwoma kẹ ohwo no, a gbẹ hae ta kẹe nọ ẹdẹ ọfa a ti zihe ze ọvo ho. Ọ ta nọ ukpoye a sae nọ ohwo na nọ: “Kọ whọ gwọlọ nọ me dhesẹ epanọ ma re ru uwuhrẹ Ebaibol kugbe ahwo kẹ owhẹ?” hayo, “Ẹdẹ gbe oke vẹ whọ gwọlọ nọ me ro zihe ze re ma ta ẹme na haro?” Ọsẹro-ọnyawariẹ na ọ niyẹrẹ nọ, onaa nana u fiobọhọ kẹ inievo ukoko jọ nọ o riwi mu Ebe-Iwuhrẹ Ebaibol 44 họ evaọ ẹkpoka ọvo.

Nọ ma gbẹ be kuvẹ re edẹ buobu e ruemu taure ma te ti zihe bru ahwo nọ ma ta usiuwoma kẹ no ho, ewoma o re noi ze. Fikieme? Keme ma te ru ere, yọ ma bi dhesẹ nọ ma ginẹ gwọlọ fiobọhọ kẹ ahwo nọ a wo emamọ eva wo otoriẹ Ẹme Ọghẹnẹ. Nọ a nọ aye jọ oware nọ ọ rọ kuvẹ nọ Isẹri Jihova a wuhrẹ Ebaibol kugbei, ọ kuyo nọ: “Me  mu uwuhrẹ Ebaibol họ keme mẹ ruẹ nọ a wo ọdawẹ gbe uyoyou kẹ omẹ.”

Nọ oniọvo-ọmọtẹ jọ nọ a re se Madaí ọ nwani nwrotọ no Isukulu Ekobaro Oke-Kpobi no, o te mu Ebaibol họ ewuhrẹ kugbe ahwo 15 yọ ọ rehọ 5 efa kẹ inievo efa bi wuhrẹ. Ejọ rai a te mu iwuhrẹ họ ẹnyaze ẹsikpobi. Eme o fiobọhọ kẹ Madaí mu uwuhrẹ Ebaibol họ kugbe ahwo bu te ere? Isukulu na i fiobọhọ kẹe riẹ nọ ọ gbẹ be maki di ahwo nọ a wo isiuru họ uwou hu, ọ hai zihe ghele bẹsenọ o re di ai họ. Oniọvo ọfa jọ nọ o fiobọhọ kẹ ahwo buobu riẹ uzẹme Ebaibol na no ọ ta nọ: “Mẹ ruẹ nọ re ma sai fiobọhọ kẹ ahwo nọ a gwọlọ riẹ Jihova, o gwọlọ nọ ma re zihe bru ai n’oke t’oke.”

Re ma sai wo izihebro gbe ebe-iwuhrẹ Ebaibol, o gwọlọ omodawọ mi omai gaga. Rekọ omodawọ yena u te oware ovo ho nọ a tẹ rehọ iẹe wawo erere nọ o re noi ze. Nọ ma te bi wobọ ziezi evaọ iruo usiuwoma ota Uvie na, ma ti fiobọhọ kẹ ahwo “riẹ uzẹme na,” re a sai wo esiwo. (1 Tim. 2:3, 4) Yọ a rẹ ruẹ obọ evawere nọ onana o rẹ wha se omai hi.