O JỌ ukpe 1923. Ahwo a vọ ọgwa arozaha nọ a re se Drama and Music Conservatory evaọ ẹwho São Paulo. Brọda George Young ọ be kẹ ovuẹ, yọ a be fa ẹme na fihọ ẹvẹrẹ Portugal. Ahwo nọ a bu te egba isoi gbe ikpe eree gbe isoi (585) nọ a jariẹ ẹdẹ yena a jẹ romatotọ gaviezọ. A jẹ rọ okwakwa jọ dhesẹ eria Ebaibol nọ Brọda Young o je se nọ a fa fihọ ẹvẹrẹ Portugal evaọ oghẹrẹ nọ e rẹ rọ romavia gbaladha evaọ ugbẹhẹ. Nọ ọ kẹ ovuẹ na no, a tẹ ghale omobe na, Millions Now Living Will Never Die! kẹ ahwo kpobi evaọ ẹvẹrẹ Oyibo, Portugal, Germany, gbe Italy. Ovuẹ ogbotu na o jọ ziezi. A jẹ ta ẹme kpahe iẹe evaọ eria sa-sa. Edẹ ivẹ nọ i lele i rie, ahwo a tẹ wariẹ vọ ọgwa na kẹ ovuẹ ogbotu ofa. Rekọ eme ọ wha onana kpobi ze?

Evaọ ukpe 1867, Sarah Bellona Ferguson avọ uviuwou riẹ a kwa no America kpohọ Brazil. Evaọ 1899, nọ Sarah o se ebe ukoko na jọ nọ oniọvo ọmaha riẹ ọ wha no America sei evaọ obọ Brazil, o te vuhumu nọ o duku uzẹme na no. Fikinọ ọ gwọlọ gbe se ebe ukoko na, ọ tẹ yare nọ a hai vi Uwou Eroro Na sei n’oke t’oke. Iwuhrẹ Ebaibol na e were riẹ te epanọ o ro kere ileta se Brọda C. T. Russell. Ọ jọ ileta na ta nọ ọyomariẹ nọ ovuẹ Ebaibol na u t’obọ na yọ “imuẹro nọ i dhesẹ nọ ovuẹ na o rẹ sai te ohwo kpobi obọ ghelọ oria nọ ọ rrọ kpobi kẹhẹ.”

Sarah Ferguson ọ jẹ daoma vuẹ amọfa kpahe iwuhrẹ Ebaibol, rekọ o jẹ kẹe uye inọ uvumọ ohwo ọ riẹ hẹ nọ o ti fiobọhọ kẹe avọ ahwo uviuwou riẹ gbe amọfa nọ a gwọlọ riẹ uzẹme na evaọ Brazil. Evaọ ukpe 1912, Ebẹtẹle obọ Brooklyn o tẹ vuẹe nọ ohwo jọ ọ be wha omobe-ovẹvẹ na, Where Are the Dead? buobu ziọ São Paulo evaọ ẹvẹrẹ Portugal. Evaọ ukpe 1915, ọ ta nọ o jẹ hai gbei unu ẹsikpobi inọ Emọ-Uwuhrẹ Ebaibol na buobu a bi rẹro nọ a te rehọ ai kpohọ odhiwu kẹle. Fikiere o te kere ileta rọ ta oware nọ o riẹe eva inọ: “Kọ eme ọ te via kẹ ahwo Brazil gbe South America soso? . . . Wha tẹ  riẹ epanọ South America ọ rro te evaọ akpọ na, wha te ruẹ nọ iruo ivuẹvu na e gbẹ vọ otọ.” Iruo ivuẹvu na e gbẹ ginẹ vọ otọ.

Oware wọhọ ukpe 1920, izoge Brazil eree nọ i re bi okọ Oyibo, a wẹriẹ ẹwho New York obọ America, yọ a jọ etẹe kpohọ iwuhrẹ ukoko evaọ okenọ a jẹ ruẹrẹ okọ-ẹmo ulogbo rai nọ o raha. Nọ a zihe kpohọ ẹwho nọ a re se Rio de Janeiro evaọ Brazil, a tẹ jẹ vuẹ amọfa kpahe eware nọ a wuhrẹ no Ebaibol ze. U kri hi, evaọ Asa 1923, Brọda George Young nọ ọ jọ ọsẹro ọnyawariẹ ọ tẹ ziọ ẹwho Rio de Janeiro, jẹ ruẹ ahwo buobu nọ a gwọlọ wuhrẹ kpahe Ọghẹnẹ. O te ru ọruẹrẹfihotọ epanọ a rẹ rọ fa ebe ukoko na sa-sa fihọ ẹvẹrẹ Portugal. Kẹsena Brọda Young o te kpohọ ẹwho São Paulo, ahwo nọ a jọ ẹwho yena a bu te idu egba ezeza (600,000). Obei ọ jọ kẹ ovuẹ jẹ ghale omobe kẹ ahwo wọhọ epanọ ma fodẹ evaọ obọ emuhọ na. Ọ ta nọ: “Fikinọ mẹ ọvo mẹ jariẹ oke yena, ebe-usi mẹ jẹ mai ro whowho ovuẹ Uvie na. Evuẹ ogbotu nana e jọ erọ ọsosuọ nọ ma rọ odẹ I.B.S.A. kẹ evaọ Brazil.” *

Uwou-Eroro Akpegbivẹ 15, 1923 o niyẹrẹ kpahe Brazil nọ: “Ma tẹ kareghẹhọ nọ ẹdẹ ọsosuọ amara Azeza iruo Uvie na i ro muhọ evaọ obọ Brazil, gbe nọ uvumọ obe o jariẹ oke yena ha, ma rẹ ruẹ nọ Olori na ọ ginẹ ghale iruo na gaga no.” Iyẹrẹ na e tẹ jẹ ta nọ Brọda Young ọ kẹ evuẹ ogbotu ivẹ evaọ udevie 21 nọ a kẹ evaọ São Paulo no umuo Azeza 1 rite Azie 30 ọrọ ukpe 1923, yọ ahwo nọ a gaviezọ kẹ evuẹ nana kpobi a bu te idu esa gbe egba ezeza (3,600). Ovuẹ Uvie na o tẹ jẹ rọ ẹmẹrera te eria sa-sa evaọ ẹwho Rio de Janeiro. Evaọ umutho emerae jọ ọvo, a kẹ ahwo ebe ukoko na nọ i bu te idu ihrẹ (7,000) evaọ ẹvẹrẹ Portugal. U te no ere no, ukpe ovo yena a ro mu Uwou-Eroro na họ ẹfa fihọ ẹvẹrẹ Portugal, yọ uvitha Akpegbọvo rite Akpegbivẹ 1923 o jọ orọ ọsosuọ.

Brọda George Young ọ tẹ nyabru Sarah Ferguson, Uwou-Eroro na o ta kpahe iweze na nọ: “Oniọvo-ọmọtẹ na ọ tẹ nyaze otuwou na, rekọ ọ sae ta ẹme ọvo okioke yena ha fiki akpọ nọ o gbe rie unu. O te kru Brọda Young obọ, tọ ovao vi ei jẹ ta nọ, ‘Kọ ọsẹro ọnyawariẹ ọ ginẹ ziọ uwou mẹ na?’” U kri hi, tei te emọ riẹ jọ a tẹ họ-ame. Anwọ ikpe 25 nọ i kpemu ọ be rọ gwọlọ họ-ame. Uwou-Eroro Aria 1, 1924 o ta nọ ahwo 50 a họ-ame evaọ Brazil, yọ ibuobu rai ahwo ẹwho Rio de Janeiro.

Enẹna nọ ikpe 90 e ruemu no na, ma re gbe du nọ họ inọ: “Kọ eme ọ te via kẹ ahwo Brazil gbe South America soso?” Isẹri Jihova nọ i bu vi idu egba ihrẹ gbe ikpe ezeza (760,000) a be ta usiuwoma evaọ Brazil enẹna. Yọ a be rọ evẹrẹ Portugal, Spain, gbe efa sa-sa ta usiuwoma na evaọ South America. Sarah Ferguson ọ ginẹ ta gba evaọ ukpe 1915 nọ ọ ta nọ, ‘Iruo ivuẹvu na e gbẹ vọ otọ.’—Iruẹru mai erọ oke nọ u kpemu evaọ Brazil.