Ẹsejọhọ whọ riẹ ahwo jọ nọ orọo rai o fa no. O sae ginẹ jọ ere keme erọo buobu e be fa nẹnẹ. Wọhọ oriruo, ekiakiẹ jọ nọ a ru evaọ Poland i dhesẹ nọ ahwo nọ a rrọ ikpe 30 nọ orọo rai u te oware wọhọ ikpe esa rite ikpe ezeza no, erọo ibuobu rai e be fa. Dede na, orọnọ ahwo nọ a rrọ ikpe nana ọvo oware nana o be via kẹ hẹ.

Ukoko jọ nọ a re se Institute for Family Policy evaọ obọ Spain o niyẹrẹ nọ: “Ekiakiẹ jọ nọ a ru i dhesẹ nọ a tẹ ghale ahwo nọ a rọo no [evaọ Europe] kpohọ abava, abọvo erọo na e te fa.” Ere ọvona o rrọ evaọ erẹwho efa nọ i rovie aro no.

Eme ọ rẹ whae ze nọ ohwo o je wo iroro ethọthọ okenọ orọo riẹ o tẹ fa? Aye jọ nọ ọ rẹ kẹ ahwo ohrẹ kpahe orọo evaọ obọ Europe ọ ta nọ: “Orọo-ofa u re dhesẹ kẹ akpọ nọ usu ọzae avọ aye na o fa no, yọ onana o rẹ da gaga.” Aye na ọ ta re nọ, ẹsibuobu “ofu o re dhe ohwo na, ọ rẹ vioja, oma o rẹ vuẹe, yọ o re roro nọ ẹruore ọ gbẹ rrọ kẹe he.” Ẹsejọ, onana o rẹ whae ze nọ ọ rẹ rọ jọ udu riẹ roro nọ u ti woma re o tube thuru whu. “Nọ okọto o tẹ fa orọo no, ohwo nọ orọo riẹ o fa na ọ rẹ rẹriẹ ovao dhe iroro ethọthọ efa. O re roro nọ o gbe wo ohwo hayo oware ovo ho, iroro nọ e rẹ sae jariẹ udu họ: ‘Enẹna nọ orọo mẹ o fa no na, kọ ẹvẹ ahwo a ti rri omẹ ? Eme mẹ rrọ uzuazọ ru?’”

Oniọvo-ọmọtẹ jọ nọ a re se Ewa ọ ta kpahe epanọ o jariẹ oma ikpe jọ nọ i kpemu inọ: “Nọ orọo mai o fa no, oma o jẹ vuomẹ gaga okenọ ahwo nọ ma gbẹ rrọ okegbe gbe ibe-iruiruo mẹ a jẹ hai dhesẹ omẹ ‘aye nọ ọzae ọ se.’ Yọ o jẹ hai ru eva dha omẹ gaga. Mẹ ọvo mẹ jọ ọsẹ gbe oni kẹ emọ esese ivẹ nọ e jọ omẹ obọ.” * Adam nọ ọ jọ ọkpako ukoko ikpe ikpegbivẹ nọ a jẹ hae kẹ adhẹẹ ziezi ọ ta epanọ o jariẹ oma nọ orọo rai o fa no inọ: “Ẹsejọ ofu ọ jẹ hai dhe omẹ keme me ku ọghọ mẹ kufiẹ no, yọ o jẹ hae lẹliẹ omẹ gwọlọ siomano ahwo.”

Fikinọ a be ruawa inọ a riẹ epanọ odẹ ọ te jọ họ, o rrọ bẹbẹ kẹ otujọ nọ orọo rai o make fa kri no re a wariẹ wo iroro iwoma. A rẹ sai tube roro nọ amọfa a be daezọ rai hi. Ohwo jọ nọ ọ rẹ jọ ebe-usi kere kpahe orọo ọ ta nọ okenọ orọo o tẹ fa no, o rẹ gwọlọ nọ ahwo nọ orọo rai o fa na “a nwene uruemu rai je wuhrẹ epanọ ae ọvo a re ro ku ebẹbẹ rai họ.”

Stanisław nọ orọo riẹ o fa re ọ ta nọ: “Nọ orọo mẹ avọ aye mẹ o fa, ọ jẹ k’omẹ uvẹ ruẹ emetẹ ivẹ mẹ hẹ. Onana o tẹ lẹliẹ omẹ roro nọ uvumọ ohwo  o gbe wo ọdawẹ kẹ omẹ hẹ, gbe nọ Jihova ọ gbẹ be daezọ mẹ gbe he. Uzuazọ u gbe je si omẹ urru hu. Nọ oke o be nyaharo na, mẹ tẹ te ruẹ nọ me je roro thọ gaga.” Oniọvo-ọmọtẹ jọ nọ a re se Wanda nọ orọo riẹ o fa re ọ jẹ ruawa gaga kpahe epanọ odẹnotha ọ te jọ, ọ ta nọ: “Me je roro nọ oke o be nyaharo na, amọfa, makọ ibe Ileleikristi mẹ dede a te gbẹ daezọ mẹ avọ emọ mẹ hẹ. Rekọ obọnana me bi ro vuhumu nọ inievo na a gine fiobọhọ kẹ omẹ avọ emọ mẹ gaga okenọ mẹ jẹ daoma epanọ emọ na a rẹ rọ daji edhere Jihova na.”

Eme ahwo nana i re fiobọhọ kẹ owhẹ riẹ nọ oma o rẹ jọ ahwo jọ ọkọkora nọ orọo rai o tẹ fa no. A rẹ sai roro nọ a gbe fioka ha, inọ amọfa a ti gbe se ai gboma ha. A rẹ sae jẹ fo amọfa. O rẹ tubẹ whae ze nọ a re ro roro nọ inievo ukoko na a wo ọdawẹ hẹ. Rekọ oware nọ o via kẹ Stanisław avọ Wanda na u dhesẹ nọ ahwo nọ orọo rai o fa no a re vuhumu uwhremu na nọ inievo nọ e rrọ ukoko na a be daezọ rai. Evaọ uzẹme, ibe Ileleikristi a daoma gaga no evaọ ẹruorote inievo nọ orọo rai o fa no, o tẹ make rọnọ inievo itienana a be hai muẹrohọ omodawọ nana ẹsiẹsiẹ hẹ.

Kareghẹhọ nọ ghelọ epanọ ma daoma te kẹhẹ, ahwo nọ orọo rai o fa a rẹ jọ ọkora n’oke t’oke. Inievo-emetẹ a rẹ mai wo ọkora je roro nọ umutho ahwo jọ ọvo a be daezọ rai. Alicja ọ ta nọ: “Ikpe eree e ruemu no anwẹnọ orọo mẹ o rọ fa na. Ghele na, me re gbe roro ẹsejọ nọ me fioka ha. Evaọ oke utionana, o rẹ jọ omẹ oma nọ akpọ o kuomẹ no, u ve ru nọ me re ro kpohọ oria mẹ sa nyae viẹ.”

Dede nọ eware nọ ma jọ etenẹ ta na e rẹ sae via kẹ ohwo nọ orọo riẹ o fa, Ebaibol na ọ ta nọ u fo ho re ohwo ọ jọ orọ obọriẹ. Nọ ohwo o te gbobọnẹ ujaje nana, o rẹ sae whae ze nọ o re ro “mukpahe oziẹ okiẹrẹe kpobi.” (Itẹ 18:1) Dede na, u fo nọ ohwo nọ ọ rrọ ọkora ọ rẹ kareghẹhọ nọ o rrọ oware areghẹ hẹ re aye ọ hae nya bru ọzae hayo re ọzae ọ hae nya bru aye kẹ ohrẹ hayo omosasọ, keme ọ tẹ be hai ru ere o rẹ sae wha isiuru obẹlẹ ze.

Ibe Ileleikristi mai nọ orọo rai o fa no a rẹ sae jọ ọkora, dheva, ruawa, je tube roro nọ ohwo ọvo ọ be daezọ rai hi. Ma tẹ riẹ nọ a rẹ sai wo ebẹbẹ itiena, yọ o rẹ jọ bẹbẹ kẹ ae re a fi ai kparobọ, u fo nọ ma rẹ daoma fiobọhọ kẹ ae jẹ rọ ere rọ aro kele Jihova. (Ol. 55:22; 1 Pita 5:6, 7) O rẹ sai mu omai ẹro nọ obọ kpobi nọ ma fihọ kẹ ae o te were ae gaga. Ẹhẹ, a te ruẹ nọ ohwo ọ rẹ sae ginẹ jọ ukoko na wo obufihọ mi uvi egbẹnyusu.—Itẹ 17:17; 18:24.