Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Oke vẹ a re ro kpe omogodẹ iwẹ-ọnyavrẹ na evaọ ẹdẹ avọ 14 ọrọ Amara Nisan na?

Efafa Ebaibol jọ e ta nọ “oke owọwọ” a re ro kpe omogodẹ na, koyehọ taure oria kpobi u te ti muebi, nọ ọre o te kiediwi no. (Ọny. 12:6)—12/15, ẹwẹ-obe avọ 18-19.

Ithubro Ebaibol vẹ e rẹ sai fiobọhọ kẹ izoge jẹ emamọ iroro?

Esa jọ họ (1) Kake gwọlọ Uvie Ọghẹnẹ gbe ẹrẹreokie riẹ. (Mat. 6:19-34) (2) Fiobọhọ kẹ amọfa re whọ rọ ere wo evawere. (Iruẹru 20:35) (3) Rọ evawere gọ Jihova evaọ oke uzoge ra. (Ọtausi. 12:1)—1/15, ẹwẹ-obe avọ 19-20.

Oke vẹ họ oke ehaa ‘orọo Omogodẹ na’? (Evia. 19:7)

A ti ru ‘ehaa orọo omogodẹ na’ nọ Jesu Kristi o te fi ẹmo riẹ re no, koyehọ nọ a tẹ raha Babilọn Ologbo na no je fi ẹmo Amagẹdọn no.—2/15, ẹwẹ-obe avọ 10.

Eme ọ soriẹ nọ ahwo Ju ikpe-udhusoi ọsosuọ a je ro “re ẹro” Mesaya na? (Luk 3:15)

Ma sae ta gbiae he inọ ahwo oke Jesu a wo otoriẹ eruẹaruẹ Daniẹl kpahe Mesaya na wọhọ epanọ ma wo otoriẹ rai nẹnẹ. (Dan. 9:24-27) Dede na, o sae jọnọ a yo ovuẹ nọ ukọ-odhiwu na o whowho kẹ ithuru-igodẹ na hayo ẹme nọ Anna ọruẹaro aye na ọ ta okenọ a wọ ọmọboba na Jesu ziọ etẹmpol na. U te no ere no, ebuẹva-isi a nyaze te gwọlọ “Ovie Ju nọ a yẹ na.” (Mat. 2:1, 2) Uwhremu na, Jọn Ọhọahwo-Ame na ọ jẹ vuẹ ahwo nọ Kristi na ọ te romavia kẹle.—2/15, ẹwẹ-obe avọ 26-27.

Eme ma rẹ daoma ru nọ Ee mai ọ rẹ rọ jọ Ee ẹsikpobi? (2 Kọr. 1:18)

Uzẹme, oware jọ o sae ginẹ gba omai họ nọ o rẹ lẹliẹ omai va oware nọ mai avọ omọfa jọ ma ta mu. Rekọ u fo nọ ma tẹ ya eyaa jọ, ma rẹ dawo ẹgba mai kpobi re ma ruẹ nọ ma koko eyaa na.—3/15, ẹwẹ-obe avọ 32.

Eme o re fiobọhọ kẹ owhẹ whaha ifoto-ẹbẹba iriwo?

Eware esa jọ nọ e rẹ sai fiobọhọ kẹ owhẹ họ: (1) Nọ who te gbẹro ku iwoho ọfariẹ, ku ovao ra kufiẹ ababọ oke oraha. (2) Sẹro iroro ra re whọ hai roro kpahe emamọ eware jẹ lẹ se Ọghẹnẹ. (3) Sẹro owojẹ ra re whọ siọ oria Itanẹte nọ a re jo dhesẹ ifoto-ẹbẹba ba ekpohọ, jẹ whaha ifimu ọfariẹ nọ who re rri.—5/1, ẹwẹ-obe avọ 8-10.

Ebẹbẹ vẹ nọ a rẹro rai hi e rẹ sae romavia nọ Oleleikristi ọ tẹ nyasiọ ahwo uviuwou riẹ ba kpohọ ukane orẹwho ofa nyae kọ okọ?

Nọ esẹgbini avọ emọ rai a gbẹ be rria kugbe he, o rẹ sae wha ọkora ze jẹ lẹliẹ uviuwou raha kuotọ. O rẹ sae lẹliẹ eva esẹgbini na dha emọ na. Yọ ọzae-avọ-aye a gbẹ rrọ kugbe ohwohwo ho o rẹ sai ru nọ a re ro mu usu obẹlẹ họ kugbe amọfa, onọ o rẹ sai su kpohọ ẹnwae-obro.—4/15, ẹwẹ-obe avọ 19-20.

Enọ ene vẹ u fo nọ ma rẹ rọ kiẹ omamai rri nọ ma tẹ rrọ usiuwoma ota?

Amono mẹ be te nyae ta usiuwoma kẹ na? Diẹse mẹ be te jọ ta usiuwoma kẹ ae na? Oke vẹ o mai fo nọ mẹ rọ ta usiuwoma kẹ ae? Oghẹrẹ vẹ u fo nọ mẹ rọ ta usiuwoma kẹ ae?—5/15, ẹwẹ-obe avọ 12-15.