KATHERINE ọ whẹro evaọ obọ America, yọ ọ họ-ame okenọ ọ jọ ikpe 16. Ọ jẹ rọ ajọwha ta usiuwoma na rekọ umutho ahwo jọ ọvo a jẹ hae gaviezọ kẹ ovuẹ Uvie na. Ọ ta nọ: “Me se kpahe ahwo buobu nọ a lẹ se Ọghẹnẹ inọ o vi ohwo jọ se ai nọ o re fiobọhọ kẹ ai wuhrẹ kpahe iẹe. Ẹsikpobi mẹ rẹ ta nọ dodokọ mẹ rẹ nyaku ohwo otiọye, rekọ mẹ rẹ nyaku hu.”

Nọ Katherine ọ jọ ẹkwotọ yena te ikpe jọ no, ọ tẹ gwọlọ nọ ọ rẹ kwa kpohọ obonọ ahwo a te mae jọ gaviezọ kẹ ovuẹ Uvie na. Rekọ ọ jẹ ruawa sọ o te lọhọ kẹe re o ru ere. Anwẹnọ a ro yẹe na, ekpoka ivẹ ọvo o kperẹ siọ ahwo uviuwou riẹ ba no, yọ ẹro rai o je voi kẹdẹ kẹdẹ. Rekọ oware nọ o mae jariẹe oja họ epanọ o re ro fiobọhọ kẹ ahwo nọ a gwọlọ riẹ Jihova. Nọ o roro kpahe eria sa-sa nọ ọ rẹ sae kwa kpohọ no, o te kere se uwou ogha Guam, a te vi evuẹ nọ ọ gwọlọ sei. Evaọ Ahrẹ ọrọ ukpe 2007, nọ Katherine ọ jọ ikpe 26, ọ tẹ kwa kpohọ ẹwho Saipan, ukoliko jọ nọ o rrọ Abade ọ Pacific, onọ o rehọ emaele idu ezeza (6,000) thabọ no ẹwho riẹ. Iyẹrẹ vẹ i no ẹkwa riẹ na ze?

Nọ Katherine o te ẹkwotọ ọkpokpọ na no, u kri hi, ọ tẹ nyaku Doris, aye jọ nọ ọ rrọ ikpe 45 nọ ọ jẹ uwuhrẹ Ebaibol rehọ. Nọ a wuhrẹ izoẹme esa ọsosuọ nọ e rrọ obe ọ Ebaibol Wuhrẹ na no, oware jọ o tẹ jẹ kẹ Katherine uye. Ọ ta nọ: “Doris o wo isiuru kpahe uwuhrẹ na gaga, yọ mẹ gwọlọ kpe isiuru riẹ hẹ. Me ri ti wo ọmọ-uwuhrẹ Ebaibol dhobọ ẹdẹvo ho, fikiere me te je roro nọ ohwo nọ o wo emọ-uwuhrẹ Ebaibol ziezi nọ ẹsejọhọ ọ rrọ ọhwa Doris u fo nọ o re wuhrẹ iẹe. Katherine ọ tẹ lẹ se Jihova inọ o fiobọhọ kẹe ruẹ oniọvo-ọmọtẹ otiọye nọ ọ rẹ sai wuhrẹ Doris. Kẹsena ọ tẹ jiroro nọ ọ rẹ vuẹ Doris inọ omọfa jọ ọ te hai ru uwuhrẹ na.

Katherine ọ ta nọ: “Taure mẹ tẹ te vuẹe ẹme na, Doris ọ tẹ ta kẹ omẹ nọ ọ gwọlọ vuẹ omẹ ẹbẹbẹ jọ nọ o wo. Nọ ọ vuẹ omẹ no, mẹ tẹ ta kẹe kpahe epanọ Jihova o ro fiobọhọ kẹ omẹ okenọ me wo ọkpọ ẹbẹbẹ yena. O te yere omẹ.” Kẹsena aye na ọ tẹ ta kẹ Katherine nọ: “Jihova ọ be rọ owhẹ fiobọhọ kẹ omẹ na. Ẹdẹ ọsosuọ nọ whọ rọ ziọ uwou mẹ na, me je se Ebaibol na. Mẹ jẹ viẹ, jẹ lẹ Ọghẹnẹ nọ o vi ohwo jọ ze ti fiobọhọ kẹ omẹ wo otoriẹ Ebaibol na. Ẹsiẹe who ro kporo ẹthẹ na. Jihova ọ ginẹ kuyo olẹ mẹ.” Irui oviẹ i te je su no aro oniọvo-ọmọtẹ mai Katherine ze nọ Doris ọ jẹ ta ẹme na kẹe na. Katherine ọ ta nọ: “Ẹme nọ Doris ọ vuẹ omẹ na u dhesẹ nọ  Jihova ọ be kuyo olẹ mẹ na. Jihova ọ rọ ere dhesẹ kẹ omẹ nọ mẹ sae ruabọhọ obe-uwuhrẹ aye na.”

Doris ọ họ-ame evaọ 2010, yọ enẹna o wo emọ-uwuhrẹ Ebaibol buobu no. Katherine ọ ta nọ: “Mẹ sai fiobọhọ kẹ ohwo jọ zihe ruọ odibo Jihova no, eva e were omẹ gaga nọ oware nọ mẹ be gwọlọ anwẹdẹ na u te omẹ obọ no. Enẹna, Katherine ọ rrọ ọkobaro obọdẹ evaọ ukoliko Pacific nọ a re se Kosrae.

Inievo-emezae gbe inievo-emetẹ nọ i bu vi ẹgba ọvo (100) nọ e rrọ umuo ikpe 19 rite 79, a kwa kpohọ eria sa-sa nọ a jọ mae gwọlọ iwhowho-uvie no evaọ Micronesia. Erica nọ ọ kwa kpohọ Guam evaọ 2006 nọ ọ jọ ikpe 19, ọ ta ẹme nọ u dhesẹ epanọ inievo nana a rri ẹkwa otiọnana. Ọ ta nọ: “Oma o rẹ were owhẹ nọ whọ tẹ rrọ ọkobaro evaọ ẹkwotọ nọ ahwo nọ a gwọlọ wuhrẹ kpahe Ọghẹnẹ a dafia. Eva e were omẹ gaga nọ Jihova o ro fiobọhọ kẹ omẹ ruọ oghẹrẹ usiuwoma ota utionana. Onana họ oghẹrẹ uzuazọ nọ o mai woma kpaobọ.” Enẹna, Erica ọ rrọ ọkobaro obọdẹ evaọ ẹwho nọ a re se Ebeye, nọ o rrọ udevie ikoliko nọ a re se Marshall Islands. Dede na, re a kwa kpohọ orẹwho ofa kẹ usiuwoma ota u wo ebẹbẹ riẹ. Joma ta kpahe ebẹbẹ esa jọ gbe oghẹrẹ nọ inievo nọ e kwa kpohọ Micronesia a ro thihakọ rai.

Uzuazọ uyero. Oniọvo-ọmọzae jọ nọ a re se Simon nọ ọ rrọ ikpe 22, ọ kwa kpohọ ukoliko Palau evaọ 2007. Nọ o te obei, ọ tẹ ruẹ nọ ugho nọ ọ te hai wo evaọ okọ riẹ u te oware ovo ho nọ a tẹ rehọ iẹe wawo onọ ọ jẹ hai wo evaọ orẹwho riẹ, England. Ọ ta nọ: “Me wuhrẹ epanọ ohwo ọ rẹ nyẹ oma re ọ siọ oware nọ u si rie urru kpobi ba ẹdẹ. Enẹna mẹ rẹ salọ emuore nọ mẹ rẹ dẹ, yọ mẹ rẹ gwọlọ oria nọ eware e jọ mai ku. Nọ okwakwa oware mẹ jọ o tẹ raha, onọ o rrọ okpokpọ họ mẹ rẹ dẹ fihọ iẹe, yọ mẹ rẹ gwọlọ ohwo nọ o re fiobọhọ k’omẹ whẹe họ.” Ẹvẹ oghẹrẹ uzuazọ uyero utiona u ro fiobọhọ kẹe? Ọ ta nọ: “U fiobọhọ kẹ omẹ riẹ oware nọ u gine wuzou evaọ uzuazọ, gbe oghẹrẹ nọ mẹ sae rọ kẹnyẹ umutho nọ me wo ro yeri uzuazọ mẹ vrẹ. Mẹ be ruẹ imuẹro buobu nọ i dhesẹ nọ Jihova ọ be rẹrote omẹ. Anwọ ikpe ihrẹ ze nọ mẹ rọ rrọ ẹkwotọ nana ta usiuwoma na, ẹsikpobi mẹ be ruẹ emuore gbe oria nọ mẹ rẹ jọ.” Uzẹme, Jihova ọ rẹ sẹro otu nọ o bi ru ẹro rai lọhọ fikinọ a gwọlọ rọ iruo Uvie na karo.—Mat. 6:32, 33.

Ẹro ahwo uviuwou ohwo nọ o re vo ohwo. Erica ọ ta nọ: “Mẹ avọ ahwo uviuwou mẹ ma kpekpe gaga, fikiere mẹ jẹ ruawa nọ ẹro rai nọ o ti vo omẹ u ti ru nọ mẹ te sae rọ tẹrovi iruo usiuwoma ota na ha.” Kọ eme o ru rọ ruẹrẹ oma kpahe kẹ onana? Ọ ta nọ: “Taure mẹ tẹ te kwa, mẹ jọ Uwou-Eroro na se izoẹme sa-sa nọ e ta kpahe ẹro ahwo uviuwou nọ o re vo ohwo. Onana u gine fiobọhọ kẹ omẹ ruẹrẹ oma kpahe kẹ ẹbẹbẹ yena. Evaọ uzoẹme jọ nọ me se, oni jọ ọ ta kẹ ọmọtẹ riẹ kpahe ẹruorote Jihova nọ, ‘Jihova ọ te rẹrote owhẹ vi epanọ mẹ rẹ sae rẹrote owhẹ.’ Ẹme yena ọ ginẹ bọ omẹ ga.” Hannah avọ ọzae riẹ, Patrick, a kwa kpohọ ẹwho Majuro nọ o  rrọ udevie ikoliko nọ a re se Marshall Islands. Oware nọ u fiobọhọ kẹ Hannah thihakọ ẹro ahwo riẹ nọ o je voi họ, inievo ukoko riẹ nọ o tuoma họ ziezi. Ọ ta nọ: “Me re yere Jihova n’oke t’oke rọkẹ okugbe inievo akpọ-soso mai na, keme ae omarai yọ ahwo uviuwou mẹ re. Ogbẹrọ uketha rai hi, mẹ hẹ sai ru iruo usiuwoma ota na evaọ oria nọ a jọ mae gwọlọ iwhowho-uvie he.”

Ewo egbẹnyusu. Simon nọ ma fodẹ evaọ obehru na ọ ta nọ: “Who te kpohọ orẹwho ofa, enwene oware kpobi u re wo ohẹriẹ. Ẹsejọ mẹ tẹ make ta ẹme ehwẹ, ahwo a rẹ hwẹ hẹ keme a be sai wo otoriẹ ẹme mẹ hẹ.” Erica omariẹ ọ ta nọ: “Oke ọsosuọ, o jọ omẹ oma nọ me wo ohwo ho, rekọ oyena u fiobọhọ kẹ omẹ roro didi kpahe oware nọ mẹ ginẹ rọ fiki riẹ kwa nya. Orọnikọ erere nọ me ti wo mẹ rọ fiki riẹ kwa ha, rekọ fiki iruo nọ mẹ gwọlọ ru kẹ Jihova. Nọ oke o be nya na, me te ti wo obọdẹ egbẹnyusu nọ e rrọ ghaghae kẹ omẹ.” Simon ọ daoma gaga wuhrẹ ẹvẹrẹ Palauan, onọ u fiobọhọ kẹe “rovie eva” kẹ jẹ whomahọ inievo ukoko riẹ ziezi. (2 Kọr. 6:13) Eva riẹ e jẹ were inievo na gaga fiki ẹvẹrẹ na nọ ọ jẹ daoma wuhrẹ na. Uzẹme, nọ inievo nọ e kwa kpohọ orẹwho ofa obọ a tẹ be hai ru iruo kugbe inievo ukoko nọ a kwa nya na, a rẹ sae reawere usu okpekpe kugbe ohwohwo evaọ ukoko na. Irere efa vẹ otu nọ ọ fialoma via kẹ usiuwoma ota evaọ eria nọ a jọ mae gwọlọ iwhowho-uvie a rẹ sai wo?

Pọl ukọ na o kere nọ: ‘Ọnọ ọ kọ buobu ọye ọ rẹ kọrọ buobu.’ (2 Kọr. 9:6) Ẹme nana o gine kiekpahe otu nọ o bi ru iruo usiuwoma ota rai kẹre. Irere vẹ inievo nọ e kwa kpobọ Micronesia a bi wo?

Evaọ obọ Micronesia, uvẹ sa-sa o riẹ nọ inievo na a bi ro mu iwuhrẹ Ebaibol họ kugbe ahwo, a tẹ be jẹ ruẹ epanọ ahwo nọ a wuhrẹ Ẹme Ọghẹnẹ je fi ei họ iruo a bi ro wo ẹnyaharo evaọ ukoko na. Patrick avọ Hannah a kpohọ iruo usiuwoma ota na re evaọ ukoliko osese jọ nọ a re se Angaur nọ ahwo egba esa gbe ikpe ivẹ (320) ọvo a be rria. Nọ a jọ etẹe ta usiuwoma emerae ivẹ no, a tẹ nyaku aye jọ nọ ọyọvo ọ be yọrọ emọ riẹ. Aye na ọ rọwo nọ a wuhrẹ Ebaibol kugbei, kẹsena ọ tẹ jẹ uzẹme na rehọ je ru inwene ilogbo evaọ uzuazọ riẹ. Hannah ọ ta nọ: “Ẹsikpobi nọ ma te wuhrẹ obe kugbei no, nọ ma rrọ ehru ẹdhighere mai be dhẹ vrẹ, mẹ avọ ọzae mẹ ma re rri ohwohwo ovao, ma vẹ ta nọ: ‘Whẹ kobiruo, Jihova.’ Mẹ riẹ nọ Jihova ọ hae rọ edhere ọfa si aye nana ziọ ukoko riẹ, rekọ fikinọ ma be ta usiuwoma evaọ ẹkwotọ nọ a jọ mae gwọlọ iwhowho-uvie ma sai ro duku ei je fiobọhọ kẹe riẹ Jihova na. Onana yọ usu eware jọ nọ ma rọ ẹro ruẹ no nọ o be kẹ omai evawere gaga.” Wọhọ epanọ Erica ọ ta, “who te fiobọhọ kẹ ohwo riẹ Jihova, who re wo evawere nọ a rẹ sae ruẹ unu gbiku riẹ hẹ.”

Ma gbẹ gwọlọ iwhowho-uvie evaọ ekwotọ buobu. Kọ whọ sae kwa kpohọ obonọ a jọ mae gwọlọ iwhowho-uvie? Lẹ se Jihova re o fiobọhọ kẹ owhẹ wo isiuru nọ whọ rẹ rọ kwa kpohọ eria nọ a jọ mae gwọlọ iwhowho-uvie. Ta ẹme na kẹ ekpako ukoko na, ọsẹro okogho, hayo inievo nọ e kwa kpohọ ekwotọ itieye na no. Nọ who te mu omaa na họ ẹma no, kere se uwou ogha nọ o be rẹrote ẹkwotọ nọ whọ gwọlọ kwa kpohọ na re a vuẹ owhẹ eware efa kpahe onana. * Ẹsejọhọ whọ sai kuomagbe idu inievo buobu, te emaha te ekpako, te enọ e rọo no gbe enọ e re te rọo ho nọ a rọ unevaze fialoma via be “kọrọ buobu” jẹ be rọ ere wo evawere nọ i wo ibe he.