PITA ọ viẹ gaga okenọ ọ vro Jesu no. Dede nọ o te rehọ oke mi Pita re ọ wariẹ ruẹrẹ usu riẹ họ kugbe Ọghẹnẹ, Jesu ọ gwọlọ nọ ọ rẹ rehọ iẹe fiobọhọ kẹ amọfa. Fikiere Jesu ọ vuẹ riẹ nọ: “Oke nọ whọ wariẹ kurẹriẹ no who ve ru imoni ra ga.” (Luk 22:32, 54-62) Pita ọ wariẹ kruga uwhremu na je zihe ruọ omọvo ahwo nọ a kru ukoko Ileleikristi ikpe-udhusoi ọsosuọ na dikihẹ. (Gal. 2:9) Epọvo na re, oniọvo nọ o no ọkpako ukoko no ọ rẹ sae wariẹ wo uvẹ-iruo yena jẹ rọ evawere bọ ibe Ileleikristi riẹ ga evaọ ukoko na.

A si otujọ no ekpako no, yọ ẹsejọhọ onana o rẹ sai ru ai roro nọ a gbe wiruo ho. Julio * nọ ọ jọ ọkpako ukoko vrẹ ikpe 20 evaọ obọ South America ọ ta nọ: “Eme nọ mẹ jẹ hae ruẹrẹ họ, gbe inievo ukoko na nọ mẹ jẹ hae weze bru jẹ rẹrote o jọ abọjọ uzuazọ mẹ. Idudhe na uvẹ-iruo yena u te brudhe, o tẹ wọhọ nọ mẹ rrọ ababọ. Onana o wha edada ilogbo se omẹ.” Enẹna Julio ọ wariẹ zihe ruọ ọkpako no.

Jemis ukọ na o kere nọ: “Imoni mẹ, re egheghẹrẹ edawọ i te te owhai, wha rehọ iẹe avọ evawere.” (Jem. 1:2) Jemis ọ jẹ ta kpahe ebẹbẹ nọ sebaẹgba mai e rẹ sae wha se omai gbe enọ e rẹ sai te omai fiki ukpokpoma. Ọ ta kpahe isiuru omobọ-ohwo, ọriẹwẹ nọ a re dhesẹ gbe eware itieye efa. (Jem. 1:14; 2:1; 4:1, 2, 11) Nọ Jihova ọ tẹ whọku omai, o rẹ sae wha edada ze. (Hib. 12:11) Rekọ u fo re ma kuvẹ hẹ re ẹbẹbẹ otiọye na o ru nọ ma gbe ro wo evawere he.

Nọ a tẹ maki mi omai uvẹ-iruo nọ ma wo evaọ ukoko na, ma re gbe wo uvẹ nọ ma rẹ rọ kiẹ ẹrọwọ mai rri je dhesẹ uyoyou nọ ma wo kẹ Jihova. Ma rẹ jẹ sai roro kpahe oware nọ o wọ omai je ru  iruo yena. Kọ ma jẹ gwọlọ erere kẹ omamai, manikọ ma le utee yena fikinọ ma you Jihova je wo imuẹro nọ ọye o wo ukoko na yọ u fo nọ a rẹ rẹrote ukoko na ziezi? (Iruẹru 20:28-30) Inievo nọ e gbẹ be rọ evawere gọ Jihova dede nọ a si rai no ekpako no, a be rọ ere dhesẹ kẹ Setan gbe ahwo kpobi nọ a gine you Jihova.

Okenọ Ọghẹnẹ ọ whọku Devidi fiki uzioraha ulogbo riẹ, ọ jẹ ọwhọkuo na rehọ yọ Ọghẹnẹ ọ rọvrẹ riẹ. Devidi ọ so nọ: “O ghale ohwo nọ a rehọ izieraha riẹ oke nọ u kpemu vrẹ, gbe ọnọ a ruru umuomu riẹ. O ghale ohwo nọ ỌNOWO o bi kele umuomu họ kẹ hẹ, ọnọ eviẹhọ e rọ eva riẹ hẹ.” (Ol. 32:1, 2) Ọwhọkuo o ru Devidi fo, yọ ababọ avro oyena u ru rie jọ emamọ ọsẹro kẹ idibo Ọghẹnẹ.

Ẹsibuobu, inievo-emezae nọ e wariẹ zihe ruọ ekpako a rẹ riẹ iruo na ru vi epaọ ọsosuọ. Ọkpako otiọye jọ ọ ta nọ: “Obọnana mẹ mae riẹ epanọ mẹ rẹ rọ rẹrote otu nọ ọ nyathọ.” Ọkpako ọfa jọ ọ ta nọ: “Enẹna me rri uvẹ-iruo ọkpako nọ mẹ rrọ na ghaghae vi epaọ anwẹdẹ.”

Ọso-ilezi na ọ ta nọ: “Jihova ọ rẹ gwọlọ iruthọ ẹsikpobi hi.” (Ol. 103:9, NW) Fikiere ma re du roro vievie he inọ Ọghẹnẹ ọ rẹ gbẹ sai fievahọ ohwo nọ ọ raha uzi ulogbo ho. Ricardo nọ a si no ọkpako nọ ọ jọ evaọ ikpe buobu ọ ta nọ: “Oware nọ me ru na o da omẹ gaga. Fikinọ me je roro nọ me gbe te ohwo nọ ọ rẹ jọ ọkpako ho, u te ru nọ mẹ gbẹ jẹ rọ wariẹ le utee ọkpako ho. Me je roro nọ u gbe wo oware ovo nọ mẹ rẹ sai ru hu nọ amọfa a re ro fievahọ omẹ. Rekọ fikinọ mẹ rẹ gwọlọ fiobọhọ kẹ amọfa, mẹ jẹ sai ru uwuhrẹ Ebaibol kugbe ahwo, tuduhọ inievo na awọ evaọ obọ Ọgwa Uvie, jẹ hai lele ai kpohọ usiuwoma ota. Oyena u fiobọhọ kẹ omẹ nọ me ro wo udu, yọ enẹna mẹ wariẹ zihe ruọ ọkpako no.”

Nọ oniọvo-ọmọzae o te fi ẹgo họ eva kpahe amọfa, o rẹ sai ru nọ ọ gbẹ sae rọ jọ ọkpako ho. U re woma re ma rọ aro kele Devidi, ọnọ ọ dhẹ siọ Sọl ovie na ba fiki ihri-eriọ Sọl. Devidi o ru  Sọl kele he, makọ okenọ uvẹ na u rovie kẹe dede. (1 Sam. 24:4-7; 26:8-12) Okenọ Sọl o whu evaọ ẹmo, Devidi o weri, o tube sei avọ Jonatan ọmọzae riẹ, “i yoyou mẹ.” (2 Sam. 1:21-23) Devidi o fi ẹgo họ eva vievie he.

Otẹrọnọ who rri nọ ohwo jọ o kienyẹ owhẹ, who du fi ẹgo họ eva vievie he. Wọhọ oriruo, oniọvo-ọmọzae jọ nọ a re se William ọ jọ ọkpako te ikpe 30 evaọ Britain, okenọ a si ei no o te fi ẹgo họ eva kpahe ekpako jọ. Eme o fiobọhọ kẹ William wariẹ wo emamọ eriwo? Ọ ta nọ: “Obe Job nọ me se o kẹ omẹ uduotahawọ gaga. Otẹrọnọ Jihova o fiobọhọ kẹ Job ruẹrẹ usu riẹ họ kugbe egbẹnyusu esa riẹ, kiyọ ọ rẹ sai fiobọhọ kẹ omẹ ruẹrẹ usu mẹ họ kugbe ekpako na re.”—Job 42:7-9.

Otẹrọnọ whẹ ọvo who no ọkpako ukoko, u ti woma gaga re who roro kpahe oware nọ o lẹliẹ owhẹ ru ere. Kọ o sae jọnọ ebẹbẹ obọra e wha riẹ ze? Manikọ eware efa e ruọ owhẹ oja uwhremu na vi uvẹ-iruo ọkpako? Kọ sebaẹgba amọfa e lẹliẹ udu whrehe owhẹ? Oghẹrẹ kpobi nọ o rrọ kẹhẹ, kareghẹhọ nọ okenọ whọ jọ ọkpako whọ mai ro wo uvẹ nọ who re ro fiobọhọ kẹ inievo na. Eme nọ whọ jẹ hai ru e jẹ hẹ kẹ ae ọbọga, a jẹ hai wo uduotahawọ no oriruo ra ze, yọ iweze ra i fiobọhọ kẹ ai thihakọ ebẹbẹ rai. Iruo nọ who je ru nọ whọ jọ ọkpako na i ru eva were Jihova wọhọ epanọ i je ru eva were owhẹ re na.—Itẹ 27:11.

Jihova o fiobọhọ kẹ inievo-emezae jọ wariẹ wo evawere gbe isiuru nọ a rẹ rọ wariẹ jọ ekpako evaọ ukoko na. Otẹrọnọ whẹ ọvo o no ọkpako hayo a si owhẹ no, whọ sae wariẹ le utee na. (1 Tim. 3:1) Pọl o “seri olẹ” họ kẹ Ileleikristi obọ Kọlọsi hi re a sai wo eriariẹ egbagba kpahe oreva Ọghẹnẹ, a vẹ sai “yeri uzuazọ, nọ u fo rọ kẹ Ọnowo na, onọ o rẹ weriẹe.” (Kọl. 1:9, 10) Otẹrọnọ whọ wariẹ zihe ruọ ọkpako ukoko, lẹ se Jihova re o fiobọhọ kẹ owhẹ wo ẹgba, odiri gbe evawere. Evaọ edẹ urere nana, idibo Ọghẹnẹ a gwọlọ obufihọ ekpako na re a sai dikihẹ ga ziezi evaọ egagọ Ọghẹnẹ. Kọ whọ sai ru imoni ra ga? Kọ u no owhẹ eva ze nọ who re ru ere?