MA BE rria etoke nọ ọ mai yoma evaọ ikuigbe ohwo-akpọ. (2 Tim. 3:1-5) Kẹdẹ kẹdẹ ma be rẹriẹ ovao ku eware nọ e rẹ sae raha usu mai kugbe Jihova. Jesu ọ ruẹaro kpahe etoke obẹbẹ nana, ọ tẹ jẹ kẹ ilele riẹ imuẹro inọ a ti wo uduotahawọ nọ u ti fiobọhọ kẹ ae thihakọ te urere. (Mat. 24:3, 13; 28:20) Onana u ru nọ ọ rọ rehọ ọrigbo nọ a re fievahọ mu re ọ rehọ emu iwuhrẹ Ọghẹnẹ ko ae ‘evaọ ẹruoke.’ —Mat. 24:45, 46.

Anwọ ukpe 1919 nọ a rọ rehọ ọrigbo nọ a re fievahọ mu na, ima ahwo buobu nọ i no evẹrẹ sa-sa ze a kurẹriẹ ziọ ukoko Ọghẹnẹ no, yọ ọrigbo na ọ be rọ emu iwuhrẹ Ọghẹnẹ ko ae. (Mat. 24:14; Evia. 22:17) Dede na, orọnọ evẹrẹ kpobi a fa ebe mai fihọ no ho, yọ orọnọ ohwo kpobi o wo okwakwa ekọmputa nọ ọ sai ro se ebe mai hi. Wọhọ oriruo, izoẹme gbe ividio nọ a rẹ jọ jw.org ọvo ruẹ na, evẹrẹ buobu i wo rai hi. Kọ onana u dhesẹ nọ emu iwuhrẹ Ọghẹnẹ nọ o re fiobọhọ kẹ ohwo kruga evaọ egagọ Ọghẹnẹ na o bi te ahwo otiọnana obọ họ? Re ma sae kuyo onọ nana gbagba, joma kiyo enọ ene jọ.

Okenọ Setan ọ ta kẹ Jesu nọ o zihe itho ruọ ebrẹdi, Jesu ọ ta kẹe nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” (Mat. 4:3, 4) Eva Ebaibol na ẹme Ọghẹnẹ ọ rrọ. (2 Pita 1:20, 21) Fikiere Ebaibol na họ ugogo oria nọ ma rẹ jọ ruẹ emu nọ Ọghẹnẹ ọ be rọ ko omai na.—2 Tim. 3:16, 17.

Ukoko Jihova o fa Ebaibol New World Translation of the Holy Scriptures na soso hayo abọjọ riẹ fihọ evẹrẹ nọ i bu vrẹ udhozeza (120) no, yọ a gbẹ be fae fihọ evẹrẹ efa kukpe kukpe. U te no Ebaibol New World Translation of the Holy Scriptures na no, Ebaibol efa buobu e riẹ nọ a fa omarai kpobi hayo abọjọ rai fihọ evẹrẹ nọ i bu te idu buobu no re. Ẹnyaharo nana ọ rọwokugbe oreva Jihova, keme ọ gwọlọ nọ “ahwo kpobi a wo usiwo, re a ze te riẹ uzẹme na.” (1 Tim. 2:3, 4) Yọ fikinọ “e nọ a ma na kpobi ovo u dhere eva aro” Jihova ha, u mu omai ẹro nọ o bi si enọ i wo eva ezi kpobi ziọ ukoko riẹ jẹ be rọ emu iwuhrẹ riẹ rọ ko ae.—Hib. 4:13; Mat. 5:3, 6; Jọn 6:44; 10:14.

Re ohwo ọ ruẹse bọ ẹrọwọ riẹ ga, orọnikọ o re se Ebaibol na ọvo ho. O gwọlọ nọ o re wo otoriẹ oware nọ o se je fi ei họ iruo. (Jem. 1:22-25) Ọwharọ obọ Ẹtiopia jọ o vuhu onana mu evaọ ikpe-udhusoi ọsosuọ. O je se Ikereakere na evaọ okenọ Filip ọtausiuwoma na ọ nọe nọ: “Whọ riẹ epanọ who re se na?” Ọwharọ na o te yo kẹe nọ: “Ẹvẹ mẹ rẹ sae rọ riẹ, ogbẹrọnọ ohwo jọ o re dhesẹ otọ riẹ kẹ omẹ?” (Iruẹru 8:26-31) Filip o te fiobọhọ kẹe wo otoriẹ Ẹme Ọghẹnẹ gbagba. Oware nọ ọwharọ na o wuhrẹ u duobọ tei udu te epanọ ọ rọ họ-ame. (Iruẹru 8:32-38) Epọvo na ebe mai i re fiobọhọ kẹ omai wo otoriẹ Ẹme Ọghẹnẹ gbagba. Eware nọ ma se evaọ ebe na i duobọte omai gaga no, e tẹ jẹ be kẹ omai ọwhọ nọ ma bi ro fi eware nọ ma wuhrẹ họ iruo.—Kọl. 1:9, 10.

Jihova ọ be rọ ẹkwoma ebe ukoko na ko idibo riẹ, yọ a be re eva vọ. (Aiz. 65:13) Wọhọ oriruo, Uwou-Eroro Na nọ a fa fihọ evẹrẹ nọ i bu vrẹ egba ivẹ gbe ikpe (210) no na, u bi ru eruẹaruẹ Ebaibol vẹ, bi ru omai wo otoriẹ eware ididi nọ e rrọ Ebaibol na, o tẹ jẹ be kẹ omai ọwhọ nọ ma re ro fi ithubro Ebaibol họ iruo. Emagazini Awake! nọ a fa fihọ evẹrẹ nọ e joma bu te ẹgba ọvo (100) no na, u bi wuhrẹ omai kpahe emama Jihova ziezi, u te je bi ru omai riẹ idhere sa-sa nọ ma sai ro fi ithubro Ebaibol họ iruo. (Itẹ 3:21-23; Rom 1:20) Ọrigbo nọ a re fievahọ na ọ be rọ evẹrẹ nọ i bu vi egba ezeza gbe ikpe eree (680) kere ebe no Ebaibol ze. Kọ whọ ruẹrẹ oke fihọ nọ who re ro se Ebaibol na kẹdẹ kẹdẹ? Kọ whọ be hai se emagazini nọ e be hai kpozi gbe ebe ekpokpọ kpobi nọ a fa fihọ ẹvẹrẹ ra nọ a be hai siobọno kukpe kukpe?

U te no ebe nọ ukoko Jihova u bi kere no, o be ruẹrẹ omaa-ẹmeọta sa-sa họ no Ebaibol ze nọ a re ro ru eme evaọ etoke iwuhrẹ gbe ikokohọ mai. Kọ whọ be hae reawere evuẹ ogbotu, edrama, idhesẹvia gbe ekiẹriwo evaọ etoke omakugbe mai? Jihova ọ be ginẹ rọ emamọ emu iwuhrẹ riẹ ko omai ziezi.—Aiz. 25:6.

Vievie. Ẹsejọ idibo Jihova jọ a rẹ sai wo emu iwuhrẹ Ọghẹnẹ vi efa, onana u re gbe omai unu hu. Fikieme? Roro kpahe ikọ Jesu. Jesu o je ru eware vẹ kẹ ikọ ikpegbivẹ riẹ na vi ilele riẹ edekọ evaọ ikpe-udhusoi ọsosuọ. (Mak 4:10; 9:35-37) O make jọ ere na, emu iwuhrẹ Ọghẹnẹ ọ jẹ kare ilele edekọ na ha; utho nọ u fo nọ a re wo u je te ae obọ.—Ẹf. 4:20-24; 1 Pita 1:8.

Ma rẹ jẹ kareghẹhọ re inọ orọnikọ eware kpobi nọ Jesu ọ ta je ru evaọ otọakpọ a kere fihọ ebe usiuwoma na ha. Jọn ukọ na o kere nọ: “Eware ibuobu efa jọ [e jariẹ] re nọ Jesu o ru; enọ re a te kere ai kpobi, me roro nọ akpọ na dede ọ sae gba ebe nọ a he ro kere ai hi.” (Jọn 21:25) Dede nọ ilele Jesu evaọ ikpe-udhusoi ọsosuọ na a riẹ kpahe Jesu vi omai, ma riẹ eware buobu kpahe iẹe ghele. Jihova o ru re ma riẹ kpahe Jesu te epanọ ma sai ro lele ithihi riẹ.—1 Pita 2:21.

Whọ sai je roro kpahe ileta nọ ikọ na a je vi se ikoko Ileleikristi ikpe-udhusoi ọsosuọ. U wo ileta Pọl jọ nọ a kere fihọ Ebaibol na ha. (Kọl. 4:16) Kọ ma sae ta nọ ma wo emu iwuhrẹ Ọghẹnẹ ziezi hi fikinọ ileta yena ọ rrọ Ebaibol ho? Ijo. Jihova ọ riẹ oware nọ ma gwọlọ, yọ ọ kẹ omai eware nọ e rẹ sai fiobọhọ kẹ omai dikihẹ ga evaọ egagọ riẹ.—Mat. 6:8.

Nẹnẹ, idibo Jihova jọ a bi wo emu iwuhrẹ Ọghẹnẹ vi efa. Kọ umutho ebe jọ ọvo a fa fihọ ẹvẹrẹ ra no? Otẹrọ ere, riẹ nọ Jihova o wo ọdawẹ kẹ owhẹ. Daoma se ebe yena, yọ otẹrọnọ ukoko ẹvẹrẹ nọ whọ rẹ mai wo otoriẹ riẹ o riẹ, hai kuomagbei kẹ iwuhrẹ. Jọ u mu owhẹ ẹro nọ Jihova o ti fiobọhọ kẹ owhẹ dikihẹ ga ziezi evaọ egagọ riẹ.—Ol. 1:2; Hib. 10:24, 25.

Whọ rẹ sae jọ oria evuẹ Itanẹte mai se emagazini gbe ebe mai efa. Whọ rẹ jẹ jọ etẹe ruẹ izoẹme sa-sa nọ e rẹ sai fiobọhọ kẹ ezae-avọ-eyae, izoge gbe esẹgbini nọ emaha e rrọ obọ. Iviuwou sa-sa a be rọ izoẹme nana ru Egagọ Uviuwou, yọ a bi wo erere noi ze. U te no ere no, whọ rẹ jọ etẹe ruẹ iruẹru obọdẹ mai jọ, wọhọ omakokohọ inievo nọ i bi nwrotọ no isukulu Giliad, gbe ẹgwa ẹgbukpe mai. Ofariẹ, ma re fi evuẹ họ iẹe kẹ inievo akpọ-soso mai kpahe okpẹtu nọ ohwo ọ so ho nọ ọ via, gbe edhọ okọto sa-sa nọ Isẹri Jihova a rease rai gbe enọ e rrọ otọ. (1 Pita 5:8, 9) Yọ oria evuẹ Itanẹte mai na yọ obọdẹ edhere jọ nọ usiuwoma u bi ro te ahwo buobu oma, makọ enọ e tubẹ rrọ erẹwho nọ a jọ fi awhaha họ iruẹru mai dede.

O tẹ make rọnọ whọ be sai kpohọ oria evuẹ Itanẹte mai hi, whọ rẹ sai dikihẹ ga evaọ egagọ Jihova ghele. Ọrigbo nọ a re fievahọ na o bi ru iruo taso tuvo re o kere je printi ebe buobu, re ahwo uwou Olori na a sai wo emu iwuhrẹ Ọghẹnẹ ziezi. Fikiere, who du roro nọ o gba owhẹ họ họ inọ whọ rẹ dẹ okwakwa ekọmputa nọ whọ sai ro kpohọ jw.org. Ahwo jọ a rẹ sae rehọ eware no oria evuẹ mai na ze kẹ amọfa nọ a be sai kpohọ iẹe he, rekọ onana yọ owha-iruo ukoko ho.

Ma re yere Jesu gaga nọ ọ be rọ rehọ emu iwuhrẹ Ọghẹnẹ ko omai ziezi, be rọ ere ru eyaa riẹ gba. Nọ edẹ urere iyoma nana e be kẹle ekuhọ no na, ma wo imuẹro inọ Jihova ọ te ruabọhọ emu iwuhrẹ riẹ nọ ọ be rọ ko omai ‘evaọ ẹruoke’ na.