Kareghẹhọ Otu nọ Ọ Rrọ Iruo Odibọgba Oke-Kpobi
“Ma [be] kareghẹhọ . . . iruo orọwọ rai gbe iruo uyoyou rai.”—1 TẸS. 1:2, 3.
1. Ẹvẹ Pọl o rri otu nọ ọ roma kẹ iruo Jihova ziezi?
PỌL ukọ na ọ kareghẹhọ otu nọ o je ru iruo gaga fiki usiuwoma Uvie na. O kere nọ: “Ma [be] kareghẹhọ edẹ rai, jẹbe rehọ iruo orọwọ rai gbe iruo uyoyou rai avọ edikihẹwha eva ẹruore eva Ọnowo Jesu Kristi ze ẹkareghẹ họ Ọghẹnẹ Ọsẹ na.” (1 Tẹs. 1:2, 3) Evaọ uzẹme, Jihova omariẹ ọ be kareghẹhọ iruo uyoyou erọ otu nọ ọ be rọ eva efuafo gọe, o make rọnọ uyero uzuazọ rai o be kẹ ai uvẹ ru buobu hayo umutho.—Hib. 6:10.
2. Eme ma te ta kpahe evaọ uzoẹme nana?
2 Ibe Ileleikristi mai buobu, te erọ oke anwae gbe erọ oke mai na a siobọno eware efa buobu no re a sai ru iruo odibọgba oke-kpobi na. Joma ta kpahe oghẹrẹ nọ otu jọ o je ru iruo nana evaọ ikpe-udhusoi ọsosuọ. Ma te jẹ ta kpahe oghẹrẹ iruo odibọgba sa-sa jọ nọ e riẹ evaọ oke mai na gbe epanọ ma sae rọ kareghẹhọ inievo mai nọ e fialoma via bi ru iruo obọdẹ nana.
ILELEIKRISTI IKPE-UDHUSOI ỌSOSUỌ
3, 4. (a) Oghẹrẹ iruo odibọgba vẹ otujọ ọ jọ evaọ ikpe-udhusoi ọsosuọ? (b) Ẹvẹ a jẹ rọ rẹrote omarai?
3 Nọ Jesu ọ nwane họ-ame no, o te mu iruo usiuwoma ota na họ nọ e te nya akpọ na soso duwu. (Luk 3:21-23; 4:14, 15, 43) Nọ Jesu o whu no, ikọ riẹ a tẹ wha iruo na haro. (Iruẹru 5:42; 6:7) Ileleikristi jọ wọhọ Filip a jọ etausiuwoma gbe imishọnare evaọ Palẹstain. (Iruẹru 8:5, 40; 21:8) Pọl gbe amọfa a wha iruo na kpohọ eria efa. (Iruẹru 13:2-4; 14:26; 2 Kọr. 1:19) Ahwo wọhọ amọ Silvanọs (ọnọ a je se Saelas re), Mak, gbe Luk a jọ ikere-ebe. (1 Pita 5:12) Eyae nọ e rrọ Ileleikristi i je kuomagbe ahwo nana evaọ iruo odibọgba na re. (Iruẹru 18:26; Rom 16:1, 2) Ikuigbe ahwo nana e rrọ usu eware nọ i ru nọ Ikereakere Griki na i ro siuru gaga, yọ i dhesẹ nọ Jihova ọ rẹ kareghẹhọ idibo riẹ.
4 Ẹvẹ otu nọ ọ jọ iruo odibọgba oke-kpobi evaọ ikpe-udhusoi ọsosuọ a jẹ sae rọ rẹrote omarai? Ẹsejọ ibe Ileleikristi rai a re ru ai ọghọ jẹ rọ idhere efa fiobọhọ kẹ ai, dede na orọnikọ ae omarai a jẹ yare obufihọ na ha. (1 Kọr. 9:11-15) Ahwo sa-sa gbe ukoko na a jẹ rọ unevaze fiobọhọ kẹ ai. (Se Iruẹru Ikọ Na 16:14, 15; Ahwo Filipai 4:15-18.) Pọl avọ otu nọ a gbẹ jọ iruo imishọnare na a jẹ hai ru iruo ubroke rọ rẹrote omarai.
EGBODIBO OKE-KPOBI EVAỌ OKE MAI NA
5. Eme ọzae-avọ-aye jọ a ta kpahe iruo odibọgba oke-kpobi nọ a rrọ?
5 Inievo buobu nẹnẹ a rrọ abọ sa-sa iruo odibọgba oke-kpobi na. (Rri ẹkpẹti na, “ Abọ Sa-Sa Ọrọ Iruo Odibọgba Oke-Kpobi.”) Ẹvẹ a rri iruo nana nọ a bi ru na? Onana yọ onọ nọ whọ rẹ sae nọ ai, yọ ẹsejọhọ u ti fiobọhọ kẹ owhẹ nọ who te ru ere. Roro kpahe oriruo jọ: Oniọvo-ọmọzae jọ nọ o ru iruo ọkobaro oke-kpobi, ọkobaro obọdẹ, imishọnare, je ru iruo evaọ Ebẹtẹle no evaọ orẹwho ofa ọ ta nọ: “Mẹ ruẹ nọ iruo odibọgba oke-kpobi na nọ mẹ ro yọ usu iroro nọ e mai woma nọ mẹ jẹ no evaọ uzuazọ. Okenọ mẹ jọ ikpe 18, o jọ bẹbẹ kẹ omẹ re mẹ salọ sọ me re kpohọ isukulu ikpehru, kọ okọ, hayo ru iruo ọkobaro. Eware nọ mẹ rọ ẹro ruẹ no i ru omẹ riẹ nọ Jihova ọ rẹ kareghẹhọ owhẹ rọkẹ eware nọ who siobọno re whọ sai ru iruo odibọgba oke-kpobi na. Mẹ rehọ onaa gbe okẹ sa-sa nọ Jihova ọ kẹ omẹ ru iruo no evaọ oghẹrẹ nọ mẹ hae sai ru hu o hae jọnọ me le utee akpọ na jọ.” Aye riẹ ọ ta nọ: “Iruo kpobi nọ ma jọ wobọ i fiobọhọ kẹ omẹ wo ẹnyaharo no. N’oke t’oke ma be ruẹ ọthọwẹ gbe ọkpọvio Jihova evaọ oghẹrẹ nọ ma hae ruẹ hẹ o hae jọnọ ma rrọ iruo obọmai. Kẹdẹ kẹdẹ me bi yeri Jihova kẹ iruo odibọgba oke-kpobi nọ ma rrọ na.” Kọ whọ gbẹ gwọlọ yere uzuazọ utioye?
6. Imuẹro vẹ u fo nọ mai kpobi re wo kpahe oghẹrẹ nọ Jihova o rri omodawọ mai?
6 Oghẹrẹ nọ eware e rrọ kẹ inievo jọ o be kẹ ae uvẹ wobọ evaọ iruo odibọgba oke-kpobi na obọnana ha. Avro ọ riẹ hẹ, Jihova o bi rri omodawọ inievo nana ghaghae. Roro kpahe otu nọ Pọl ọ fodẹ edẹ rai evaọ obe Filimọn 1-3, gbe inievo nọ e rrọ ukoko obọ Kọlọsi. (Sei.) Pọl o rri rai ghaghae, yọ ere Jihova o rri rai re. Epọvo na Ọsẹ obọ odhiwu mai na o bi rri omodawọ rai. Rekọ, ẹvẹ whẹ omara whọ sae rọ rehọ uketha kẹ inievo nọ e rrọ iruo odibọgba oke-kpobi enẹna?
FIOBỌHỌ KẸ EKOBARO
7, 8. Eme iruo ọkobaro e kẹre te, kọ ẹvẹ amọfa evaọ ukoko na a sai ro fiobọhọ kẹ ekobaro?
7 Wọhọ etausiuwoma ikpe-udhusoi ọsosuọ, ekobaro nọ i wo ajọwha ziezi a rrọ uduotahawọ kẹ ukoko na. Ibuobu rai a be daoma rọ euwa 70 ta usiuwoma kamara kamara. Kọ ẹvẹ whọ sai ro fiobọhọ kẹ ae?
8 Oniọvo-ọmọtẹ jọ nọ a re se Shari nọ ọ rrọ ọkobaro ọ ta nọ: “Nọ ekobaro a be hai kpohọ usiuwoma ota ẹsikpobi na, ma re rri rai nọ a kruga ziezi yọ a wo uvumọ ẹbẹbẹ hẹ. Ghele na, a gwọlọ uduotahawọ.” (Rom 1:11, 12) Oniọvo-ọmọtẹ ọfa nọ o ru iruo ọkobaro evaọ ikpe jọ ọ ta kpahe ekobaro nọ e rrọ ukoko riẹ nọ: “A re ru iruo gaga, ababọ eriosehọ. Nọ amọfa a tẹ wọ ae kpohọ usiuwoma, zizie ae kẹ emuọriọ, kẹ ae ugho epẹtiro hayo rọ ugho fiobọhọ kẹ ae evaọ edhere ọfa jọ, o rẹ were ae. U re dhesẹ kẹ ae nọ a be ginẹ daezọ rai.”
9, 10. Eme ahwo jọ a ru ro fiobọhọ kẹ ekobaro nọ e rrọ ukoko rai no?
9 Kọ whọ gwọlọ fiobọhọ kẹ ekobaro na evaọ usiuwoma ota? Ọkobaro jọ nọ a re se Bobbi ọ ta nọ: “Ma gwọlọ inievo nọ i re kuomagbe omai kpohọ usiuwoma evaọ udevie oka na.” Ọkobaro ọfa jọ nọ ọ rrọ ukoko ovona o fibae nọ: “Whọ rẹ kake ruẹ ohwo nọ o re lele owhẹ kpohọ usiuwoma ota evaọ oke uvo ho.” Oniọvo-ọmọtẹ jọ nọ ọ rrọ Ebẹtẹle Brooklyn enẹna ọ ta kpahe okenọ ọ jọ iruo ọkobaro nọ: “Oniọvo-ọmọtẹ jọ nọ o wo omoto ọ vuẹ omẹ nọ, ‘Oke kpobi nọ whọ gbẹ ruẹ ohwo nọ o re lele owhẹ kpohọ usiuwoma ha, s’omẹ, me ti lele owhẹ nya.’ O fiobọhọ k’omẹ ruabọhọ iruo ọkobaro na.” Shari nọ ma fodẹ ẹsiẹe na ọ ta nọ: “Nọ ekobaro nọ e re te rọo ho a te no usiuwoma ota ze no, ẹsibuobu a rẹ jọ goli. Whọ sai zizie ai re a kuomagbe owhai n’oke t’oke evaọ oke egagọ uviuwou. Whọ sai je zizie ai re a kuomagbe owhai evaọ eware efa, oyena o rẹ kẹ ae ọbọga re.”
10 Oniọvo-ọmọtẹ jọ nọ ọ rrọ iruo odibọgba oke-kpobi na te ikpe 50 no ọ kareghẹhọ okenọ tei te inievo-emetẹ efa nọ e re te rọo ho a je ru iruo ọkobaro na. Ọ ta nọ: “Ekpako ukoko mai a jẹ hai weze bru ekobaro na n’oke t’oke nọ a te gb’emera jọ h’oma no. A jẹ hae nọ kpahe epanọ ma rrọ gbe okọ mai, jẹ nọ omai sọ ma wo ebẹbẹ jọ. A jẹ ginẹ daezọ mai. A jẹ hai weze ziọ uwou mai re a riẹ sọ ma gwọlọ obufihọ jọ.” Onana o rẹ sai ru owhẹ kareghẹhọ epanọ Pọl o rri oware nọ ibe Oleleikristi jọ o ru kẹe evaọ Ẹfẹsọs ghare te.—2 Tim. 1:18.
11. Oghẹrẹ vẹ iruo ọkobaro obọdẹ e rrọ?
11 Ekobaro obọdẹ e rrọ ikoko jọ. Inievo nana buobu a be rọ euwa udhozeza gbe ikpe (130) ta usiuwoma kamara kamara. Fiki oke nọ a be rọ ta usiuwoma na je ro ru iruo ukoko na efa, a wo oke kẹ okọ obọrai hi. Uwou ogha o rẹ kẹ ae umugho jọ nọ a rẹ rọ rẹrote omarai re a sae tẹrovi iruo usiuwoma ota na.
12. Ẹvẹ ekpako ukoko gbe amọfa a sai ro fiobọhọ kẹ ekobaro obọdẹ?
12 Ẹvẹ ma sai ro fiobọhọ kẹ ekobaro obọdẹ? Ọkpako ukoko jọ nọ ọ rrọ uwou ogha ru iruo nọ o re lele ibuobu rai ta ẹme ẹsikpobi ọ ta nọ: “O gwọlọ nọ ekpako na a re lele ai ta ẹme, riẹ oghẹrẹ nọ eware e rrọ kẹ ae re a rọ ere riẹ oghẹrẹ nọ a sai ro fiobọhọ kẹ ae. Inievo jọ a re roro nọ ekobaro obọdẹ a wo ẹbẹbẹ ugho ho keme ukoko o be rẹrote ai, dede na u wo idhere buobu nọ inievo nọ a gbẹ rrọ ukoko a sai ro fiobọhọ kẹ ai.” Wọhọ ekobaro oke-kpobi, ekobaro obọdẹ a gwọlọ inievo nọ i re lele ai kpohọ usiuwoma ota. Kọ whọ sai fiobọhọ evaọ abọ nana?
FIOBỌHỌ KẸ ESẸRO ỌNYAWARIẸ
13, 14. (a) Eme u fo nọ ma rẹ kareghẹhọ kpahe esẹro okogho? (b) Eme who roro nọ whọ rẹ sai ru ro fiobọhọ kẹ esẹro okogho?
13 A re rri esẹro okogho avọ eyae rai wọhọ ahwo nọ a kruga ziezi evaọ ukoko na, nọ udu o rẹ kaki whrehe he. Ere o ginẹ rrọ, dede na a gwọlọ uduotahawọ gbe ahwo nọ a re lele ai kpohọ usiuwoma ota, o tẹ jẹ gwọlọ nọ a re kuomagbe amọfa zaharo ẹsejọ. Kọ otẹrọnọ ẹyao o kie rai te epanọ a ro fi ai họ ehwa evaọ ẹsipito, yọ ẹsejọhọ o gwọlọ nọ a re ru obẹrọ kẹ ae hayo a nwoma nọ o gwọlọ nọ a rẹ gba oria jọ oma rai nọ u wiri? O rẹ kẹ ai omosasọ gaga nọ inievo na a te bi fiobọhọ kẹ ae jẹ daezọ rai. Onana u re ru omai roro kpahe ọdawẹ nọ Luk, “ọbo oyoyou na,” nọ o kere obe Iruẹru Ikọ na o wo kẹ Pọl avọ otu nọ a gbẹ jọ iruo imishọnare.—Kọl. 4:14; Iruẹru 20:5–21:18.
14 O rẹ were esẹro ọnyawariẹ avọ eyae rai nọ inievo ukoko na a te mu usu okpekpe kugbe ai. Ọsẹro ọnyawariẹ jọ o kere nọ: “O wọhọ nọ egbẹnyusu mẹ a rẹ riẹ oke nọ mẹ gwọlọ uduotahawọ. A rẹ nọ omẹ enọ nọ i re ru omẹ vuẹ ae oware nọ o be kẹ omẹ uye. Ezọ nọ a rẹ gaviẹ kẹ omẹ ọvo dede na yọ obufihọ ulogbo.” O rẹ were esẹro okogho avọ eyae rai gaga nọ inievo na a te bi dhesẹ nọ a wo ọdawẹ kẹ ai.
FIOBỌHỌ KẸ INIEVO NỌ E RRỌ IRUO EBẸTẸLE
15, 16. Fikieme iruo nọ inievo Ebẹtẹle gbe enọ e be rẹrote Egwa Ikokohọ a bi ru i ro wuzou, kọ ẹvẹ ma sai ro fiobọhọ kẹ ae?
15 Inievo nọ e rrọ iruo Ebẹtẹle gbe enọ e be rẹrote Egwa Ikokohọ wariẹ akpọ na soso họ a be tha iruo Uvie na uke. Otẹrọnọ inievo nọ e rrọ iruo Ebẹtẹle a rrọ ukoko hayo okogho ra, ẹvẹ whọ sai ro dhesẹ nọ whọ be kareghẹhọ ai?
16 A tẹ ziọ Ebẹtẹle obọ, ẹro ahwo uviuwou gbe egbẹnyusu rai nọ a nya seba o re vo ai gaga. Eva e rẹ were ai nọ inievo nọ a gbẹ rrọ Ebẹtẹle gbe enọ a gbẹ rrọ ukoko a te mu usu kugbe ai. (Mak 10:29, 30) Iruo ikẹdẹ kẹdẹ rai evaọ Ebẹtẹle o rẹ kẹ inievo nana uvẹ kpohọ iwuhrẹ je w’obọ evaọ usiuwoma ota k’oka k’oka. Rekọ ẹsejọ inievo nana a re ru iruo efa ba iruo ikẹdẹ kẹdẹ rai evaọ uwou ogha na. O rẹ kẹ erere nọ ukoko nọ a rrọ o tẹ riẹ onana, je bi dhesẹ nọ iruo nọ a bi ru na e da rai ẹro fia.—Se 1 Ahwo Tẹsalonika 2:9.
FIOBỌHỌ KẸ INIEVO NỌ E RRỌ IRUO ODIBỌGBA OKE-KPOBI EVAỌ ERẸWHO EFA
17, 18. Iruo efa vẹ inievo nọ a vi kpohọ iruo odibọgba na evaọ erẹwho efa a re ru?
17 Inievo nọ a vi kpohọ orẹwho ofa kẹ iruo Uvie na a rẹ sai wo ẹbẹbẹ kugbe oghẹrẹ emu, iruemu ẹwho, gbe oghẹrẹ uzuazọ uyero nọ u wo ohẹriẹ no orọ ẹwho nọ a rria n’otọ ze. Fikieme a rọ rọwo nọ a rẹ rẹriẹ ovao dhe ebẹbẹ yena?
18 Inievo nana jọ yọ imishọnare nọ e rẹ rọ oke rai kpobi ta usiuwoma na. A wo onaa ewuhrẹ gbe usiuwoma ota ziezi yọ amọfa a re wo erere no onaa rai ze. Uwou ogha o rẹ gwọlọ oria nọ a rẹ rria kẹ ae, jẹ kẹ ai umugho nọ a rẹ rọ rẹrote omarai. Inievo efa nọ a vi kpohọ orẹwho ofa a rẹ jọ uwou ogha ru iruo hayo fiobọhọ evaọ ebabọ iwou ogha, ifisi efafa, Egwa Okokohọ gbe Egwa Uvie. A rẹ kẹ ae emu gbe iwou nọ a rẹ rria gbe eware efa nọ i re fiobọhọ kẹ ae. Yọ a re kpohọ iwuhrẹ je wobọ evaọ iruo usiuwoma ota na wọhọ epanọ inievo nọ e rrọ iruo Ebẹtẹle a re ru na, fikiere a rrọ obufihọ evaọ idhere buobu.
19. Eme u fo nọ ma rẹ kareghẹhọ kpahe otu nọ a vi kpohọ iruo odibọgba na evaọ erẹwho efa?
19 Ẹvẹ whọ sae rọ kareghẹhọ inievo nana? Riẹ nọ ẹsejọ emu orẹwho nọ a kpohọ na ọ rẹ kake reriae oma ha, maero kọ oke ọsosuọ. Whọ sai wo onana họ iroro nọ whọ tẹ gwọlọ zizie ae kẹ emuọriọ. Whọ sae kake nọ ae kpahe oghẹrẹ emu nọ ọ rẹ were ae hayo ọnọ a te gwọlọ dawo. Thihakọ kẹ ai nọ a bi wuhrẹ ẹvẹrẹ gbe uruemu ẹwho na. O rẹ sae rehọ oke re a te ti wo otoriẹ oware kpobi nọ whọ be ta, rekọ whọ sai fiobọhọ kẹ ae riẹ epanọ a re se eware evaọ ẹvẹrẹ na. A gwọlọ wuhrẹ.
20. Edhere owoma vẹ ma sae rọ kareghẹhọ inievo nọ e rrọ iruo odibọgba oke-kpobi avọ esẹgbini rai?
20 Otu nọ ọ rrọ iruo odibọgba oke-kpobi a rẹ kpako nọ oke o be nyaharo na, yọ ere esẹgbini rai re. Ẹsejọhọ o te were esẹgbini nọ e rrọ ukoko na gaga re emọ rai nọ e rrọ iruo odibọgba oke-kpobi a daji iruo na. (3 Jọn 4) Inievo nọ e rrọ iruo odibọgba oke-kpobi a rẹ daoma dhogbo bru esẹgbini rai nọ a tẹ gwọlọ obufihọ jẹ nyae ruẹ e rai ẹsikpobi nọ o tẹ lọhọ. Dede na, emọ nọ e rrọ kugbe esẹgbini na a rẹ sai fiobọhọ kẹ inievo nọ e rrọ iruo odibọgba oke-kpobi na rẹrote ai. Kareghẹhọ nọ inievo nọ e rrọ iruo odibọgba oke-kpobi na a bi wobọ taso tuvo evaọ iruo akpọ-soso nọ e mai wuzou. (Mat. 28:19, 20) Kọ u gbe woma re whẹ hayo ukoko ra u fiobọhọ nọ esẹgbini inievo nọ e rrọ iruo odibọgba oke-kpobi a tẹ gwọlọ obufihọ?
21. Ẹvẹ obufihọ gbe uduotahawọ nọ amọfa a rẹ kẹ inievo nọ e rrọ iruo odibọgba oke-kpobi o rẹ jarae oma?
21 Orọnikọ ugho nọ a ti wo o wọ otu nọ ọ rrọ iruo odibọgba oke-kpobi ruọ iruo na ha, rekọ fikinọ a gwọlọ ru iruo kẹ Jihova je fiobọhọ kẹ amọfa. Obọ kpobi nọ who fihọ kẹ ae o te were ae. Oniọvo-ọmọtẹ jọ nọ ọ rrọ orẹwho ofa ru iruo na ọ ta ẹme nọ u dhesẹ oghẹrẹ nọ o rrọ otu rai jọ buobu oma, inọ: “Nọ ohwo o te kere ẹmẹme jọ dede ro yere owhẹ kẹ oware nọ who bi ru, u re dhesẹ nọ ahwo a bi roro kpahe owhẹ yọ oware nọ who bi ru o were rai.”
22. Ẹvẹ who rri iruo odibọgba oke-kpobi?
22 Iruo odibọgba oke-kpobi nọ ma re ru họ uzuazọ uyero nọ o rẹ mae kẹ erere. Iruo na i wo ise-abọ riẹ, rekọ i re wuhrẹ ohwo, jẹ kẹ ohwo evawere. Yọ i re fiobọhọ ruẹrẹ omai kpahe kẹ iruo evawere nọ idibo Ọghẹnẹ a ti ru nọ Uvie Ọghẹnẹ o tẹ ze no. Ajọ mai kpobi ma hae ‘kareghẹhọ iruo orọwọ gbe iruo uyoyou’ otu nọ ọ rrọ iruo odibọgba oke-kpobi na.—1 Tẹs. 1:2, 3.
