EVAỌ Azie 6, 1926, ọmotọ Japan jọ nọ ọ jọ ọsẹro ọnyawariẹ evaọ America o zihe kpohọ Japan kẹ iruo imishọnare. Omọvo nọ a jẹ hai vi Uwou-Eroro Na se evaọ Japan nọ ọ to utu uwuhrẹ Ebaibol họ no evaọ ẹwho Kobe ọ tẹ jẹ hẹrẹ imishọnare na nọ o yo nọ ọ be nyaze. Utu emọ-uwuhrẹ Ebaibol nọ ọ tohọ na o jọ Kobe evaọ Japan ru okokohọ ọsosuọ rai evaọ Ọvo 2, 1927. Ahwo 36 a ziọ okokohọ yena yọ ahwo 8 a họ-ame. O jọ emamọ emuhọ, rekọ onọ na họ, ẹvẹ utu osese nana o te sae rọ wha elo uzẹme Ebaibol na se ahwo Japan nọ a bu te ima udhosa (60,000,000) na?

Evaọ Asoi ọrọ ukpe 1927, Emọ-Uwuhrẹ Ebaibol nọ e rẹ daoma rọ onaa sa-sa wha iruo Uvie na haro na a tẹ be vuẹ ahwo izoẹme evuẹ ogbotu nọ a gwọlọ kẹ. Re a ruẹse kẹ ovuẹ ọsosuọ rai evaọ ẹwho Japan jọ nọ a re se Osaka, inievo na a te fi esabọdo họ akotọ idhere gbe eria sa-sa ẹwho na, a te je vi ebe-uzizie nọ i bu te idu esa (3,000) se ahwo nọ a riodẹ evaọ ẹwho na. A kẹ ahwo ebe-uzizie nọ i bu te idu udhuhrẹ gbikpe (150,000), a te je ru nọ a ro kere ovuẹ uzizie na fihọ itikẹte idu egba ene (400,000) nọ a rẹ kẹ ohwo nọ ọ ruọ itreni, jẹ jọ ebe-usi Osaka nọ a riẹ ziezi whowho ovuẹ na re. Evaọ ẹdẹ nọ a rọ kẹ ovuẹ na, irupre ivẹ e dhẹ orẹwho na wariẹ jẹ vravra ebe uzizie nọ i bu te odu ẹgba ọvo (100,000). Ahwo idu ivẹ gbe egba esa (2,300) a keke oma họ Ọgwa Osaka Asahi re a gaviezọ kẹ ovuẹ nọ o ta nọ, “Uvie Ọghẹnẹ O Kẹle No.” Emọ-Uwuhrẹ Ebaibol na a tubẹ ta kẹ amọfa nọ a bu te odu ọvo (1,000) inọ a zihe kpo keme Ọgwa na ọ te gba ai hi. Nọ a kẹ ovuẹ na no, ahwo egba ezeza (600) a te gbe kiọkọ kẹ abọ enọ gbe iyo Ebaibol. Evaọ emerae nọ i lele i rie, a kẹ evuẹ ogbotu efa evaọ Kyoto gbe ewho efa nọ e rrọ ofẹ ukiediwo-ọre Japan.

Evaọ Akpe 1927, Emọ-Uwuhrẹ Ebaibol na a te ru ọruẹrẹfihotọ nọ a rọ kẹ evuẹ ogbotu sa-sa evaọ Tokyo. Epọvo na a zizie ahwo evaọ onana, a vi ebe-uzizie se osu ubrotọ Tokyo, ahwo ogbẹgwae riẹ, te ilorida egagọ gbe isu isoja. A ta ebe-uzizie mu eria sa-sa, jẹ rọ enọ i bu te idu egba ihrẹ gbe ikpe (710,000) kẹ ahwo, a tẹ jẹ rọ ebe-usi whowho ovuẹ na. Ahwo idu ene gbe egba eree (4,800) a gaviezọ kẹ evuẹ ogbotu esa nọ a kẹ evaọ Kobe nọ o jọ ẹwho esuo Japan.

Egbaẹmo-aro nọ a bi se ekobaro enẹna a daoma gaga wha ovuẹ na te ahwo oma oke yena evaọ iwou rai. Matsue Ishii, nọ ọ jọ omọvo egbaẹmo-aro ọsosuọ nọ e jọ Japan avọ Jizo ọzae riẹ a wha usiuwoma na te abasa nọ a tẹ ghale Japan soso kpohọ abane. A mu usiuwoma ota na họ evaọ Sapporo, ẹwho Japan nọ ọ rrọ ofẹ ẹkpẹlobọ ovatha-ọre, kẹsena a te ti  no etẹe kpohọ Sendai, Tokyo, Yokohama, Nagoya, Osaka, Kyoto, Okayama, gbe Tokushima. Sista Ishii avọ oniọvo-ọmọtẹ ọfa nọ ọ kpako no nọ a re se Sakiko Tanaka a sẹ osẹ emotọ Japan jẹ nyabru ahwo egọmeti ẹkwotọ na. Omọvo jọ evaọ usu ahwo egọmeti nọ a nyabru na ọ tẹ yare nọ a kẹe ẹko egba esa (300) erọ ebe na, The Harp of God gbe Deliverance re o fihọ iwou-ebe nọ e rrọ iwou-odi orẹwho na sa-sa.

Ọzae-avọ-aye na, Katsuo avọ Hagino Miura a rehọ ebe mi Sista Ishii. Nọ a se ebe na, a tẹ ruẹ nọ a duku uzẹme na no. A họ-ame evaọ ukpe 1931 je zihe ruọ egbaẹmo-aro. Ọzae-avọ-aye ọfa nọ a re se Haruichi avọ Tane Yamada gbe imoni rai buobu a kurẹriẹ taure ukpe 1930 u te ti te nọ a yo ovuẹ Uvie na. Ọzae-avọ-aye nana a zihe ruọ egbaẹmo-aro uwhremu na, Yukiko ọmọtẹ rai o te kpohọ iruo Ebẹtẹle evaọ uwou ogha Tokyo.

Imoto e jọ ghaghae gaga oke yena yọ idhere e jọ yoyoma. Fikiere, Kazumi Minoura avọ egbaẹmo-aro efa nọ e gbẹ jọ uzoge oke yena a jẹ hae rria iwou nọ a ku wọhọ imoto nọ a rẹ sai ghelie no oria ruọ oria. A te je se iwou nana Jehu, onọ o rrọ odẹ ohwo Izrẹl jọ nọ ọ jẹ hae dhẹ akẹkẹ nọ o zihe ruọ ovie Izrẹl uwhremu na. (2 Iv. 10:​15, 16) Iwou nana nọ a jẹ hai se Jehu na e jẹ hai theri te irula ihrẹ, okẹkẹe rai irula ezeza, yọ e jẹ hai kpehru te irula ezeza re. Ekobaro ezeza e jẹ hae rria ọvuọvo. A tẹ jọ uwou ogha Japan ku Jehu 11 esese efa nọ a rẹ sae rọ ẹdhighere dhẹ, enọ imava ọvo e rẹ sae jọ. Kiichi Iwasaki, nọ ọ jọ omọvo inievo nọ e jẹ hai ku Jehu na ọ ta nọ: “Jehu ọvuọvo ọ jẹ hai wo kanopi nọ a rẹ gha ruru iei, yọ ma jẹ hai fi ebatri omoto fihọ iẹe nọ a sae rọ rehọ ikpẹ tu nọ oke u te kpo no.” Egbaẹmo-aro na a je ru nọ elo uzẹme na o je ro lo evaọ Japan soso, bi ghelie Jehu evaọ ikpehru gbe ikpotọ nọ e rrọ ẹkwotọ Japan, no ẹwho Hokkaido nọ ọ rrọ ofẹ ẹkpẹlobọ ovatha-ọre rite ẹwho Kyushu nọ ọ rrọ ofẹ obọze ovatha-ọre.

Ikumatsu Ota nọ ọ jọ ọgbaẹmo-aro ọ ta nọ: “Nọ ma te te ẹwho, ma vẹ rọ Jehu mai kpahe unueri hayo ogege nọ ọ rrọ ẹkwotọ na. Ma rẹ kake nyabru ahwo nọ a wuzou ẹwho na, wọhọ osu na, kẹsena ma vẹ nya bru ahwo evaọ iwou rai jẹ rọ ebe kẹ ae. Nọ ma te ru ẹkwotọ na re no, ma vẹ wọ kpohọ ẹwho nọ ọ kẹle riẹ.”

O jọ ‘oware osese evaọ ẹdẹ yena’ nọ umutho Emọ-Uwuhrẹ Ebaibol 36 nọ e jọ Kobe a ru okokohọ ọsosuọ rai evaọ ẹkwotọ na. (Zek. 4:10) Rekọ evaọ ukpe 1932, nọ ikpe isoi ọvo e ruemu no, Japan o te ti wo egbaẹmo-aro udhusoi gbe esa (103) yọ ebe nọ a fihọ ada ukpe yena i bu vi idu ikpegbene (14,000). Nẹnẹ, a be jọ eria Japan sa-sa nọ ahwo a rẹ jọ zurie ta usiuwoma na ziezi, yọ enwenọ iwhowho-uvie idu egba ivẹ gbe udhe (220,000) a be kuvẹ re elo rai o lo evaọ Ẹkwotọ Ovatha-Ọre nana.​—⁠Iruẹru mai erọ oke nọ u kpemu evaọ Japan.