GUY HOLLIS PIERCE nọ ọ rrọ omọvo Utu Ẹruorote Iruẹru Isẹri Jihova o whu evaọ Edivẹ-Oka, Asa 18, 2014. Ikpe 79 ọ jọ okenọ o whu, nọ ẹruore riẹ ọrọ uzuazọ obọ odhiwu nọ ọ te rọ jọ kugbe Kristi o ro rugba.—Hib. 2:10-12; 1 Pita 3:18.

Akpegbọvo 6, 1934 a yẹ Brọda Guy Pierce evaọ ẹwho Auburn, California obọ America, yọ ọ họ-ame evaọ ukpe 1955. Evaọ ukpe 1977, ọ tẹ rehọ aye oyoyou riẹ nọ a re se Penny je yẹ emọ. Uviuwou nọ o wo na u ru nọ o je ro dhesẹ uruemu ọsẹ ẹsikpobi. Ukpe 1982, yọ tei te aye riẹ Penny a rrọ iruo ọkobaro na no gidigba, kẹsena ọyomariẹ o te zihe ruọ ọsẹro okogho evaọ ukpe 1986, yọ a jọ iruo nana te ikpe 11 evaọ America.

Evaọ ukpe 1997, Brọda Guy Pierce avọ aye riẹ Penny a te mu iruo Ebẹtẹle họ evaọ uwou ogha obọ America. Brọda Pierce o je ru iruo evaọ Ẹko-Iruo Ẹruorote Iruẹru Ikoko, kẹsena evaọ ukpe 1998, a tẹ rehọ iẹe mu ofiobọhọ rọkẹ Ogbẹgwae Ẹruorote Ahwo Uwou Ogha orọ Utu Ẹruorote Iruẹru Isẹri Jihova na. Evaọ Ẹgwae Ẹgbukpe Isẹri Jihova nọ a ru evaọ Akpe 2, 1999, a te whowho nọ a rehọ Brọda Pierce mu omọvo Utu Ẹruorote Iruẹru Isẹri Jihova no. O ru iruo kugbe Ogbẹgwae Ẹruorote Ahwo Uwou Ogha, Ogbẹgwae Ebe-Ikere, Ogbẹgwae Ebe-Iwhowho, gbe Ogbẹgwae Otu Ẹruọsa.

Oma riẹ o jẹ hae were oghẹrẹ ahwo kpobi fiki ehwẹ riẹ gbe eme ehwẹ nọ ọ jẹ hae ta. Rekọ uyoyou nọ o wo kẹ amọfa, omaurokpotọ riẹ, adhẹẹ nọ o wo kẹ izi ikiẹrẹe Ọghẹnẹ, gbe ẹrọwọ ọgaga nọ o fihọ Jihova họ iruemu nọ e jẹ mae lẹliẹ iẹe were ahwo. Brọda Guy Pierce o fi ẹrọwọ họ eyaa Jihova te epanọ o rọ jariẹ oma nọ, o rẹ tubẹ lọhọ re ọre ọ seba ẹva ze viukpenọ eyaa Jihova e rẹ seba erugba, yọ ọ gwọlọ nọ o re ru ahwo akpọ na soso riẹ uzẹme nana.

Brọda Pierce o se egagọ Jihova gboja gaga, ọ jẹ hae kpama evaọ irioke je ru iruo te aso ẹsibuobu. O te erẹwho buobu no evaọ akpọ na fiki erẹ nọ ọ jẹ hae nya ẹsikpobi re ọ tuduhọ inievo na awọ. Ghelọ epanọ iruo i bu rie abọ te, ọ jẹ hae raha oke kugbe oniọvo Ebẹtẹle kpobi nọ ọ gwọlọ jọ kugbei. Ọ jẹ hae kezọ kẹ ọnọ ọ gwọlọ lele iei ta ẹme kpobi, ọnọ ọ gwọlọ ohrẹ gbe ọnọ ọ gwọlọ obufihọ riẹ. Inievo na a gbẹ be kareghẹhọ oke nọ ọ raha kugbe ai, gbe uduotahawọ nọ ọ kẹ rai no Ebaibol ze ikpe buobu nọ i kpemu.

Brọda Pierce o wo emọ ezeza, emọ-iruọmọ, gbe emọ-iruọmọ avivẹ, yọ aye riẹ ọ gbẹ rrọ akpọ. Ọ jọ wọhọ ọsẹ kẹ ahwo buobu evaọ ukoko na. Brọda Mark Sanderson nọ ọ rrọ omọvo Utu Ẹruorote Iruẹru Isẹri Jihova ọ kẹ ovuẹ uwhori riẹ evaọ Ẹdẹ-Ọmaha, Asa 22, 2014 evaọ Ebẹtẹle obọ Brooklyn. Evaọ ovuẹ na, ọ fodẹ ẹruore uzuazọ obọ odhiwu nọ Brọda Pierce o wo, o te je se ẹme Jesu nọ ọ ta nọ: “Evaọ uwou Ọsẹ mẹ eria i re buobu; . . . Re mẹ tẹ nya e ruẹrẹ oria kẹ owhai, mẹ jẹ te tha mẹ vẹ te rehọ owhai, re oria nọ mẹ rọ wha rẹ te jọ etẹe re. Obonọ mẹ be nya wha riẹ edhere na.”—Jọn 14:2-4.

Ẹro Brọda Pierce o ti vo omai gaga. Rekọ eva e be were omai inọ ọ “riẹ edhere” na kpohọ “oria” nọ ọ te jọ bẹdẹ bẹdẹ.