Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kiyo enọ nọ e rrọ obotọ na:

Kọ ukio nọ a rẹ jọ rehọ erae mahe ohwo nọ o whu na u fo kẹ Oleleikristi?

Sọ a rẹ mahe ori hayo a rẹ mahe iẹe he, yọ ẹme obọ ohwo. Dede nọ Ebaibol ọ jọ uvumọ oria ta ha sọ oghẹrẹ ukio utiona o thọ hayo o thọ họ, ma re muẹrohọ nọ okenọ Sọl ovie na avọ Jonatan ọmọ riẹ a whu, erae a rọ mahe ae a tẹ tọ igbenwa rai fihọ otọ. (1 Sam. 31:2, 8-13)—6/15, ẹwẹ-obe avọ 7.

Ẹvẹ o sai ro mu omai ẹro nọ Ọghẹnẹ họ ọnọ ọ be wha eware iyoma ze he?

Ọghẹnẹ o kiẹrẹe evaọ idhere riẹ kpobi. Ọ tẹ jẹ rrọ Ọghẹnẹ ọtẹruo nọ ọ kare eyoma, nọ o re wowoma je kiete. Jihova ọ vọ avọ uyoyou gbe ohrọ-oriọ. (Izie. 32:4; Ol. 145:17; Jem. 5:11)—9/1, ẹwẹ-obe avọ 4.

Ebẹbẹ vẹ ohwo nọ ọ kwa kpohọ ẹkwotọ nọ a jọ mae gwọlọ iwhowho-uvie evaọ orẹwho ofa ọ rẹ sae rẹriẹ ovao dhe?

Ebẹbẹ esa jọ họ (1) oghẹrẹ nọ uzuazọ uyero obei o rẹ rọ reria ae oma, (2) Ẹro ahwo uviuwou rai nọ o re vo ae, gbe (3) Epanọ a sai ro mu usu kugbe inievo nọ e rrọ obonọ a kwa nya na. Ahwo buobu nọ a fi ebẹbẹ nana kparobọ no a wo eghale buobu no.—7/15, ẹwẹ-obe avọ 4-5.

Fikieme emebe-evẹvẹ ekpokpọ na i ro woma jẹ rrọ lọlọhọ kẹ usiuwoma ota?

Oghẹrẹ ovona a ro kere emebe-evẹvẹ ekpokpọ na kpobi. Emebe-evẹvẹ na i re fiobọhọ kẹ omai se oria ikere jọ jẹ nọ ohwo na onọ. Ghelọ uyo nọ ọ kẹ kpobi, ma ve rovie omobe-ovẹvẹ na je se oware nọ Ebaibol na ọ ta kẹe. Ma sai je dhesẹ onọ nọ ma te ta kpahe oke ofa kẹ ohwo na.—8/15, ẹwẹ-obe avọ 13-14.

Ẹvẹ esẹgbini a sae rọ rẹrote emọ rai?

U wuzou gaga re esẹgbini a gaviezọ kẹ emọ rai re a sae riẹ ae ziezi. Daoma rọ Ẹme Ọghẹnẹ wuhrẹ ai ziezi. Rọ edhere oyoyou kpọ ae, maero nọ a te wo avro evaọ udu rai kpahe egagọ Jihova.—9/15, ẹwẹ-obe avọ 18-21.

Eware jọ vẹ Uvie Ọghẹnẹ u ti si no otọ?

Ẹyao, uwhu, ẹmo, ohọo, gbe uvuhu e te gbẹ jọ họ, yọ ẹbẹbẹ iruo nọ a be ruẹ ru hu, o ti kuhọ re.—11/1, ẹwẹ-obe avọ 6-7.

Evaọ Ebaibol na, ọvọ vẹ o ru rie lọhọ nọ ahwo jọ a ti ro su kugbe Kristi?

Nọ Jesu ọ to Emu Owọwọ Olori na họ kugbe ilele riẹ no, ọ tẹ reọvọ kugbe ai, ọvọ nọ a re se ọvọ Uvie na. (Luk 22:28-30) Ọnana họ ọvọ nọ ọ kẹ rai udu nọ a ti ro lele Jesu su evaọ obọ odhiwu.—10/15, ẹwẹ-obe avọ 16-17.

Wọhọ epanọ Jemis ọ ta evaọ obe Iruẹru 15:14, amono họ ‘ahwo nọ a ro mu kẹ odẹ’ Jihova?

Ahwo nana họ ahwo Ju gbe ahwo erẹwho efa nọ i kurẹriẹ, enọ Ọghẹnẹ ọ salọ re a “woro iruo urirẹ” Ọnọ o se rai na. (1 Pita 2:9, 10)—11/15, ẹwẹ-obe avọ 24-25.