EVAỌ Ane 28, 2013, Isẹri Jihova a kuomagbe evaọ ẹwho Nagoya, obọ Japan. Evaọ omakugbe obọdẹ nana, Brọda Anthony Morris nọ ọ rrọ omọvo Utu Ẹruorote Iruẹru Isẹri Jihova o ru owhowhovia jọ nọ a rẹro riẹ hẹ. O siobọno obe okpokpọ jọ evaọ ẹvẹrẹ ahwo Japan nọ uzoẹme riẹ o ta nọ, The Bible—The Gospel According to Matthew (Ebaibol na—Usi Uwoma Matiu). Nọ o siobọno obe na, ahwo idu egba ivẹ gbe ikpe (210,000), te enọ i kokohọ oria na gbe enọ e jẹ rọ ẹkwoma itanẹte riwi ughe na hayo gaviezọ evaọ eria efa sa-sa a tehe abọ oke krẹkri.

Obe Matiu nana nọ u wo ewẹ-obe udhozeza gbe eree (128) nọ a rehọ no Ebaibol New World Translation ọrọ ẹvẹrẹ Japan ze na o rrọ oghẹrẹsa. Brọda Morris ọ ta nọ a ru obe nana evaọ oghẹrẹ nọ u re ro “fiobọhọ kẹ ahwo ẹvẹrẹ Japan.” Ẹvẹ a ru obe Ebaibol nana? Fikieme a ro ru ei? Kọ ẹvẹ ahwo a rri obe na?

Oghẹrẹ nọ a ru obe Ebaibol nana u gbe ogbotu na unu. Ahwo Japan a rẹ sai kere uhie-eme rai dikihẹ hayo kere ai kiẹzẹ. Yọ a be hai kere uhie-eme na kiẹzẹ evaọ emagazini gbe ebe mai efa jọ, makọ enọ a siobọno kẹle na. Rekọ a kere uhie-eme obe Matiu nana dikihẹ wọhọ oghẹrẹ nọ a be hai kere ebe-usi gbe ebe ẹvẹrẹ Japan efa buobu. Obe nọ a rọ oghẹrẹ utiona kere o rẹ mae lọhọ ese kẹ ahwo Japan buobu. U te no ere no, a wọ izoẹme esese nọ e rẹ jọ obehru ewẹ-ebe Ebaibol na fihọ udevie eme evaọ obe Matiu nana re e sai fiobọhọ kẹ ohwo nọ o bi sei ruẹ igogo eme na.

Inievo obọ Japan a mu obe Matiu nana họ ese ababọ oke oraha. Oniọvo-ọmọtẹ jọ nọ ọ kpako te ikpe udhone gbọ no ọ ta nọ: “Me se obe Matiu na unuẹse buobu no vẹre, rekọ onana nọ a kere uhie-eme riẹ dikihẹ avọ izoẹme esese nọ e rrọ udevie eme na, u fiobọhọ kẹ omẹ wo otoriẹ Ovuẹ obọ Ugbehru na vi epaọ anwẹdẹ.” Oniọvo-ọmọtẹ jọ nọ ọ rrọ uzoge o kere nọ: “Ẹkeriotọ ọvo me ro se obe Matiu na re. Isase ebe nọ a kere uhie-eme rai kiẹzẹ o reria omẹ obọ no, rekọ enọ a re kere uhie-eme rai dikihẹ e rẹ mae were ahwo Japan buobu.”

Ẹvẹ obe Ebaibol ovo nana o sai ro fiobọhọ kẹ ahwo ẹvẹrẹ Japan? Dede nọ ahwo Japan buobu a nwane riẹ kpahe Ebaibol na tere he, a rọwo nọ a re sei. Obe Usi Uwoma Matiu nana u ti ru nọ ahwo nọ a re ruẹ Ebaibol vẹre he a ti ro wo abọjọ obe ofuafo nana je sei.

Fikieme a rọ salọ nọ obe Matiu a re ru enẹ? Nọ ahwo Japan buobu a te yo ẹme na “Ebaibol,” Jesu Kristi iroro rai i re kpohọ. Onana u ru nọ a rọ salọ obe Matiu, keme u wo ikuigbe uyẹ Jesu, eyẹ riẹ, Ovuẹ obọ Ugbehru riẹ nọ o viodẹ na, gbe eruẹaruẹ riẹ kpahe edẹ urere na. Enana kpobi e rẹ were ahwo Japan buobu.

 Iwhowho-uvie Japan a te mu obe nana họ ẹghale kẹ ahwo evaọ usiuwoma ota n’uwou ruọ uwou gbe etoke nọ a kpohọ ozihebro. Oniọvo-ọmọtẹ jọ o kere nọ: “Enẹna me wo uvẹ nọ me bi ro fi Ebaibol na họ ada kẹ ahwo buobu evaọ ẹkwotọ mai. Me tube fi obe Matiu na jọ họ ada evaọ uvo ẹdẹ nọ a ro siobọnoi na.”

Ẹvẹ iwhowho-uvie a be hai ro mu ẹmeọta họ nọ a tẹ gwọlọ fi obe Matiu na họ ada? Ahwo Japan buobu a riẹ eme wọhọ, “unuẹthẹ ohwahwa,” ‘izuu nọ a gbolo kẹ isi,’ gbe “wha ruawa odẹnotha vievie he.” (Mat. 6:34; 7:6, 13) U re gbe ai unu nọ a te yo nọ Jesu ọ ta eme nana. Nọ ibuobu rai a ruẹ eme nana evaọ obe Usi Uwoma Matiu na, a ta nọ: “O rrọ isiuru mẹ nọ me re se Ebaibol na anwẹdẹ, o tẹ make rrọ ẹsiẹvo.”

Nọ inievo na a te zihe bru ahwo nọ a fi obe Matiu na họ ada kẹ, ẹsibuobu a rẹ ta nọ okenọ oniọvo nọ ọ kẹ rai obe na ọ nwani kiuke ku no a ro mu obe na họ ese. Ọzae jọ nọ ọ rrọ ikpe udhosa gbọ ọ ta kẹ owhowho-uvie jọ nọ: “Me se rie unuẹse buobu, yọ o kẹ omẹ omosasọ. Iviena gbe wuhrẹ omẹ eware efa kpahe Ebaibol na.”

A be hai fi obe Matiu na họ ada evaọ etoke usiuwoma ota ẹgbede. Evaọ etoke usiuwoma ota utiona jọ, oniọvo-ọmọtẹ jọ ọ rehọ adrẹse e-mail riẹ kẹ aye jọ nọ ọ rehọ obe na. Nọ auwa ọvo ọ ruemu no, aye na o te vi uwou se oniọvo-ọmọtẹ na inọ o se abọjọ obe Matiu na no yọ ọ gbẹ gwọlọ wuhrẹ eware efa. Nọ ẹkpoka ọ ruemu no, a te wuhrẹ Ebaibol kugbei evaọ orọ ọsosuọ. O raha oke he, o te mu iwuhrẹ họ ẹnya.

Unu obe Matiu na nọ a vi kpohọ ikoko sa-sa no evaọ Japan i bu vrẹ ima ọvo gbe idu egba ezeza (1,600,000) no, yọ inievo na a bi fi idu rai buobu họ ada kamara kamara. Eme-emuhọ obe Matiu nana i dhesẹ oware nọ o rrọ isiuru ahwo nọ a whowho i rie, inọ: “O rrọ irẹro mai nọ isiuru nọ who wo kẹ ẹme Ọghẹnẹ o te ga vi epanọ o jọ nọ who ti se obe Matiu nana.”