1, 2. (a) Etadhesẹ vẹ Jesu ọ kẹ okenọ ọ jẹ ta ẹme kugbe ilele ekpekpe riẹ? (Rri uwoho nọ o rrọ emuhọ uzoẹme na) (b) Eme u fo nọ ma riẹ kpahe ọtadhesẹ igodẹ gbe ewe na?

ANWẸSIẸ Jesu ọ be ta ẹme kẹ Pita, Andru, Jemis, gbe Jọn nọ e jọ egbẹnyusu ekpekpe riẹ. Obọnana ọ kẹ ọtadhesẹ ọrigbo nọ a re fievahọ nọ o wo areghẹ na, emetẹ-kọkọ ikpe na, gbe etalẹnte na. Kẹsena ọ tẹ kẹ ọtadhesẹ ọfa jọ ro ku ẹme riẹ họ. Ọ ta kpahe okenọ “Ọmọ ohwo ọ te nyaze” ti guẹdhọ “erẹwho na kpobi.” Ababọ avro, ọtadhesẹ nana o ru nọ ilele na a rọ gwọlọ gbe yo eme efa. Jesu ọ jọ ọtadhesẹ na tẹrovi ẹko ahwo ivẹ jọ, ejọ igodẹ edekọ ewe. Ọ tẹ jẹ ta kpahe utu avesa jọ, enọ o se “inievo” “Ovie” na.—Se Matiu 25:31-46.

² U kri no nọ idibo Jihova a ro wo isiuru kpahe ọtadhesẹ nana, keme Jesu ọ jariẹ ta kpahe ẹme uwhu gbe azọ. Ọ fodẹ oware nọ o soriẹ nọ otujọ o ti ro wo uzuazọ ebẹdẹ bẹdẹ, efa kọ ọraha ebẹdẹ bẹdẹ. Re ma sae zọ, o gwọlọ nọ ma re wo otoriẹ ọtadhesẹ nana je ru lele oware nọ Jesu ọ be rehọ iẹe wuhrẹ omai. Nọ o rrọ ere na, o gwọlọ nọ ma nọ omamai nọ: Ẹvẹ Jihova ọ rọ rehọ ẹmẹrera ru otoriẹ mai kpahe ọtadhesẹ na vẹ no? Fikieme ma sae rọ ta nọ ọtadhesẹ na o fiẹgba họ  epanọ iruo usiuwoma ota na i wuzou te? Amono a kẹ iruo usiuwoma ota na? Kọ fikieme u ro fo nọ ma jọ oke nana romakpotọ kẹ “Ovie na” gbe otu nọ o se “inievo mẹ” na?

3, 4. (a) Re ma sai wo otoriẹ ọtadhesẹ igodẹ gbe ewe na, eware vẹ nọ i wuzou o gwọlọ nọ ma rẹ riẹ? (b) Evaọ ukpe 1881, ẹvẹ a jọ emagazini na Zion’s Watch Tower fotọ ọtadhesẹ nana?

³ Re ma sai wo otoriẹ ọtadhesẹ igodẹ gbe ewe na ziezi, o gwọlọ nọ ma rẹ riẹ ohwo nọ a se “ọmọ ohwo” na, ahwo nọ a se igodẹ gbe ewe na, oke ẹdhoguo nọ a te rọ hẹriẹ igodẹ no ewe na, gbe ẹjiroro nọ a ro se otujọ igodẹ, efa kọ ewe.

⁴ Evaọ ukpe 1881, emagazini Uwou-Eroro Na nọ a jẹ hai se Zion’s Watch Tower oke yena o ta nọ “Ọmọ ohwo” hayo “Ovie na” họ Jesu Kristi. Otoriẹ nọ Emọ-Uwuhrẹ Ebaibol na a wo vẹre họ, ẹme na “inievo mẹ” o kiekpahe otu nọ o ti lele Jesu su evaọ obọ odhiwu, o te je kiekpahe otu nọ ọ te rria otọakpọ na evaọ okenọ a te zihe ruọ ahwo ọgbagba no. A je roro nọ etoke Esuo Odu Ikpe Kristi a te rọ hẹriẹ igodẹ na no ewe. U te no ere no, a je roro nọ oware nọ u ti ru ahwo jọ utu igodẹ họ uzi Ọghẹnẹ kpahe uyoyou nọ a re koko.

5. Evaọ etoke ikpe 1920, otoriẹ okpokpọ vẹ ma wo?

⁵ Evaọ etoke ikpe 1920, Jihova o fiobọhọ kẹ idibo riẹ wo otoriẹ ọtadhesẹ nana vi epanọ o jọ. Uwou-Eroro ọ Akpe 15, 1923, ọrọ Oyibo, o ta nọ Jesu họ “Ọmọ ohwo” na. Rekọ u dhesẹ no Ikereakere na ze inọ Ileleikristi nọ a rọ ẹzi wholo nọ a ti lele Jesu su evaọ obọ odhiwu ọvo họ enọ a se inievo Kristi na, o tẹ jẹ ta nọ utu igodẹ na họ enọ e te jọ otọ esuo Kristi evaọ otọakpọ obonẹ. Kọ ẹvẹ kpahe oke nọ a te rọ hẹriẹ igodẹ no ewe na? Uwou-Eroro na o ta re nọ inievo Kristi a ti lele iei jọ obọ odhiwu su evaọ etoke Esuo Odu-Ikpe Kristi na, fikiere etoke nana o gbẹ rrọ oke nọ ahwo-akpọ a sai ro fiobọhọ kẹ ae hayo gbabọ kẹ ae he. Onana u dhesẹ nọ a te hẹriẹ igodẹ no ewe taure Esuo Odu-Ikpe Kristi na o te ti muhọ. Uwou-Eroro na o ta kpahe ẹjiroro nọ a ti ro se otujọ igodẹ inọ, fikinọ a rehọ Jesu fihọ Olori rai jẹ rẹroso Uvie Ọghẹnẹ inọ o te wha ewoma ze.

6. Evaọ etoke ikpe 1990, oruvẹ ọfa vẹ ma wo kpahe otoriẹ mai?

⁶ Fiki otoriẹ okpokpọ yena, idibo Jihova a je roro nọ etoke edẹ urere na kpobi a te rọ hẹriẹ igodẹ no ewe, yọ oghẹrẹ owọ nọ a jẹ kpahe ovuẹ Uvie na a ti ro vuhu ogodẹ gbe ẹwe. Dede na, evaọ ukpe 1995 ma tẹ wariẹ wo otoriẹ okpokpọ. Izoẹme ivẹ jọ evaọ Uwou-Eroro ọ Akpe 15, 1995, ọrọ Oyibo, e ta kpahe oghẹrẹ nọ eme Jesu nọ e rrọ obe Matiu 24:29-31 (sei) gbe Matiu 25:31, 32 (sei) i ro tho ohwohwo. * Uwou-Eroro Na u ku ẹme na họ nọ: “Oke nọ a te rọ hẹriẹ igodẹ no ewe o gbẹ rrọ obaro.” Rekọ onọ na họ, ugogo oke vẹ a te rọ hẹriẹ igodẹ no ewe na? “Onana o te romavia okenọ ‘uye’ nọ a fodẹ evaọ obe Matiu 24:29, 30 na u te du lahwe no nọ Ọmọ ohwo ọ te ‘nyaze evaọ oruaro riẹ.’ . . . Kẹsena evaọ ekuhọ uyerakpọ omuomu nana, Jesu o ve ti bruoziẹ akpọ na jẹ raha irumuomu.”

7. Otoriẹ uvevẹ vẹ ma wo enẹna?

 ⁷ Nẹnẹ, otoriẹ nọ ma wo kpahe ọtadhesẹ igodẹ gbe ewe na u vẹ gaga no. Jesu họ “Ọmọ ohwo” hayo Ovie nọ a fodẹ evaọ ọtadhesẹ na. Ileleikristi nọ a rọ ẹzi wholo nọ i ti lele Jesu su evaọ obọ odhiwu na họ “inievo mẹ” nọ a fodẹ evaọ ọtadhesẹ na. (Rom 8:16, 17) “Igodẹ” gbe “ewe” na i dikihẹ kẹ ahwo sa-sa nọ a no erẹwho kpobi ze. A rọ ẹzi wholo enana ha. Kọ oke vẹ a te rọ hẹriẹ igodẹ no ewe na? Ẹdhoguo nana ọ te romavia evaọ ekuhọ uye ulogbo na nọ o kẹle no na. Kọ ẹjiroro vẹ a ti ro gu otu jọ ẹdhọ sọ a rrọ igodẹ hayo ewe? Oghẹrẹ nọ a ru Ileleikristi nọ a rọ ẹzi wholo nọ e gbẹ rrọ otọakpọ u ti dhesẹ onana via. Nọ urere akpọ nana u te re no na, eva e be were omai gaga inọ Jihova ọ be rọ ẹmẹrera ru ọtadhesẹ nana vẹ kẹ omai gbe efa nọ i wobọ kugbe ọnana nọ e rrọ Matiu uzou avọ 24 gbe 25.

8, 9. Fikieme a ro se igodẹ na ahwo “okiẹrẹe”?

⁸ Jesu ọ fodẹ iruo usiuwoma ota na gbiae he evaọ ọtadhesẹ riẹ ọrọ igodẹ gbe ewe na. Kọ ẹvẹ ma sae rọ ta nọ u fiẹgba họ iruo usiuwoma ota na?

⁹ Orọ ọsosuọ, muẹrohọ nọ oware jọ Jesu ọ be rọ ọtadhesẹ na wuhrẹ na. O rrọ vevẹ nọ orọnikọ ọ be ta kpahe igodẹ nọ a be hẹriẹ no ewe dẹẹ hẹ. Epọvo na re, orọnikọ ọ be ta nọ enọ a se igodẹ na a te ginẹ rehọ emu ko, rọ ehọ zuo, rẹrote, hayo weze bru inievo riẹ nọ e rrọ uwou-odi dẹẹ hẹ. Ukpoye, ọ be rọ onana dhesẹ uruemu nọ otu nọ a se igodẹ na a re dhesẹ kẹ enọ a se inievo riẹ. O se igodẹ na ahwo “okiẹrẹe” fikinọ a vuhumu nọ Kristi o wo inievo nọ a rọ ẹzi wholo nọ e gbẹ rrọ otọakpọ, yọ igodẹ na a be rọ omaurokpotọ tha ahwo nana uke evaọ oke urere obẹbẹ nana.—Mat. 10:40-42; 25:40, 46; 2 Tim. 3:1-5.

10. Ẹvẹ igodẹ na a sai ro fiobọhọ kẹ inievo Kristi?

¹⁰ Orọ avivẹ, roro kpahe eme nọ e wariẹ ọtadhesẹ Jesu na họ. Ọ be ta kpahe oka ọzino riẹ gbe orọ ekuhọ uyerakpọ umuomu nana. (Mat. 24:3) Jesu ọ jọ emuhọ ẹme riẹ fodẹ oware jọ nọ o te jọ abọ ologbo jọ ọrọ oka yena, ọ ta nọ “a rẹ te ta usi uwoma Uvie na evaọ akpọ na soso.” (Mat. 24:14) Yọ taure ọ tẹ te ta kpahe igodẹ gbe ewe na, ọ kẹ ọtadhesẹ etalẹnte na. Wọhọ epanọ ma ta evaọ uzoẹme nọ o vrẹ na, Jesu ọ kẹ ọtadhesẹ yena ro fiẹgba họ ẹme na kẹ “inievo” riẹ, koyehọ Ileleikristi nọ a rọ ẹzi wholo na inọ o gwọlọ nọ a rẹ rọ osegboja ta usiuwoma na. Rekọ umutho Ileleikristi nọ a rọ ẹzi wholo nọ i ti kiọkọ otọakpọ evaọ etoke ọzino Kristi na a rẹriẹ ovao dhe use-abọ epanọ a te sae rọ ta usiuwoma na kẹ “erẹwho na kpobi” taure urere na o tẹ te ze. Ọtadhesẹ igodẹ gbe ewe na u dhesẹ nọ ahwo jọ a ti fiobọhọ kẹ Ileleikristi nọ a rọ ẹzi wholo na. Fikiere, ugogo edhere jọ nọ ahwo nọ a se igodẹ na a re ro fiobọhọ kẹ inievo Kristi họ, uketha nọ a rẹ rọ kẹ ae evaọ iruo usiuwoma ota na. Kọ eme oyena o gwọlọ? Kọ ugho gbe ekwakwa eyero nọ a re ro fiobọhọ hayo kọ uduotahawọ nọ a rẹ kẹ ae ọvo, manikọ o gwọlọ oware ofa jọ?

11. Onọ vẹ o rẹ sae romavia, kọ fikieme?

¹¹ Ibuobu ilele Jesu nọ i bu te ima eree (8,000,000) nẹnẹ na a rrọ usu enọ a rọ ẹzi wholo na ha. A wo etalẹnte nọ  Jesu ọ kẹ idibo riẹ nọ a rọ ẹzi wholo na ha. (Mat. 25:14-18) Onana o rẹ sae wha onọ jọ ze inọ, ‘Kọ ahwo nọ a rọ ẹzi wholo ho a ginẹ rrọ usu enọ a kẹ iruo usiuwoma ota na?’ Uyo na họ, Ee. Joma roro kpahe ẹjiroro sa-sa nọ ma rọ ta ere.

12. Eme ma wuhrẹ no eme Jesu nọ e rrọ obe Matiu 28:19, 20 na ze?

¹² Jesu ọ vuẹ ilele riẹ kpobi nọ a ta usiuwoma. Nọ Jesu ọ kparoma no uwhu ze no, ọ ta kẹ ilele riẹ nọ a wuhrẹ ahwo re a zihe ruọ ilele, inọ a wuhrẹ ai “eware kpobi” nọ o jie uzi rai. Iruo usiuwoma ota na e rrọ usu eware nana nọ o jie uzi kẹ ai nọ a ru na. (Se Matiu 28:19, 20.) Fikiere, o gwọlọ nọ ilele Jesu kpobi a rẹ ta usiuwoma, te a ti lele Jesu su evaọ obọ odhiwu hayo a te jọ otọ esuo riẹ evaọ otọakpọ.—Iruẹru 10:42.

13. Eme eruẹaruẹ nọ a rọ via kẹ Jọn i dhesẹ, kọ fikieme?

¹³ Obe Eviavia u dhesẹ nọ Ileleikristi nọ a rọ ẹzi wholo na gbe amọfa a ti ru iruo usiuwoma ota na. Jọn ukọ na ọ jọ eruẹaruẹ nọ Jesu o dhesẹ kẹe ruẹ “ọmọtibobo,” koyehọ ahwo idu udhuhrẹ gbe ene (144,000) nọ a rọ ẹzi wholo na, enọ i ti lele Kristi su evaọ obọ odhiwu nọ a bi zizie amọfa inọ a nyaze te “da ame uzuazọ ọvọvẹ.” (Evia. 14:1, 3; 22:17) Ame uzuazọ na o dikihẹ kẹ ọruẹrẹfihotọ idhe ẹtanigbo Jesu Kristi nọ Jihova o ru re ọ ruẹsi si ahwo-akpọ no igbo uzioraha gbe uwhu. (Mat. 20:28; Jọn 3:16; 1 Jọn 4:9, 10) Ẹtanigbo na yọ ugogo oware jọ nọ ma be vuẹ ahwo evaọ usiuwoma ota, yọ Ileleikristi nọ a rọ ẹzi wholo na a kobaro bi fiobọhọ kẹ amọfa riẹ kpahe iẹe re a ruẹsi wo erere noi ze. (1 Kọr. 1:23) Rekọ Jọn ọ jọ eruẹaruẹ na ruẹ amọfa jọ nọ a rrọ utu ọmọtibobo na ha. A ta kẹ enana re inọ a vuẹ amọfa nọ a “Nyaze!” A bi ru lele onana, bi zizie amọfa nọ a nyaze te da ame uzuazọ.  Utu avivẹ nana họ enọ i wo ẹruore otọakpọ. Fikiere eruẹaruẹ nana i dhesẹ vevẹ nọ ahwo kpobi nọ a ru lele uzizie na, “nyaze,” a wo owha-iruo nọ a rẹ rọ ta usiuwoma kẹ amọfa.

14. Re a koko “uzi Kristi,” eme o kẹre te?

¹⁴ O gwọlọ nọ ahwo kpobi nọ a rrọ otọ “uzi Kristi na” a rẹ ta usiuwoma. (Gal. 6:2) Uzi ovona Jihova o fihọ kẹ idibo riẹ kpobi. Wọhọ oriruo, ọ ta kẹ emọ Izrẹl nọ: “Te ọrara te ọmotọ uzi ovo na wha re wo.” (Ọny. 12:49; Izerẹ 24:22) Ileleikristi a rrọ otọ Uzi Mosis hi. Rekọ Oleleikristi kpobi ọ rrọ otọ “uzi Kristi,” te ọnọ a rọ ẹzi wholo hayo ọnọ a rọ ẹzi wholo ho. Uzi yena o kẹre te oware kpobi nọ Kristi o wuhrẹ omai. Oware jọ nọ o mai wuzou nọ Jesu o wuhrẹ ilele riẹ họ, uyoyou nọ a re dhesẹ kẹ amọfa. (Jọn 13:35; Jem. 2:8) Yọ ugogo edhere jọ nọ ma re ro dhesẹ uyoyou nọ ma wo kẹ Ọghẹnẹ, Kristi, gbe erivẹ mai họ, usiuwoma Uvie na nọ ma re whowho.—Jọn 15:10; Iruẹru 1:8.

15. Fikieme ma sae rọ ta nọ uzi nọ Jesu o jie nọ a ta usiuwoma na u kiekpahe ilele riẹ kpobi?

¹⁵ Ẹme nọ Jesu ọ ta kẹ umutho ahwo o rẹ sai kiekpahe ahwo buobu. Wọhọ oriruo, ilele ikpegbọvo ọvo Jesu ọ reọvọ Uvie kugbe, rekọ ọvọ yena o kiekpahe ahwo idu udhuhrẹ gbe ene (144,000) na kpobi. (Luk 22:29, 30; Evia. 5:10; 7:4-8) Epọvo na re, nọ ọ kparoma no uwhu ze no, umutho ilele riẹ jọ gheghe nọ ọ romavia kẹ ọ vuẹ nọ a ta usiuwoma. (Iruẹru 10:40-42; 1 Kọr. 15:6) Rekọ ilele riẹ erọ ikpe-udhusoi ọsosuọ na kpobi a vuhumu nọ iruo na i te rai re dede nọ Jesu ọ vuẹ rai ovao dhe ovao ho. (Iruẹru 8:4; 1 Pita 1:8) Epọvo na nẹnẹ, Jesu ọ ta ẹme kẹ ọvuọvo ovao dhe ovao ho evaọ usu iwhowho-uvie nọ i bu te ima eree (8,000,000) na. Rekọ aikpobi na a riẹ nọ o gwọlọ nọ a re fi ẹrọwọ họ Jesu, yọ a re je dhesẹ onana via ẹkwoma iruo usiuwoma ota na nọ a re ru.—Jem. 2:18.

16-18. Ẹvẹ otu nọ o rẹro nọ ọ te jọ igodẹ a sae rọ tha inievo Kristi uke, kọ fikieme o rọ gwọlọ nọ a re ru ere enẹna?

¹⁶ Setan o bi fiẹmo kugbe inievo Kristi nọ a rọ ẹzi wholo na nọ i kiọkọ otọakpọ, yọ ọwọsuọ riẹ ọ te ga vi epaọ anwẹdẹ kpobi nọ “omoke kakao” nọ u kiọkọ kẹe na u bi re no na. (Evia. 12:9, 12, 17) Dede nọ Ileleikristi nọ a rọ ẹzi wholo na a rẹriẹ ovao dhe edawọ ilogbo sa-sa, a be kobaro evaọ iruo usiuwoma ota nọ a re ruẹ obọ riẹ hẹ evaọ ikuigbe ohwo-akpọ na. Ababọ avro, Jesu ọ rrọ kugbe ai be kpọ ae evaọ iruo usiuwoma ota na.—Mat. 28:20.

¹⁷ Igodẹ Kristi nọ i bi dhe ebuebu na a rehọ e riẹ inọ uvẹ-ọghọ o rrọ nọ a be rọ tha inievo Kristi uke evaọ iruo usiuwoma ota na gbe idhere efa sa-sa. Wọhọ oriruo, a be rọ ugho ru unevaze je bi fiobọhọ evaọ ebabọ Egwa Uvie, Egwa Okokohọ, gbe iwou ogha, yọ a bi yoẹme kẹ inievo nọ e be kobaro evaọ ukoko na nọ “ọrigbo nọ a re fievahọ nọ o wo areghẹ na” o ro mu.—Mat. 24:45-47; Hib. 13:17.

¹⁸ Kẹlena, ikọ-odhiwu a ti siobọno ofou ọraha nọ ọ te wha uye ulogbo ze na. Onana o te via nọ a te kpoka urere họ inievo Kristi nọ i kiọkọ otọakpọ no. (Evia. 7:1-3) Yọ a te rehọ ai kpohọ odhiwu taure ẹmo Amagẹdọn o te ti du lahwe. (Mat. 13:41-43) Fikiere, enẹna họ oke nọ otu nọ o rẹro nọ ọ te jọ igodẹ na a rẹ rọ tha inievo Kristi uke.