JIHOVA yọ Ọghẹnẹ nọ ọ vọ avọ ọghoruo. (Jem. 1:17) Who te rri idadeghe na evaọ aso, whọ rẹ ruẹ isi nọ e da riẹ fia. Nọ who je rri otọakpọ na, whọ rẹ ruẹ ẹbe ọrọrọ nọ ọ vọ oria kpobi. O wọhọ ẹsenọ emama Jihova e be so ile urirẹ kẹ omai kpahe ọghoruo riẹ.—Ol. 65:12, 13; 147:7, 8; 148:3, 4.

Edẹro nọ ọso-ilezi na o wo kẹ Jihova nọ ọ ma ọyomariẹ e ga te epanọ oma o rọ wọe so ole ro jiri iruo abọ Jihova. Se Olezi avọ 104 sọ who ti wo ọkpọ eriwo ọso-ilezi na. Ọ ta nọ: “Mẹ rẹ suole kẹ ỌNOWO na nọ mẹ gbẹ rọ uzuazọ na; mẹ rẹ suole ajiri kẹ Ọghẹnẹ mẹ evaọ okenọ mẹ rẹ ria krite kpobi.” (Ol. 104:33) Kọ ere whọ gwọlọ ru re?

Jihova ọ gwọlọ nọ ma rehọ aro kele oriruo ọghoruo riẹ. Ọ kẹ omai obọdẹ ẹjiroro sa-sa nọ ma re ro ru ọghọ. Ọ wọ Pọl ukọ na kere nọ: “Ta kẹ enọ i fe evaọ uyero-akpọ nana inọ a wọ oma kpehru hu, gbe nọ a du rọ ẹruore rai kpahe efe nọ o muẹro ho ho, rekọ a rọ ẹruore rai kpahe Ọghẹnẹ, ọnọ ọ be kẹ omai eware kpobi nọ ma be reawere rai buobu. Ta kẹ ae nọ a hai ru ewoma, a hai ru eware ezi buobu, a hai ru ọghọ, siobọno kẹ amọfa, a vẹ rọ ere bi koko efe nọ oware ovo u re ru hu họ kẹ omarai, onọ o rrọ emamọ otọhotọ kẹ obaro na, re a sae dadabọ mu uvi uzuazọ na.”—1 Tim. 6:17-19.

Okenọ Pọl o kere ileta avivẹ riẹ se ukoko obọ Kọrint, o fiẹgbahọ uruemu nọ u fo nọ ohwo o re wo kpahe okẹ hayo ọghoruo. Ọ ta nọ: “Jọ ohwo kpobi o ru wọhọ epanọ ọ gba riẹ mu evaọ udu riẹ, orọnikọ avọ ẹgo ho hayo ọgbahọ họ, keme Ọghẹnẹ o re you ohwo nọ ọ rẹ rọ evawere kẹ okẹ.” (2 Kọr. 9:7) Kẹsena Pọl ọ tẹ fodẹ ahwo nọ a re wo erere no ọghoruo ze: ahwo nọ a jọ ọbẹwẹ nọ okẹ u te obọ, gbe otu nọ o ru ọghọ na nọ i wo eghale Ọghẹnẹ.—2 Kọr. 9:11-14.

Pọl ọ tẹ ta kpahe ọghoruo Ọghẹnẹ nọ ọ mae rro ro ku abọ nana ileta riẹ na họ. O kere nọ: “Uyere u te Ọghẹnẹ fiki okẹ ọvọvẹ riẹ nọ a rẹ sae ruẹ unu gbiku riẹ hẹ.” (2 Kọr. 9:15) Okẹ nọ Jihova ọ kẹ omai o kẹre te eware iwoma kpobi nọ ọ be rọ ẹkwoma Jesu Kristi ru kẹ omai idibo riẹ. Okẹ na o rro te epanọ a sai ro dhesẹ epanọ o ghare te he.

Ẹvẹ ma sai ro dhesẹ edẹro kẹ eware kpobi nọ Jihova avọ Ọmọ riẹ a ru kẹ omai no gbe enọ a ti ru kẹ omai evaọ obaro? Edhere jọ nọ ma sai ro ru onana họ, oke mai, ẹgba mai, gbe ugho hayo ekwakwa mai nọ ma rẹ rọ tha egagọ Jihova uke, te o kawo te o rro.—1 Irv. 22:14; 29:3-5; Luk 21:1-4.