Wọhọ epanọ o rrọ Joshua 6:10-15, 20, egbaẹmo Izrẹl a nya Jeriko wariẹ ẹsiẹvo okpẹdẹ evaọ edẹ ezeza. Evaọ ẹdẹ avọ ihrẹ, a tẹ nya okpẹwho na wariẹ isiahrẹ, kẹsena Ọghẹnẹ o te ru nọ igbẹhẹ ilogbo riẹ i ro kie fihọ otọ. Onana u ru nọ ahwo Izrẹl a sae rọ ruọ Jeriko je fi ei kparobọ. Kọ eware anwae nọ a kiẹ via kpahe Jeriko e kẹ imuẹro nọ e rọwokugbe ikuigbe Ebaibol na inọ, oke kpẹkpẹe ọvo a wariẹ okpẹwho na họ taure a te ti fi ei kparobọ?

Evaọ oke anwae, ewegrẹ a jẹ hae wariẹ ikpewho nọ a di ogba wariẹ họ. Ghelọ epanọ a wariẹ okpẹwho otiọna họ kri te kẹhẹ, ewegrẹ na a te fi ei kparobọ no a rẹ kwa efe okpẹwho na rehọ, te eware emuore kpobi nọ i kiọkọ. Nọ ekiotọ a jẹ kiẹ eware Jeriko oke anwae nọ ọ raha no, a ruẹ ekwakwa emuore buobu evaọ okpẹwho na. Obe na, Biblical Archaeology Review o ta kpahe onana nọ: “U te no eware wọhọ idẹro gbe ithẹ no, oware ofa nọ a mae ruẹ evaọ okpẹwho na họ ibi-ekakọ nọ a vu. . . . Evaọ eware nọ a kere fihotọ kpahe ekiakiẹ eware anwae obọ Palestine, onana o jọ oghẹrẹsa gaga. Ẹsejọ a sae ruẹ akana ọvo hayo ivẹ, rekọ a re te ruẹ ibi-ekakọ nọ i bu tere he.”

Wọhọ epanọ ikuigbe na i dhesẹ, u wo obọdẹ ẹjiroro nọ ahwo Izrẹl a gbẹ rọ kwa ekakọ nọ a vu evaọ Jeriko ho. Jihova o jie uzi kẹ ae nọ a du ru ere he. (Jos. 6:17, 18) Okenọ ahwo Izrẹl a wọ ohọre bru okpẹwho na, yọ oke ivuẹvu o nwane vrẹ obọ, onọ u ru ibi-ekakọ nọ a vu hayo emu da oria kpobi fia evaọ okpẹwho na. (Jos. 3:15-17; 5:10) Nọ o rọnọ ibi-ekakọ nọ a vu buobu i kiọkọ Jeriko okenọ a fi ei kparobọ no na, u dhesẹ nọ oke kpẹkpẹe ahwo Izrẹl a wariẹ okpẹwho na họ wọhọ epanọ Ebaibol o dhesẹ na.