Ileta nọ I No Obọ Ghana Ze

Ẹdẹ nọ Umueku Ubiebi na U ro Noi Eku

OGHẸRẸ ohwo nọ me rẹro riẹ ọye mẹ ruẹ hẹ. Avọ ewu owhewhelie ọfuafo othethei nọ o kuhọ oma, umueku ubiebi nọ o kẹre te evabọ ọmaha nọ o ro mu eku ọkakao riẹ, o dikihẹ kerọ ẹsenọ ọ be te họre, ọ zaza abọ mu, jẹ dada awọ muotọ. O mudhe, si ovao họ avọ ikparo riẹ nọ i siku. Ibiaro riẹ i si rueva, yọ etuaro riẹ e zare vi avọ idudu—whọ rẹ ruẹ oware ovuovo nọ u dhesẹ oyẹlẹ via evaọ ovao riẹ hẹ.

Ẹsiẹvo na o te bo je duola. O te veghe obọ. Obọgo riẹ o tẹ bẹre ẹwẹ-akpala ibro-ivẹ kie fihọ otọ. Ọ tẹ wariẹ tọlọ oma n’otọ vre kurẹriẹ, veghe abọ gbe awọ riẹ ẹsiẹvo epaọ ẹsenọ ọ gwọlọ bọo omọfa nọ a be gbẹ họre. Kọ o sae ginẹ jọnọ ọzae nọ ọ ta nọ ọ gwọlọ re ohwo jọ ọ nyaze ti wuhrẹ iẹe Ebaibol na ọna?

Mẹ tẹ riẹ obọ be gwọlọ suẹe obọ, inọ: “O wọhọ nọ whẹ họ Kojo. A vuẹ omẹ inọ whọ gwọlọ nọ ohwo jọ o wuhrẹ Ebaibol kugbe owhẹ.” O te viri obọ mẹ, je kp’ohwẹ ku unu, ovao riẹ o tẹ ghariẹ. Ovao riẹ u nwene no, ukpọ idudu kọ isiuru orọ ohwo nọ ọ gwọlọ riẹ oware whọ rẹ ruẹ. Ọ tẹ ta nọ: “Ee, o te were omẹ gaga, oke vẹ ma bi ro muhọ?”

Ma tẹ keria ogebara riẹ avọ Ebaibol gbe ebe nọ ma kru. Oria na o rrọ fọfọ ziezi, yọ mai ọvo ma riẹ. Mẹ, ọyomariẹ gbe emewe riẹ. Emewe na nọ ọ rọ omoware theri vi urula na, o wo eto ewawae eva oko-uzou riẹ avọ etuagba efuafo nọ u re fou ohwo họ ehwẹ nọ whọ tẹ rue riẹ, yọ oria ovo o rẹ gbae he. Ọ rẹ rọ ẹro ruẹ oware nya seba ha, bi vre ẹgolo, dhẹ kpenẹ avọ enẹ, la ruọ ehru ebe mai, fru igbẹ-ame mi omai, thọrọ abọ họ ekpa iwu mai gwọlọ oware kpobi nọ u re tei obọ. Wọhọ ọyewọ nọ edo gbe odhẹ emaha o reria oma no, Kojo ọ be daezọ ugberu emewe na ha, ọ tẹrovi uwuhrẹ na ọvo. Enọ buobu nọ ọ be nọ u dhesẹ kẹ omẹ nọ o bi gine roro kpahe uwuhrẹ na, je wo ọwhọ kẹe. O sae jọnọ ekareti-efa u wuhrẹ i rie omoyọrọ gbe ẹro-omuhotọ no, keme ọ rẹ nwane rọwo oware he ajokpanọ ọ ruẹ imuẹro riẹ evaọ Ikereakere na.

Uwuhrẹ na o be nya haro ziezi. Nọ oke o be nya na, mẹ tẹ te ruẹ nọ u wo abọ-omuo ọgaga ọfa nọ ọ rẹriẹ ovao dhe, ohọre kugbe iroro riẹ. Ọ ta kẹ omẹ nọ: “Oware ovo nọ mẹ jọ akpọ na you kpobi họ ekareti-efa.” Mẹ be jọ ovao ọgba nana ruẹ inọ o gine you ekareti, oware nọ o wuhrẹ lafi no. Ikpe udhegbezeza ọ rrọ, yọ orọnikọ o you ekareti ọvo ho, rekọ  ọgba ekareti-efa ọ rrọ, te epanọ o ro te ọkwa ohwo nọ a rẹ kẹ umueku ubiebi, onọ umutho egba jọ ọvo a rẹ sai wo tobọ.

Mẹ riẹ abọ nọ Kojo ọ te whomahọ họ. Mẹ riẹ nọ o vuhumu inọ re ọ jọ ọgba ekareti, nọ ọ rẹ rehọ abọ gbe awọ nwa amọfa oma, o rọwokugbe ẹzi ọdawẹ, ẹwo gbe ororokẹ hẹ nọ e rrọ oka uyoyou nọ o rrọ udevie Ileleikristi uzẹme. Dede na, mẹ riẹ nọ Ebaibol na i nwene ahwo nọ udu rai o ga vi oriẹ no. Kojo o te gine wo eva ezi, ẹgba Ẹme Ọghẹnẹ o te rọ ẹmẹrera ru udu riẹ lọhọ. Me re wo odiri.

Uvo ẹdẹjọ nọ ma ti ru ma ku uwuhrẹ mai họ, ma te se oria Ebaibol jọ nọ u du obọ te Kojo wọhọ epanọ obọgo ọgba ohọre u re du ọrivẹ ohọre efẹ na. O se nọ: “ỌNOWO na ọ rẹ kiẹ ikiẹrẹe gbe iru-umuomu, ẹzi riẹ o mukpahe ọnọ o you igbruku [hayo, ozighi].” (Olezi 11:5) Ọ tẹ rọ unu kpotọ be wariẹ ẹme na kẹ omariẹ, “Ọnọ o you igbruku [hayo, ozighi].” Ibiaro riẹ nọ e jọ wawae nọ e zae vi jẹ vọ avọ idudu na i te muhọ ẹlọhọ. O te rri omẹ ovao, kp’ohwẹ ku unu jẹ ta nọ: “U no omẹ eva ze no.”

Enẹna mẹ avọ Kojo ma bi ru iruo nọ e mae were omai kpaobọ—be rehọ oke mai wuhrẹ ahwo nọ a gwọlọ gaviezọ kẹ ovuẹ Ebaibol na ọvọvẹ. Ohiohiẹ nana ma be nyae ruẹ ọzae jọ nọ a re se Luke wọhọ epanọ ma ta fihọ.

Edhere eki nọ o re zurie ma be nya kpohọ oria Luke. Whọ rẹ ruẹ iwou-eki buobu gbe ahwo nọ a rọ eware sa-sa dhe: koghẹrẹ koghẹrẹ ibi-izuwo, ikete etomatoso, ọkro, gbe iredio, esasa, edha, iwhigi, imidhe gbe ebẹro, iwu gbe eviẹ ọkreka. Emetẹ e wọ idhe emu nọ o bi gbore awere họ uzou krẹkrẹrẹkrẹ bi ghoro. A be keke oma họ udevie ahwo vrẹ be rọ ore awere izuwo gbe istu nọ a rọ iyei eyaya, ero hayo egadiokpa gbe isekpe ro there kpare isiuru ahwo nọ ohọo u bi kpe. Erakọ, ewe, gbe erifẹ nọ i bi bo e be dhẹ otọ awọ ahwo vrẹ. Iredio i bi do, te egba imoto gbe imotosaikoro, yọ ahwo a be kpare uvo ta ẹme.

Ma tẹ ruọ edhere ovu jọ kiuke ku edo ọgaga ẹwho na, ma te te uwou anwae jọ nọ a kere fihọ nọ: “Oria Eriosehọ kẹ Erẹ Ugbothabọ.” Luke nọ ọ rrọ omojọ vrẹ ikpe 20 no, o dikihẹ unuẹthẹ na o te se omai ruọ edhedhẹ no uvo na. Oria na kpobi o vọ avọ ekpa gbe ikete nọ a fi ebe-ẹwọ gbe awọ-ire eyaya fihọ, ebe nọ a rọ ifi gba kokohọ, gbe ikru ehọrọ-ire buobu, enọ oniọvo oni Luke nọ ọ kpako no o re ro ru imu kẹ ahwo. Eriariẹ ebe-ẹwọ nọ ọ riuku rai mi esẹ-esẹ riẹ o bi ro ru onana, ebe-ẹwọ, awọ-ire, gbe ehọrọ-ire sa-sa nọ o duwu je there nọ o re ro siwi oghẹrẹ eyao sa-sa. Luke o bi rẹro mai vẹre. O hwere otọ na kpobi fuafo jẹ ruẹrẹ ekpala ire esa kpahe be hẹrẹ omai. Ma keria kẹle ohwohwo, ma te mu uwuhrẹ Ebaibol họ.

Kojo ọye o bi wuhrẹ Ebaibol kugbe Luke. Mẹ keria be gaviezọ nọ aimava a be kiẹ oware nọ Ebaibol na e ta kpahe oware nọ o soriẹ nọ uye-oruẹ o jẹ vọ akpọ te enẹ. Nọ Kojo o nioma bru Luke bi fi obọ họ kẹe gwọlọ oria Ebaibol jọ, me te bi rri epanọ ọ be rọ rehọ abọ ọgaga riẹ na rọ ẹmẹrera rovie ewẹ-obe evẹvẹ Ebaibol na. Me te roro kpemu, inọ omoke jọ nọ o vrẹ, ọ jẹ rehọ abọ nana họre ahwo. Ẹme Ọghẹnẹ o wo ẹgba nọ o re ro nwene iruemu iyoma nọ e da akpọ omuomu nana fia na zihe ruọ erọ ẹwo gbe uyoyou. A rẹ sae ruẹ enwene nọ o te onana ha.

Nọ ma bi zihe kpo na, ma tẹ wẹriẹ re ma ta ẹme kẹ ọzae jọ nọ ọ keria otọ ure emagoro. Ọ nabe fọ be gaviezọ nọ Kojo o rovie oria Ebaibol jọ bi se kẹe. Rekọ nọ ọzae na ọ riẹ nọ mai yọ Isẹri Jihova, ọ tẹ sa kpama ẹsiẹvo. O te bo nọ: “Eva rai Isẹri Jihova e rẹ dha omẹ!” Eva e tẹ dha Kojo tuke. Mẹ tẹ ruẹ nọ ọ bi hrẹ udu kpotọ, o te kuomarẹriẹ. Ma tẹ nya vrẹ.

Nọ ma rrọ edhere be nyavrẹ na, Kojo o te fi unu họ omẹ ozọ jẹ ta nọ: “Ofu ọ gbamu omẹ udu ẹsiẹ nọ ọ ta ẹme yena. Whọ riẹ oware nọ mẹ hai ti ru ọzae yena?” Mẹ tẹ hwẹ jẹ ta nọ: “Mẹ riẹ.” Ọ tẹ hwẹ re, ma tẹ ruabọhọ onya mai.