Si Kẹle Ọghẹnẹ

Ọnọ O You Uvi-Oziẹ

Ahwo Hibru 10:26-31

KỌ A ru owhẹ oware oja hayo kienyẹ owhẹ no ẹdẹjọ, yọ ohwo nọ o ru owhẹ oware na ọ daezọ họ, yọ uvumọ ohwo ọ kpọ riẹ unu gbe he? Eware nọ e rẹ via kẹ ohwo nọ e rẹ sae da vi oghẹrẹ okienyẹ otiọye i tulo ho, maero otẹrọnọ ohwo nọ who rẹro nọ o ti dhesẹ uyoyou kẹ owhẹ hayo rẹrote owhẹ o ru onana. O rẹ sai gbowhẹ unu nọ, ‘Fikieme Ọghẹnẹ ọ rọ kuvẹ kẹ eware itieye na?’ * Uzẹme ẹme na họ, Jihova Ọghẹnẹ o mukpahe oghẹrẹ okienyẹ kpobi. Ẹme riẹ, Ebaibol na, e kẹ omai imuẹro inọ Ọghẹnẹ ọ te siọ ahwo nọ a bi keke aro fihọ ru eyoma uye ba ẹkẹ hẹ. Joma ta ẹme kpahe eme Pọl ukọ na nọ e rrọ Ahwo Hibru 10:26-31.

Pọl o kere nọ: “Otẹrọnọ ma riẹ uzẹme na no, ma tẹ jẹ barosa keke be raha izi, iwẹ egọ fiki izieraha igbe fiokaha.” (Owọ avọ 26) A rẹ ruẹ oware nọ u yoma te aro nọ a re keke fihọ raha uzi hi. Fikieme o jẹ rrọ ere? Orọ ọsosuọ, orọnikọ otiọ uzi nọ o rẹ thọ ohwo obọ ẹsejọ fiki omoyẹlẹ iwo oye ahwo otiọna a be thọ na ha—onọ o rẹ sae via kẹ omai kpobi ẹsejọ fikinọ ma gba ha. Rekọ ahwo otiọna a zihe umuomu uruo ruọ ẹkẹ uzuazọ uyero rai. Orọ avivẹ, aro kekeke ahwo otiọye na a bi ro ru umuomu. A rẹ “barosa” ru umuomu. Udu rai u where kẹ eyoma oruo no. Orọ avesa, orọnikọ ogbori a bi ro ru umuomu na ha. A “riẹ uzẹme na” kpahe oreva Ọghẹnẹ gbe idhere riẹ.

Ẹvẹ Ọghẹnẹ o re rri otu nọ o re keke aro fihọ raha uzi nọ a rẹ rọwo kurẹriẹ hẹ? Pọl ọ ta nọ: “Iwẹ egọ fiki izieraha igbe fiokaha,” koyehọ e gbẹ riẹ hẹ. Idhe ẹtanigbo Kristi—okẹ Ọghẹnẹ rọkẹ ahwo-akpọ—u re ruru izieraha nọ ma thọ fiki sebaẹgba. (1 Jọn 2:1, 2) Rekọ ahwo nọ a re keke aro fihọ raha uzi ababọ ekurẹriẹ, a bi dhesẹ nọ a wo edẹro kẹ okẹ oghaghae nana ha. Evaọ eriwo Ọghẹnẹ, a be “sa Ọmọ Ọghẹnẹ awọ, . . . be jẹ azẹ ọvọriọ nọ ọ rehọ gọ iwẹ na fiẹ.” (Owọ avọ 29) A be rọ owojẹ nana dhesẹ orivo kẹ Jesu je bi rri azẹ riẹ “wọhọ oware ukuẹku,” wọhọ ẹsenọ azẹ riẹ avọ ọrọ ohwo-akpọ nọ ọ gba ha ọ rrọ ẹrẹrẹe. (Today’s English Version) Ahwo otiọye nọ a kare edẹro na a sai wo erere no idhe ẹtanigbo Kristi ze he.

Eme ahwo omuomu otiọye a rẹ sai rẹro riẹ? Ọghẹnẹ uvi-oziẹ na ọ ta nọ: “Orukele na ọ mẹ; me re ru kele.” (Owọ avọ 30) Jọ ahwo kpobi nọ a bi keke aro fihọ ru umuomu, yọ a be daezọ uye nọ onana o be wha se amọfa ha, a yọrọ oma. Ohwo ọvuọvo nọ ọ rẹ sae raha izi ikiẹrẹe Ọghẹnẹ ababọ uye nọ u re tei ọ rrọ họ. Ẹsibuobu orumuomu o re kpawọ ku ebẹbẹ nọ uzioraha riẹ o wha ze. (Ahwo Galesha 6:7) U je re krẹ, a te rẹriẹ ovao ku ẹdhoguo Ọghẹnẹ evaọ obaro kẹlena nọ o ti si oghẹrẹ okienyẹ kpobi no otọakpọ na. (Itẹ 2:21, 22) Pọl ọ vẹvẹ omai unu nọ: “O rọ oware imuozọ gaga re ohwo o kie uzi Ọghẹnẹ uzuazọ [na].”—Owọ avọ 31.

Ẹriẹ inọ Jihova Ọghẹnẹ o re rri uziothọ aro kekeke vo ho o rẹ kẹ omosasọ gbe ẹruore, maero rọkẹ ahwo nọ a ruẹ uye no evaọ obọ ahwo omuomu nọ a keke aro fihọ ru ai oware ogaga. Ma rẹ sae nyasiọ orukele ba kẹ Ọghẹnẹ nọ o mukpahe okienyẹ kpobi na, avọ evaifihọ inọ ọ te kioja kẹ omai.

[Oruvẹ-obotọ]