Abọ nọ Meri O Wo Evaọ Orugba Ẹjiroro Ọghẹnẹ

ẸDẸJỌ evaọ etoke odibọgba Jesu, aye jọ ọ jọ udevie ogbotu bo nọ: “Edhede nọ o yẹ owhẹ o wo oghale, gbe evie nọ who vie!” O hae jọnọ Jesu ọ gwọlọ nọ a gọ oni riẹ, onana yọ obọdẹ uvẹ nọ ọ hẹ te rọ ta udu họ oghẹrẹ egagọ itieye. O ru ere he, rekọ ọ ta nọ: “I kpoye, enọ i yo ẹme Ọghẹnẹ, [je] ru ei a wo eghale!”—Luk 11:27, 28.

Jesu ọ kẹ oni riẹ adhẹẹ obọdẹ oghẹrẹsa jọ họ; yọ ọ ta kẹ ilele riẹ ẹdẹvo nọ a ru ere he. Nọ o rrọ ere na, ẹvẹ ma rẹ sae ta kpahe egagọ nọ ahwo buobu nọ a wo eva ezi a be rọ kẹ Meri na? Joma rọ Ikereakere na kiẹ iwuhrẹ jọ riwi nọ e da oria kpobi fia nẹnẹ kpahe oni Jesu.

“Ọnọ A Ri Aro Gaga,” Ọnọ O “Wo Oghale Eva Udevie Eyae”

Ukọ-odhiwu na Gebriẹl ọ vuẹ Meri ẹkẹ abọ nọ o ti wo evaọ orugba ẹjiroro Ọghẹnẹ. Oke yena o ro yere Meri nọ: “Do, whẹ ọnọ a ri aro gaga, Ọnowo na avọ owhẹ a rọ!” (Luk 1:28) Ahwo jọ a fa uyere nana nọ: “Uyere u te owhẹ, ọnọ o wo aruoriwo gaga, Ọnowo na ọ rrọ kugbe owhẹ.” Nọ oyena o vrẹ no, Ẹlizabẹt o te je yere Meri nọ: “Who wo oghale eva udevie eyae, ubi edhede ra u wo oghale.” (Luk 1:42) Kọ eme nana i gbe dhesẹ nọ Meri o te ohwo nọ a rẹ gọ?

Ijo, o rrọ ere he. Dede nọ ahwo Kathọlik a re fi eme nana rọ ba elẹ rai se Meri,  Ebaibol na e kẹ ẹjiroro ọvuọvo nọ a rẹ rọ lẹ se Meri hi. Gebriẹl avọ Ẹlizabẹt a vuhu uvẹ-ọghọ ulogbo nọ u te Meri nọ o bi ti ro yẹ Mesaya na, rekọ Ikereakere na e ta ẹme ọvuọvo ho nọ u dhesẹ inọ u fo re a lẹ se Meri. Ukpoye, okenọ ilele Jesu a ta kẹe nọ o wuhrẹ ai epanọ a rẹ lẹ, ọ ta kẹ ai nọ Ọsẹ riẹ ọvo a rẹ lẹ se. Enẹ olẹ oriruo nọ Jesu o wuhrẹ ilele riẹ na u ro muhọ: ‘Ọsẹ mai nọ ọ rọ obọ odhiwu.’—Matiu 6:9.

Omọvo Ibe-Isu Kugbe Kristi

A be jẹ wha uwuhrẹ ofa jọ haro kpahe Meri inọ, “Ovie-Aye Odhiwu” ọ rrọ enẹna. Ebaibol e kẹ Meri odẹ-ova utioye vievie he. Dede na, Ebaibol e ta nọ o wo obọdẹ oria evaọ ọruẹrẹfihotọ Ọghẹnẹ evaọ obọ odhiwu. Didi oria?

Jesu ọ ta nọ ilele riẹ jọ nọ i wo ẹrọwọ a ti lele iei su evaọ Uvie riẹ. (Luk 22:28-30) Jesu ọ te kẹ ahwo yena nọ a salọ na udu-esuo nọ a te rọ jọ “izerẹ kẹ Ọghẹnẹ mai, a vẹ te re uvie evaọ akpọ na.” (Eviavia 5:10) Ẹme nọ Ebaibol na e ta kpahe Meri o kẹ omai imuẹro inọ ọ rrọ usu ahwo nọ a kẹ uvẹ-ọghọ ulogbo nana. Ẹvẹ ma rọ ta ere?

Kareghẹhọ inọ okenọ Jesu o whu no, Meri ọ “ruẹrẹ eva kpahe olẹ olẹ” kugbe ilele gbe inievo Jesu. Okejọ ahwo nọ a te 120 a kokohọ kẹ onana, yọ “eyae” e jọ usu rai re. (Iruẹru Ikọ Na 1:12-15) Ebaibol e ta inọ: “Nọ ẹdẹ Pẹntikọst ote, ai kpobi a te koko họ oria ovo,” ẹzi ọfuafo Ọghẹnẹ o te hwẹ ku aikpobi, onọ u ru nọ a jẹ rọ jẹ evẹravẹrẹ.—Iruẹru Ikọ Na 2:1-4.

Nọ Meri ọ jọ usu ahwo nọ a wo oghale nana, u dhesẹ nọ ọyomariẹ gbe eyae edekọ nọ a ku ẹzi ọfuafo ku na a rrọ usu ahwo nọ a salọ re a jọ ibe-isu evaọ Uvie Jesu evaọ obọ odhiwu. Fikiere imuẹro e vọ riẹ nọ ma rẹ rọ rọwo inọ Meri ọ rrọ kugbe Jesu no enẹna evaọ obọ odhiwu. (Ahwo Rom 8:14-17) Muẹrohọ uvẹ-ọghọ efa jọ nọ Meri avọ ibe-isu Jesu nọ i kiọkọ a bi ti wo evaọ orugba ẹjiroro Ọghẹnẹ.

A te Wha Eghale Obọdẹ Ze

Ebaibol e jọ obe Eviavia ta inọ a te kpare ahwo 144,000 kpohọ obọ odhiwu re a jọ kugbe Jesu wọhọ izerẹ, ibruoziẹ, gbe ivie. (Eviavia 14:1, 4; 20:4, 6) Wọhọ izerẹ, a ti kuobọgbe rehọ aghare idhe ẹtanigbo Jesu te ahwo-akpọ kpobi nọ a yoẹme, a ve ti ru ai jọ gbagba evaọ abọ-ẹzi, uruemu, gbe ugboma. (Eviavia 21:1-4) Uvẹ-ọghọ ulogbo o be te jọ kẹ idibo Jihova kpobi nọ e yọrọ ẹgbakiete rai re a rọ ẹro ruẹ oke yena! *

Meri o wo obọ evaọ orugba ẹjiroro Ọghẹnẹ evaọ oke nọ o vrẹ, yọ ọ gbẹ be jariẹ wobọ enẹna. Oriruo omaurokpotọ, ẹrọwọ, ẹmeoyo, gbe oriruo omarọkẹ owha-iruo riẹ wọhọ oni i fo aruorokele, a gbe du ta ha orọ akothiho riẹ eva etoke edawọ. O fo aye nọ a rẹ kẹ adhẹẹ ziezi rọkẹ abọ nọ o wo evaọ eyẹ Mesaya na gbe eghale ebẹdẹ bẹdẹ nọ o ti ku obọ gbe wha se ahwo-akpọ.

Dede na, oware nọ o mai wuzou nọ ma wuhrẹ mi Meri họ, tei te idibo Ọghẹnẹ efa buobu nọ i wo ẹrọwọ a gọ Jihova orọnọ ọghẹnẹ ọfa jọ họ. Meri o ku unu gbe ibe-isu Kristi nọ i kiọkọ nọ e rrọ obọ odhiwu nọ i bo nọ: “Oghale gbe adhẹẹ gbe oro gbe ogaga u te ọnọ Ọ keria akaba uvie na gbe Omogodẹ na bẹdẹ bẹdẹ!”—Eviavia 5:13; 19:10.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 10]

Oriruo omaurokpotọ, ẹrọwọ, gbe ẹmeoyo Meri i fo aruorokele