Wuhrẹ Emọ ra

Josaya Ọ Salọ nọ O Re Ru Oware nọ U Kiehọ

KỌ WHO roro nọ o rrọ bẹbẹ re a ru oware nọ u kiehọ? *— Whọ tẹ ta nọ o rrọ bẹbẹ, ahwo buobu a te rọwo kugbe owhẹ. O rrọ bẹbẹ kẹ ahwo nọ e kpako no dede re a ru oware nọ a riẹ inọ u kiehọ. Joma ruẹ oware nọ o wha riẹ ze nọ o rọ jọ bẹbẹ gaga kẹ Josaya re o ru oware nọ u kiehọ. Kọ whọ riẹ ohwo nọ ọ jọ?—

Josaya yọ ọmọzae Amọn, ovie Juda, yọ ikpe 16 ọvo Amọn ọ jọ nọ o ro yẹ Josaya. Amọn ọ jọ ovie oyoma wọhọ Manasẹ, ọsẹ riẹ. Manasẹ ọ jọ ekpehre ovie ikpe buobu. Rekọ nọ oke o be nyaharo na, ahwo Asiria a te mu ei je fi ei họ uwou-odi evaọ ugbobọ Babilọn. Nọ ọ jọ uwou-odi, Manasẹ ọ tẹ lẹ Jihova re ọ rọ vrẹe, Jihova ọ tẹ rọ vrẹe.

Nọ a si obọ no Manasẹ no, o te zihe kpohọ Jerusalẹm jẹ wariẹ muhọ esu. Ababọ okioraha, ọ tẹ kpọ eware iyoma nọ o ru thọ na vi je fi obọ họ kẹ ahwo na re a gọ Jihova. Ẹsejọhọ, eva e were riẹ hẹ inọ ọmọzae riẹ Amọn ọ nya lele emamọ oriruo riẹ hẹ. Enwenọ oke nana a ro yẹ Josaya. Ebaibol na e fodẹ epanọ Manasẹ ọ raha oke kugbe Josaya, oruọmọ riẹ na te he. Kọ who roro nọ ẹsejọhọ Manasẹ ọ daoma fi obọ họ kẹe gọ Jihova?—

Okenọ Josaya ọ jọ ikpe ezeza ọvo Manasẹ o ro whu, ọsẹ Josaya nọ a re se Amọn o te zihe ruọ ovie. Ikpe ivẹ ọvo Amọn o su taure idibo riẹ a te ti kpei. Fikiere, Josaya o te zihe ruọ ovie Juda evaọ okenọ ọ jọ ikpe eree. (2 Iruẹru-Ivie, uzou avọ 33) Eme who roro nọ o via nọ o muhọ esu no? Kọ Josaya o lele ekpehre uruemu Amọn ọsẹ riẹ, manikọ emamọ oriruo Manasẹ, ọsẹ-ode riẹ nọ o kurẹriẹ na o lele?—

Dedenọ Josaya ọ jọ ọmaha, o jọ isiuru riẹ inọ ọ rẹ gọ Jihova. Fikiere ọ jẹ hae gaviezọ kẹ ahwo nọ a you Jihova, viukpọ egbẹnyusu ọsẹ riẹ. Ikpe eree ọvo Josaya ọ jọ rekọ ọ riẹ inọ u woma re a gaviezọ kẹ ahwo nọ a you Ọghẹnẹ.  (2 Iruẹru-Ivie 34:1, 2) Kọ whọ gwọlọ riẹ oware jọ kpahe ahwo nọ a hrẹ Josaya jẹ jọ emamọ oriruo kẹe?—

Zẹfanaya ọruẹaro na yọ omọvo ahwo nọ emamọ oriruo rai o kpomahọ Josaya. Omoni Josaya ọ jọ, keme o wọhọ nọ ọ jọ ohwo uyẹ Hẹzikaya emamọ Ovie na, ọnọ ọ jọ ọsẹ Manasẹ. Evaọ emuhọ esuo Josaya, oye Zẹfanaya o ro kere obe Ebaibol nọ a rọ odẹ riẹ se na. Zẹfanaya ọ kẹ unuovẹvẹ kpahe eware iyoma nọ e te via kẹ ahwo nọ a je ru eyoma, yọ ababọ avro, Josaya ọ gaviezọ kẹ unuovẹvẹ yena.

Jerimaya, ọnọ ẹsejọhọ who yo kpahe no vẹre na, yọ omọfa nọ emamọ oriruo riẹ o kpomahọ Josaya. Jerimaya avọ Josaya a rria kẹle oma no emaha ze. Jihova ọ kẹ Jerimaya ẹgba ẹzi ro kere obe Ebaibol nọ a rọ odẹ riẹ se. Okenọ a kpe Josaya evaọ ẹmo, Jerimaya o te kere obọdẹ ole-uweri jọ ro dhesẹ ọkora nọ uwhu Josaya o wha sei. (2 Iruẹru-Ivie 35:25) O rẹ sai mu omai ẹro inọ a jẹ hae ta udu họ ohwohwo awọ re a yọrọ ẹrọwọ kẹ Jihova!

Eme who roro nọ whọ rẹ sai wuhrẹ no ikuigbe Josaya ze?— Wọhọ epanọ o jọ kẹ Josaya na, otẹrọnọ ọsẹ ra ọ gbẹ be gọ Jihova ha, kọ omọfa jọ ọ riẹ nọ ọ rẹ sai fi obọ họ kẹ owhẹ wuhrẹ kpahe Ọghẹnẹ, nọ whọ rẹ sae raro kele? Ẹsejọhọ o sae jọ oni ra, ọsẹ-ode hayo oni-ode ra, hayo omoni ra ọfa jọ. O sae jẹ jọ omọfa jọ nọ ọ be gọ Jihova, ọnọ oni ra ọ kuvẹ re o wuhrẹ Ebaibol na kugbe owhẹ.

Epanọ o jọ kpobi kẹhẹ, dede nọ Josaya ọ jọ ọmaha, o wo areghẹ te epanọ ọ rọ salọ inọ ọ rẹ nya usu kugbe ahwo nọ a be gọ Jihova. Daoma ru epọvo na re, jẹ gbaemu nọ who re ru oware nọ u kiehọ!

[Oruvẹ-obotọ]

Enọ:

○ Amono họ ọsẹ gbe ọsẹ-ode Josaya, kọ oghẹrẹ ahwo vẹ a jọ?

○ Didi enwene ọsẹ-ode Josaya o ru?

○ Diodẹ eruẹaro ivẹ jọ nọ o wọhọ nọ emamọ oriruo rai o kpomahọ Josaya wowoma, kọ fikieme who je roro nọ u wuzou re ohwo o wo egbẹnyusu itieye?

[Uwoho nọ o rrọ ẹwẹ-obe avọ 25]

Edhere vẹ o rẹ sae wọhọ nọ Zẹfanaya gbe Jerimaya a ro fi obọ họ kẹ Josaya ru oware nọ u kiehọ?