Oware Nọ Ma Wuhrẹ Mi Jesu

Kpahe Elẹ nọ Ọghẹnẹ O re Yo

Jesu ọ jẹ hae jọ oria nọ ohwo ọvo ọ rrọ họ lẹ, yọ ọ ta nọ ilele riẹ a ru epọvo na re. Ebaibol e ta nọ: “Nọ ọ jẹ lẹ eva oria jọ, nọ o kuhọ no, omọvo ilele riẹ jọ ọ tẹ ta kẹ e nọ, ‘Olori, wuhrẹ omai ma hẹ lẹ‘ . . . [Ọ] tẹ ta kẹ ae nọ, ‘Wha te lẹ wha tanọ, “Ọsẹ mai ru re a dhẹozọ kẹ odẹ ra.”’” (Luk 5:16; 11:1, 2) Fikiere, Jesu o wuhrẹ inọ Ọsẹ riẹ, Jihova, ma rẹ lẹ se. Jihova họ Ọnọ ọ ma omai yọ ọye ọvo họ “Ọnọ o re yo elẹ.”—Olezi 65:2.

Kọ elẹ kpobi e rẹ were Ọghẹnẹ?

Elẹ nọ a fihọ uzou nọ a re dhe ẹwẹwariẹ e rẹ were Ọghẹnẹ hẹ. Jesu ọ ta nọ: “Nọ wha te lẹ, wha dhe eme ẹwẹwariẹ hẹ.” (Matiu 6:7, King James Version) O gwọlọ nọ oware nọ o ginẹ rrọ omai udu ma rẹ ta evaọ olẹ se Ọsẹ obọ odhiwu mai. Ẹdẹjọ, Jesu ọ ta kẹ ilele riẹ inọ Ọghẹnẹ ọ jẹ olẹ ọrahauzi jọ rehọ, ọnọ ọ rọ udu kpobi lẹ fikinọ ọ gwọlọ nwene no izieraha riẹ, viukpọ olẹ ohwo omovia jọ nọ ọ jẹ hae rọ obọ kotọ ru iruẹru egagọ. (Luk 18:10-14) Fikiere, re Ọghẹnẹ ọ ruẹse jẹ elẹ mai rehọ, u fo re ma daoma rọ omaurokpotọ ru oware nọ ọ vuẹ omai. Makọ Jesu dede ọ ta nọ: “Epanọ Ọsẹ o wuhrẹ omẹ, mẹ rọ ta eme eware enana . . . Me bi ru eware nọ e be were iẹe kẹse kẹse.” (Jọn 8:28, 29) Jesu ọ ta evaọ olẹ nọ: “Orọnọ, orọ eva mẹ hẹ, rekọ orọ eva ra, a re ruẹ.”—Luk 22:42.

 Didi eware ma rẹ lẹ kpahe?

Nọ orọnọ a ta odẹ Ọghẹnẹ raha no na, Jesu ọ ta nọ: ‘Fikiere wha lẹ epa onana: Ọsẹ mai nọ ọ rọ obọ odhiwu, odẹ ra o jọ ọrẹri. Uvie ra o ze, epanọ a rọ obọ odhiwu ru orọ eva ra, ru re a jọ akpọ na ru ere re.’ (Matiu 6:9, 10) U fo nọ ma lẹ kẹ Uvie Ọghẹnẹ re o ze keme oye họ isuẹsu nọ Ọghẹnẹ o ti ro ru oreva riẹ gba evaọ odhiwu gbe akpọ. Jesu ọ ta nọ ma rẹ sae lẹ kẹ “emu inẹnẹ.” Ma rẹ jẹ sae yare Jihova re o fi obọ họ k’omai wo iruo, uwou, emuẹgọ, omokpokpọ, gbe eware efa nọ e roja. Ofariẹ, Jesu ọ ta nọ ma lẹ kẹ erọvrẹ izieraha mai.—Luk 11:3, 4.

Kọ u fo re ma lẹ roro amọfa?

Jesu ọ lẹ kẹ amọfa. Ebaibol e vuẹ omai nọ: “A tẹ rehọ emaha bru ei ze re ọ rehọ abọ kpahọ ae, [re] ọ lẹ.” (Matiu 19:13) Jesu ọ ta kẹ Pita ukọ na nọ: “Mẹ lẹ kẹ owhẹ re ẹrọwọ ra ọ seba ere.” (Luk 22:32) Jesu ọ ta udu họ ilele riẹ awọ nọ a lẹ roro amọfa, makọ enọ e be kẹ ae uye gbe enọ e be poviẹ ae.—Matiu 5:44; Luk 6:28.

Fikieme ma jẹ lẹ kẹse kẹse?

Jesu ọ jẹ hae ruẹrẹ oke họ kẹ olẹ, ọ tẹ jẹ ta udu họ ilele riẹ awọ inọ “a hẹlẹ kẹse kẹse [re] oma ose ae ba ẹrọ.” (Luk 18:1) Jihova ọ gwọlọ nọ ma dhesẹ via inọ ma fi eva họ iẹe ẹkwoma ẹlẹ nọ ma rẹ lẹ kẹse kẹse kpahe eware nọ e rrọ omai oja. Jesu ọ ta nọ: “Yare, a rẹ te kẹ owhai.” Rekọ orọnọ onana u dhesẹ hẹ inọ Jihova o wo ehoo nọ ọ rẹ rọ kpahe fihọ elẹ ahwo nọ i you rie je wo adhẹẹ kẹe wọhọ Ọsẹ. Ikpoye, Jesu ọ ta nọ: “Whai enọ i yoma wha tẹ riẹ epanọ wha rẹ rọ emamọ eware kẹ emọ rai, kẹvẹ Ọsẹ obọ odhiwu rai ọ rẹ rehọ Ẹzi Ẹri kẹ enọ e yare riẹ te?”—Luk 11:5-13.

Rọkẹ evuẹ efa, rri uzou avọ 17 orọ obe na Eme Ebaibol na O Gine Wuhrẹ? *

[Oruvẹ-Obotọ]