“Mẹ Riẹ Uye Rai”
Si Kẹle Ọghẹnẹ
“Mẹ Riẹ Uye Rai”
‘ỌRẸRI, ọrẹri, ọrẹri họ ỌNOWO.’ (Aizaya 6:3) Eme yena nọ a rọ ẹgba ẹzi Ọghẹnẹ kere na i dhesẹ nọ Jihova Ọghẹnẹ ọ rrọ fuafo evaọ kabọ kabọ. Onana o sae lẹliẹ owhẹ nọ inọ: ‘Kọ ẹfuọ Ọghẹnẹ u ru nọ mẹ gbẹ sai si kẹle iẹe he hayo nọ ọ gbẹ sai ro wo isiuru kpahe omẹ hẹ? Kọ Ọghẹnẹ nọ ọ fo tere ọ sae ginẹ daezọ mẹ—ọrahauzi gheghe nọ ọ gba ha?’ Joma kiẹ eme omosasọ nọ Ọghẹnẹ ọ ta kẹ Mosis riwi, wọhọ epanọ a kere fihọ Ọnyano 3:1-10.
Nọ o je su igodẹ ẹdẹjọ, Mosis ọ tẹ ruẹ oware igbunu jọ—etuetue nọ erae e be jọ ware, rekọ “ọ be tua ha.” (Owọ avọ 2) O te go kẹle re ọ ruẹ oware nọ o be via na. Jihova ọ tẹ rọ ẹkwoma ukọ-odhiwu tẹme kẹ Mosis no udevie erae na ze inọ: “Who bi kẹle he; si eviẹ ra no awọ ra, keme oria nọ who dikihẹ na otọ ọrẹri.” (Owọ avọ 5) Roro epanọ onana u gbunu te—fikinọ urru Ọghẹnẹ ọrẹri na u no etuetue na ze, otọ na omariẹ o tẹ jọ ọrẹri!
U wo ẹjiroro nọ Ọghẹnẹ ọrẹri na ọ rọ gwọlọ lele Mosis tẹme. Ọghẹnẹ ọ ta nọ: “Mẹ ruerẹ uye ahwo mẹ nọ a rọ evaọ Ijipti, me te je yo oviẹ rai fiki ahwo nọ a bi su ai; mẹ riẹ uye rai.” (Owọ avọ 7) Ọghẹnẹ ọ fare aro kẹ edada nọ ahwo riẹ a jọ hayo tehe ezọ di kẹ oviẹ unubo rai hi. Ukpoye, o jariẹ oma wọhọ ẹsenọ ọyomariẹ ọ be ruẹ uye na. Muẹrohọ inọ Ọghẹnẹ ọ ta nọ: “Mẹ riẹ uye rai.” Obe jọ o ta kpahe ẹme na “Mẹ riẹ,” inọ: “Ẹme nana o dhesẹ ororokẹ, ọdawẹ, gbe ohrọ-oriọ.” Eme nọ Jihova ọ ta kẹ Mosis i dhesẹ inọ ọye yọ Ọghẹnẹ nọ o wo ororokẹ jẹ be daezọ ahwo.
Kọ eme Ọghẹnẹ o bi ti ru? Orọnikọ ọ re ohrọ rai hayo yo oviẹ unubo rai ọvo ho. Ọ jowọ nọ ọ rẹ rọ kpọ eware họ. Ọ jiroro nọ o re si ahwo riẹ no Ijipti no jẹ rehọ ae ze “otọ nọ ame-ivie gbe ọnyọ i je bi suẹ.” (Owọ avọ 8) Re onana o sae lọhọ, Jihova ọ salọ Mosis jẹ ta kẹe inọ: “Rehọ ahwo mẹ . . . no evaọ Ijipti ze.” (Owọ avọ 10) Mosis ọ nya uwou nọ a vi rie na je si emọ Izrẹl no Ijipti evaọ 1513 B.C.E.
Jihova o ri nwene he. O rẹ sai mu enọ e be gọe nẹnẹ ẹro inọ ọ be ruẹ ebẹbẹ rai je bi yo ubo rai kẹ obufihọ. Ọ riẹ uye nọ a be ruẹ. Rekọ orọnọ ohrọ ọvo Jihova o re wo kẹ idibo riẹ hẹ. Ọghẹnẹ ọdawẹ na ọ rẹ jowọ ro fi obọ họ kẹ ae, “keme ọye ọ be sẹro” rai.—1 Pita 5:7.
Ohrọoriọ Ọghẹnẹ o lẹliẹ omai wo ẹruore. Avọ obufihọ riẹ, mai ahwo-akpọ nọ e gba ha ma rẹ sae jọ fuafo ẹkwoma ekoko itee ikiẹrẹe riẹ, onọ o rẹ whae ze nọ ọ rẹ rọ jẹ omai rehọ. (1 Pita 1:15, 16) Aye Oleleikristi jọ nọ elọhoma gbe ọkora e jọ oma o wo omosasọ rono ikuigbe Mosis ọrọ etuetue nọ ọ jẹ ware erae na ze. Ọ ta nọ: “Otẹrọnọ Jihova ọ sai ru ẹkpẹ gheghe ọrẹri, koyehọ umutho ẹruore jọ ọ gbẹ rrọ kẹ omẹ. Eroro kpahe onana u fi obọ họ kẹ omẹ gaga no.”
Kọ whọ gwọlọ wuhrẹ eware efa kpahe Jihova, Ọghẹnẹ ọrẹri na? O lọhọ re ohwo o mu usu okpekpe kugbe Jihova, keme “ọ riẹ epanọ a rọ ma omai; ọ be kareghẹhọ nọ mai ẹkpẹ gheghe.”—Olezi 103:14.