Odhesẹvia nọ O Mae Rro orọ Uyoyou Ọghẹnẹ
Si Kẹle Ọghẹnẹ
Odhesẹvia nọ O Mae Rro orọ Uyoyou Ọghẹnẹ
ABRAHAM o you Ọghẹnẹ. Ọsẹ-orua yena nọ ọ vọ avọ ẹrọwọ na o you Aiziki re, ọmọ nọ o yẹ evaọ oke owho riẹ. Rekọ o wọhọ nọ okenọ Aiziki ọ kpako te ikpe 25 no, Abraham ọ rẹriẹ ovao dhe odawọ jọ nọ o bẹ gaga kẹ ọsọmọ—Ọghẹnẹ ọ ta kẹe nọ ọ rehọ ọmọ riẹ dheidhe. Dede na, evaọ ukuhọ riẹ, Aiziki o whu hu. Epanọ Abraham o bi ti ro bru ọmọ riẹ na, Ọghẹnẹ ọ tẹ rọ ẹkwoma ukọ-odhiwu dae obọ ji. Ikuigbe Ebaibol nana nọ a kere fihọ Emuhọ 22:1-18 na e lẹliẹ omai wo ẹmẹvo ọrọ epanọ uyoyou nọ Ọghẹnẹ o wo kẹ omai o ga te.
Owọ ọsosuọ o ta nọ: “Ọghẹnẹ ọ tẹ dawo Abraham.” Abraham yọ ọzae nọ o wo ẹrọwọ, rekọ ọ be te rẹriẹ ovao dhe oghẹrẹ odawọ nọ u ri tei ẹdọvo ho. Ọghẹnẹ ọ ta kẹe nọ: “Rehọ ọmọzae ra na, ọmọzae ọvo ra na Aiziki, ọnọ who you, re whọ . . . rehọ iẹe dhe-idhe emahọ evaọ ugbehru jọ nọ me re ti dhesẹ kẹ owhẹ.” (Owọ avọ 2) Kareghẹhọ inọ Ọghẹnẹ ọ rẹ kuvẹ re odawọ nọ o rro vi idibo riẹ u te ai hi. Fikiere, odawọ nana u dhesẹ nọ Ọghẹnẹ o fi eva họ Abraham.—1 Ahwo Kọrint 10:13.
Abraham o ru epanọ Ọghẹnẹ ọ ta kẹe ababọ okioraha. Ma se nọ: “Abraham o te tovrẹ irioke frifri, ọ tẹ ruọ anyenya riẹ, ọ tẹ rehọ emoha ivẹ jọ gboma, gbe Aiziki ọmọzae riẹ; o te kru ire idhe emahọ na, ọ tẹ [ruọ edhere.]” (Owọ avọ 3) U muẹro inọ Abraham ọ vuẹ uvumọ ohwo kpahe oware nọ a ta kẹe nọ o ru na ha.
A te mu onya nọ o rehọ edẹ esa họ, nọ o kẹ riẹ uvẹ nọ ọ sai ro roro didi. Rekọ Abraham o nwene iroro riẹ hẹ. Eme nọ ọ ta i dhesẹ ẹrọwọ riẹ via. Nọ ọ jọ ugbo kparo ruẹ ugbehru nọ Jihova ọ ta kẹe na, ọ tẹ vuẹ idibo ivẹ riẹ na inọ: “Wha jọ etenẹ . . . ; mẹ avọ ọmọ na ma be nya kpo obei e gọ, . . . je ti zihe bru owhai tha.” Nọ Aiziki ọ nọe obonọ omogodẹ nọ a bi ti ro dhe-idhe na ọ rrọ, Abraham ọ tẹ kuyo nọ: “Ọghẹnẹ ọvo ọ rẹ te rehọ omogodẹ idhe-emahọ kẹ oma obọ riẹ.” (Owọ avọ 5, 8) Abraham o rẹro nọ tei te ọmọzae riẹ a ti gbe zihe kpo. Fikieme o ro wo irẹro itieye? Fikinọ “o roro nọ Ọghẹnẹ ọ rẹ sae kpare [Aiziki] no iwhuowhu” ze.—Hibru 11:19.
Nọ Abraham ọ tọlọ “aghae re o ti kpe ọmọzae riẹ” evaọ ehru ugbehru na, ukọ-odhiwu ọ tẹ dae obọ ji. Ọghẹnẹ o te fi egbo họ etuetue jọ re Abraham ọ sai ro dheidhe ro nwene “ẹta ọmọzae riẹ.” (Owọ avọ 10-13) Evaọ eriwo Ọghẹnẹ, o wọhọ ẹsenọ Abraham ọ ginẹ rehọ Aiziki dheidhe no. (Hibru 11:17) Ọgba-eriariẹ jọ ọ ta nọ: “Rọkẹ Ọghẹnẹ, unevaze nọ Abraham o dhesẹ inọ ọ rẹ rehọ ọmọ riẹ dheidhe na, o wọhọ ẹsenọ ọ ginẹ rehọ iẹe dheidhe.”
Abraham o ru oma vo Jihova ha evaọ evaifihọ nọ Jihova o wo kpahe iẹe. Yọ Abraham o wo oghale re fiki evaifihọ nọ o wo kpahe Jihova, keme Ọghẹnẹ ọ wariẹ je fi eghale efa ba ọvọ nọ ọ re kugbei no vẹre, onọ eghale i ti no ze te ahwo erẹwho akpọ na kpobi.—Owọ avọ 15 rite 18.
Ukuhọ riẹ, Ọghẹnẹ ọ whaha Abraham idhe nọ ọ jẹ te rehọ ọmọ riẹ Aiziki dhe, dedenọ evaọ obaro Ọghẹnẹ omariẹ ọ te whaha erodhidhe ọmọ obọriẹ hẹ. Unevaze nọ Abraham ọ rọ gwọlọ rehọ Aiziki dheidhe o riẹ obọ kpohọ idhe nọ Ọghẹnẹ ọ rehọ Ọmọ ọvo riẹ, Jesu, dhe fiki izieraha mai. (Jọn 3:16) Idhe Kristi na họ odhesẹvia nọ o mae rro orọ uyoyou nọ Jihova o wo kẹ omai. Nọ Ọghẹnẹ o si obọ no ọmọ ọghaghae riẹ fiki mai na, u fo re ma nọ oma mai nọ, ‘Eme mẹ rẹ sai si obọ no re mẹ ruẹsi ru Ọghẹnẹ eva were?’