Epanọ Whọ Sai ro Wo Otoriẹ Ebaibol Na

3. Jẹ Obufihọ Amoọfa Rehọ

Nọ Edward John Eyre, ọnọ o re kpohọ ekwotọ nọ i sioma no jẹ fa eria ekpokpọ ọ jẹ nya Otọ-Opraprara Nullarbor nọ o ya fia vrẹ, ahwo nọ a rria ẹkwotọ na n’otọ ze a dhesẹ epanọ a sae rọ jọ ẹkpẹ nọ o kokohọ gbe ure nọ a re se eucalyptus wo ame t’obọ kẹ Edward John Eyre. Obufihọ ahwo nọ e riẹ ẹkwotọ na nọ Edward John Eyre ọ jẹ rehọ u siwi uzuazọ riẹ.

WỌHỌ epanọ oriruo nana o dhesẹ, re ohwo ọ sai ru oware nọ o rrọ use-abọ, o rẹ mae gwọlọ obufihọ omọfa nọ o wo otoriẹ oware na vi ei. Epọvo na o rẹ jọ nọ who te mu Ebaibol na họ ese obọ.

Jesu ọ riẹ inọ ababọ obufihọ, ilele riẹ a sai wo otoriẹ Ebaibol na ha. Evaọ ẹdẹjọ, o “rovie aro rai re a riẹ otọ ikerakere na.” (Luk 24:45) Jesu ọ riẹ inọ re ahwo nọ a bi se Ebaibol na a sai wo otoriẹ iwuhrẹ Ikereakere na vevẹ, a gwọlọ obufihọ amọfa.

Obufihọ Mi Amono?

Jesu ọ kẹ uvi ilele riẹ iruo inọ a wuhrẹ amọfa Ebaibol na. Taure o te kpohọ odhiwu, Jesu ọ kẹ ujaje na inọ: “Wha wuhrẹ ahwo erẹwho kpobi . . . re a ru eware kpobi nọ mẹ vuẹ owhai.” (Matiu 28:19, 20) Iruo nọ e mai  wuzou kẹ Ileleikristi họ ewuhrẹ, onọ o kẹre te eruvẹ epanọ ahwo a sai ro fi ehri-izi Ebaibol họ iruo evaọ uzuazọ ikẹdẹ kẹdẹ rai. Ileleikristi uzẹme a re fi obọ họ kẹ amọfa wo otoriẹ Ebaibol na.

Nọ Jesu ọ nwane kẹ ilele riẹ iruo yena no, oware isiuru jọ o tẹ via. Ebaibol na e ta kpahe ọzae jọ nọ o wuzou eyero-efe ovie-aye obọ Ẹtiopia, ọnọ o je se abọjọ eruẹaruẹ Aizaya. Ọzae na o se oria jọ nọ ọ sai wo otoriẹ riẹ hẹ. Wọhọ epanọ okerefihotọ Ebaibol na o dhesẹ, enẹ oria na o ta: “A su rie vrẹ rọ ogodẹ nọ a bi kpe, jẹ wọhọ omogodẹ o dienu, evaọ aro ọnọ ọrẹ kọeto, fikiere o rovie unu riẹ hẹ. Udevie oma urokpotọ riẹ na a je brukpe ei. Kọ ono ọ rẹ sai dhesẹ oge riẹ? Keme a rehọ uzuazọ riẹ no akpọ no.”—Iruẹru Ikọ Na 8:32, 33; Aizaya 53:7, 8.

Ọzae na ọ tẹ nọ Filip, Oleleikristi nọ o wo eriariẹ ziezi kpahe Ikereakere na inọ: “Ono ọruẹaro [na] ọ ta ẹme riẹ na, kpahe oma obọ riẹ o rẹ, kọ omọfa?” (Iruẹru Ikọ Na 8:34) Ohwo Ẹtiopia na o kpohọ Jerusalẹm nyae gọ Ọghẹnẹ, yọ ẹsejọhọ ọ yare Ọghẹnẹ inọ o fi obọ họ kẹe wo otoriẹ Ẹme riẹ. Avro ọ riẹ hẹ, ọzae na o je se Ebaibol na avọ ọwhọ gbe  omaurokpotọ. Rekọ ọ sai wo otoriẹ etenẹ Ebaibol na ha. Ọ tẹ rọ omaurokpotọ yare Filip re o fi obọ họ kẹe. Otofa ikere yena nọ Filip o ru vẹ kẹe o kẹ riẹ evawere gaga, te epanọ o ro zihe ruọ Oleleikristi.—Iruẹru Ikọ Na 8:35-39.

Isẹri Jihova a bi ru iruo evona nọ Filip gbe Ileleikristi ọsosuọ a je ru na. Evaọ erẹwho nọ i bu vi egba ivẹ ikpesa gbisoi (235), Isẹri na a be rọ unevaze fi obọ họ kẹ amọfa wo otoriẹ oware nọ Ebaibol na o gine wuhrẹ. A bi ru onana ẹkwoma izoẹme sa-sa nọ a si no Ikereakere na ze nọ a re ro wuhrẹ ahwo. A rẹ jọ ewuhrẹ nana rọ oma totọ kiẹ oware nọ Ebaibol na e ta kpahe ugogo oware hayo uzoẹme jọ. *—Rri ẹkpẹti na “Iyo nọ E rẹ Veva Rọkẹ Enọ Kpahe Ebaibol Na.”

“A Kẹ Iyo Enọ Mẹ Kpobi”

Steven, Valvanera, gbe Jo-Anne nọ ma wariẹ eme rai evaọ uzoẹme ọsosuọ na, a rọwo inọ Isẹri Jihova a wuhrẹ Ebaibol kugbe ae. Steven ọ ta nọ: “U gb’omẹ unu gaga nọ mẹ ruẹ inọ ohwo ọ tẹ rehọ ikuigbe hayo eria Ikereakere sa-sa wawo ohwohwo, ẹsibuobu ọ rẹ nwane ruẹ uzẹme ẹme na.” O fibae nọ: “Taure Isẹri Jihova a te ti mu Ebaibol họ ewuhrẹ kugbe omẹ, uvumọ ohwo o dhesẹ epanọ a re ru onana kẹ omẹ hẹ. Udu u te omẹ otọ nọ mẹ riẹ inọ a rẹ sai wo otoriẹ Ebaibol na, orọnikọ yọ obe nọ eware avro e vọ hayo obe nọ a re ro sikẹ hẹ.”

Valvanera ọ rọwokugbe ẹme yena. Ọ ta nọ: “Eware nọ me je wuhrẹ na kpobi e rọwokugbe ohwohwo ziezi avọ imuẹro.” Ọ ta re inọ: “Mẹ ruẹ nọ eware na uzẹme keme a ru rai vẹ no Ikereakere na ze, orọnọ ‘Ichọche’ e tanọ họ.” Jo-Anne ọ ta nọ: “Fikinọ a kẹ iyo enọ mẹ kpobi no Ebaibol na ze u ru nọ me ro wo adhẹẹ odidi kẹ Ọnọ o wo eme riẹ—keme o wo orimuo nọ o ro kere iyo nọ i fo enọ kpobi nọ ohwo-akpọ ọ rẹ sae nọ fihọ otọ.”

Kọ whọ riẹ omọvo Isẹri Jihova jọ? Kọ whọ gbẹ nọe re o dhesẹ oghẹrẹ nọ a re ru uwuhrẹ Ebaibol nana kẹ owhẹ? Otẹrọnọ whọ riẹ omọvo Isẹri Jihova ọvuọvo ho, iviena kere kpohọ adrẹse jọ evaọ usu enọ e rrọ ẹwẹ-obe avọ 2 ọrọ emagazini nana. Avọ obufihọ ẹzi Ọghẹnẹ, eva oruọzewọ nọ who re ro se Ebaibol na wọhọ ohwo nọ ọ ginẹ gwọlọ riẹ, gbe ohwo nọ ọ riẹ Ebaibol na ziezi nọ whọ rẹ kuvẹ re o wuhrẹ owhẹ, Ẹme Ọghẹnẹ ọ te bẹ owhẹ ẹriẹ hẹ. Whọ sai wo otoriẹ Ebaibol na!

[Oruvẹ-obotọ]

[Ẹkpẹti/Uwoho nọ e rrọ ẹwẹ-obe avọ 8]

Iyo nọ E rẹ Veva Rọkẹ Enọ Kpahe Ebaibol Na

Izoẹme jọ nọ Isẹri Jihova a re ro ru uwuhrẹ Ebaibol:

• Eme họ ẹjiroro Ọghẹnẹ kpahe otọakpọ na?

• Bovẹ ahwo nọ a whu no a rrọ?

• Kọ “edẹ urere” na ma rrọ na?

• Fikieme Ọghẹnẹ ọ jẹ kuvẹ kẹ uye-oruẹ?

• Ẹvẹ mẹ sai ro ru uviuwou mẹ wereva?

[Uwoho nọ o rrọ ẹwẹ-obe avọ 7]

Re whọ sai wo otoriẹ Ebaibol na . . . lẹ kẹ obufihọ ẹzi Ọghẹnẹ, sei wọhọ ohwo nọ ọ ginẹ gwọlọ riẹ, jẹ obufihọ amọfa rehọ