Jihova O Dhesẹ Omariẹ
Jihova O Dhesẹ Omariẹ
OGHẸRẸ vẹ whọ rẹ sai dhesẹ Ọghẹnẹ, ekwakwa-aghae gbe idhere riẹ? Dae rehọ iẹe nọ who wo uvẹ nọ whọ sae rọ nọ Ọghẹnẹ kpahe omariẹ jẹ gaviezọ nọ o bi dhesẹ ekwakwa-aghae riẹ kẹ owhẹ. Mosis ọruẹaro na o wo uvẹ-ọghọ utioye na. U woma kẹhẹ inọ ẹzi Ọghẹnẹ ọ wọ riẹ kere oware nọ o via fihọ otọ.
Evaọ ugbehru Saena, Mosis ọ yare Jihova nọ: “Mẹ lẹ owhẹ, dhesẹ oruaro ra kẹ omẹ.” (Ọnyano 33:18) Okiokiọ riẹ, Mosis o te wo uvẹ-ọghọ nọ ọ rọ ruẹ ẹmẹvo ọrọ oruaro Ọghẹnẹ. * Mosis ọ robọ kotọ dhesẹ eware kpobi nọ ọ ruẹ hẹ. Ukpoye, o kere kpahe oware jọ nọ o mai wuzou—ẹme nọ Ọghẹnẹ omariẹ ọ ta. Jọ ma ruẹ oware nọ Jihova ọ ta, wọhọ epanọ o rrọ Ọnyano 34:6, 7.
Oware ọsosuọ nọ Jihova o dhesẹ via kpahe omariẹ họ, ọye yọ “Ọghẹnẹ nọ ọ vọ avọ ohrọ gbe aruoriwo.” (Owọ avọ 6) Wọhọ epanọ ọgba-uwuhrẹ jọ ọ ta, ẹme Hibru nọ a fa “ohrọ” na u dhesẹ “ọdawẹ odidi Ọghẹnẹ, wọhọ onọ ọsẹ o re wo kẹ emọ riẹ.” Ẹme nọ a fa “aruoriwo” na “u dhesẹ ohrọ nọ o rẹ wọ ohwo fi obọ họ kẹ omọfa nọ o wo ẹbẹbẹ.” Ẹhẹ, Jihova ọ gwọlọ nọ ma riẹ inọ ọ be rẹrote idibo riẹ epanọ eyewọ e rẹ rọ ẹro te emọ rai na—avọ uyoyou gbe ọdawẹ odidi kpahe ẹgwọlọ rai.—Olezi 103:8, 13.
Jihova ọ tẹ jẹ ta inọ “ọ rẹ kaki muofu hu.” (Owọ avọ 6) O wo ofu ọkpakpata kẹ idibo riẹ hẹ. Ukpoye, o re wo odiri kẹ ae, thihakọ kẹ ae nọ a te ru thọ jẹ kẹ ae uvẹ nọ a re ro nwene idhere rai.—2 Pita 3:9.
Ọghẹnẹ ọ tẹ jẹ ta inọ “o wo uyoyou nọ o rẹ rẹriẹ hẹ gbe ọtẹruo.” (Owọ avọ 6) Uyoyou nọ o rẹ rẹriẹ hẹ yọ okwakwa-aghae nọ Jihova ọ rẹ rọ tua usu okpekpe nọ o wo kugbe idibo riẹ. (Iziewariẹ 7:9) Jihova ọ tẹ jẹ rrọ ehri ọtẹruo hayo uzẹme. Ọ rẹ viẹ ohwo họ họ, yọ uvumọ ohwo ọ rẹ sae viẹe họ gbe he. Nọ ọ rrọ “Ọghẹnẹ ọtẹruo [hayo, uzẹme]” na, ma rẹ sai fi eva kpobi họ ẹme riẹ gbe eyaa nọ ọ yaa kpahe obaro.—Olezi 31:5.
Oware ulogbo ofa jọ nọ Jihova ọ gwọlọ nọ ma riẹ kpahe ọyomariẹ họ, “ọ rẹ rehọ eyoma gbe iruthọ gbe uzioraha rọ vrẹ.” (Owọ avọ 7) O wo “erọvrẹ” kẹ erahaizi nọ i kurẹriẹ. (Olezi 86:5) Rekọ Jihova ọ rẹ jẹ eyoma rehọ họ. Ọ ta inọ ‘o re voro [hayo fare aro kẹ] imuemu hu.’ (Owọ avọ 7) Ọghẹnẹ ọrẹri nọ o re bruoziẹ okiẹrẹe na ọ rẹ kẹ irumuomu nọ i keke aro fihọ bi ru eyoma uvẹ ababọ uye he. O maki kri, a rẹ ruẹ osa eyoma rai.
Ekwakwa-aghae riẹ nọ o dhesẹ via na o kẹ imuẹro inọ Jihova ọ gwọlọ nọ ma riẹe gbe idhere riẹ ziezi. Kọ oma o gbẹ be wọ owhẹ re who gbe wuhrẹ kpahe ekwakwa-aghae riẹ?
[Oruvẹ-obotọ]
^ edhe-ẹme 4 Mosis ọ rọ ẹro ruẹ Jihova ha, keme ohwo-akpọ ọvuọvo ọ sae rọ ẹro ruẹ Ọghẹnẹ re ọ gbẹ jọ uzuazọ họ. (Ọnyano 33:20) Ẹkwoma ukọ-odhiwu nọ Jihova o ro lele Mosis ta ẹme, o ro dhesẹ oruaro Riẹ via kẹe.