Oware Nọ Ma Wuhrẹ Mi Jesu

Kpahe “Urere Akpọ Na”

Eme o ti re?

Ilele Jesu a nọ riẹ inọ: “Eme ọ rẹ te jọ oka ẹtha ra gbe urere akpọ na?” (Matiu 24:3) Nọ ọ jẹ kẹ uyo onọ yena, orọnikọ otọakpọ na Jesu ọ ta nọ a te raha na ha. Taure ilele riẹ a tẹ te nọe onọ yena, Jesu ọ ta ẹme kpahe “urere akpọ na” no vẹre, jẹ rehọ iẹe ta kpahe eyero akpọ na, te ofẹ isuẹsu, ekọ, egagọ gbe eware efa kpobi, enọ e rrọ otọ ekpakpọ Setan. (Matiu 13:22, 40, 49) Fikiere, eware nana o wo họ iroro okenọ ọ ta nọ: ‘Urere na o te ze.’—Matiu 24:14.

Oghẹrẹ vẹ Jesu ọ ta nọ urere akpọ na o te jọ?

Ekuhọ eyero akpọ okienyẹ nana yọ ‘usi uwoma.’ Jesu ọ ta nọ: ‘A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere na u te zi te.’ Enẹ Jesu o dhesẹ ekuhọ eyero akpọ inẹnẹ na: “Uye obẹbẹ ruaro o rẹ te jọ, u tioye o te jọ no emuhọ akpọ na ze ri te enẹ hẹ, ijo, o gbẹ sae jọ ofa ha. A gbẹ kpẹre edẹ eyena ha, a hẹ sai siwi ohwo ọvo ho.”—Matiu 24:14, 21, 22.

Amono a te raha kufiẹ?

Ahwo nọ a te raha họ, enọ i wo uyoyou kẹ Jihova gbe Jesu hu, enọ e se inọ a rẹ gọ Jihova ha. Ahwo otiọye na a rẹ gaviezọ kẹ ẹme Ọghẹnẹ hẹ. Jesu ọ ta nọ: “Wọhọ epanọ edẹ Noa e jọ ere ẹtha Ọmọ ohwo ọ rẹ te jọ.” O te fibae nọ ahwo oke yena “a riẹ hẹ bẹsenọ ẹvo ọ rọ ze, ọ jẹ rehọ ai kpobi vrẹ.” (Matiu 24:36-39) Jesu ọ ta nọ ahwo buobu a rrọ edhere nọ o bi  su kpohọ ọraha-kufiẹ. Dede na, ọ kẹ omai imuẹro inọ edhere jọ ọ riẹ nọ “a re ro kpohọ uzuazọ . . . [onọ] unu riẹ ọ rẹ hwahwa.”—Matiu 7:13, 14.

Okevẹ eyero akpọ nana o ti ro kuhọ?

Okenọ ilele Jesu a nọe kpahe oka ẹtha riẹ “gbe urere akpọ na,” o yo kẹ ae nọ: “Orẹwho o rẹ te kpare bru orẹwho, uvie o rẹ te kpare bru uvie, ohọo u re ti muẹ gbe otọ u re ti nuhẹ . . . Epanọ umuomu o rẹ te jọ buobu, uyoyou ahwo buobu u re ti kiekpo.” (Matiu 24:3-12) Koyehọ usi uyoma kpobi nọ ma rọ akpọ inẹnẹ yo na u dhesẹ nọ emamọ eware e be tha—kẹle na esuo Uvie Ọghẹnẹ o te wha udhedhẹ se ahwo-akpọ ẹmeoyo. Jesu ọ ta nọ: “Nọ wha ruẹ eware enana nọ i biti ruẹ, wha riẹ nọ uvie Ọghẹnẹ o kẹle ino.”—Luk 21:31.

Eme u fo nọ who re ru?

Jesu ọ ta nọ Ọghẹnẹ ọ “rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Re whọ sai fi ẹrọwọ họ Ọghẹnẹ gbe Ọmọ riẹ, o gwọlọ nọ whọ rẹ riẹ ae ziezi. Fikiere Jesu ọ rọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”—Jọn 17:3.

Whọ kẹ awaọruọ gbe ebẹbẹ uvẹ hẹ re e whaha owhẹ ewuhrẹ epanọ who re ro you Ọghẹnẹ. Jesu ọ ta nọ: “Wha yọrọ oma rai ogbẹrọ ere he . . . iroro akpọ na, i ve ti ru owhai zoruẹ, re ẹdẹ ọyena ọ se owhai ba emu idudhe wọhọ agbefẹ.” Ẹdẹ na ọ te seba ẹtha ha. Whọ tẹ gaviezọ kẹ unuovẹvẹ Jesu, whọ te sae “va eware nana kpobi abọ, enọ i re ti ruẹ na.”—Luk 21:34-36.

Rọkẹ evuẹ efa, rri uzou avọ 9, “Kọ ‘Edẹ Urere’ na Ma Rrọ Na?,” evaọ obe na Eme Ebaibol na O Gine Wuhrẹ? *

[Oruvẹ-obotọ]