“Mẹ Ọnowo na Ọghẹnẹ Rai na Mẹ Ọrẹri”
Si Kẹle Ọghẹnẹ
“Mẹ Ọnowo na Ọghẹnẹ Rai na Mẹ Ọrẹri”
“ỌRẸRI, Ọrẹri, Ọrẹri, Ọnowo Ọghẹnẹ.” (Eviavia 4:8) Ebaibol e rọ eme yena dhesẹ nọ Jihova ọrẹri, nọ u dhesẹ ẹfuọ nọ ọ mai kpehru. Uzioraha u thabọ no Ọghẹnẹ; a rẹ ruẹ epe hayo oka ogbekuo ọvo evaọ omariẹ hẹ. Kọ onana u dhesẹ nọ ahwo-akpọ sebaẹgba a sai si kẹle Ọghẹnẹ ọrẹri na ha? O rrọ ere vievie he! Joma kiẹ eme omosasọ nọ e rrọ obe Iruo-Izerẹ uzou avọ 19 na riwi.
Jihova ọ ta kẹ Mosis nọ: “Takẹ ogbotu emọ Izrẹl na nọ.” Eme nọ ọ ta lele iei i kiekpahe ohwo kpobi evaọ orẹwho na. Eme Mosis ọ be te vuẹ ae na? Ọghẹnẹ ọ ta nọ: “Wha rẹ te jọ ọrẹri; keme Mẹ ỌNOWO na Ọghẹnẹ rai na mẹ ọrẹri.” (Owọ avọ 2) O gwọlọ nọ ohwo Izrẹl kpobi ọ rẹ jọ ọrẹri. Onana o jọ oware nọ u je ohwo o ve ru hu, ukpoye o jọ uzi. Kọ oware nọ a rẹ sai ru hu Ọghẹnẹ ọ be gwọlọ mi ae na?
Muẹrohọ nọ Jihova ọ ta inọ ọyomariẹ ọrẹri, rekọ orọnọ ọ rọ oyena dhesẹ epanọ ae omarai a rẹ fo te he, rekọ oware nọ o soriẹ nọ ae omarai a jẹ jọ ọrẹri. Koyehọ, orọnọ Jihova ọ jẹ ta kẹ emọ Izrẹl nọ e gba ha na inọ a jọ ọrẹri gbagba wọhọ ọyomariẹ hẹ. Oyena o lọhọ họ. Jihova, “Ọrẹri Ọvo na” o kpehru vi ahwo kpobi evaọ ẹfuọ. (Itẹ 30:3) Rekọ fikinọ Jihova ọrẹri, o rẹro nọ idibo riẹ a rẹ jọ ọrẹri re—evaọ epanọ o rẹ sae lọhọ te kẹ ahwo-akpọ nọ e gba ha. Evaọ idhere vẹ a rẹ rọ jọ ọrẹri?
Nọ ọ kẹ ae ujaje inọ a rẹ jọ ọrẹri no, Jihova ọ tẹ rọ ẹkwoma Mosis kẹ ijaje sa-sa nọ i wobọ kugbe kabọ kabọ uzuazọ uyero. O gwọlọ nọ ohwo Izrẹl kpobi o re lele ijaje nana evaọ uzuazọ riẹ: ọ rẹ rọ adhẹẹ kẹ ọsẹgboni riẹ gbe otu nọ e kpako no (owọ avọ 3, 32); wo ororokẹ rọkẹ otu nọ i diezọ, enọ i tuaro, gbe ahwo nọ i wo oghẹrẹ ebẹbẹ efa (owọ avọ 9, 10, 14); rọ oruọzewọ gbe ababọ-ọriẹwẹ yeri kugbe amọfa (owọ avọ 1-13, 15, 35, 36); je you ọrivẹ riẹ nọ a gbẹ be gọ Ọghẹnẹ wọhọ omariẹ. (Owọ avọ 18) Ẹkwoma eware nana gbe efa nọ e rrọ Uzi na nọ o re ru lele, ohwo Izrẹl kpobi o re ro “ru oma [riẹ] ọrẹri kẹ Ọghẹnẹ [riẹ].”—Ikelakele 15:40.
Uzi kpahe ọrẹri nọ a rẹ jọ na u re fi obọ họ kẹ omai wo otoriẹ eriwo gbe idhere Jihova Ọghẹnẹ. Oware jọ nọ ma jariẹ wuhrẹ họ, re ma sai wo usu okpekpe kugbe Ọghẹnẹ, o gwọlọ nọ ma rẹ dao oma mai kpobi re ma jọ uzuazọ gbe uruemu mai lele utee uruemu ẹfuọ riẹ. (1 Pita 1:15, 16) Ma te lele itee nana, irere buobu i re te omai.—Aizaya 48:17.
Uzi na inọ ma jọ ọrẹri u te je dhesẹ evaifihọ nọ Jihova o wo kpahe idibo riẹ. Jihova ọ rẹ yare oware nọ u vi ẹgba mai mi omai hi. (Olezi 103:13, 14) Ọ riẹ inọ mai ahwo-akpọ nọ ọ ma evaọ uwoho riẹ, ma rẹ sai le utee ọrẹri—te epanọ ẹgba mai o mu. (Emuhọ 1:26) Kọ oma o be wọ owhẹ wuhrẹ kpahe epanọ whọ sai ro sikẹle Ọghẹnẹ ọrẹri na, Jihova?
[Uwoho nọ o rrọ ẹwẹ-obe avọ 9]
Ma rẹ sae jọ ọrẹri