Thọ Oma Ra No Obọ Izi Imuomu

UKOLIKO Malaita, evaọ Solomon Islands ọzae jọ nọ a re se Jemis ọ rria no emaha ze. No emaha ze a wuhrẹ i rie inọ a rẹ rọ adhẹẹ kẹ imizi. Ọ ta nọ: “Mẹ hae te yare imizi na vievie he inọ a nwa amọfa oma, rekọ me je roro nọ ohwo ọ rẹ sae wereva evaọ uzuazọ họ ababọ rarafono [iruẹru sa-sa nọ i notọ ze nọ a rẹ rọ gwọlọ obufihọ imizi] nọ ohwo ọ rẹ rọ thọ omariẹ no enwoma.”

Wọhọ epanọ ahwo buobu a rọwo evaọ abọ ọfa sa-sa akpọ na, ahwo Solomon Islands a wo orọwọ inọ imizi e rẹ sai fi obọ họ kẹ hayo nwa ohwo oma. Evaọ uzẹme, ahwo buobu evaọ ukoliko ofa jọ nọ a re se Melanesia a wo uyoyou kẹ imizi nọ a re bo se kẹ obufihọ, a rẹ dhozọ rai hi.

Idhere sa-sa orọwọ nọ ahwo a wo kpahe imizi u bi ro dhesẹ oma via. Wọhọ oriruo, nọ Jemis ọ jọ ọmaha, eyae nọ e jọ ẹwho riẹ a jẹ hae wọ emọ rai dhẹ ruọ uwou nọ a te yo edo ọvra nọ o re bo korokoro (ọvra nọ a re se koel). Fikieme? A rọwo inọ ubo ọvra na u dhesẹ nọ oware uyoma o be te via kẹ ohwo jọ.

Ahwo ẹwho na jọ a re fi oghẹrẹ ubiutho ofuafo jọ họ ehru unuẹthẹ rai. Jemis ọ jẹ hai ru onana re, keme ọ rọwo inọ ubiutho na o te thọe no obọ imizi iyoma. Yọ evaọ okenọ Jemis ọ tẹ be re emu uvo evaọ obọ iruo, o re koko emu nọ ọ re kiọkọ gbe onọ u kiotọ kpobi fihọ ẹkpa re ọ ruẹsi ku ai fiẹ ẹsiẹfa. Ẹjiroro nọ o je ro ru onana họ re ohwo nọ o wobọ kugbe iruẹru-imizi ọ gbẹ sae rehọ emu na ru oware nọ o rẹ kẹe eyao ho.

Ẹsejọhọ ahwo okegbe ra a nwani wo oghẹrẹ uruemu nana ha, ghele na o sae jọnọ who wo ọkpọ eriwo Jemis inọ u fo re who ru oghẹrẹ iruemu-ẹwho ra jọ re whọ ruẹsi wo ọthọwẹ no obọ imizi ze. Ẹsejọhọ udu ra o sae ta kẹ owhẹ nọ re a wobọ evaọ iruemu itieye nọ i no otọ ze u re ru nọ oware uyoma ovo u gbe ro te owhẹ oma ha.

Avro ọ riẹ hẹ, otẹrọnọ who fi eva họ Ebaibol na, whọ te gwọlọ riẹ uyo nọ o kẹ kpahe enọ nana: (1) Didi enwoma izi imuomu e rẹ sae wha se owhẹ? (2) Kọ elele iruemu-ẹwho ra jọ nọ i notọ ze o sai ru nọ who je kpomafihọ kẹ ekpakpọ izi imuomu? (3) Ẹvẹ whọ sai ro wo uvi ọthọwẹ no obọ izi imuomu je wo evawere?

 Oghẹrẹ nọ Izi Imuomu E rẹ rọ Wha Enwoma Ze

Ebaibol i dhesẹ via inọ izi imuomu yọ izi ahwo nọ i whu no vievie he. Ebaibol e ta nọ: “Enọ e rọ uzuazọ a riẹ nọ a reti whuẹ, rekọ iwhuowhu e riẹ oware ovo ho.” (Ọtausiuwoma Na 9:5) Uzẹme riẹ họ, izi imuomu na yọ ijẹle ọwọsuọ nọ i kuomagbe Setan be gwọlọ su ahwo-akpọ thọ.—Eviavia 12:9.

Ikereakere na i dhesẹ vevẹ inọ o gwọlọ nọ ma re mugba kẹ izi imuomu. Pọl ukọ na o kere se Ileleikristi obọ Ẹfẹsọs nọ: “Orọnọ uwo gbe azẹ ma bi lele họra na ha, rekọ . . . izi iyoma nọ e rọ eva eria ikpehru.” Pita ukọ na o dhesẹ osu izi imuomu, Setan Ẹdhọ na, wọhọ “okpohrokpo nọ obi do enu, be guọlọ ọjọ nọ ọ rẹ ria.”—Ahwo Ẹfẹsọs 6:12; 1 Pita 5:8.

Ugogo edhere nọ Setan ọ be rọ wha enwoma se ahwo họ ẹkwoma osuthọ, be viẹ ae họ ru eware iyoma hayo rehọ eware nọ e rẹ dha Ọghẹnẹ eva rọ dawo ai. Ebaibol e ta nọ Setan ọ be “rehọ oma riẹ ru elo ukọ-odhiwu.” (2 Ahwo Kọrint 11:14) O bi ru wọhọ ẹsenọ ọ rrọ omama ẹzi nọ ọ be thọ ahwo kpakiyọ oware umuomu o riẹe eva. Setan o bi wuhu iroro ahwo di re a siọ oghẹrẹ ohwo nọ ọ rrọ ba ẹriẹ je bi ru re a siọ uzẹme kpahe Ọghẹnẹ ba ẹriẹ. (2 Ahwo Kọrint 4:4) Ẹjiroro vẹ o bi ro su ahwo-akpọ thọ?

Setan ọ gwọlọ nọ a gọe, o te bi ru re ahwo a rehọ aro koko hayo ibiaro ogbori gọe. Okenọ Ọmọ Ọghẹnẹ, Jesu Kristi ọ jọ otọakpọ, Setan ọ gwọlọ nọ o ‘diguẹ gọe.’ Rekọ Jesu ọ ta nọ: “Setan, nyawa: keme a kere nọ, ‘Whọ rẹ gọ Ọnowo na Ọghẹnẹ ra.’” (Matiu 4:9, 10) Jesu ọ se inọ o re ru oware ovuọvo nọ u re dhesẹ egagọ hayo omaurokpotọ kẹ Setan he.

Jihova ọ ga vi emama izi kpobi yọ ọ rẹ kẹ uvẹ hẹ re ohwo hayo omama ẹzi jọ o wha enwoma ebẹdẹ bẹdẹ se idibo riẹ. (Olezi 83:18; Ahwo Rom 16:20) Rekọ re ma sai ru Jihova eva were wọhọ epanọ Jesu o ru na, o gwọlọ nọ ma rẹ whaha iruẹru kpobi nọ u re dhesẹ omarọkẹ Setan hayo idhivẹri riẹ. Fikiere, o gwọlọ nọ ma re vuhu iruemu-ẹwho nọ a re ru rọ rehọ adhẹẹ kẹ izi imuomu. Ẹvẹ whọ sai ro ru onana?

Vuhu Iruẹru nọ E rẹ Dha Ọghẹnẹ Eva

Jihova Ọghẹnẹ ọ vẹvẹ orẹwho Izrẹl, idibo riẹ oke anwae unu inọ a rọ aro kele iruemu erẹwho nọ e wariẹ e rai họ họ. Ọ ta nọ: “A jọ udevie rai ruẹ . . . ọgbẹva, hayo ọbo, hayo ọnuahwo, hayo ọjahwo [ho].” Ebaibol e ta kpahe ahwo nọ a wo iruemu nana inọ: “Kohwo kohwo nọ o ru eware enana yọ o zuoma eva aro ỌNOWO na.”—Iziewariẹ 18:10-12.

Fikiere, nọ who te bi roro kpahe iruemu-ẹwho jọ nọ e viodẹ evaọ okegbe ra, nọ omara enọ nana: Kọ uruemu na u wobọ kugbe eware oka hayo otha? Kọ uruemu na u wobọ kugbe orọwọ inọ ohwo ọ rẹ sai wo ọthọwẹ no eware nọ i wo uzuazọ họ ze? Kọ u wobọ kugbe ẹnua nọ a rẹ nua amọfa hayo ẹkpọfia enua? Kọ o rọ edhere jọ dhesẹ omarọkẹ imizi viukpọ Jihova hayo Jesu, Ọmọ riẹ?—Ahwo Rom 14:11; Ahwo Filipai 2:9, 10.

O roja inọ whọ rẹ siọ iruemu kpobi nọ i wobọ kugbe eware nọ ma fodẹ na. Fikieme? A kẹ Pọl ukọ na ẹgba ẹzi kere nọ: “Wha rẹ sae jọ emẹjẹ Ọnowo na avọ emẹjẹ izi igbegbe re emu hu.” Ọ vẹvẹ unu nọ ahwo nọ a rẹ gwọlọ ru eva were Ọghẹnẹ gbe imizi oke ovona a be “rọ ihri-eriọ ru Ọnowo na evadha.” (1 Ahwo Kọrint 10:20-22) Jihova Ọghẹnẹ ọ gwọlọ nọ ọye ọvo ma rẹ gọ, yọ o gine te ọnọ ma rẹ rọ eva mai kpobi gọ.—Ọnyano 20:4, 5.

Roro kpahe onọ nana re: Kọ uruemu na u re ru nọ a jẹ j’ame wozẹ ohwo nọ o ru eyoma abọ? Wọhọ oriruo, evaọ ewho buobu a rri rie fihọ oware nọ o thọ re imava nọ e rọo ohwohwo ho a wezẹ kugbe hayo re ohwo o lele omọfa nọ ọ rrọ ọrivẹ-orọo riẹ hẹ wezẹ,  yọ Ebaibol i mukpahe iruemu nana re. (1 Ahwo Kọrint 6:9, 10) Rekọ, evaọ ewho ofẹ Abade ọ Pacific na jọ, a rẹ ruẹ oware ovo nọ o jariẹ thọ họ nọ ọmọtẹ ọ tẹ ta nọ “obe a ro ru ei,” * inọ umu a ro fowo iei họ lele iei wezẹ.

Rekọ Ebaibol i wuhrẹ nọ Ọghẹnẹ ọ rẹ nọ omai unu kpahe eware nọ ma ru. (Ahwo Rom 14:12; Ahwo Galesha 6:7) Wọhọ oriruo, aye ọsosuọ na, Ivi, o gu inoma inọ Setan ọ viẹ riẹ họ ghẹmeeyo kẹ Ọghẹnẹ, ọ ta nọ: “Oriọvọ o liẹliẹ omẹ họ mẹ jẹ re iẹe.” Ghele na, Jihova ọ j’ame wozẹ Ivi abọ họ evaọ oware nọ o ru na. (Emuhọ 3:13, 16, 19) Epọvo na re, ọ rẹ nọ omai unu kpahe oware kpobi nọ ma ru.—Ahwo Hibru 4:13.

Eme U Fo nọ Who re Ru?

Whọ tẹ gwọlọ ru Ọghẹnẹ eva were jẹ rria lele ehri-izi Ebaibol, o gwọlọ nọ whọ rẹ jowọ enẹna. Ahwo udu-oruọzewọ nọ a jẹ rria Ẹfẹsọs evaọ ikpe-udhusoi ọsosuọ a fi emamọ oriruo hotọ evaọ abọ nana. Re a ruẹsi si oma no otọ imizi, a koko ebe rai kpobi nọ i wobọ kpahe iruẹru-imizi họ, “a tẹ jọ iraro ahwo kpobi mahe ae.”—Iruẹru Ikọ Na 19:19.

Taure a tẹ mahe ebe rai na, ahwo nana a jẹ nyaze te “fa imuemu rai.” (Iruẹru Ikọ Na 19:18) Fikinọ uwuhrẹ Kristi nọ Pọl o wuhrẹ i rai u te rai udu, oma o wọ rae mahe ebe iruẹru-imizi rai. A te je nwene eriwo rai kpahe iruẹru itieye na.

Uzẹme, o lọhọ họ re ohwo o si obọ no iruẹru-ẹwho jọ nọ i n’otọ ze. Jemis, ọnọ ma ta ẹme te evaọ emuhọ na ọ rẹriẹ ovao dhe use-abọ nana. Ọ rọwo nọ Isẹri Jihova a wuhrẹ Ebaibol kugbei, yọ eware nọ o wuhrẹ e were riẹ. Rekọ o gbe je wobọ evaọ rarafono ghele. Nọ ọ kiẹ udu riẹ riwi ziezi, ọ tẹ ruẹ inọ o fi eva họ eyaa Jihova kpahe obaro, rekọ o gbe je roro inọ re ọ ruẹse thọ omariẹ, o gwọlọ nọ ọ rẹ gbẹ rọ ẹro so iruẹru ekpọfia.

Eme o fi obọ họ kẹ Jemis nwene eriwo riẹ? Ọ ta nọ: “Mẹ lẹ se Jihova nọ ọ thọ omẹ je fi obọ họ kẹ omẹ rọ ẹro so ọyomariẹ. Evaọ oke ovona, me te si obọ no iruẹru ekpọfia nọ mẹ jẹ hai ru na.” Kọ enwoma jọ i te rie no? Jemis ọ ta nọ: “Ijo, ukpoye me wuhrẹ epanọ me re ro fi eva họ Jihova no. Mẹ ruẹ no inọ Jihova ọ rẹ sae jọ ogbẹnyusu ọkpekpe kẹ ohwo.” Whaọ, anwọ ikpe ihrẹ ze na Jemis ọ rọ rrọ ọtausiwoma oke-kpobi na, nọ o bi fi obọ họ kẹ amọfa wuhrẹ oware nọ Ebaibol na e ta.

Kọ whọ gbẹ dawo oma rọ aro kele oriruo Jemis? Rọ oma totọ kiẹ iruemu sa-sa nọ e rrọ ẹwho ra, re whọ rehọ ẹgba iroro ra kiẹ ai riwi sọ e rọwo kugbe “oreva Ọghẹnẹ.” (Ahwo Rom 12:1, 2) Kẹsena whọ vẹ gbaudu si oma no ogbẹrọwọ gbe iruẹru nọ i re lele iei. Who te ru ere, o rẹ sai mu owhẹ ẹro inọ Jihova o “ti dede [owhẹ] rehọ” jẹ thọ owhẹ. (2 Ahwo Kọrint 6:16-18) Wọhọ Jemis, whọ te ruẹ uzẹme eyaa nana nọ e rrọ Ebaibol na: “Odẹ ỌNOWO na họ uwou ukpehru; ohwo okiẹrẹe ọ tẹ dhẹ ruẹ ẹe ọ vẹ zọ.”—Itẹ 18:10.

[Oruvẹ-obotọ]

[Uwoho nọ o rrọ ẹwẹ-obe avọ 15]

“Korokoro”

[Ẹnọ i wo Uwoho]

Ọnọ ọ kẹ uvẹ uwoho na họ Dr. Bakshi Jehangir

[Uwoho nọ o rrọ ẹwẹ-obe avọ 15]

Ọmọtẹ nọ ọ be ha emu nọ o kiotọ evaọ okenọ ọ jẹ re emu re amọfa a gbẹ tọlọ ae ro ru oware uyoma ha