Kọ Ọghẹnẹ Ọ Ya Eyaa Efe kẹ Owhẹ?

‘Ọghẹnẹ ọ gwọlọ nọ who fe—wo imoto buobu, avọ ekọ nọ e be nyaharo. Thakpi fi ẹrọwọ họ iẹe ọvo, dhobọ họ ẹkpa, si obọ no oware kpobi nọ who wo kẹe.’

OBE-USI jọ evaọ Brazil o ta nọ itu egagọ jọ a be wha eriwo otiọye na haro evaọ ẹkwotọ yena. Ahwo buobu a jẹ eriwo otiọye na rehọ. Evaọ ọkiẹriwo nọ a jọ nọ ahwo nọ i se oma rai Ileleikristi evaọ America enọ, obe-usi nọ a re se Time o ta nọ: “Ahwo udhosa-gbọvo soso evaọ udevie udhusoi a rọwo inọ Ọghẹnẹ ọ gwọlọ nọ ahwo a fe. Ahwo ọgba-gbọvo evaọ udevie udhusoi . . . a rọwo nọ whọ tẹ rọ ugho ra kẹ Ọghẹnẹ, Ọ rẹ te rọ igho buobu ghale owhẹ.”

Eriwo otiọnana inọ a rẹ gọ Ọghẹnẹ yogbe he o da oria kpobi fia, maero evaọ erẹwho Latin-America wọhọ Brazil, yọ ahwo a bi su kpohọ ichọche nọ i bi wuhrẹ ahwo nọ Ọghẹnẹ ọ te rọ efe ghale ae. Kọ Ọghẹnẹ ọ ginẹ ya eyaa efe kẹ ahwo nọ a be gọe? Kọ idibo Ọghẹnẹ oke anwae kpobi a fe?

Uzẹme inọ evaọ Ikereakere Hibru na, eria buobu i dhesẹ nọ efe-iwo o re lele eghale Ọghẹnẹ. Wọhọ oriruo obe Iziewariẹ 8:18 o ta nọ: “Wha rẹ te kareghẹhọ ỌNOWO Ọghẹnẹ rai, keme ọye ọ kẹ owhai ogaga nọ wha ro wo efe na.” Onana o kẹ emọ Izrẹl imuẹro inọ a te yoẹme kẹ Ọghẹnẹ, ọ te rọ efe ghale orẹwho na.

Kọ ẹvẹ kpahe omomọvo? Job, ọzae nọ o wo ẹrọwọ na ọ jọ ọdafe ologbo, yọ okenọ Setan ọ raha efe riẹ kpobi no, Jihova o zihe ekuakua Job kẹe “akuava.” (Job 1:3; 42:10) Abraham ọ jọ ọdafe re. Emuhọ 13:2 o ta nọ o “fe hrọ eva uthuru erao, siliva gbe igoru.” Nọ egbaẹmo ivie ene erọ ofẹ ovatha-ọre a mu Lọt, ọmọ oniọvo Abraham, Abraham ‘o te su ahwo riẹ nọ o wuhrẹ, nọ a yẹ eva uwou riẹ, ahwo egba-esa gbe ikpegbere.’ (Emuhọ 14:14) Taure o te wo ‘ahwo nọ o wuhrẹ’ nọ e rẹ sai kpohọ ẹmo nọ i bu te egba-esa gbe ikpegbere na, u dhesẹ nọ uviuwou Abraham o jọ ruaro. Nọ ọ jẹ sae rẹrote uviuwou ulogbo utioye na, u dhesẹ nọ ọ jọ ọdafe nọ o wo ithuru erao buobu.

Ẹhẹ, ibuobu idibo Ọghẹnẹ evaọ oke anwae— Abraham, Aiziki, Jekọp, Devidi, Solomọn, gbe efa a fe. Kọ onana u dhesẹ nọ Ọghẹnẹ o re ru ohwo kpobi nọ ọ be gọe fe? Evaọ abọdekọ riẹ, nọ ohwo ọ tẹ rrọ oyogbere, kọ u dhesẹ nọ Ọghẹnẹ ọ ghale riẹ hẹ? Uzoẹme nọ o rrọ aro na o kẹ iyo enọ nana.