Kọ Ohwo O te Yogbe U Dhesẹ nọ O Wo Ọjẹrehọ Ọghẹnẹ Hẹ?

ỌGHẸNẸ ọ vuẹ orẹwho Izrẹl oke anwae nọ: “Oyogbere ọvo ọ rẹ jọ udevie rai hi.” Ọ ta onana keme evaọ Uzi nọ ọ kẹ rai, o ru ọruẹrẹfihotọ nọ a rẹ rọ rẹrote iyogbe jẹ tubẹ kpairoro vrẹ esa nọ a re. (Iziewariẹ 15:1-4, 7-10) Fikiere, ohwo ọvo ọ hae jọ udevie ahwo Izrẹl yogbe he keme Jihova ọ ya eyaa inọ ọ te ghale ae. Dedena, nọ a te koko Uzi na ọvo a re ro wo oghale yena tobọ, rekọ emọ Izrẹl a koko Uzi na ha.

Dedena, orọnikọ onana u dhesẹ nọ oyogbe yọ ohwo nọ Ọghẹnẹ o gbolo aro kẹ hẹ, wọhọ epanọ efe ọ nwane rrọ imuẹro oghale Ọghẹnẹ hẹ na. Idibo Ọghẹnẹ buobu nọ i wo ẹrọwọ a jọ iyogbe. Emọs ọruẹaro na o fe he, othuru-igodẹ gbe ọwhẹrẹ gheghe ọ jọ. (Emọs 1:1; 7:14) Nọ ohọo u je mu evaọ edẹ Elaeja ọruẹaro na, oria nọ Elaeja ọ jọ ruẹ emu re họ, uwou aye-uku oyogbe jọ nọ Ọghẹnẹ o ru emu riẹ vi nọ u ro te ai re evaọ etoke ohọo na. Elaeja hayo aye-uku na o zihe ruọ edafe he; umutho emu nọ u re te ae re ọvo Jihova ọ kẹ rae.—1 Ivie 17:8-16.

Eware nọ a rẹro rai hi e rẹ sai ru ahwo zihe ruọ iyogbe idudhe. Asidẹnte hayo ẹyao ọ sai bru ohwo abọ họ evaọ etoke jọ hayo ru nọ ohwo ọ gbẹ sai ru iruo vievie he. Yọ uwhu o sai kpe ọzae siọ aye gbe emọ ba. Eware iyoma itieye na e tẹ make via kẹ ohwo orọnikọ u dhesẹ nọ Ọghẹnẹ ọ be dheva kẹ ohwo na ha. Ikuigbe Naomi avọ Rut e kẹ oriruo epanọ Jihova ọ rẹ rọ rẹrote iwhrori. Dedenọ ọzae Naomi gbe ọrọ Rut nọ a whu se ae ba u ru eware bẹbẹ kẹ ae, Jihova Ọghẹnẹ ọ ghale rai jẹ gbẹ edhere nọ a ro wo ẹgwọlọ rai.—Rut 1:1-6; 2:2-12; 4:13-17.

O rrọ vevẹ, ohwo o te yogbe o nwani dhesẹ hẹ inọ o wo oghale Ọghẹnẹ hẹ. Ahwo nọ a fi ẹrọwọ họ Jihova Ọghẹnẹ a rẹ sai wo imuẹro kpahe ẹme Devidi ovie na inọ: “Mẹ jọ ọmaha, enẹna mẹ who uno; dede na mẹ te ruẹ okiẹrẹe nọ a se he, hayo kọ emọ riẹ e jẹ yare re a tẹ re he.”—Olezi 37:25.

[Uwoho nọ o rrọ ẹwẹ-obe avọ 8]

Dedenọ Naomi avọ Rut a jọ iyogbe yọ eware e jọ bẹbẹ kẹ ae, Ọghẹnẹ ọ ghale rai jẹ rẹrote ẹgwọlọ rai