Kọ Ugho Họ Oware nọ O rẹ Kẹ Uvi Evawere?

A YẸ Sonia evaọ Spain. Nọ ọ gbẹ jọ ọmaha, ọ jẹ hai lele oni riẹ kpohọ iwuhrẹ Isẹri Jihova. Rekọ nọ o te ohwo no, ọ tẹ kwa kpohọ London evaọ England, o te je ru iruo evaọ ẹko-iruo nọ o re fi obọ họ kẹ egọmeti hayo ekọmpene evaọ ẹruorote igho ekiọthuọ rai, onọ a re se bond broker.

Iruo na e were Sonia gaga. O je fi obọ họ kẹ ehreki riẹ rọ ẹro te igho gbidi gbidi, yọ ọ jẹ jọ iruo na wo ugho ziezi. Iruo na e jẹ kẹe evawere, yọ eware i je kiehọ kẹe ziezi. Sonia ọ jẹ hai ru iruo euwa ikpegberee kẹdẹ kẹdẹ, yọ ẹsejọ euwa ivẹ hayo esa ọvo ọ jẹ hae rọ wezẹ evaọ aso. Ọ rọ uzuazọ riẹ kpobi kẹ iruo na. Rekọ ẹsiẹvo na, ẹkẹ o te kurẹriẹ. Okie o kie Sonia—ẹsejọhọ fikiọ iruo egaga nọ o je ru na. Ikpe ọgba ọvo ọ jọ.

Okie na ọ rehọ abọvo oma riẹ, yọ u mu edọkita riẹ ẹro ho sọ Sonia ọ te gbẹ sae ta ẹme. O raha oke he, oni riẹ o te kpohọ England nyae rọ ẹro tei. Nọ oma Sonia o ga te epanọ ọ be sae rọ nya no, oni riẹ ọ tẹ ta kẹe inọ, “Me bi kpohọ ewuhrẹ, yọ who re lele omẹ nya keme mẹ sae nya siọ owhẹ ọvo ba uwou hu.” Sonia o te lele iei. Kọ eme o no rie ze?

Sonia ọ ta nọ: “Eware kpobi nọ me yo e wọhọ uzẹme. U gbunu kẹhẹ. Avọ evawere, mẹ tẹ rọwo kẹ omọvo jọ evaọ usu ahwo buobu nọ i yere omẹ ẹdẹ ọsosuọ nọ me ro kpohọ Ọgwa Uvie na inọ o wuhrẹ Ebaibol kugbe omẹ. Egbẹnyusu ọsosuọ mẹ a gbe weze bru omẹ ze viere he, rekọ egbẹnyusu nọ me wo enẹna a you omẹ jẹ rrọ sasasa.”

Ẹmẹrera na, Sonia ọ tẹ wariẹ mu ẹme họ ẹta, jẹ nyaharo ziezi evaọ uwuhrẹ Ebaibol riẹ. U te ẹgbukpe re ọ tẹ họ-ame he. Ibuobu egbẹnyusu ekpokpọ nọ ọ jọ ukoko na wo a je ru iruo usiuwoma ota oke-kpobi, yọ ọ ruẹ nọ a jẹ wereva ziezi. Sonia ọ tẹ jọ iroro riẹ be ta nọ: ‘Mẹ gwọlọ jọ ere re. Mẹ gwọlọ rọ ẹgba mẹ kpobi gọ Jihova Ọghẹnẹ!’ Enẹna, Sonia ọ rrọ ọtausiuwoma oke-kpobi.

Eme Sonia o wuhrẹ no oware nọ o via kẹe na ze? “Dede nọ me je wo ugho buobu, iruo na e jẹ whọlọ omẹ oma je fi ozọ gbe uduama họ omẹ oma, onọ u ru nọ me gbe je ro wo evawere he. Me vuhumu no inọ oware nọ o mai wuzou evaọ uzuazọ họ re me wo emamọ usu kugbe Ọsẹ obọ odhiwu mẹ, Jihova. Enẹna, me wo uvi evawere no.”

Pọl ukọ na o kere nọ: “Uyoyou kpahe igho oye họ owọ imuomu kpobi; fiki eguọlaguọlọ na oye o lẹliẹ otu jọ vru siọ orọwọ na ba a jẹ rehọ inwe buobu duwu eva rai.” (1 Timoti 6:10) Sonia ọ rẹ sae kẹ owhẹ imuẹro inọ ẹme yena ginọ uzẹme.