Kpahe Obaro Ohwo-Akpọ
Oware Nọ Ma Wuhrẹ Mi Jesu
Kpahe Obaro Ohwo-Akpọ
Kọ Jesu ọ ya eyaa uzuazọ obọ odhiwu kẹ ahwo?
Ee, ọ ya eyaa itieye! A kpare Jesu no uwhu ze, o te tovrẹ kpobọ odhiwu bru Ọsẹ riẹ. Rekọ taure oyena o tẹ te via, ọ ya eyaa kẹ ilele ikpegbọvo riẹ nọ i wo ẹrọwọ inọ: “Evaọ uwou Ọsẹ mẹ eria i re buobu . . . Mẹ be nya e ruẹrẹ eria kẹ owhai.” (Jọn 14:2) Dede na, umutho ahwo jọ ọvo a ti wo uvẹ-ọghọ nana. Jesu o ru onana vẹ okenọ ọ ta kẹ ilele riẹ inọ: “Wha dhẹ-ozọ họ, uthuru okakao, keme o were Ọsẹ rai nọ ọrẹ rehọ uvie na kẹ owhai.”—Luk 12:32.
Eme “uthuru okakao” na u ti ru evaọ obọ odhiwu?
Ọsẹ na ọ gwọlọ nọ utu okakao nana u lele Jesu su evaọ obọ odhiwu. Ẹvẹ ma rọ riẹ? Nọ a kpare iẹe kpohọ odhiwu no, Jesu ọ tẹ jọ eruẹaruẹ dhesẹ kẹ Jọn ukọ na inọ Ileleikristi jọ nọ i wo ẹrọwọ a te ‘re uvie akpọ na.’ (Eviavia 1:1; 5:9, 10) Onana yọ emamọ usi. Emamọ esuo yọ oware jọ nọ ohwo-akpọ ọ mae gwọlọ. Eme esuo Jesu o ti ru? Jesu ọ ta nọ: ‘Eva akpọ nọ tha nọ Ọmọ ohwo ọ te keria agbara uvie oruaro, whai enọ i lele omẹ, wha rẹ te keria egbara uvie kpogbivẹ.’ (Matiu 19:28) Esuo Jesu avọ ilele riẹ na u ti ru nọ evaọ “akpọ nọ tha” na, ohwo-akpọ ọ te rọ wariẹ wo uzuazọ ogbagba nọ Adamu avọ Ivi a reawere riẹ taure a tẹ te raha uzi.
Ẹruore vẹ Jesu ọ kẹ ahwo-akpọ nọ i kiọkọ?
Wo ohẹriẹ no Jesu nọ a ma kẹ uzuazọ obọ odhiwu, a ma ohwo-akpọ re ọ rria otọakpọ. (Olezi 115:16) Fikiere, Jesu ọ ta nọ: “Otọ wha nọ ze, ehru me nọ ze.” (Jọn 8:23) Jesu ọ ta kpahe emamọ uzuazọ nọ ahwo a te reawere riẹ evaọ otọakpọ. Ọ ta ẹdẹjọ nọ: “Ahwo nọ a te rọ oma kpotọ eva e were ae, keme arẹ te ria akpọ na.” (Matiu 5:5) Ọ jẹ rọ ere si iroro ahwo kpohọ eme olezi nọ a rọ ẹgba ẹzi Ọghẹnẹ kere na, nọ o ta nọ: “Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ. Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:11, 29.
Fikiere, orọnikọ “uthuru okakao” nọ u ti wo uzuazọ obọ odhiwu na ọvo a ti wo uzuazọ ebẹdẹ bẹdẹ hẹ. Jesu ọ ta inọ ima ahwo gbidigbidi a wo ẹruore uzuazọ evaọ otọakpọ. Ọ ta nọ: ‘Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.’—Jọn 3:16.
Ẹvẹ Ọghẹnẹ o ti ro si uye-oruẹ no kẹ ahwo-akpọ?
Jesu ọ ta kpahe eko ahwo ivẹ jọ nọ e be wha uye-oruẹ ze nọ Ọghẹnẹ o ti si no okenọ ọ ta nọ: “Whaọ okenọ a re ro bruoziẹ akpọ na u te no; enẹna a ti le ọgba [hayo, osu] akpọ na no.” (Jọn 12:31) Orọ ọsosuọ, a te rọ ahwo oyoma kpobi nọ e be wha uye-oruẹ ze guẹdhọ, a vẹ te raha ae kufiẹ. Orọ avivẹ, a te raha osu akpọ na Setan no, o gbe ti su ahwo-akpọ thọ ofa ha.
Kọ ẹruore vẹ ọ rrọ kẹ ahwo nọ uvẹ u rovie kẹ hẹ nọ a re ro wuhrẹ kpahe je fi ẹrọwọ họ Ọghẹnẹ gbe Jesu? Jesu ọ ta kẹ orumuomu jọ nọ a kare kẹle iẹe nọ o te uwhu no inọ: “Who re ti lele omẹ jọ obọ Paradais.” (Luk 23:43) Jesu ọ te kpare orumuomu yena gbe amọfa gbidigbidi ziọ aparadase otọakpọ, o ve ti wo uvẹ nọ o ti ro wuhrẹ kpahe Ọghẹnẹ. O ti wo uvẹ-ọghọ nọ ọ sae rọ jọ usu ahwo ikiẹrẹe gbe enọ e rọ oma kpotọ, enọ i ti wo uzuazọ ebẹdẹ bẹdẹ evaọ otọakpọ.—Iruẹru Ikọ Na 24:15
Rọkẹ evuẹ efa, rri uzou avọ 3 gbe orọ avọ 7 evaọ obe na Eme Ebaibol na O Gine Wuhrẹ? *
[Oruvẹ-obotọ]
^ edhe-ẹme 13 Onọ Isẹri Jihova a kere.
[Uwoho nọ o rrọ ẹwẹ-obe avọ 19]
“Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:29