Ileta nọ I No Obọ Bolivia Ze

O Wo Evawere gbe Ẹruore Ghelọ Uvuhu

WỌHỌ imishọnare evaọ orẹwho nọ akpọ ọ jọ lọhọ tere he, kẹse kẹse oma u re ririe omẹ nọ mẹ be ruẹ uvuhu gbe ọbẹwẹ nọ ọ rrọ ahwo oma. Dodokọ ohwo jọ ọ rẹ sai si ai no oja nana nẹnẹ-gb’odẹ. Rekọ mẹ riẹ nọ Uvie Ọghẹnẹ ọvo o te sai ku ebẹbẹ nana họ. Dedena, mẹ rọ ẹro ruẹ unuẹse buobu no epanọ ahwo nọ a lele Ẹme Ọghẹnẹ a sai ro wo evawere no ghelọ ebẹbẹ uzuazọ. Sabina yọ omọvo rai jọ.

Ikpe buobu nọ i kpemu, Sabina avọ emetẹ esese ivẹ riẹ nọ ọ wọ họ igbama, o je rri ọzae riẹ nọ ọ be ruọ omoto re o kpohọ orẹwho ofa nyae gwọlọ iruo nọ ugho u re no ze ziezi. Nọ oke o be nya na, ọ tẹ jẹ hẹrẹ, emera buobu e vrẹ, ikpe e vrẹ, rekọ ọzae na o zihe ze viere he. Anwẹnọ ọzae na ọ rọ nya se ae ba na, kẹdẹ kẹdẹ Sabina ọ be rọ akọ kpena re ọ sae ko unu riẹ avọ emetẹ ivẹ riẹ, Milena avọ Ghelian.

Oke ọsosuọ nọ mẹ rọ nyaku Sabina họ uvo ẹdẹjọ nọ ọ jẹ rọ oma totọ be zẹ eware kẹ ahwo nọ a bi sei kiti kiti evaọ uwou-eki oniọvo riẹ. Mẹ ruẹ inọ okikpo na soso Sabina o bi ru iruo keme ovao riẹ u dhesẹ ohwo nọ oma o whọlọ no. Mẹ tẹ ta kẹe inọ mẹ gwọlọ wuhrẹ Ebaibol kugbei avọ emọ riẹ. Ọ ta nọ: “O hae were omẹ, rekọ iruo i bu omẹ abọ hrọ. Dedena, o te were omẹ re who wuhrẹ emetẹ mẹ.” Mẹ tẹ rọwo. Nọ uwuhrẹ emọ na o be nyaharo na, mẹ tẹ te riẹ Sabina ziezi, jẹ riẹ oja nọ ọ be re.

Ighọjọ ene ohiohiẹ Sabina ọ rẹ rọ kpama. Nọ emetẹ riẹ e gbẹ rrọ owezẹ evaọ ubrukpẹ ovo nọ a be rria na, Sabina o re koko erae họ otọ ẹbẹro ologbo riẹ nọ o kri no. O ve there arao nọ o ti fihọ eva ebọnso nọ ọ rẹ fra zẹ rọ ko uviuwou riẹ. Sabina ọ rẹ gua iwuu-eka nọ o ti ro ru ebọnso na kpahotọ aso hẹrioke.

Sabina ọ rẹ rọ oma totọ kwa ekwakwa eki riẹ—asasa ologbo, istovu unu-ovo, ololo ekrasi, emẹjẹ, ekpala, ebẹro, ewhri, arao nọ ọ ja no, iwuu-eka, gbe egalọno udi nọ a rọ ibi-ure ru, ọ vẹ wọ ae kpobi fihọ iwhibairo nọ o mi ohwo.

Oma ighọjọ ezeza yọ Sabina avọ emetẹ ivẹ a wọ no. A vẹ kare ẹthẹ rai. A vẹ ruọ edhere avọ ovao nọ a sihọ; ababọ ẹme nọ a rẹ ta hayo ehwẹ. Epanọ a te rọ zẹ eki ẹdẹ yena ọvo iroro rai e rẹ jọ. Unuẹse buobu mẹ rẹ jọ unwido uwou imishọnare mai ruẹ ahwo nọ a bi no uwou irioke oghẹrẹ utiona. Ẹhẹ, Sabina yọ omọvo evaọ usu eyae buobu nọ i re no uwou irioke frifri nyae zẹ emu gbe idi evaọ iyẹrẹ Bolivia.

 Oma ighọjọ ezeza-gbabọ, nọ elo ọre ohiohiẹ ọ be roma via evaọ ehru ugbehru na, yọ Sabina avọ emetẹ riẹ a te oria nọ a rẹ jọ zẹ eki rai no. Ababọ ẹme nọ a rẹ ta kẹ ohwohwo, a vẹ wọ ekwakwa na họ otọ, jẹ ruẹrẹ ae họ wọhọ ikichini. A ve fi ebọnso ọsosuọ họ ewhri nọ o bi kweri na, u ve do shẹrẹrẹrẹ. Ore awere na o vẹ da oria na kpobi fia, onọ u re se ahwo nọ ohọo u bi kpe ze te dẹ.

Sabina ọ vẹ nọ ohwo ọsosuọ nọ ọ nya ze te dẹ inọ: “Bro?” Ababọ ovao nọ ọ rẹ kpare, ọzae nọ owezẹ o gbẹ rrọ aro na ọ vẹ riẹ iziabọ ivẹ, Sabina ọ vẹ kẹe ebọnso eroro ivẹ. O ve mi umugho na họ obọ. Enenẹ ọvo bẹsenọ a rẹ zẹ re. A tẹ zẹ orọ urere no, a vẹ kwa ewha rai ruọ edhere bi kpo. Dedenọ awọ ọ rrọ Sabina no fiki iruo anwọ irioke na, ọ rẹ rọ ovao rri okọ avivẹ riẹ evaọ obọ uwou-eki oniọvo riẹ.

Nọ me bru rai kpobọ uwou-eki oniọvo riẹ nyai ru uwuhrẹ Ebaibol ọsosuọ kugbe emọ na, a ruẹrẹ ekpala ivẹ họ ubiozọ jọ jẹ hẹrẹ. No emuhọ uwuhrẹ na ze, Milena nọ ọ jọ ikpe 9 avọ Ghelian nọ ọ jọ ikpe 7, a jẹ hae rọ ọwhọ rẹro uwuhrẹ na, yọ a jẹ hae ruẹrẹ oma kpahe ziezi. Ẹmẹrera na, emetẹ nana nọ e jẹ hae vuoma vẹre na a te muọ oma họ ẹsasa je ru omẹ họ ogbẹnyusu rai. Onana u duobọte udu Sabina gaga. U kri hi, ọ tẹ ta kẹ omẹ inọ dede nọ iruo i bu rie abọ, ọ gwọlọ nọ me wuhrẹ Ebaibol kugbei re.

Nọ eriariẹ Sabina e be rro haro na, uyoyou riẹ kẹ Jihova Ọghẹnẹ o tẹ jẹ ga re. O te ti mu oware okpokpọ jọ họ ẹruẹ evaọ uzuazọ riẹ—evawere! Aye nana nọ ọ rẹ jọ iyẹrẹ zẹ eware nọ oma o rẹ rrọ ẹsikpobi yọ ọ rẹ hwẹ hẹ na, o nwene no. O bi dikihẹ kpọvi ziezi enẹna, jẹ kpare ovao, yọ ovao riẹ o rrọ sasasa. Oniọvo riẹ ọ ta nọ: “Sabina ọ be hwẹ ẹsikpobi enẹna. Ọ jẹ hae hwẹ vẹre he.” Amọfa a jọ oma Sabina avọ emetẹ riẹ ruẹ enwene ologbo no re. Sabina o wo oware jọ nọ o kare riẹ anwẹdẹ tobọ no—uzẹme kpahe Ọghẹnẹ gbe ẹjiroro Riẹ.

Uwuhrẹ na o jẹ were Sabina oma, rekọ fikiọ iruo nọ e vọ riẹ abọ, ọ jẹ sai kpohọ iwuhrẹ Ileleikristi hi. Uwhremu na ọ tẹ te ziọ ewuhrẹ evaọ Ọgwa Uvie ẹdẹjọ. No umuo oyena ze, ọ re siọ ewuhrẹ ba ẹdọvo ho. Sabina ọ jọ ukoko na wo uvi egbẹnyusu no. Ọ ruẹ no re inọ Jihova o re fi obọ họ kẹ ahwo nọ i you Rie je bi ru oware kpobi re a sae gọe.—Luk 12:22-24; 1 Timoti 6:8.

Eware nọ Sabina o je wuhrẹ na e were riẹ oma, yọ o jọ isiuru riẹ re ọ vuẹ amọfa. Rekọ ọ ta nọ, “Udu o be hai bru omẹ oke kpobi nọ me te roro te usiuwoma ota ẹgbede.” Ọ jẹ hai roro evaọ udu riẹ inọ, ‘Ẹvẹ mẹ nana nọ ọ dhomovuọ viere na, nọ o kpohọ isukulu tere he na, mẹ te sai ro wuhrẹ omọfa?’ Dedena, ẹwo nọ a dhesẹ kẹe evaọ ukoko na gbe enwene ologbo nọ eware nọ o wuhrẹ e wha sei no, o wọ riẹ jowọ usiuwoma ota. Ọ tẹ jẹ ruẹ inọ emetẹ riẹ a bi fi ẹro họ ọyomariẹ wọhọ oriruo nọ a rẹ raro kele. Fikiere o te mu usiuwoma họ ẹta kẹ amọfa. Emetẹ riẹ a tẹ rọ ọwhọ kuomagbei.

Nẹnẹ, Sabina ọ gbẹ nwane wọhọ eyae efa nọ uvuhu u bi kpe nọ i bi ruiruo okikpo ababọ evawere he. Orọnikọ o bi wo okpugho enẹna ha. Oware nọ u nwene họ, eriwo riẹ kpahe uzuazọ. Wọhọ Oleleikristi nọ ọ họ-ame no, Sabina ọ be vuẹ amọfa usiuwoma Uvie Ọghẹnẹ—oware ovo nọ o rrọ ifue ebẹdẹ bẹdẹ kẹ uvuhu gbe ebẹbẹ akpọ na kpobi.—Matiu 6:10.

Ighọjọ isoi ohiohiẹ i te no, Sabina ọ be te jẹ riọ no uwou. Rekọ orọnọ ebọnso ọ be nyae zẹ irioke nana ha. Ọ be nyai kuomagbe ibe Ileleikristi riẹ re a gbe kpohọ usiuwoma ota evaọ iyẹrẹ. Oke riẹ jọ nọ ọ be raha koka koka ro wuhrẹ amọfa u fiba evawere riẹ no. Ọ tẹ kare ẹthẹ riẹ, jẹ ruọ edhere avọ ovao ohwohwẹ. Ukpọ iwhibairo, kọ ẹkpa ọ wọ. Eware nọ e rrọ ẹkpa na họ Ebaibol riẹ gbe ebe nọ a kere no Ebaibol ze nọ ọ rẹ rọ ta usi uwoma ẹruore kẹ amọfa. Avọ ohwẹ nọ o kpe kuagba, Sabina ọ ta nọ, “Mẹ wezẹ ewezẹ riẹ ẹdọvo ho inọ mẹ te sae vuẹ amọfa kpahe Ebaibol na.” O fibae nọ, “O were omẹ kẹhẹ!”