Si Kẹle Ọghẹnẹ

Obruoziẹ nọ O Dikihẹ Ga kẹ Oware nọ U Kiehọ

Ikelakele 20:2-13

IBRUOZIẸ ahwo-akpọ a rẹ sai bruoziẹ ọriẹwẹ hayo okienyẹ, rekọ Jihova Ọghẹnẹ—ọnọ o “you oziẹokiẹrẹe” na ọ rrọ ere he. (Olezi 37:28) Dede nọ o wo odiri, o re rolobọ kẹ eyoma ha. O re dikihẹ ga kẹ oware nọ u kiehọ. Roro kpahe oware nọ o ru okenọ ẹwhọ gbe ọkparesuọ ọ romavia, wọhọ epanọ o rrọ Ikelakele uzou avọ 20.

Nọ emọ Izrẹl a kẹle ekuhọ onya rai evaọ udhude na no, ame ọ jariẹ nọ a rẹ da ha. * A te je lele Mosis avọ Erọn whọ, anọ: “Emejabọ nọ whọ jẹ rehọ ogbotu ỌNOWO na ze eva igbrẹwọ nana, re ma whu evaọ etenẹ, mai jegbe uthuru mai?” (Owọ avọ 4) A gu unoma inọ igbrẹwọ na yọ “oria uyoma,” nọ u wo “fig, hayo okakọ, hayo pọmegranet” hi—ubiure nọ ekiotọ na a wha no Ẹkwotọ Eyaa na ze ikpe jọ nọ i kpemu na—a te je gu unoma inọ “ame ọda ọ gbẹ jẹ riẹe he.” (Owọ avọ 5; Ikelakele 13:23) Koyehọ a be fo Mosis avọ Erọn keme udhude na o wọhọ ẹkwotọ owoma na ha, onọ oge nọ o kpemu ọ sae ro ho fikiọ eguago rai!

Jihova ọ siọ otu nọ o gu unoma na ha. Ukpoye, ọ vuẹ Mosis nọ o ru eware esa jọ: ọ rehọ ọkpọ riẹ, koko ahwo na họ, jẹ “ta kẹ utho nọ o rọ aro rai re ọ rehọ ame riẹ ze.” (Owọ avọ 8) Mosis o yoẹme evaọ eware ivẹ ọsosuọ na, rekọ o yoẹme evaọ orọ avesa na ha. Ukpenọ ọ ta ẹme kẹ utho na evaọ oghẹrẹ nọ u re dhesẹ nọ obọ Jihova ame na o bi no ze, ọ tẹ rọ ofu ta ẹme kẹ ahwo na, inọ: “Wha yo, whai itu ọkparesuọ; kọ ma sai si ame no utho onana kẹ owhai?” (Owọ avọ 10; Olezi 106:32, 33) Mosis ọ tẹ rọ ọkpọ fa utho na isiava, “ame o te hwẹ ze buobu.”—Owọ avọ 11.

Enẹ Mosis avọ Erọn a rọ thọ uzi ulogbo. Ọghẹnẹ ọ ta kẹ ae nọ, “Who muofu kpahe ujaje mẹ.” (Ikelakele 20:24) Ẹkwoma aghẹmeeyo yena, Mosis avọ Erọn a te zihe ruọ ahwo ọkparesuọ—oware nọ ae omarai a rọ fiki riẹ fo ahwo na. Ẹdhoguo Ọghẹnẹ ọ rrọ vevẹ: Mosis avọ Erọn a ti su orẹwho Izrẹl ruọ Ẹkwotọ Eyaa na ha. Kọ obrukpe na ọ ga hrọ? Ijo, u wo oware nọ o soriẹ ze.

Orọ ọsosuọ, Ọghẹnẹ o vi Mosis nọ ọ ta ẹme kẹ ahwo na ha, kabikọ re o se ai itu imuofu hayo ahwo ọkparesuọ. Orọ avivẹ, Mosis avọ Erọn a kẹ Ọghẹnẹ oruaro ho. Ọghẹnẹ ọ ta kẹ ae nọ: ‘Wha ru omẹ fo ho.’ (Owọ avọ 12) Ẹkwoma ẹme nọ Mosis ọ ta inọ, ‘ma sai si ame no utho onana ze kẹ owhai,’ koyehọ ọ be ta nọ ọyomariẹ avọ Erọn họ ahwo nọ a rọ edhere igbunu kẹ ahwo na ame, orọnikọ Ọghẹnẹ hẹ. Orọ avesa, obrukpe na ọ rọwo kugbe oghẹrẹ nọ Ọghẹnẹ o bruoziẹ amọfa no vẹre. Ọghẹnẹ ọ kẹ oge ọkparesuọ ọsosuọ na uvẹ ruọ ẹkwotọ Kenan he, yọ ere ọvona o ru Mosis avọ Erọn. (Ikelakele 14:22, 23) Orọ avene, Mosis avọ Erọn a jọ isu kẹ ahwo Izrẹl. Ahwo nọ a mu iruo buobu hobọ, epọvo na Ọghẹnẹ ọ te nekpẹ ibuobu mi ae re.—Luk 12:48.

Jihova o re dikihẹ ga kẹ oware nọ u kiehọ. Fikinọ o you oziẹokiẹrẹe, ọ rẹ sai bruoziẹ ọriẹwẹ hayo okienyẹ hẹ. Ẹhẹ, Obruoziẹ otioye na o te ọnọ ma rẹ kẹ adhẹẹ je fi eva họ.

[Oruvẹ-obotọ]