Ẹbẹbẹ Akpọ-soso, O Gwọlọ Ifue Akpọ-Soso

UYE-ORUẸ o da oria kpobi fia, yọ ohrọ o be wọ ahwo buobu fi obọ họ kẹ enọ u te oma. Wọhọ oriruo, ahwo usiwo-imu a bi ru iruo t’aso t’uvo re a ruẹse rẹrote enọ e nwoma hayo nọ e be mọ. Ahwo nọ i re furie erae, iporisi, eriẹ-izi, gbe otu ẹko-iruo ogbodhẹ a rẹ gwọlọ ru oma vori enọ e rrọ uye hayo tubẹ whaha okpẹtu. Omodawọ utioye na u bi fi obọ họ ru uye-oruẹ ahwo jọ kpotọ, dedena ohwo hayo ukoko ovo nọ o rẹ sai si uye-oruẹ akpọ na soso no ọ riẹ hẹ. Rekọ Ọghẹnẹ o wo ogaga nọ o re ro ru ere, yọ o ti ku ebẹbẹ akpọ-soso họ.

Obe urere Ebaibol na o kẹ omai imuẹro nana: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” (Eviavia 21:4) Ahwo gbidi gbidi a ti wo erere no eyaa yena ze. U dhesẹ ẹjiroro Ọghẹnẹ nọ o ti ro ku uye-oruẹ kpobi họ. O ti ru oyena ẹkwoma ẹmo, ohọwo, ẹyao, okienyẹ, gbe irumuomu nọ o ti si no akpọ na  riẹriẹriẹ. Ohwo-akpọ ọvo nọ ọ sai ru oyena ọ riẹ hẹ.

Oware nọ Uvie Ọghẹnẹ U ti Ru

Ọghẹnẹ ọ te rọ ẹkwoma Jesu Kristi nọ o whu jẹ kparoma no na, ọnọ ọ rrọ ohwo avivẹ nọ ọ mai wo ogaga evaọ ehrugbakpọ na ro ru eyaa Riẹ gba. Oke o be tha nọ esuo Jesu evaọ obọ odhiwu u ti ro te otọakpọ na soso ababọ ohwo jọ nọ ọ te wọso ẹe. Esuo ahwo-akpọ ọ te gbẹ jọ ofa ha. Ukpoye, otọakpọ na soso u ti wo Ovie ọvo gbe egọmeti ọvo—Uvie Ọghẹnẹ.

Uvie yena o te raha egọmeti ahwo-akpọ kpobi no. Ebaibol na e ruẹaro onana kri no inọ: “Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.” (Daniẹl 2:44) Ahwo-akpọ kpobi a te jọ okugbe evaọ otọ esuo egọmeti okiẹrẹe ọvo—Uvie Ọghẹnẹ.

Okenọ Jesu ọ jọ otọakpọ, ọ ta ẹme kpahe Uvie yena ẹsibuobu. Ọ fodẹ Uvie na evaọ olẹ oriruo na, onọ o jo wuhrẹ ilele riẹ nọ a lẹ inọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:10) Muẹrohọ nọ Jesu o dhesẹ inọ Uvie na u wobọ kugbe erugba oreva Ọghẹnẹ evaọ otọakpọ na, yọ o rrọ oreva Ọghẹnẹ re O si uye-oruẹ kpobi no otọakpọ na.

Esuo okiẹrẹe Ọghẹnẹ ọ te wha eghale buobu ze, enọ esuo ohwo-akpọ ọvo ọ rẹ sae kẹ hẹ. Kareghẹhọ inọ Jihova ọ rehọ Ọmọ riẹ kẹ wọhọ ẹtanigbo, re ahwo-akpọ a sai wo uzuazọ ebẹdẹ bẹdẹ. Evaọ otọ esuo okiẹrẹe yena, ahwo a te rọ ẹmẹrera te ẹgbagba. Eme o ti noi ze? Jihova ọ te “lọ uwhu no ri bẹdẹ, Ọnowo na ỌGHẸNẸ o veti ririe irui oviẹ no aro rai.”—Aizaya 25:8.

Ahwo jọ a rẹ sae nọ inọ: ‘Kọ fikieme Ọghẹnẹ ọ gbẹ re jowọ nana anwẹdẹ hẹ? Eme ọ be hẹrẹ?’ Jihova ọ hẹ sai si uye-oruẹ kpobi n’otọ hayo tubẹ whaha iẹe anwẹdẹ. Ukpoye, ọ gbẹ kẹ uye-oruẹ uvẹ, orọnikọ fiki ẹjiroro oriobọ jọ họ rekọ fiki ewoma ibẹdẹ bẹdẹ ọrọ ahwo-akpọ, emọ riẹ. Ọsẹgboni oyoyou a rẹ kẹ ọmọ rai uvẹ ruẹ uye nọ a tẹ riẹ inọ onana o te wha erere nọ ọ rẹ tọ se ọmọ na evaọ ukuhọ riẹ. Epọvo na re, u wo ẹjiroro nọ Jihova ọ rọ kẹ ahwo-akpọ uvẹ re a ruẹ uye evaọ umutho oke, yọ Ebaibol na i ru onana vẹ. Ẹjiroro nana o wobọ kugbe ufuoma ẹsalọ nọ ma rẹ rọ salọ onọ u je omai, omarọvia uzioraha, gbe ẹme-avro kpahe udu nọ Jihova o re ro su. Ebaibol na e tẹ jẹ ta inọ a kẹ ukọ omuomu jọ uvẹ umutho oke jọ re o su akpọ na. *

Dedenọ ma sae jọ etenẹ r’obọ kotọ ta ẹme kpahe eware nana ha, eware ivẹ jọ e riẹ nọ e rẹ sae bọ omai ga jẹ kẹ omai ẹruore. Orọ ọsosuọ ona: Jihova ọ te ghale omai te epanọ ma te gbẹ rọ kareghẹhọ uye-oruẹ kpobi nọ ma rọ ẹro ruẹ no ho. Ọghẹnẹ ọ kẹ omai imuẹro inọ: “A gbẹ te kareghẹhọ eware anwae he hayo a gbe ti roro ai hi.” (Aizaya 65:17) Ọghẹnẹ o ti si edada gbe uye-oruẹ nọ e rrọ akpọ na no bẹdẹ bẹdẹ, enọ e romavia fiki emuemu nọ ọ kẹ uvẹ riẹ evaọ umutho oke na.

Oware avivẹ ona: Ọghẹnẹ o fi oke họ no nọ o ti ro ku uye-oruẹ họ, yọ ohwo ọvo ọ rẹ sai nwene iei hi. Kareghẹhọ inọ Habakuk ọruẹaro na ọ nọ Jihova kpahe epanọ ọ te kuvẹ ozighi gbe eyoma krite. Jihova ọ kẹ riẹ uyo nọ: “Eruaruẹ na e be hẹrẹ oke rai . . . Ọ te raha oke he.” (Habakuk 2:3) Wọhọ epanọ ma te jọ uzoẹme nọ o rrọ aro ruẹ na, “oke” yena o kẹle no.

[Oruvẹ-obotọ]

 [Ẹkpẹti nọ ọ rrọ ẹwẹ-obe avọ 7]

Ikereakere nọ E Kẹ Ẹruore Kpahe Obaro

ẸMO Ọ GBẸ TE JỌ HỌ:

“Nyaze who ri iruo ỌNOWO na . . . Ọye o ru akpọ na kpobi nọ ẹmo o je serihọ ri te oka akpọ!”—Olezi 46:8, 9.

IYOYOU MAI NỌ I WHU E TE KPAROMA:

“Ẹkparomatha enọ ikiete avọ enọ ikiete he e rẹ te jarọ.”—Iruẹru Ikọ Na 24:15.

EMU Ọ TE DAFIA:

“Ibi i [ti] vihọ eva otọ na!”—Olezi 72:16.

ẸYAO Ọ GBẸ TE JỌ HỌ:

“Ohwo ọvo nọ ọ be ria eva [akpọ na] nọ ọ rẹte ta no, ‘Mẹ be mọ,’ ọ rọ họ.” —Aizaya 33:24.

A TE RAHA AHWO OMUOMU NO:

“A re ti kpe ahwo omuomu no otọ na, gbe ahwo [ẹgwae] omuomu a re ti si ai no otọ na.”—Itẹ 2:22.

UVIOZIẸ O TE JỌ ORIA KPOBI:

“Ri ovie [Kristi Jesu] o reti suẹ avọ ẹrẹreokie, gbe emọ-ivie i ve ti guẹdhọ uzẹme.” —Aizaya 32:1.

[Iwoho nọ e rrọ ẹwẹ-obe avọ 7]

Uvie Ọghẹnẹ u ti si uye-oruẹ kpobi nọ u te omai no